Jeowa tʉbʉ pʉreara ariya pʉrea erbara

1. ¿Daizeze Bedʼeabara sãwũã jarabʉ kãgara ʉ̃rʉra?

KÃGARA «iyi tʉbʉ pʉreara jẽrãtʉbʉ, Jah tʉbʉ pʉrea. Bania kĩrʉbʉbara kia ẽ kãgara, mia do zromabida do barrea ede ẽ»b (Cant. 8:6, 7). Kʼãrẽ bedʼea bia naʉ̃ kãga ʉ̃rʉ bedʼeabʉra. Naʉ̃ba ũdubibʉ baera juwa jidapanʉra kãga ũdubibʉra ewari jõmaʉ̃nẽ erbaseabʉta.

2. ¿Kʼãrẽta oibara yi juwa jidapanʉra yiya kãgabʉta adua ẽ marẽã?

² Juwa jidapanʉrata wãrĩnu yiya kãgapanakĩrãbʉbʉrʉ, ãyidebʉ maʉ̃ra. Bari jaraita, tʉbʉta pʉrea bamarẽãra badua jẽrãbaibara ki ẽ marẽã. Mawũãbʉta akʉ ẽã idubʉra, wiña wiñane maʉ̃ tʉbʉra ki wãseabʉ. Maʉ̃ kĩrãkʼa yi juwa jidapanʉrãra ewari jõmaʉ̃nẽ kãga baseabʉ, maʉ̃ba zarea odaibara maʉ̃ kãga aduabida ẽ baita. Mamina yi kãgara edaʉde jõseabʉ naʉ̃ra bedʼea zroma ũdubʉrʉde, plata neẽãne, kayabʉrʉde, wũãwũã dapʉẽine. Maʉ̃ kʼarea marata juwa jidabʉbʉrʉ, ¿sãwũã Jeowa tʉbʉ pʉreara eda erbaseabʉ mara juwa jidabʉde? Naʉ̃ artikulodera bedʼea ũbea kʼawuadayi, sãwũã mara kʼãwũã juwa jidapanʉra audre yiya kãga wãita akʉza sobia bʼaita.c

AUDRE KÃGA WÃRA JEOWARA

3. Eclesiastés 4:12​de jarabʉdera, ¿sãwũã juwa jidapanʉraba Jeowa mejãcha kãgabʉba audre yiya kãgadaita? (Akʉra potota).

³ «Jah tʉbʉ pʉrea» pʉrea erbaira, yi juwa jidapanʉrata yumakẽrãta yuwẽrãʉ̃mera zarea odaibara Jeowa audre kãga wãnaita. Mara juwa jidapanʉrãra, ¿sãwũã kʼarebai Jeowa audre kãgaita? Yumakẽrãba Jeowa mejãcha kãgabʉ ũdubibʉde, aripe opanʉ Jeowaba zokʼabʉta, maʉ̃ba kʼarebayi ãyi bedʼea zroma ũdubʉrʉde ara oita, bedʼeaka ẽ baita akʉza ãyi kima kãga ũdubibʉ jõ ẽ baita (akʉra Eclesiastés 4:12). Yi ẽbẽra Jeowa nãã bʉebʉra, zarea obʉ Jeowade kĩrãkʼa oita, ne diakĩrã dia bʼaita, jʉ̃ã bʼaita akʉza kĩrãdua kʼawuaita iyi ʉ̃rʉ nemitia obʉdade (Efes. 4:32–5:1). Juwa jidapanʉraba naʉ̃ nebiata oũdubipanʉbʉrʉ audre yiya kãga wãnañi. Mebẽã wẽrã yi trʉ̃ Lena yi juwa jidadata 25 poaga audre ba, iya jarabʉ: «Ẽbẽra Jeowade nããra bʉebʉbara iyaʼa wawia ũdubita akʉza kãgaira zare ẽ».

4. ¿Kʼãrẽa Jeowabara jidasi Joséta Maríaʉ̃me Jesu yibarira bamarẽã?

⁴ Krĩchadaya Daizeze Bedʼeaba yiza jaradiabʉ ʉ̃rʉ, Jeowaba yi warra Jesuita kʼaita yibarira bʼaita jidasidera, Davidʼdeba zedarãra ẽbẽrarã mejãchaʉta juwa jidapanasimina, iyara biʼia krĩcha kʼãrãpe jidasi Joséta Maríaʉ̃me. ¿Kʼãrẽa jidasi? Naʉ̃rãra Jeowa neũdukʼawua biabasi baera akʉza Jeowaba kʼawuabasi ewari jõmaʉ̃nẽ iya zokʼabʉta obʼaita, mawũã ãyi juwa jidapanʉne bia wãmarẽã. Mara juwa jidapanʉrabara, ¿kʼãrẽta kʼawuaseabʉ José akʉza Maríadebara?

5. ¿Yumakẽrãrabara kʼãrẽta kʼawuaseapanʉ Josédeba?

⁵ Joséba Jeowaba jarabʉ kĩrãkʼa obasi baera, maʉ̃ba iyira kima biabasi. Jeowabara jarama ũbea jarasi Joséʼa yi mebẽrã sãwũã akʉi ʉ̃rʉ. Maʉ̃ra iya jõma aripe osi, iyibada awuara bʼaibasimina (Mat. 1:20, 24; 2:13-15, 19-21). Josébara Jeowa kʼarebadeba Maríata kʼarebasi akʉza iya nesidabʉta diabasi. Krĩchaidua naʉ̃ta, sãwũã Maríaba kãgata akʉza wawiata ũdubisi Joséba nebia obadadeba. Yumakẽrãra juwa jidapanʉra marabara Joséde kĩrãkʼa oseabʉ, Daizeze Bedʼeade eda akʉpanʉne mara mebẽrã sãwũã akʉi ʉ̃rʉ.d Naʉ̃ ũrãgʼata obʉbʉrʉ akʉza bʉa nekʼãrẽ awuara oimina, mawũãra marara yi kãgapanañi akʉza audre ãbapanañi. Mebẽãba Vanuatura iyi juwa jidadara poaga 20 audre ba, iya jarabʉ: «Mʉ̃ kimaba obʉde akʉza jʉrʉbʉde Jeowa kʼarebata, mʉ̃ara audre wawiata ũdubibʉ akʉza kãgata. Mʉ̃a kʼawuabʉ baera iya kʼãrẽ jidabʉra bia jidaita, Jeowaba kãgabʉ kĩrãkʼa».

6. ¿Yuwẽrã juwa jidapanʉraba kʼãrẽta kʼawuaseabʉ Maríadebara?

⁶ Maríara Jeowa neũdukʼawuabasi, iyara iyidobaʉba akʉbasi Daizeze Bedʼeara, yi kimaʉ̃meba akʉda awuara, maʉ̃ba iyara bia ũdukʼawuabasi sãwũãbʉta Daizeze Bedʼeara (akʉra nota Lucas 1:46​ba erbʉta). Adewara ewari jʉrʉbasi Daizezeba kʼãrẽ oda ʉ̃rʉ krĩchaita (Luc. 2:19, 51). Maríaba mawũã Jeowadeta nãã bʉebasi baera iyira kima biabasi. Idi ewadera yuwẽrã juwa jidapanʉrabida abarika opanʉ Maríaba obada kĩrãkʼa. Bari jaradaita, mebẽã iyi trʉ̃ra Emiko maʉ̃ba jarabʉ: «Mʉ̃ dobabasidera mʉ̃yidobaʉba Daizeze Bedʼeara akʉbasi, mamina mʉ̃ juwa jidaside mʉ̃ kimaba jõma obasi. Iya yiwidʼibasi mʉ̃bari, ũmeba Daizeze Bedʼea akʉpanasi, maʉ̃ba mʉ̃a jʉ̃ãbasi omarẽã iya jõma mʉ̃ bari. Maʉ̃ kʼarea mʉ̃a kʼawuasi nesidata mʉ̃yidobaʉba Daizeze ʉ̃rʉ audre bia kʼawuaita, maʉ̃ba ewari jʉrʉbʉ Daizeze Jeowa yiwidʼita, Daizeze Bedʼea leita akʉza maʉ̃ ʉ̃rʉ bia krĩchaita» (Gál. 6:5). Audre Jeowa neũdukʼawua babʉrʉza mara kimara mara ʉ̃rʉ ibia bedʼeayi akʉza audre kãga wãni (Prov. 31:30).

7. ¿Juwa jidapanʉrabara kʼãrẽta kʼawuapanʉ José akʉza María Jeowa ãba yiwidʼibadadebara?

⁷ Joséta Maríaʉ̃me nekʼãrẽ osida audre Jeowa neũdukʼawua bʼaita. Ãyara kʼawuabasi yi mebẽã ãbaʉba yiwidʼibarabasita Jeowaʼa (Luc. 2:22-24, 41; 4:16). Ãyitara maʉ̃ra zarebasibaibara, mamina audre wũãwũãra baraside, mawũãsidu osi Jeowaba kãgabʉta. Maʉ̃ kʼarea ãyira jipa yiza bia yi juwa jidapanʉraita. José kĩrãkʼa akʉza María kĩrãkʼa wũãwũãrata erbʉbʉrʉ zarea baseabʉ ãba yi jʉrebarieda wãita akʉza semanaza bʉ mebẽrãbawaraʉba kʼawuaita Jeowa ʉ̃rʉ akʉza maraitara zarea baseabʉ Daizeze ʉ̃rʉ ũmepeiba kʼawuaita akʉza Jeowa yiwidʼita. Kĩrãbeidua, maraba mara ũmeba Jeowaba kãgabʉta opanʉbʉrʉ audre iyi kʼawabayi akʉza audre yi kãgapanañi. Maʉ̃ kʼarea nãã bʉeidua Jeowaba kãgabʉta.

8. Mebẽrã juwa jidapanʉrata bedʼea zroma erpanʉbʉrʉ, ¿sãwũã kʼarebaseabʉ semanaza mebẽrãbawara Jeowa ʉ̃rʉ kʼawuaiba?

⁸ ¿Marabara kʼãrẽta oseabʉ mara juwa jidapanʉne bedʼea zromata ũdupanʉbʉrʉ? Edaʉde maraitara zarea baseabʉ mebẽrãbawara Daizeze ʉ̃rʉ kʼawuaita. Maʉ̃ta mawũãbʉbʉrʉ mayi ũmeba estudiaidua maramabʉta akʉza aukʼara drazo chu ẽãta, maraba maʉ̃ta opanʉbʉrʉ audre yiya kãga wãnañi akʉza Jeowaba jarabʉta audre okĩrã wãnañi.

EWARI JɄRɄDA ÃBA BʼAITA

9. ¿Kʼãrẽa yi juwa jidapanʉrãra ewari jʉrʉibara audre ãbapanaita?

⁹ Juwa jidapanʉra marata ewari jʉrʉbʉbʉrʉ ãba bʼaita, mara kãgara audre wari wãñi. Mawũã opanʉbʉrʉ krĩcha abapaibʉ kĩrãkʼapanañi (Gén. 2:24). Akʉidua Liliaba akʉza Ruslánba kʼãrẽta ũdusidata ãyi juwa jidadadeba 15 poaga berabarida tẽã: «Semana aba berabarida tẽã, daiba kʼawuasida dai nãã bada kĩrãkʼa ãba ba ẽ basita, daira ewari neẽãsi trajo mejãcha oi kʼarea, deda kʼãrẽ oibaraba akʉza dai wũãwũãra kʼarea. Maʉ̃ta kʼawuasida dai kʼãwũã juwa jidapanʉta ewarita jʉrʉ ẽ basibʉrʉ ãbapanaita, dai kʼãwũã juwa jidabʉra yi idubʉkasida».

10. ¿Sãwũã juwa jidapanʉraba aripe oseabʉ Efesios 5:15, 16 jarabʉra?

¹⁰ ¿Kʼãrẽta oseabʉ juwa jidapanʉrabara ewari jʉrʉita audre ãba bʼaita? Zarea oseabʉ jʉrʉita kʼãrẽ ewaride ãba bʼaita (akʉra Efesios 5:15, 16). Mebẽã Nigeriadebemaba iyi trʉ̃ Uzonduba jarabʉ: «Mʉ̃a nekʼãrẽ obʉrʉdera jʉrʉbʉ ewari mʉ̃ kimaʉ̃me ãba bʼaita, maʉ̃ ewaridera nekʼãrẽ awuara oẽ, mawũã iyiʉ̃me audre ãba berabarita» (Filip. 1:10). Akʉra Anastasiaba zõrãrã kongregasionʼra akʉbari kimaba Moldaviadebemaba, iya kʼãrẽta obʉta iyi ewari bia zokʼaita, iya jarabʉ: «Mʉ̃ kimaba nekʼãrẽ kongregasionebema obʉedara mʉ̃ara deda obʉ nekʼãrẽ mʉ̃a oibarata, maʉ̃ba iyi zebʉrʉdera kʼarebabʉ audre ãbapanaita». Mamina marata ewari neẽbʉrʉ mawũã ãba bʼaita, ¿kʼãrẽta oseabʉ?

11. Áquilaba akʉza Priscilaʉ̃mebara, ¿kʼãrẽta ãbaʉba opanasi?

¹¹ Juwa jidapanʉrabara nekʼãrẽ mejãcha kʼawuaseabʉ Áquila akʉza Priscila yizadeba, ãyira yiza biabasi kristianora nããbemaraitara (Rom. 16:3, 4). Daizeze Bedʼeaba ãyi ʉ̃rʉ nekʼãrẽ mejãcha jara ẽ mina jarabʉ ãba trajabasita, ãbaʉba jaradiabasita akʉza ãbaʉba kʼarebapanasita wuabemarata (Hech. 18:2, 3, 24-26). Adewara Daizeze Bedʼeaba Áquilata akʉza Priscila ʉ̃rʉ jarabʉdera, maʉ̃rãra ũme ãba jarabʉ.

12. ¿Kʼãrẽta oseapanʉ juwa jidapanʉrabara audre ãba berabarita? (Akʉra potora).

¹² ¿Juwa jidapanʉrabara sãwũã oseapanʉ Áquilaba akʉza Priscilaʉ̃meba oda kĩrãkʼa? Krĩchaidʉa bʉa akʉza bʉ kimaʉ̃meba nekʼãrẽ mejãcha oseapanʉta. ¿Maraba nekʼãrẽ opanʉra ãbaʉba oseapanʉka? Bari jaradaita, Áquilaba Priscilaʉ̃mebara ãbaʉba Daizeze Bedʼeata jaradiapanasi, ¿marabara maʉ̃rane kĩrãkʼa abarika oseapanʉka? Akʉza Áquilara Priscilaʉ̃mera ãyira ãba trajapanasi, ¿marata iyabaʉ trajota erpanʉ ẽ bʉrʉ deda ãba trajaseapanʉka? (Ecl. 4:9). Yiya kʼarebapanʉbʉrʉ nekʼãrẽ obʉde, mawũãra audre ãba babibʉ akʉza audre bedʼeapanʉ. Lindata akʉza Roberʼʉ̃mera 50 poaga audre ba ãyi juwa jidadata, iya jarabʉ: «Daira ewarita neẽ nekʼãrẽ jemeneine ãba berabarita, mʉ̃ kimaʉ̃meba netata sʉgʉbʉrʉde akʉza dai ũmeba chirua ponopanʉne, mʉ̃ra sobiabʉ maʉ̃ta ãbaʉba opanʉ baera adewara dai kãgara audre wari wã».

13. Wãrĩnu juwa jidapanʉra ãba bʼaira, ¿kʼãrẽta odaibara?

¹³ Dayi deda ãbachuba jarakĩrãkʉ ẽ wãrĩnu ãbabʉta. Wẽrã aba Brasildebemaba jarasi: «Idi ewade kʼãrẽ mejãcha oibaraba krĩchaseapanʉ deda ãbabʉ baera ãbapanʉta, mamina kʼawuasi mawũã ẽãta, deda ãbabʉba ãbabʉta jarakĩrãbʉ ẽ, awuarabʉrʉ mʉ̃ kimaʼa diaibara iya nesidabʉ ewarita». Akʉra mebẽã Brunoba akʉza Taysba sãwũã ewari jʉrʉbʉta ãyi ãba bʼaita, iya jarabʉ: «Dai ãbapanʉnera daiba dai selularʼra jãpe bʉepanʉ, mawũã audre ãba ewari berabarita».

14. Juwa jidapanʉrata ãbabʉde sobiapanʉ ẽ bʉrʉ, ¿kʼãrẽta oseapanʉ?

¹⁴ Mamina, ¿kʼãrẽta oseabʉ yi juwa jidapanʉrata ãbabʉde sobiapanʉ ẽ bʉrʉ? Adewara, ¿kʼãrẽta berabariseabʉ mara ũmeba nekʼãrẽ awuara okĩrãbʉrʉ, mawũã ẽ bʉrʉ ãba bakĩrã ẽ bʉrʉ? ¿Kʼãrẽta osepanʉ? Krĩchaidua yiza nãã bedʼeada ʉ̃rʉ, nããra bedʼeasida tʉbʉra waña pʉrea toto ẽ, awuarabʉrʉ wiña wiñane jẽrã wãibara, mawũã pʉrea wãmarẽã. Maʉ̃ kĩrãkʼa mayi ũmena ewari jʉrʉidua aba bʼaita wiña wiñane akʉza oidua mayi ũmeba nekʼãrẽ kãgapanʉta, oraidua mayi ũmena bedʼeakabibʉta (Sant. 3:18). Maʉ̃ba maraba nekʼãrẽ ãbaʉba wiña wiñane owãne mayirai audre yi kãga wãnañi.

MAYIRAI YI WAWIA ŨDUBIPANɄNE

15. ¿Kʼãrẽa wawia ũdubira arigʉ yibia juwa jidapanʉraitara?

¹⁵ Wawia ũdubira arigʉ yibia kʼãwũã juwa jidapanʉne. Dayirãra iñababʉ osijenoba, osijenota nẽẽbʉrʉ beiseabʉ, maʉ̃ kĩrãkʼa tʉbʉ pʉrea erbaita nesidabʉ osijenota, osijenota neẽbʉrʉ tʉbʉra kiseabʉ. Maʉ̃ wawia ũdubira osijeno kĩrãkʼabʉ juwa jidapanʉrane. Juwa jidapanʉrane wawiata ũdubida ẽ bʉrʉ mawũãra aduaseabʉ yiya kãgabʉra. Juwa jidapanʉrata yiya wawia ũdubipanʉbʉrʉ mawũãra audre wari wãñi ãyi yi kãgapanʉra. Mamina krĩcha ẽ baibara bʉa iyita wawiabʉta, bʉ kimaba wãrĩnu sentibara bʉa iyaʼa wawia ũdubibʉta. Pennyta Aretʼʉ̃me 25 poaga audre ba ãyi juwa jidadata, iya jarabʉ: «Daita deda yiya wawiata ũdubipanʉ baera aduʼapanʉ, kʼawuapanʉ baera yiya bia ũrĩnaita daiba jarapanʉra». ¿Bʉra kʼãrẽta oibara bʉ kimaba iya wawia ũdubibʉta sentimarẽãra? Akʉdaya Abrahán Saraʉ̃meba kʼãrẽ yiza bia diadata.

16. Yumakẽrãrabara, ¿kʼãrẽta kʼawuaseapanʉ Abrahán yizadeba? (1 Pedro 3:7 akʉza akʉra potota).

¹⁶ Abrahánbara wawiata ũdubisi yi kima Sarara iya ũrĩside iyi bedʼeata. Ewari aba Sarara mejãcha krĩcha zroma obasi, jarasi Abrahánʼa iyi sãwũã sentibadata akʉza jarasi iyi kʼarea mawũã berabarinʉmʉta, ¿mawũã jarabʉrʉ kʼarea Abrahánʼra kĩrʉsika? Kĩrʉ ẽ basi iya kʼawuabasi baera Sarara iya jarabʉrʉde basita akʉza ẽbẽra bia basita, ũrĩsi iyara, mõbe ara oita krĩchasi (Gén. 16:5, 6). ¿Kʼãrẽta kʼawuapanʉ maʉ̃neba? Yumakẽrãra marabʉrʉ jidaseabʉ mara mebẽrã kʼareara (1 Cor. 11:3). Mamina bigabayi kʼãrẽ jidai nãã, yi kimabida widita kʼãrẽ krĩchabʉta maʉ̃ ʉ̃rʉ, mawũã iyi sopʉabi ẽ baita (1 Cor. 13:4, 5). Edaʉde bʉ kimara mejãcha krĩcha zroma oseabʉ, maʉ̃ kʼarea iya jarakĩrãbʉ bʉaʼa maʉ̃ krĩcha zroma obibʉta, maʉ̃ kʼarea kĩrãkita ũrĩdua iyi sãwũã sentibʉta (akʉra 1 Pedro 3:7). Angelata Dimitriʉ̃me 30 poaga ba juwa jidadata, iya sentibʉ yi kimaba iyira wãrĩnu wawia ũdubibʉta, iya jarabʉ: «Dimitribara ũrĩbʉ mʉ̃ bedʼeara mʉ̃ kĩrʉkʉde, mawũã ẽ bʉrʉ mʉ̃ bari bedʼeakĩrãbʉde akʉza mesera kĩrʉ ẽ aduʼabʉ ẽãne».

17. Yuwẽrã juwa jidapanʉrabara, ¿kʼãrẽta kʼawuaseabʉ Sara yizadebara? (1 Pedro 3:5, 6).

¹⁷ Sarabara kʼarebasi Abrahánba jidadara aripe berabarimarẽã (Gén. 12:5). Ewari aba Abrahánbara ẽbẽrarã jãpeba zedata bia edakĩrãbasi, maʉ̃ kʼarea jarasi Sara, iya nekʼãrẽ obadata idubʉ kʼãrãpe panta mejãcha wiamarẽã ãyita (Gén. 18:6). Sarabara Abrahánba jaradara ũrĩsi mõbe mesera osi. Yuwẽrãra juwa jidapanʉrabara ũrĩbara mara kima bedʼeara, mawũãra mara yiya kãgapanʉra audre wari wãñi (akʉra 1 Pedro 3:5, 6). Dimitriba ũdubʉ sãwũã yi kimaba wawia ũdubibʉta, iya jarabʉ: «Angelaʼa biga diabʉ mʉ̃a, mʉ̃a jidadata ĩjãbʉ baera, edaʉde mʉ̃me bedʼea abarikabʉ ẽ mina, mʉ̃a jidadata bia oẽãnera mʉ̃ ʉ̃rʉ imitia bedʼea ẽ, maʉ̃ kʼarea zare ẽ dayi wawiabʉ kãga ũdubira».

18. ¿Kʼãrẽ nebiata ũdupanʉ juwa jidapanʉraba ãba trajapanʉbʉrʉ kãga ũdubita?

¹⁸ Idi ewadebida Diarubara jõbikĩrãbʉ juwa jidapanʉra kristianora yiya kãgapanʉra. Diarubara kʼawuabʉ juwa jidapanʉrata yiya kãgapanʉ jõbʉrʉdera Jeowadeba jĩga wãita. Mamina kãga arara jõ ẽ. Maʉ̃ kʼarea mara juwa jidapanʉne yiya kãgapanʉra libro Salomónba Cantar de los Cantaresde jarada kĩrãkʼa bʼaibara. Maʉ̃ kʼarea mara juwa jidapanʉrãra Jeowa kãgabʉta nãã ũdubidaibara, ewari jʉrʉdaibara yiya audre kãga wãita akʉza wawiata ũdubidaibara. Maʉ̃ta obʉbʉrʉ kʼãwũã juwa jidapanʉneba Jeowa ʉ̃rʉ ibia bedʼeabidayi akʉza mara kãgara ewari jõmaʉ̃nẽbayi.