KAPITULO 72
Jesús warrara basieda
Joséta yi kima Maríaʉ̃mera panasi pʉwʉrʉ Nazaretde yi warrarabawara, maʉ̃ra warraranebema abara Jesúsbasi. Joséra karpinterobasi, maʉ̃ne trajabasi yi mebẽrãba nekʼãrẽ nesidabada diaita. Yi mebẽrã Jeowa ʉ̃rʉ akʉza Ley ʉ̃rʉ jaradiabasi. José iyi kimaʉ̃me akʉza iyi warrarabawara wãpanasi sinagogaeda Daizezeʼa yiwidʼita akʉza poagaza wãpanasi Jerusalénʼena Pascua piesta odaita.
Nazaret pʉwʉrʉ Jerusalénʼneba jĩgabasimina, Jesús 12 poagabaside wãsi yi mebẽrãbawara Jerusalénʼena, ãya ozebʉrʉ kĩrãkʼa. Jerusalén pʉwʉrʉra ẽbẽrarãba birabasi, maʉ̃rasida abarika Pascua piestade basi. Pascua jõna tẽã Joséta akʉza yi kima Maríaʉ̃mera jẽda deda wãbasi. Ãyara krĩchabasi Jesúsʼra ãyi kʼaidu ãba wãta, mamina ãya Jesús jʉrʉbʉrʉde neẽbasi.
Maʉ̃ kʼarea ãyira jẽda wãsi Jerusalénʼena odeba, mõbe jʉrʉsida Jesústa Jerusalénʼne ewari 3 bayeda. Ãya Jesúsʼra ũdusida templode, Jesúsʼra nejaradiabarira ẽzadra ũdusida, mama ũrĩbasi ãya jarabʉta akʉza ãyaʼa widibasia. Nejaradiabarirabara kĩrãkita ũrĩpanasi Jesús bedʼeabʉta, mõbe ãya Jesúsʼa widipanasi. Ãya ĩjã ẽã akʉpanasi Jesúsba panʉbʉra. Mawũã ãya kʼawuasida Jesúsba bia ũrĩbʉta Jeowa Leyʼra.
Joséta Maríaʉ̃mera mejãcha krĩcha zromata opanasi. Maríaba jarasi: «Wau zake, daiba bʉra mejãcha jʉrʉbʉda. ¿Sama chuasi bʉra?». Mawũẽra Jesúsba panʉsi: «¿Marabara kʼawuada ẽ basika mʉ̃ra mʉ̃ Zeze deda bʼaibarabasita?».
Jesúsʼra yibarirabawara Nazaretʼeda jẽda wãsi. Mama Joséba Jesúsʼa jaradiasi karpintero trajota. ¿Bʉara kʼãrẽta krĩchabʉ? ¿Sãwũã basiba Jesúsʼra warraraenara? Jesúsʼra waribʉrʉza buru bia ba wãsi. Maʉ̃ba Daizezeba akʉza ẽbẽrarãbara audre kãgabasi.
«Daizeze bʉa kãgabʉ oira mʉ̃itara arigʉ yibia akʉza bʉ leyʼra mʉ̃ sode edabʉa» (Salmo 40:8).