ARTIKULO KʼAWUAITA 34
Kʼawuara Daizeze Bedʼeade propesia jarabʉdeba
«Yi biʼia kʼawuapanʉrabʉrʉ ũrĩnañi» (DAN. 12:10).
TRÃBI 98 Las Escrituras están inspiradas por Dios
KʼÃRẼTA ŨDUDAITAa
1. ¿Kʼãrẽba kʼarebaseabʉ audre estudiakĩrã estudiaita propesiara Daizeze Bedʼeadebʉta?
BEN kʉ̃ra abaʉba jarabʉ: «Mʉara jipa akʉkĩrã Daizeze Bedʼeade propesiarãra». ¿Ben kĩrãkʼa krĩchabarika? Mawũẽ ẽ bʉrʉ, ¿bʉitara zareka ũrĩta propesiarãra? Mamina bʉa krĩchaseabʉ propesiara akʉbʉba maseseabʉta. Mamina bʉa kʼawuabʉrʉde kʼãrẽa Daizezeba iyi bedʼeade bʉesita propesiarata, bʉra awuara krĩchaseabʉ.
2. ¿Kʼãrẽ ʉ̃rʉ audre kʼawuadai naʉ̃ artikulodera?
2 Naʉ̃ artikulode bari kʼawuada ẽ bayi kʼãrẽa kʼawuadaibarata propesiara ʉ̃rʉ, awuarabʉrʉ kʼawuadayi sãwũã estudiaita. Adewara kʼawuadayi Danielba propesia ũme jarada ʉ̃rʉ sãwũã maʉ̃ ũrĩba dayirãta kʼarebaseabʉta.
¿KʼÃRẼA KʼAWUADAIBARA PROPESIARA Ʉ̃RɄRA?
3. ¿Kʼãrẽta odaibara dayirãba Daizeze Bedʼeadebema propesiata ũrĩkĩrãbʉbʉrʉ?
3 Nesidapanʉ kʼareba jʉrʉita wãrĩnu ũrĩkĩrãpanʉbʉrʉ propesiara ʉ̃rʉ. Krĩchara naʉ̃ta, bʉta wãñi drʉa bʉa ũduaduaeda bʉ neũdukʼawuaʉ̃me, mamina mama jʉ̃ẽbʉrʉde bʉ neũdukʼawuaba bia kʼawuabayi saʉ̃ ode wãibarata, maʉ̃ kʼarea bʉra mejãcha sobiayi kʼawuasi baera iyira bʉme wãsita. Maʉ̃ kĩrãka Jeowabara kʼawuabʉ dayirãra kʼãrẽ ewaride barabʉta. Maʉ̃ kʼarea dayirãba propesiata ũrĩkĩrãbʉbʉrʉ Jeowa kʼarebata widibara (Dan. 2:28; 2 Ped. 1:19, 20).
Propesia ʉ̃rʉ estudiabʉba kʼarebayi ʉrʉma bʼaita nekʼãrẽ ʉ̃ra zei kʼarea. (Akʉra parrapo 4).
4. ¿Kʼãrẽa Jeowabara bʉ amaesi propesiarãra iyi Bedʼeadera? (Jeremías 29:11 akʉza akʉra potora).
4 Yibarirabara kãgapanʉ yi wũãwũãra bia wãmarẽã, maʉ̃ kĩrãkʼa Jeowabida kãgabʉ dayirãta bia wãmarẽã (akʉra Jeremías 29:11). Wuabemara yibariraira, Jeowabara jaraseabʉ ʉ̃ra zeide kʼãrẽta berabarita. Jeowabara jidasi ʉ̃kʉrʉ yumakẽrãrata iyi propesiata iya jaradata bʉmarẽã, mawũã kʼawuamarẽã ʉ̃ra zeide kʼãrẽ berabarita maʉ̃ berabari nãã (Is. 46:10). Maʉ̃ propesiara Daizezeba nebia diadatabʉ. Mamina ¿sãwũã wãrĩnu ĩjãseabʉ mama jarabʉra wãrĩnu berabarita?
5. ¿Warrarabara kʼãrẽta kʼawuaseapanʉ Max yiza berabaridadeba?
5 Idi ewadera dayirã warrarãrabʉ eskuelade, ẽbẽrarã Daizeze Bedʼea wawia ũdubida ẽ bawara. Maʉ̃ba warrara kolegiodebʉba ãya obʉdeba akʉza ãyi bedʼeabʉdeba, aña krĩchabiseabʉ warrara Jeowa odebʉrata. Krĩchara Max berabaridata, iya jarabʉ: «Mʉ̃ kolegiode basidera mʉ̃a krĩcha jʉ̃drʉsi mʉ̃ yibarirabara mʉ̃ara jaradia ẽ basita saʉ̃ta religion arata akʉza krĩcha jʉ̃drʉsi wãrĩnu Daizeze Bedʼeara Daizezedeba zebʉ kʼawuaita». ¿Yibarirabara kʼãrẽta osi? Iya jarabʉ: «Mʉ̃a jarada kʼarea ãyira mejãcha krĩcha zroma osibaibara, mamina ãyara kĩrʉbʉta ũdubi ẽ basi». Max yibarirabara iya widibʉra panʉsi Daizeze Bedʼeadeba, mamina Maxbara mama iduaribi ẽ basi, maʉ̃ awuara iyabida nekʼãrẽ osi. Iya jarabʉ: «Mʉ̃yidobaʉba akʉsi mʉ̃a propesiarata, mõbe maʉ̃ ʉ̃rʉ bia ũrĩbʉrʉde kolegiode warrarabawara maʉ̃ ʉ̃rʉ bedeasi». Maʉ̃ba Maxba, ¿kʼãrẽ nebiata ũdusi? Iya jarabʉ: «Maʉ̃ba mʉ̃a ĩjãsi wãrĩnu Daizeze Bedʼeara Daizezedeba zesita».
6. ¿Kʼãrẽta oseabʉ wãrĩnu ĩjã ẽ bʉrʉ akʉza kʼãrẽa?
6 Bʉa Max kĩrãkʼa wiña ĩjã ẽ bʉrʉ Daizeze Bedʼeara Daizezedeba zebʉta, maʉ̃ kʼarea krĩcha zroma orãra. Mamina nekʼãrẽ awuara oibara daya wãrĩnu ĩjã erbaita. Mõgosiabʉba ãrĩ wã nekʼãrẽ biata, maʉ̃ kĩrãkʼa mejãcha ĩjã ẽ bʉrʉ Daizeze Bedʼeade wiña wiñane daya ĩjãbʉta adua wãseabʉ. Audre ĩjãita Daizeze ʉ̃rʉ dayikʉza widibara: «¿Mʉ̃ara wãrĩnu ĩjãbʉka Daizeze Bedʼeade ʉ̃ra zeide kʼãrẽ berabari jarabʉra?». Mamina maʉ̃ ʉ̃rʉ wãrĩnu ĩjã ẽ bʉrʉ akʉra propesiara yi berabarimata.
¿SÃWŨÃ ESTUDIASEABɄ EDA PROPESIARA DAIZEZE BEDʼEADEBɄRA?
Dayirãba Danielde kĩrãkʼa ĩjãbʉta ũdubita propesia ʉ̃rʉ estudiaibara akʉza eda krĩchabʉta ũdubidaibara. (Akʉra parrapo 7).
7. ¿Danielbara kʼãrẽ yiza biata diasi propesiara estudiai ʉ̃rʉra? (Daniel 12:10 akʉza akʉra potota).
7 Danielbara dia amaesi dayirã yiza biata sãwũã propesiara akʉi ʉ̃rʉ. Iya propesia akʉsidera osi wãrĩnu kʼawuaita. Danielbara ũdubibasi eda krĩchabʉta, iyara kʼawuabasi Jeowaba kʼarebaita iyi kawabasibʉrʉ akʉza ũrĩbasibʉrʉ (Dan. 2:27, 28; akʉra Daniel 12:10). Danielba eda krĩchabʉta ũdubisi Jeowa kʼareba jʉrʉbaside (Dan. 2:18). Danielbara kĩrãkita akʉbasi propesiara iyi ewaride badara (Jer. 25:11, 12; Dan. 9:2). ¿Sãwũã Danielba oda kĩrãkʼa oseapanʉ?
8. ¿Kʼãrẽa ʉ̃kʉrʉbara ĩjã ẽ propesiaba jarabʉra wãrĩnu berabarita, mamina dayirãbara kʼãrẽta oseabʉ?
8 Biʼia akʉra kʼãrẽ kʼarea propesiara ʉ̃rʉ kʼawuakĩrãbʉta. Bʉa propesiara estudiabʉta wãrĩnu kʼawuakĩrãbʉbʉrʉ Jeowaba kʼarebayi (Juan 4:23, 24; 14:16, 17). Mamina ʉ̃kʉrʉba propesiara estudiabʉ nekʼãrẽ awuara kʼarea. Estudiapanʉ ũdubita Daizeze Bedʼeara Daizezedeba ze ẽ basita. Maʉ̃ kʼarea ãyikʉzaʉba jidapanʉ nekʼãrẽ biata akʉza nekʼãrẽ kayiruata. Maʉ̃ kʼarea bia krĩchaibara kʼãrẽa estudiabʉta. Maʉ̃ kʼarea propesiara ũrĩta eda krĩchabʉta ũdubibara.
9. ¿Kʼãrẽ nebiaba kʼarebai propesiara bia ũrĩta? Jara ũrĩbira.
9 Eda krĩchabʉta ũdubira. Jeowabara jarabʉ kʼarebaita yi eda krĩchabʉra (Sant. 4:6). Maʉ̃ kʼarea iyaʼa kʼarebata widibara propesiara ũrĩta akʉza kĩrãbedaibara Jeowabara nezokʼa jipabʉdeba diabʉta yiko jauredebemara (Luc. 12:42). Jeowabara jõma daucha obʉ, maʉ̃ kʼarea dayirãbara ĩjãnaibara Jeowabara erbʉta dayirãʼa kʼairaneba jaradiaita, adewara mawũã ũrĩbita iyi bedʼeadebʉta (1 Cor. 14:33; Efes. 4:4-6).
10. ¿Kʼãrẽta kʼawuaseapanʉ Esther yizadeba?
10 Kĩrãkita estudiara. Jidara bʉa propesia audre kʼawuakĩrãbʉta akʉza maʉ̃ ʉ̃rʉ jʉrʉda. Maʉ̃ta osi mebẽã Estherba. Iyara kʼawuakĩrãbasi propesia Dayirã ẽdrubibari ʉ̃rʉ bedʼeabʉta. Iya jarabʉ: «Mʉ̃ 15 poagabaside mʉ̃a jʉrʉ jʉ̃drʉsi kʼawuaita propesiara bʉdara Dayirã ẽdrubibari ʉ̃rʉ, Jesu naena yi bʉmabasi kʼawuaita». Iya kʼawuadaba Rollos del mar Muerto ʉ̃rʉ maʉ̃ba audre ĩjãbisi. Iya jarabʉ: «Maʉ̃ranebema ʉ̃kʉrʉra Kristo zei naena bʉsida. Maʉ̃ba propesia zebʉra Daizezedeba zesibaibara. Maʉ̃ kʼarea mʉ̃ara propesiara akʉda ʉ̃rʉ akʉibarabasi biʼia ũrĩta». Mamina iyira sobiabasi maʉ̃ta osi baera, iya propesia ʉ̃rʉ kĩrãkita akʉda tẽã iya jarabʉ: «Maʉ̃ba mʉ̃aʼa ũdubisi Daizeze Bedʼeaba jarabʉra wãrĩnuta».
11. ¿Kʼãrẽa yibia kʼawuaita Daizeze Bedʼeaba jarabʉra wãrĩnuta?
11 Dayirãba propesiara berabarida ũdubʉrʉdera Daizeze Bedʼeadebemane, audre Jeowa ʉ̃rʉ ĩjãbibʉ akʉza iya zokʼabʉta ũrĩnañi. Adewara propesiarabara kʼarebabʉ sobia jʉ̃ãbaita nekʼãrẽ ʉ̃ra zeide bedʼea zroma ũduimina. Atia akʉdayi propesia ũme Danielba jaradata idi ewade berabarinʉmʉta. Naʉ̃ propesia ũme bia kʼawuabʉrʉba kʼarebayi nekʼãrẽ obʉrʉde bia jida kʼawuaita.
¿KʼÃRẼA DAYIRÃBA KʼAWUAIBARA NEKʼÃRẼ OMA JĨRɄ Ʉ̃RɄ?
12. Nekʼãrẽ oma jĩrʉ jiorrota egoroʉ̃me ãba pʉerabʉbara ¿kʼãrẽta jarakĩrãbʉ? (Daniel 2:41-43).
12 (Akʉra Daniel 2:41-43). Danielba Nabucodonosorba kʼãĩmokʼãrãdata ũrĩbisidera jarasi naʉ̃ nekʼãrẽ oma jĩrʉra jiorrota egoroʉ̃me ãba pʉerabasita. Propesiaraba jarabʉba, Danielba bʉdaba jarabʉba akʉza Apocalipsisba jarabʉba ũdubibʉ maʉ̃ jĩrʉra Gran Bretañata Estados Unidosʼʉ̃me bedʼea abarika zedata, naʉ̃ra nokʼo zromarabara naʉ̃ drʉa jõmaʉ̃nẽ idi zokʼabʉ. Danielba jarasi nokʼo zromara naʉ̃ drʉa jõmaʉ̃mae zokʼabʉ ʉ̃rʉ, maʉ̃ra «nokʼora ʉ̃kʉrʉta zareabayi ʉ̃kʉrʉta borekeabayi». ¿Kʼãrẽa ʉ̃kʉrʉta borekeabaibarabasi? Egorobara jarakĩrãbʉ ẽbẽrarãta, maʉ̃ra ẽbẽrarã nokʼora idu yi zokʼabida ẽ, maʉ̃ba nokʼorabara zarea zokʼabe ẽ naʉ̃ra ẽbẽrarãra ãya kãgabʉ kĩrãkʼa.b
13. ¿Kʼãrẽ wãrĩnu ʉ̃rʉ kʼawuapanʉ naʉ̃ propesia ũrĩbʉdeba?
13 Danielba nekʼãrẽ oma ʉ̃rʉ jaradadeba nekʼãrẽ kʼawuapanʉ, audre iyi jĩrʉ ʉ̃rʉ. Aba, Gran Bretañata Estados Unidosʼʉ̃mebara ũdubibʉ ãyira mejãcha zarea erbʉta. Bari jaraita, Estados Unidosba Gran Bretañaʉ̃meba ʉ̃kʉrʉ pʉwʉrʉrata ãyi juwa edre baebisi. Maʉ̃ra osida Primera Guerra mundial zeside akʉza Segunda Guerra mundial zeside. Mamina maʉ̃ra nokʼorãra wiña wiñane borekea wã, ẽbẽrarã ãya zokʼabʉta yiya yõpanʉ baera akʉza ãya kãgabʉta opanʉ baera. Yi ũmeta, maʉ̃ nokʼo zromaba naʉ̃ drʉa jõmaʉ̃mae zokʼabʉ kĩrãkʼara wuara neẽ bayi, Daizeze Nokʼota zei baera nokʼora naʉ̃ drʉadebʉ jõbita. Mamina ʉ̃kʉrʉ nokʼorata Gran Bretaña Estados Unidosʼʉ̃me yõkĩrãbʉmina, ãyide kĩrãkʼara zokʼa ze ẽ bayi. Maʉ̃ra jarapanʉ Daizeze Bedʼeaba jarabʉ baera katumaneba ʉ̃tʉ zebʉta mõgara toabʉedapaedata akʉza naʉ̃bara jarakĩrãbʉta Daizeze Nokʼota. Akʉza Daizeze Nokʼobara birachiyi maʉ̃ nekʼãrẽ jĩrʉ omara. Maʉ̃rãra Estados Unidos akʉza Gran Bretaña (Dan. 2:34, 35, 44, 45).
14. Maʉ̃ propesia bia ũrĩba, ¿sãwũã kʼarebai nekʼãrẽ jidabʉrʉde bia jida kʼawuaita?
14 ¿Bʉara wãrĩnu ĩjãbʉka Danielba jaradara nekʼãrẽ jĩrʉne jiorro erbʉ ʉ̃rʉ akʉza egoro oma ʉ̃rʉ jarabʉra? ¿Maʉ̃ra wãrĩnuka? Bʉa wãrĩnu ĩjãbʉbʉrʉ jʉrʉ ẽ bayi mejãcha plata erbaita akʉza naʉ̃ drʉade nekʼãrẽ bia mejãcha erbaita, kʼawuapanʉ baera Daizeze Nokʼoba naʉ̃ drʉadebʉra jõbita (Luc. 12:16-21; 1 Juan 2:15-17). Akʉza maʉ̃ ʉ̃rʉ ĩjãpanʉbʉrʉ zarea odayi wuabemara jaradiaita (Mat. 6:33; 28:18-20). Maʉ̃ propesia estudiada tẽã naʉ̃ widita ora: «¿Mʉ̃a nekʼãrẽ jidabʉdeba mʉ̃ara wãrĩnu kʼawuabʉka Daizeze Nokʼobʉrʉ jõbita aranʉ nokʼora naʉ̃ drʉadebʉra?».
¿KʼÃRẼTA BERABARIBɄ NOKʼO SURDEBEMABA AKɄZA NOKʼO NORTEDEBEMABA ZOKʼABɄDEBARA DAYIRÃRA?
15. ¿Idira kʼai nokʼo surdebemara akʉza nortedebemara? (Daniel 11:40).
15 (Akʉra Daniel 11:40). Daniel yi zroma 11de bedʼeabʉ nokʼo zroma ũme ʉ̃rʉ. Ãyira yõbʉ yiya kʼaita audre yi zroma bʼaita akʉza naʉ̃ drʉa jõma kʼaiba zokʼaita. Maʉ̃ propesia wuabemara propesia Daizeze Bedʼeade akʉbʉrʉdera kʼawuaseapanʉ nokʼo nortedebemara Rusia akʉza nokʼo surdebemara Estados Unidos akʉza Gran Bretaña.c
Dayirãba akʉpanʉbʉrʉ naʉ̃ra propesia sãwũã aripe berabari wãta nokʼo surdebemata nokʼo nortedebemaʉ̃me yõpanʉta, dayirãba ĩjãbʉra audre wari wã akʉza maʉ̃ba krĩcha zroma obi ẽ bayi. (Akʉra parrapo 16-18 bayeda).
16. Nokʼo nortedebemabara, ¿sãwũã edabʉ Daizeze pʉwʉrʉra?
16 Nokʼo norte zokʼabʉmaebʉra, mejãchade zʉbʉriabʉ ãyaʼa pẽwãpanʉ baera. Ʉ̃kʉrʉ mebẽrãta popanʉ, ʉ̃kʉrʉta karselde eda ibalbʉepanʉ ãya ĩjãbʉ kʼarea. Maʉ̃ nokʼo nortedebemaba obʉ kʼarea mebẽrãrarã perada ẽ, awuarabʉrʉ ãya ĩjãbʉta ʉ̃ta zarea babibʉ. ¿Kʼãrẽa mãwũã ĩjãpanʉ? Maʉ̃ra mebẽrãba kʼawuapanʉ baera Danielba jaradara Daizeze pʉwʉrʉ pẽwãnai ʉ̃rʉra wãrĩnutad (Dan. 11:41). Maʉ̃ kʼawuaiba kʼarebayi Jeowaʉ̃me kʼẽrẽpa bʼaita.
17. ¿Mebẽrãbara kʼãrẽ bedʼea zromata ũdupanʉ nokʼo surdebemaba zokʼanʉmʉmaera?
17 Naweda basidebida, nokʼo surdebemabara Daizeze pʉwʉrʉra pẽwã zebʉrʉ. Ʉ̃kʉrʉ mebẽrãra karselde eda ibalbʉesida akʉza ʉ̃kʉrʉ warrarata kolegiodeba ãĩ bʉesida kʼaiare ba ẽ basi baera. Mamina idi ewade mebẽrã nokʼo surdebema zokʼabʉmae panʉta nekʼãrẽ awuara ũdubibara ãyira Jeowa Nokʼoarepanʉta. Bari jaradaita, ẽbẽrarãba jidabʉrʉde kʼai nokʼo bʼaita, mebẽrãba krĩchaseabʉ kʼaiare bʼaita ãyi sode. ¿Dayirãbara sãwũã daya krĩchabʉdeba akʉza daya obʉdeba ũdubibara kʼaiarebʉ ẽãta? (Juan 15:18, 19; 18:36).
18. ¿Dayirãra sãwũã bʼai maʉ̃ra nokʼo zroma ũme yõbʉrʉdera? (Akʉra potota).
18 Ẽbẽrarã propesia ʉ̃rʉ ĩjã ẽãrabara ãyara mejãcha krĩcha zromata oseabʉ ãya ũdubʉrʉde nokʼo surdebema akʉza nokʼo nortedebemaʉ̃me yõnʉmʉta (Dan. 11:40, nota). Maʉ̃ra nokʼo zroma ũmebara põgata mejãcha erbʉ ẽbẽrarã makenaita. Mamina Jeowaba iduaribi ẽ bayi maʉ̃ berabarimarẽãra (Is. 45:18). Dayirãba ũrĩbʉrʉde yõpanʉta maʉ̃ra nokʼorãra, dayirãba ĩjãbʉra audre zarea erbʉ, kʼawuapanʉ baera naʉ̃ ewari jõira arakʼaitabata.
KĨRÃKITA AKɄPANɄ PROPESIARA SÃWŨÃ ARIPE BERABARI WÃTA
19. ¿Kʼãrẽta kʼawuapanaibara propesiara ʉ̃rʉra?
19 Edaʉde dayirãba ũrĩ ẽ jõma propesia kʼãrẽta jarakĩrãbʉra. Danielbida abarika jõmara ũrĩ ẽ basi propesiara iya bʉbadara (Dan. 12:8, 9). Dayirãba jõma ũrĩ ẽ mina propesiara sãwũã berabarita, maʉ̃ba jarakĩrãkʉ ẽ berabari ẽãta. Jeowaba jaraseabʉ dayirã maʉ̃ra propesia sãwũã berabarita iya jarai ewaride, iya naweda jarada kĩrãkʼa (Amós 3:7).
20. ¿Aranʉbai kʼãrẽ propesia berabarinʉmʉta akʉdai dayirãbara akʉza kʼãrẽta odaibara?
20 «Jarakadayi aduʼa bʼaita» (1 Tes. 5:3). Nokʼorabara religion zeri ẽãrãra jõbiyi (Apoc. 17:16, 17). Maʉ̃ tẽã Daizeze pʉwʉrʉta pẽwã jʉ̃drʉdayi (Ezeq. 38:18, 19). Maʉ̃ mawũã berabarinʉmʉne zeyi Daizeze yõta, Armagedón (Apoc. 16:14, 16). Maʉ̃ra aranʉ jõma berabariyi. Maʉ̃ kʼarea Daizeze Jeowaʼa biga diaibara akʉza kʼawuabaibara maʉ̃ra propesia ʉ̃rʉ, adewara wuabemara jaradiabara ãyabida kʼawuadamarẽã.
TRÃBI 95 La luz brilla más cada día
a Naʉ̃ drʉara audre mitia wãmina kʼawuapanʉ ʉ̃ra zeidera jõma audre bia bʼaita. Maʉ̃ra wãrĩnu ĩjãpanʉ Daizeze Bedʼeade akʉpanʉ baera propesiarata. Naʉ̃ artikulode kʼawuadayi kʼãrẽa dayirãbara akʉibara Daizeze Bedʼeaba kʼãrẽ jarabʉ ʉ̃rʉ. Atia naʉ̃ne wiña kʼawuadayi Danielba propesia nekʼãrẽ ũme jarada ʉ̃rʉ akʉza maʉ̃ba sãwũã dayirãta kʼarebaseabʉta dayirãba ũrĩbʉrʉde.
b Akʉra artikulo «Jehová revela ‹las cosas que tienen que suceder dentro de poco›», La Atalaya 15 junio 2012de parr. 7-9 bayeda.
c Akʉra artikulo «¿Quién es ‹el rey del norte› hoy en día?» La Atalaya mayo 2020de parr. 3, 4.