¿Bʉa Daizeze Bedʼeade nãã wiña kʼawuadaba bʉra idibasidu kʼarebaseabʉka?

1. ¿Bʉra Daizeze Bedʼea kʼãwũã kʼawua jʉ̃drʉdadeba sãwũã kʼarebasi?

NAWEDA kʼawũã Daizeze Bedʼea akʉ jʉ̃drʉdadeba nekʼãrẽ mejãcha kʼawuasi. Bari jaradaita, kʼawuasi Daizeze trʉ̃ kʼaita, mawũã Daizeze neũdukʼawua basi (Is. 42:8). Akʉza kʼawuasi beida tẽãra zʉbʉria ẽãta (Ecl. 9:10). Adewara dayirãba kʼawuaside Daizezeba naʉ̃ drʉa ẽjʉ̃ã kĩrãwãreã babita maʉ̃ kʼarea krĩcha zroma o ẽ basi ũra zeide kʼãrẽ berabarita adewara kʼawuasi dayirãra ba ẽ baita 70 mawũã ẽ bʉrʉ 80 poaga pai awuarabʉrʉ ewari jõmaʉ̃nẽ zokʼai baita (Sal. 37:29; 90:10).

2. ¿Pedrobara kʼãrẽa jẽda kĩrãbebisi mebẽrã kʼẽrẽpa badararã ãya naweda Daizeze Bedʼea ʉ̃rʉ kʼawuada ʉ̃rʉ? ( 2 Pedro 1:​12, 13).

² Dayirãba Daizeze Bedʼea naweda kʼawuadara kʼãrẽ ẽ kĩrãkʼa akʉ ẽ baibara. Apostol Pedroba maʉ̃ segunda karta bʉsidera jarasi kristianora wãrĩnuta ĩjãpanasita (akʉra 2 Pedro 1:​12, 13). Mamina maʉ̃ ewari basidera maʉ̃ra kongregasionera basi ẽbẽrara Jeowa odeba jĩgababikĩrãbadata, maʉ̃ba Pedrobara mebẽrã kongregasionebemata so zarea diakĩrãbasi ãya jẽda kĩrãbebibaside ãya naweda kʼãrẽ kʼawuadata Daizeze Bedʼeadeba, mawũã ẽbẽrarã maʉ̃ra kongregasionebʉʼa yi sewabi ẽ bamarẽã ãya. Mawũã naweda Daizeze Bedʼea ʉ̃rʉ kʼawuadaba kʼarebaseabasi Jeowaʉ̃me kʼẽrẽpa baita (2 Ped. 2:​1-3).

3. ¿Kʼãrẽa kristianorabara ãya naweda Daizeze Bedʼeade kʼawuadata krĩchaseabʉ? Yiza aba jara ũrĩbira.

³ Dayirã Daizeze odebʉta dããrabamina Daizeze Bedʼeadeba nekʼãrẽ nãã kʼawuabadata audre kʼawua wãseabʉ. Bari jaradaita, krĩchadadrʉ yi ẽbẽra neo kʼawuabʉta akʉza yi neobe ẽ ʉ̃me, ãya iyabaʉ ne warra zokʼaimina yi audre neo kʼawuabʉbara maʉ̃ra ne warrara bia zokʼa kʼau akʉza maʉ̃bara yikora audre warra biayi iyabaʉ ne warra zokʼaimina. Maʉ̃ kĩrãkʼabʉ ẽbẽrarã Jeowa ode kikibarirata akʉza yi ʉ̃rabʉrʉ Jeowa o eda wãnata, mebẽrã Jeowa ode kikibarirabara nekʼãrẽ mejãcha kʼawuaseabʉ Daizeze Bedʼeadeba akʉza nekʼãrẽ yiwidʼita. Dayi buru kʼoedadeba ʉ̃ta nekʼãrẽ mejãcha ũduzebʉrʉ dayi bebʉde akʉza kongregasione nekʼãrẽ mejãcha ozebʉrʉ maʉ̃ba daya krĩchabʉrʉde nãã Daizeze Bedʼeaba dayi sãwũã kʼarebadaba idi ewadebida kĩrã awuara kʼarebaseabʉ. Maʉ̃ audre kʼawuadaita akʉdaya nekʼãrẽ ũbea Daizeze Bedʼeaba jaradiabʉta akʉza Jeowa ode kikibarirabida kʼãrẽta kʼawuaseabʉta maʉ̃ra ũbeadeba.

JEOWARA NAɄ̃ DRɄA PARÃNA

4. ¿Kʼãrẽta kʼawuaseapanʉ kʼawũã Jeowaba dayirã parãnaneba?

⁴ Dayirã jõmaʉ̃ba kʼawuapanʉ naʉ̃ drʉa parãnara jipa buru biata akʉza zarea mejãcha barabʉta, Daizeze Bedʼeaba jarabʉ: «Nekʼãrẽ jõma bʉra Daizezeba parãna» (Heb. 3:4). Maʉ̃neba nekʼãrẽ mejãcha kʼawuaseabʉ. Bari jaraita, Daizezebara dayirãra mejãcha krĩchabʉ, iya kʼawuabʉ kʼãrẽta yibiata dayirãitara akʉza iya dayirãra bia ũdukʼawuabʉ, iya dayirãra parãsi baera, ¿kʼãrẽta kʼawuaseapanʉ kʼawũã Jeowaba dayirã parãnaneba? Kʼawuabʉ kʼãrẽa bʉta dayirã naʉ̃ drʉade akʉza nekʼãrẽ oibarata maʉ̃ kʼarea.

5. ¿Kʼãrẽba kʼarebabʉ edabʉta krĩchaita? (Isaías 45:​9-12).

⁵ Kʼawuapanʉne Jeowaba kʼãwũã dayirã parãnata maʉ̃ba kʼarebabʉ eda krĩchaita. Bari jaradaita, dããraba Jobʼbara Jeowa ʉ̃rʉ aña jarabarisi akʉza iyitrʉ abapai krĩchabasi Jobʼra adewara kãgabasi wuabemara ẽbẽrarãba ĩjãnamarẽã iya jarabʉta mamina maʉ̃ne Jeowaba kĩrãbebisi Jobʼa iyira naʉ̃ drʉa parãnata (Job 38:​1-4). Jeowaba Jobʼa maʉ̃ bedʼea jaradadeba Jobʼbara kĩrãbesi Jeowabara baldu yumakẽrãira audre bia kʼawuabʉta, maʉ̃ kʼarea propeta Isaíasba bʉbarisi ẽbẽrarãbara jipa krĩchada ẽ bʼaibara ãyira audre buru biata ãyi parãnaira (akʉra Isaías 45:​9-12).

6. ¿Kʼairaba jẽda kĩrãbeseabʉ Jeowara naʉ̃ drʉa parãnata akʉza kʼãrẽa? (Akʉra potorata).

⁶ Ẽbẽrã abaʉba Jeowa ode kikibariba edaʉde krĩchaseabʉ iyara nekʼãrẽ mejãcha kʼawuabʉta Daizeze ode kikibari baera, maʉ̃ba iyara Jeowa ũrãgʼa jʉrʉi kʼaude iyi krĩchamabʉta jidaseabʉ (Job 37:​23, 24). Mamina kʼãrẽta berabariseabʉ ẽbẽra abaʉba krĩchabʉbʉrʉ Jeowa krĩchata audre yi zromata iya parãna baera. Iyara kʼawuayi Jeowa krĩchatrʉ audre yi zromata iyi krĩchaira maʉ̃ba kʼarebayi iyi eda krĩchabaita (Is. 40:22; 55:​8, 9).

7. ¿Organizasionba nekʼãrẽ awuara ojarasidadera Rahelabara kʼãrẽta osi maʉ̃ ʉ̃rʉ ĩjãita?

⁷ Mebẽã aba Rahela Eslovenianebemaba, iya krĩchabʉba Jeowara naʉ̃ drʉa parãnata kʼarebabʉ organizasione nekʼãrẽ awuara obʉdade ĩjãita. Iya jarabʉ: «Edaude mʉ̃itara zare organizasionba nekʼãrẽ jarabʉrʉ yiwidi ũrĩta. Bari jaraita, mʉ̃a ũdusi bideo 2023de Bedʼea jarabʉta 8, Zõrãrã Burubiaba mama eda jarabasi yumakẽrãrabara ikarara abaseabʉta mamina mʉ̃a ũduside wãrĩnu eda salone mebẽã abaʉba diskurso diabʉta mʉ̃ita maʉ̃ra biga ẽ basi maʉ̃ kʼarea mʉ̃ra yiwidʼisi Jeowa maʉ̃ ʉ̃rʉ ĩjãbimarẽã». Rahelabara mama ũdusi Jeowata naʉ̃ drʉa parãnabʉrʉ akʉza bajãta kʼãwũã osibʉrʉ iyi organizasionsida bia zokʼaseabʉta. Bʉita zareabʉrʉ Jeowa organizasionba mawũã awuara obʉrʉ kʼarea, krĩchara Jeowara buru biata akʉza dayi parãnata (Rom. 11:​33-36).

¿KʼÃRẼA DAIZEZEBARA IDUARIBIBɄ ZɄBɄRIARA?

8. ¿Bʉra sãwũã sentibʉ kʼawuasi baera kʼãrẽa Jeowaba iduaribibʉta zʉbʉriara?

⁸ Ʉ̃kʉrʉ ẽbẽrarãba kʼawua ẽ baera Daizezeba kʼãrẽa iduaribibʉta zʉbʉriara Daizeze ʉ̃rʉ kĩrʉbʉ akʉza jarapanʉ Daizezera neẽãta (Prov. 19:3). Mamina bʉara kʼawuasi dayirã kʼãwũã zʉbʉriabʉra Jeowaba oẽ basita awuarabʉrʉ maʉ̃ zʉbʉriara zesita Adán Evadeba ãya nãã nekayiruata osi baera mawũã dayirã jõmaʉ̃ta ãyideba zesi baera zõnababʉ, kayapanʉ akʉza beipanʉ adewara kʼawuasida Jeowaba kʼãwũã zʉbʉriata idibasidu jõbi ẽ baera ẽbẽrarã mejãchaʉba ũdukʼawua zebʉrʉta iyira. Kʼawuasi baera kʼãwũã Jeowaba ẽbẽrarãra zʉbʉriabi ẽãta aduʼa babibʉ akʉza audre iyi kʼawa babibʉ (2 Ped. 3:​9, 15).

9. ¿Sãwũãbʉde kĩrãbeseapanʉ Jeowabara iduaribibʉta zʉbʉriara?

⁹ Kʼawuapanʉ Jeowaba zʉbʉria jõbi ẽ dara jʉ̃ãkʼawuabʉta ũdubibarata, mamina dayirãba ũdubʉde dayirã mebẽrã mejãcha zʉbʉriabʉta mawũã ẽ bʉrʉ dayita zʉbʉribʉbʉrʉ, mawua ẽ bʉrʉ dayirã mebẽrã beibʉrʉde widibʉ kʼãrẽa Daizezebara mesera taʉbi ẽãta zʉbʉriara (Hab. 1:​2, 3). Maʉ̃ krĩchata dayirãma zera akʉza jẽda akʉdaibara kʼãrẽa Daizezebara iduaribibʉta zʉbʉriara (Sal. 34:19).a Maʉ̃ta odara jẽda kĩrãbedayi Jeowabara jipa jõbita zʉbʉriara.

10. ¿Kʼãrẽba kʼarebasi Annera aduʼa bʼaita yi papa beisimina?

¹⁰ Daya kʼawuabʉde Daizezeba kʼãrẽa iduaribibʉta zʉbʉriara bedʼea zroma ũdupanʉmina so zareapanʉ. Mebẽã aba Mayotte drʉadebʉba, iyi trʉ̃ Anneba jarabʉ: «Mʉ̃ papa beidadeba mʉ̃ra kʼãwũã mejãcha sopʉabʉ mamina mʉ̃a kĩrãbesi Jeowabara ẽbẽrarãra zʉbʉriabi ẽãta awuarabʉrʉ iyara ẽbẽrarãra jẽda piradrʉbikĩrãbʉ akʉza iyara taʉbikĩrãbʉ naʉ̃ zʉbʉriara mʉ̃a maʉ̃ ʉ̃rʉ krĩchabʉrʉba mʉ̃ra aduʼabʉ akʉza maʉ̃ba so zarea diabʉ».

11. ¿Kʼãrẽa iduaribibʉ Daizezeba zʉbʉriara akʉza maʉ̃ba sãwũã kʼarebaseabʉ jaradiakĩrã jaradia wãita?

¹¹ Jaradiakĩrã jaradiapanʉ baera Daizezebara kʼãrẽa iduaribibʉta zʉbʉriara. Pedroba jara ũrĩbibʉ Jeowabara zʉbʉriara idibasidu jõbi ẽ bʉ kʼãrẽ, kãgabʉ baera ẽbẽrarã mejãchaʉta ẽdrʉdamarẽã akʉza iyi ʉ̃rʉ kʼawuadamarẽã, iya bʉsi: «Krĩchara mara sãwũã panaibarata. Odaibara Daizezeba zokʼabʉta akʉza iyiʉ̃me kʼẽrẽpabaibara» (2 Ped. 3:11). Nekʼãrẽ mejãcha oibara maʉ̃ oita. Bari jaradaita, Daizeze ʉ̃rʉ jaradiaibara, dayirã Zeze Jeowaba ẽbẽrarã kãga kĩrãkʼa dayirãbara abarikʼa mawũã kãga ũdubidaibara, adewara kãgapanʉ ẽjũã kĩrãwãreãnẽ panamarẽã. Jeowabara jʉ̃ãbʉ ẽbẽrarã bʉchudebemaba ũdukʼawuadamarẽã akʉza iyaʼa yiwidʼidamarẽã. Dayirã jõmaʉ̃ba kʼarebaseabʉ ẽbẽrarã mejãchaʉba Jeowata ũdukʼawuadamarẽã naʉ̃ ewari jõi nãa, bʉmabi mawũã oira yibia bayi (1 Cor. 3:9).

NÃɄ EWARI JÕBODOAREPANɄ

12. Kʼawuapanʉ naʉ̃ drʉa jõbodoare panʉta, ¿maʉ̃ta kʼawuapanʉ baera naʉ̃ba sãwũã kʼarebabʉ?

¹² Daizeze Bedʼeabara jara ũrĩbibʉ ẽbẽrarãra idi ewadebemara sãwũã bʼaita naʉ̃ ewari jõbodoare (2 Tim. 3:​1-5). Dayirãba akʉpanʉbʉrʉ ẽbẽrarã dayirã audu sãwũã panʉta wãrĩnu kʼawuadayi Daizeze Bedʼeaba jarabʉra aripe berabarinʉmʉta. Ũdupanʉne ẽbẽrarã sãwũã audre ẽbẽra kayirua ba wãta maʉ̃ba wãrĩnu ĩjãpanʉ Daizeze Bedʼeaba jarabʉra wãrĩnuta (2 Tim. 3:​13-15).

13. Jesúsba Lucas 12:​15-21 bayeda nebʉra jaradadebara, ¿dayirãra sãwũã kʼarebaseabʉ?

¹³ Kʼawuapanʉ baera naʉ̃ ewari kʼãwũã jõita arakaitabata maʉ̃ kʼarea dayirã ewarira bia zokʼapanʉ. Jesúsba nebʉrasi ẽbẽra abaʉ ʉ̃rʉ, akʉdaya maʉ̃ yizaba dayirã sãwũã kʼarebaseabʉta dayirã ewari bia zokʼa kʼawuaita (akʉra Lucas 12:​15-21). Daizeze Bedʼeade naʉ̃ yumakẽrã ʉ̃rʉ nebʉrabʉ: «Bʉra kʼãrẽ krĩcha neẽã». Jesúsba maʉ̃ bedʼea jarasidera jarakĩrãkʉa ẽ basi naʉ̃ yumakẽrã plata mejãcha erbʉ kʼarea awuarabʉrʉ jarakĩrãbasi maʉ̃ yumakẽrãbara iyi ewarira bia zokʼa ẽ basita, ¿kʼãrẽa mawũã jarasi? Maʉ̃ yumakẽrã beibodota basimina iyi ewarira bia zokʼaba ẽ basi, ¿maʉ̃ nebʉradeba kʼãrẽta kʼawuaseapanʉ? Maʉ̃ba jaradiabʉ dayirã ewarira bia zokʼa kʼawuaibarata naʉ̃ drʉa jõita arakaita ba baera, maʉ̃ kʼarea naʉ̃ widibʉ ʉ̃rʉ krĩchadaibara: ¿Mʉ̃a okĩrãbʉdeba mʉ̃ara ũdubibʉka mʉ̃ ewarira bia zokʼakĩrãbʉta? ¿Kʼãrẽta oibarata jaradiabʉ mʉ̃ wũãwũãrarã? ¿Mʉ̃ara zokʼabʉka mʉ̃ zareata, mʉ̃ ewarita akʉza mʉ̃a nekʼãrẽ erbʉta mʉ̃a kãgabʉ erbaita mawũã ẽ bʉrʉ Jeowaba zokʼabʉ oita?

14. Mikibara kĩrãbesi naʉ̃ ewari jõĩra arakaitabata, ¿maʉ̃ba dayirãsida sãwũã kʼarebaseabʉ?

¹⁴ Dayirãba kʼawuabʉ baera naʉ̃ ewari jõita arakʼaitabata, maʉ̃ba kʼarebabʉ dayirã ewari bia zokʼaita Jeowaba jarabʉ kĩrãkʼa oita. Akʉdaya mebẽã wẽrã iyi trʉ̃ Miki kʼãrẽ berabaridata, iya jarabʉ: «Mʉ̃ eskueladeba gradua berabariside mʉ̃a nekʼãrẽ ũme okĩrãbasi estudiakĩrãbasi unibersidade nedʉwʉrʉra ʉ̃rʉ bia kʼawuaita akʉza yi nãã edebarita okĩrãbasi maʉ̃ne mʉ̃ neũdukʼawua kongregasionebemaba mʉ̃a jarabarisi bia krĩchamarẽã maʉ̃ra ũmena oseabʉ kʼawuaita, adewara jarasi mʉ̃ara ẽjũã kĩrãwãreã zebʉrʉde nedʉwʉrʉ ʉ̃rʉ mejãcha kʼawuaseabʉta. Mʉ̃ra unibersidadʼeda wã ẽ basimina nekʼãrẽ kʼawuasi mawũã tẽã trabajo ũduita yi nãã edebari bʼaita. Maʉ̃ tẽã wãsi mʉ̃ra Ecuador eda audre jaradiaita». Idi ewadera Mikita yi kimaʉ̃mera Ecuadordebʉ akʉza yi kimara zõrãrã kongregasion akʉbari.

15. ¿Santiago yiza kʼãwũã berabaridaba sãwũã kʼarebaseabʉ pae ẽ baita ẽbẽrarãba dayirã bedʼea ũrĩkĩrã ẽ mina jaradia wãĩta? (Akʉra potora).

¹⁵ Ẽbẽrarãba ũrĩkĩrãna ẽ mina wãmana ẽ baibara jaradiade, ẽbẽrarãba naweda ũrĩkĩrã ẽ basimina tẽã ũrĩseabʉ. Akʉdaya kʼãrẽta berabarisita Santiago Jesús mebẽãta. Santiagobara ũdusi Jesús sãwũã waridata, sãwũã miõba oka odata akʉza ũdusi Jesúsbara sãwũã eda Daizeze Bedʼeaba jarabadara aripe berabaribisita, adewara ũdusi sãwũã bia jaradiabadata ẽbẽrarã, mawũãsidu Santiagobara Jesús ʉ̃rʉra ĩjã ẽ basi. Mamina Jesús beidadeba jẽda pirãdrʉda tẽã wãrĩnu Jesús ʉ̃rʉ ĩjãbisi (Juan 7:5 Gál. 2:9).b Ẽbẽrarãba akʉza bʉ mebẽrãba ũrĩamapanʉbʉrʉ maʉ̃ kʼarea mapaẽrãra, awuarabʉrʉ zarea ora jẽda jaradiaita. Kĩrãbedaibara dayirãbara naʉ̃ ewari kʼãwũã arakʼaita ba baera paeda ẽ baibarata jaradia wãĩta. Dayirãba idi ewade ẽbẽrarã kʼãrẽ jarabʉra ãyara maʉ̃ra tẽã kĩrãbeseabʉ akʉza zʉbʉria zroma zei ewaridebida.c

SOBIABARA JEOWABA KĨRÃBEBIBɄ BAERA NÃÃ JARADIADATA

16. ¿Sãwũã kʼarebabʉ Jeowaba kʼãwũã dayirãba nãã kʼauchuadata jẽda kĩrãbebibʉ baera? (Akʉra rekuadro «Zokʼara wuabemara kʼarebaita»).

¹⁶ Ʉ̃kʉrʉ Kartara Jeowa organisasionba obʉrara opanʉ jipa Daizeze ʉ̃rʉ kʼawua ẽã bʉraita. Bari jaradiaita ʉ̃kʉrʉ diskursota, artikulota, bideota akʉza kartarata maʉ̃ra kartara Daizeze ode panʉra ẽãita opanʉmina mawũãsidu dayirãsida mejãcha kʼarebaseabʉ dayirã kĩrãbebipanʉ baera daya nãã kʼawuada ʉ̃rʉ. Adewara kʼarebabʉ Daizeze Bedʼeade audre ĩjãita Jeowa audre kãga zeita akʉza ẽbẽrarã audre bia jaradia kʼawuaita (Sal. 19:7).

17. ¿Sãwũãbʉde krĩchaseabʉ Jeowaba kʼãwũã naweda jaradiada ʉ̃rʉ?

¹⁷ Dayirã kʼãwũã Jeowa ode kikibariraitara arigu yibia kʼãwũã nekʼãrẽ yiwidi jara ũrĩbibʉ ʉ̃rʉ kʼawuaira. Naweda dayirãba kʼãwũã Daizeze ʉ̃rʉ kʼawuadaba Jeowa kʼawa babisi baera sobiapanʉ, akʉza idibasidu maʉ̃ba kʼarebaseabʉ. Bari jaradaita naweda dayirãba kʼawuabarisi Jeowara dayirã pãrãnata, maʉ̃ta kĩrãbedaibara dayirã krĩchama zebʉrʉde Jeowa organizasionba jarabʉta oamapanʉne, maʉ̃ berabaribʉrʉde kĩrãbedaibara dayirã organizasionra Jeowaba zokʼabʉta. Dayirã mebẽrã beibʉrʉde akʉza bedʼea zroma ũdubʉrʉde kĩrãbedaibara Jeowaba kʼãrẽa iduaribibʉta zʉbʉriara. Akʉza krĩchabʉdade dayirãba sãwũã zokʼaita dayirã ewarita, zareata akʉza dayirãba nekʼãrẽ erbʉta kĩrãbeidaibara dayirãra naʉ̃ ewari jõbodoarebʉta. Kʼãwũã Jeowaba jẽda kĩrãbebibʉdeba iyiʉ̃me kʼẽrẽpa bara akʉza audre buru bia bara.