Lepanʉraba widipanʉta
¿Aranʉ Jeowabara nokʼora sode kʼãrẽ krĩchata bʉeyi?
Apocalipsis 17:16, 17de jarabʉ kʼãrẽta berabarita zʉbʉria zroma jʉ̃drʉi nãã, jarabʉ: «Bʉa 10 kachu abada ũdudaba akʉza nedʉwʉrʉ mẽsiabawaraʉba jʉradayi yuwẽrã odebemabʉra, ãkada ope beadayi. Akʉza kodayi iyi yarara, mawũã oda kʼãrãpe edabʉedayi tʉbʉde. Daizezeba ãyi sode bʉsi iya krĩchabʉde odamarẽã, ãyi krĩchara abarika zesida nedʉwʉrʉra mẽsiabʉa zokʼabita, Daizezeba jarada aribaeyeda». Dayirã kartarabara nãã jarabasi, Jeowabara nokʼora sode bʉeita religionʼra zeri ẽã jõma jõbita.
Mamina naʉ̃ ʉ̃rʉ bia ũrĩta nesidapanʉ, Jeowabara nokʼora sode bʉe ẽ bayi religion zeri ẽã jõbita, awuarabʉrʉ oyi, nokʼorãra krĩchara abarika zedamarẽã «nedʉwʉrʉra mẽsiabʉa zokʼabita». ¿Sãwũã aripe berabariyi naʉ̃ bedʼeara? Naʉ̃ bia ũrĩnaita edre bedʼea widibʉta panʉnaibara.
¿Kʼaira ʉ̃rʉ bedʼeabʉ Apocalipsisdera? Bedʼeabʉ «yuwẽrã odebemabʉra» ʉ̃rʉ iyabaʉta trʉ̃gapanʉ «Babilonia zroma», naʉ̃ba jarakĩrãbʉ religion zeri ẽã naʉ̃ drʉa jõmaʉ̃nẽbemata. Adewara bedʼeabʉ «nedʉwʉrʉ mẽsia yi purru eskarlata» ʉ̃rʉ, naʉ̃ba jarakĩrãbʉ Organización de las Naciones Unidas, naʉ̃ organizasionʼra osida poaga 1919de naʉ̃ drʉa jõmaʉ̃nẽ aduʼa bʼaita jʉrʉita (Apoc. 17:3-5). Akʉza bedʼeabʉ «10 kachu» bʉ ʉ̃rʉ, naʉ̃ba jarakĩrãbʉ nokʼo jõma Organización de las Naciones Unidas arepanʉta.
¿Yuwẽrã odebemara nedʉwʉrʉ mẽsia yi purru eskarlataʉ̃mera ãbapanʉka? Yuwẽrã odebemara «nedʉwʉrʉ mẽsia» ʉ̃rʉ jewedabʉ, naʉ̃ba jarakĩrãbʉ iyira iyi arebʉta akʉza iyara naʉ̃ta iyi juwa edre bamarẽã kãgabʉta.
¿Kʼãrẽta sãwũã berabari yuwẽrã odebemara? Nedʉwʉrʉ mẽsiaba akʉza 10 kachu barabʉba jʉradayi yuwẽrã odebemara. Jõma jãrĩnañi iya nebia erbʉra akʉza jõmaʉ̃ʼa ũdubidayi iya kʼãrẽ nemitia obʉta. Mawũã aripe berabariyi Jeowaba jaradara, religion zari ẽã naʉ̃ drʉa jõmaʉ̃nẽbʉta jõbiyi (Apoc. 17:1; 18:8). Mamina maʉ̃ jõma berabari nãã Jeowaba oyi nokʼoraba omarẽã naʉ̃ drʉade berabarika badata.
¿Jeowabara kʼãrẽta obiyi nokʼora? Dayirãba kʼawuada kĩrãkʼa Jeowabara oyi nokʼorãra idu yi zokʼabimarẽã Organización de las Naciones Unidasʼa (Apoc. 17:13). Maʉ̃ra ãyi sode mawũã oita zesi baera, ¿mawũã odaika? Mawũã ẽ, awuarabʉrʉ Jeowaba oyi mawũã odamarẽã (Prov. 21:1; naʉ̃ testoʉ̃me akʉra Isaías 44:28). ¿Nokʼorãra wiña wiñane yi zokʼabidaika Naciones Unidasʼa? Mawũã ẽ, Maʉ̃ra mesera odayi, yãrãba jʉ̃ãna ẽãne. Mawũã Naciones Unidasʼra mejãcha zareabara bʼai baera religion zeri ẽã naʉ̃ drʉadebʉra jõma makenañi Jeowaba kãgabʉ kĩrãkʼa.
¿Kʼãrẽta berabarimarẽã jʉ̃ãpanʉ? Dayirãbara jʉ̃ãna ẽ baibara notisiade jaradamarẽã nokʼorãra wiña wiñane Naciones Unidas arepanʉta. Awuarabʉrʉ jʉ̃ãnaibara Jeowaba nokʼora sode bʉemarẽã atiaʉde ãyita bamarẽã Naciones Unidas are, mawũã berabaribʉdera kʼawuapanañi zʉbʉria zroma ewari jʉ̃drʉbodota. Maʉ̃ kʼarea Daizeze Bedʼeaba jarabʉta odaibara: «Kʼãĩnʉma ẽ baibara wuabemaraba obʉ kĩrãkʼa» badu ewaride maʉ̃ta berabariseabʉ baera (1 Tes. 5:6).