Reperensia Karta nekʼawuabari Bʼaita Kristianora kĩrãkʼa akʉza Trajaita Daizezeita
6-12 JULIOBAYEDA
BEDʼEA BIA DAIZEZE BEDʼEADE ŨDUDATA | ÉXODO 6, 7
«Atia bʉa akʉyi mʉ̃a kʼãrẽta oita paraonʼra»
(Éxodo 6:1) Aramaʉ̃ta Jeowaba panʉsi Moisésʼa: «Atia bʉa akʉyi mʉ̃a kʼãrẽta oita paraonʼra. Iyi juwa ʉ̃ta chuba obiyi aĩ wãmarẽã, adewara iyi juwa ʉ̃ta chuba obiyi drʉadeba ãĩ wãmarẽã».
(Éxodo 6:6, 7) Maʉ̃ba israelitara jarada: Mʉ̃ra Jeowa, mʉ̃a ẽdrʉbiyi egipsioraba nezʉgʉa ataʉbibʉdeba akʉza wuabema nezokʼa babʉdeba. Mʉ̃a ẽdrʉbiyi mʉ̃ juwa iyi ʉ̃ta bʉba akʉza mejãcha zʉbʉriabiyi. 7 Mʉ̃ara jidayi mʉ̃ pʉwʉrʉ kĩrãkʼa akʉza mʉ̃ra mara Daizezebayi. Marabara wãrĩnu kʼawuadayi mʉ̃ra Jeowa mara Daizezeta, mara Egiptode nezʉgʉa ataʉbʉdeba ẽdrʉbita.
it-2-S 415 parr. 1
Moisés
Israelra awuara krĩchasida. Ãya nãã ĩjãpanasi Moisésʼra Daizezeba jidadata mamina paraonba ãyi audre zarea trajabisidera, Moisés ʉ̃rʉ imitia bedʼeasida maʉ̃ba Moisésʼra krĩcha zroma osi aramaʉ̃ta Jeowa kʼareba widisi (Éx 4:29-31; 5:19-23). Jeowaba jarasi Moisésʼa, iya jaradara Abrahánʼa, Isaacʼa akʉza Jacobʼa aripe berabaribita, naʉ̃ba zarea jidasi Moisésʼra, Jeowaba ũdubikĩrãbasi iyi trʉ̃ba kʼãrẽta jarakĩrãbʉta Israel ẽdrʉbibʉrʉde akʉza Drʉa iya Diaya adade pʉwʉrʉ zroma babibʉrʉde (Éx 6:1-8). Mawũãsidu Israeldebemabara ũrĩna ẽ basi Moisés bedʼeara. Mamina Jeowaba zʉbʉria kĩrãtana zokʼadadebema yi 9ba Moisésʼare babisi, maʉ̃ tẽã zʉbʉria kĩrãtanabʉ yi 10debemane Moisésʼitara zare ẽ basi ara daucha jʉre edeita mawũã Egiptodeba ẽdrʉbita, ãya kʼarebasi baera (Éx 13:18).
(Éxodo 7:4, 5) Mamina paraonbara ũrĩ ẽ bayi maraba jarabʉra. Maʉ̃ kʼarea mʉ̃ juwara Egipto ʉ̃rʉbayi akʉza mamaʉ̃ba ẽdrʉbiyi ẽbẽrarã mejãchabʉra, mʉ̃ pʉwʉrʉ israelitarata. Ẽdrʉbiyi Egiptodebema mejãcha zʉbʉriabibʉrʉde. 5 Mawũã egipsiorabara kʼawuayi mʉ̃ra Jeowata, mʉ̃a mʉ̃ juwa Egipto ʉ̃rʉ bʉebʉrʉde mõbe israelitara ẽdrʉbibʉrʉde».
it-2-S 414 parr. 5, 6
Moisés
Paraon nãã Egiptode. Moisésta akʉza Aarónʼʉ̃mera audre yibiabasi, Daizeze wãrĩnuarata akʉza daizeze zeri ẽãʉ̃me yõnʉmaside. Paraonba yi saserdotera jai obʉraneba widisi zareata diamarẽã daizeze zeri ẽã Egiptodebema, Jeowaʉ̃me yõita, Janes akʉza Jambresʼra saserdotera jai obʉra nokʼobada (2Ti 3:8). Moisésba nããra Aarónʼa miõba okata omarẽã jaradaba ũdubisi Jeowara daizeze zeri ẽ Egiptodebemaira ʉ̃tabasita, mamina paraonbara jipa ũrĩkĩrã ẽ basi (Éx 7:8-13). Zʉbʉria kĩrãtana yi ũbeata zeside saserdoteraba jarasida: «Naʉ̃ra Daizeze juwa jĩwini». Zʉbʉriasi ãyi yara jõma mõgaside maʉ̃ba paraonʼinʉ wãbe ẽ basi Moisésʼʉ̃me yõita maʉ̃ ewaribaside (Éx 8:16-19; 9:10-12).
Jeowaba zʉbʉria kĩrãtana zokʼadaba iyita kãgabisi, ʉ̃kʉrʉba ũrĩkĩrã ẽ basi. Moisésba Aarónʼʉ̃mebara jarakasida zʉbʉria kĩrãtana 10bʉra. Naʉ̃ zʉbʉria kĩrãtana Moisésba jaradara jõma aripe berabarisi. Naʉ̃ mawũã berabaridaba ũdubisi Moisésʼra Jeowaba jʉrʉdata. Maʉ̃ba ũdukʼawuasida Daizeze trʉ̃ra Egiptode, maʉ̃ kʼarea israelitarata akʉza ʉ̃kʉrʉ egipsioraba kãgasida Jeowata mamina paraonta akʉza iyi kʼawabadabawara so zareasida (Éx 9:16; 11:10; 12:29-39). Egipsiorabara kʼawuapanasi ãyi daizeze zeri ẽãta kĩrʉbida ẽ basita, ãya kʼawuapanasi Jeowabʉrʉ zʉbʉria obʉta. Zʉbʉria kĩrãtana yi 9 obʉrʉde, Moisésʼra jõmaʉ̃ba wawiadebasi Egipto drʉadera (Éx 11:3).
Jʉrʉda nekʼãrẽ biʼiabʉta Daizezedebemata
(Éxodo 6:3) Mʉ̃ra yi ũdubibasia Abrahánʼa, Isaacʼa, Jacobʼa Daizeze Jõma oseabʉde, mamina mʉ̃ trʉ̃ Jeowa, ãyaʼa jaradia ẽ basi.
it-2-S 1140 parr. 4, 5
Jõma oseabʉ
Jeowaba naʉ̃ bedʼeara zokʼasi «Daizeze Jõma oseabʉ» (El Schad·dái) Abrahán jaraside Isaac todai ʉ̃rʉ, nesidabasi Jeowa mejãcha ĩjãita aripe berabarimarẽã Jeowaba jaradata. Mamaʉ̃ba ʉ̃ta naʉ̃ bedʼeara zokʼabasi Daizezeba, Isaacʼa akʉza Jacobʼa nebia diaya aside, maʉ̃ra ʉ̃rʉbida zeibasi Abrahánba nebia ũdudara (Gé 17:1; 28:3; 35:11; 48:3).
Maʉ̃ berabarida dããrane Daizezeba Moisésʼa jarasi: «Mʉ̃ra yi ũdubibasi Abrahánʼa, Isaacʼa, Jacobʼa Daizeze Jõma oseabʉde [beʼÉl Schad·dái], mamina mʉ̃ trʉ̃ Jeowa, ãyaʼa jaradia ẽ basi» (Éx 6:3). Naʉ̃ bedʼeabara jara ẽ basi ãya ũdukabasita Daizeze Jeowa trʉ̃ra, ãya Jeowa trʉ̃ra audre ẽãne jarabasi baera (Gé 4:1, 26; 14:22; 27:27; 28:16). Libro Génesisde mebẽrã buru ʉ̃rʉ bedʼeabasidera, zokʼasi bedʼea «Jõma oseabʉ», maʉ̃ra 6bai bʉsida, kõbe Jeowa trʉ̃ra bʉsida 172 testo ebreode. Mebẽrã burubara kʼawuabasi Daizezebara «Jõma oseabasita», mamina biʼia kʼawua ẽ basi kʼãrẽta jarakĩrãbʉta Jeowa trʉ̃bara. The Illustrated Bible Dictionary (odata J. D. Douglas, 1980, vol. 1, pag. 572) jarabʉ maʉ̃ ʉ̃rʉ: «Nekʼãrẽ mebẽrã buruʼa jaradara tẽãne aripe berabarita, naʉ̃ba jarakĩrãbasi mejãcha ĩjãbasita Iyi ʉ̃rʉ, Yahweh, aripe berabaribibasi. Jeowa bakuru pʉreade ũdubidara maʉ̃ra yibiabasi, Yahweh trʉ̃ba ũdubisi iyira audre zareabarabʉta akʉza ũdubisi ewari jõmaʉ̃nẽ bakikibari baera bʼaita iyira».
(Éxodo 7:1) Aramaʉ̃ta Jeowaba jarasi Moisésʼa: «Akʉra, mʉ̃a bʉra Daizeze kĩrãkʼa obʉrʉa paraonʼita, bʉ mebẽã Aarónʼra bʉ propetabayi.
it-2-S 414 parr. 2
Moisés
Moisésʼa zokʼadapeadara jãrĩ ẽ basi, iya obe ẽãta krĩchabasimina.
Moisésbara jarasi iyira biʼia bedʼea be ẽãta. Mamina 40 paoaga berabari nãã iyareba krĩchasi ẽdrʉbita pʉwʉrʉ Israelra, maʉ̃ta atiara awuara krĩchabʉ. Moisésbara jarada ʉ̃rʉ jarabasi iyara obe ẽãta Jeowaba zokʼabʉta, maʉ̃ kʼarea jarabasi iyita zokʼa ẽ marẽã. Maʉ̃ kʼarea Jeowa kĩrʉsimina jãrĩ ẽ basi iya zokʼadara awuarabʉrʉ zokʼasi yi mebẽã Aarónta iyi bari bedʼeamarẽã. Moisésʼra Daizezebari bedʼeabasi baera, maʉ̃ba Aarónʼitara «Daizeze kĩrãkʼa basi», mawũã Aarónʼra bedʼeaibarabasi Moisés bari. Zõrãrã Israeldebemabawara ãba yi jʉreda kʼarea akʉza paraonʼʉ̃me bedʼea zroma zeda kʼarea, maʉ̃ kʼarea Daizezeba zokʼasi kʼãrẽta oibarata, maʉ̃ta Moisésba Aarónʼa jarasi paraonʼʉ̃me bedʼeamarẽã (Éx 2:23; 4:10-17). Moisés Daizeze propetabada kĩrãkʼa Aarónsida Moisés propetabasi. Adewara jarasi Moisésʼa «bʉra Daizeze kĩrãkʼa obʉrʉa paraonʼita», zarea erbai baera Daizezedeba akʉza paraon iyi juwa edre erbai baera, maʉ̃ kʼarea pera ẽ baibarabasi Egipto nokʼo kʼarea (Éx 7:1, 2).
Daizeze Bedʼea leita
(Éxodo 6:1-15) Aramaʉ̃ta Jeowaba panʉsi Moisésʼa: «Atia bʉa akʉyi mʉ̃a kʼãrẽta oita paraonʼra. Iyi juwa ʉ̃ta chuba obiyi ãĩ wãmarẽã, adewara iyi juwa ʉ̃ta chuba obiyi drʉadeba ãĩ wãmarẽã». 2 Aramaʉ̃ta Daizezeba jarasi Moisésʼa: «Mʉ̃ra Jeowa. 3 Mʉ̃ra yi ũdubibasia Abrahánʼa, Isaacʼa, Jacobʼa Daizeze Jõma oseabʉde, mamina mʉ̃ trʉ̃ Jeowa, ãyaʼa jaradia ẽ basi. 4 Adewara mʉ̃ra bedʼea abarika zesi ãyibawara Canaán drʉa diaita, drʉa ãyi jãpeba zeda kĩrãkʼabadata. 5 Mʉ̃a ũrĩbʉrʉa mʉ̃ pʉwʉrʉ Israel zʉbʉriara, egipsioraba ãyi nezokʼa babibʉrʉra, maʉ̃ kʼarea kĩrãbebʉ mʉ̃ bedʼea abarika zedara. 6 »Maʉ̃ba israelitara jarada: Mʉ̃ra Jeowa, mʉ̃a ẽdrʉbiyi egipsioraba nezʉgʉa ataʉbibʉdeba akʉza wuabema nezokʼa babʉdeba. Mʉ̃a ẽdrʉbiyi mʉ̃ juwa iyi ʉ̃ta bʉba akʉza mejãcha zʉbʉriabiyi. 7 Mʉ̃ara jidayi mʉ̃ pʉwʉrʉ kĩrãkʼa akʉza mʉ̃ra mara Daizezebayi. Marabara wãrĩnu kʼawuadaya mʉ̃ra Jeowa mara Daizezeta, mara Egiptode nezʉgʉa ataʉbʉdeba ẽdrʉbita. 8 Mʉ̃a edeyi drʉa Abrahánʼa, Isaacʼa akʉza Jacobʼa jaradama, maʉ̃ta maranearabayi. Mʉ̃ra Jeowa». 9 Maʉ̃ tẽã, Moisésbara jarasi naʉ̃ bedʼeata israelitara, mamina ãyara ũrĩ ẽ basi Moisés bedʼeara, ãyi mejãcha zokʼapanʉba kʼãrẽ oamasi baera. 10 Aramaʉ̃ta Jeowaba Moisésʼa jarasi: 11 «Wãra paraonʼa jarade, Egipto nokʼoʼa, idu wãbimarẽã israelitarata iyi drʉadeba». 12 Aramaʉ̃ta, Moisésba jarasi Jeowaʼa: «Israelitaraba mʉ̃ bedʼeata ũrĩna ẽ bʉrʉ, ¿sãwũã ũrĩ paraonbara, mʉ̃ta kʼãwũã bia bedʼea be ẽ bʉrʉ?». 13 Mawũãsidu, Jeowabara jarada ʉ̃rʉ jarasi Moisésʼa akʉza Aarónʼa, iya bedʼea zokʼadata jaramarẽã israelitaraʼa adewara pararonʼa, Egipto nokʼoʼa, mawũã israelitara ẽdrʉbita drʉa Egiptodeba. 14 Naʉ̃rata nokʼora bʉ zeze dedara. Rubén wũãwũãrata, Israel wũãwũã nabemara naʉ̃rabasi, Hanok, Palú, Hezrón akʉza Carmí. Naʉ̃rata Rubén mebẽrãra. 15 Simeón wũãwũãrãra naʉ̃rabasi, Jemuel, Jamín, Ohad, Jakín, Zóhar akʉza Shaúl, kananea wũãwũã. Naʉ̃rata Simeón mebẽrãra.
13-19 JULIOBAYEDA
BEDʼEA BIA DAIZEZE BEDʼEADE ŨDUDATA | ÉXODO 8, 9
«Paraonbara iya kʼawua ẽ nãã Jeowaba jaradara aripe berabaribisi»
(Éxodo 8:15) Paraonba ũduside bedʼea zroma taʉdogota, jẽda so kayiruasi mawũã Moisésba akʉza Aarónʼʉ̃meba jarabʉra ũrĩ ẽ basi, Jeowaba jarada kĩrãkʼa.
it-2-S 1105
Ũrĩkĩrã ẽ
Jeowaba mejãcha jʉ̃ãbʉ kʼarea pʉwʉrʉrata akʉza ẽbẽrarãta zokʼaipanʉ, ãyi beibaramina (Gé 15:16; 2Pe 3:9). Ʉ̃kʉrʉ ẽbẽrarã Jeowaba kʼãwũã ũdubida kʼarea krĩcha awuarabesi, mawũã Jeowaba so zʉbʉria akʉsi ãyira (Jos 2:8-14; 6:22, 23; 9:3-15), mamina ʉ̃kʉrʉra audre so kayiruasi Jeowa ʉ̃rʉ adewara iyi pʉwʉrʉ ʉ̃rʉ (Dt 2:30-33; Jos 11:19, 20). Ãya ũrĩkĩrã ẽ baera Jeowabara iduaribibʉ mawũã bamarẽã. Jeowaba maʉ̃ra ẽbẽrarã jõma makenabʉrʉde ũdubiyi iyi zareata akʉza iyi trʉ̃ta ũdukʼawuabiyi (akʉra Éx 4:21; Jn 12:40; Ro 9:14-18).
(Éxodo 8:18, 19) Saserdotera jai obʉrabara abarika okĩrãbasi ãyi jaiba ororo ʉ̃tʉzebikĩrãbaside, mamina oauda ẽ basi. Orororabara ẽbẽrarã kakʉasi akʉza nedʉwʉrʉrasida. 19 Saserdotera jai obʉrabara jarasida paraonʼa: «Naʉ̃ra Daizeze juwa jĩwini». Mawũãsidu paraonʼra so kayiruabasi, maʉ̃ba ũrĩ ẽ basi Jeowaba jarada kĩrãkʼa.
(Éxodo 9:15-17) Mʉ̃ara yataeda zʉbʉria okasi bʉra akʉza bʉ pʉwʉrʉta kaya kayiruaba, mawũã bʉra naʉ̃ drʉade neẽã okasi. 16 Mamina mʉ̃a bʉra naʉ̃ kʼarea zokʼaibʉ kʼãrẽ: mʉ̃a ũdubita mʉ̃ zareata akʉza mawũã mʉ̃ trʉ̃ra naʉ̃ drʉa jõmaʉ̃nẽ jaradamarẽã. 17 ¿Mʉ̃ pʉwʉrʉ ẽdrʉbi ẽ baera, bʉra wabidabasidu yi zromata krĩchabʉka?
it-1-S 1227
Kayirua
Jeowabara nekʼãrẽ baduta oseabʉ ẽbẽrarã kayirurabida iya kãgabʉta odamarẽã. Ẽbẽrarã Jeowa ʉ̃rʉ panʉmina, Jeowabara iduaribi ẽ aukʼara zʉbʉria odamarẽã iyi odepanʉra, adewara ẽbẽrarãba obʉdeba ũdubibʉ iya jõma aripe obʉra audre yibiata (Ro 3:3-5, 23-26; 8:35-39; Sl 76:10). Mawũã jarabʉ Proverbios 16:4: «Jeowabara nekʼãrẽ jõma obʉ iya krĩchabʉ aripe oita, yi ẽbẽrarã kayiruarasida osi makenaita».
Maʉ̃ yizadebemara paraonbasi, Jeowaba kʼawuabisi Moisés akʉza Aaróneba israelitarãra ẽdrʉbibarabasita. Daizezebara paraonʼra so kayiruabi ẽ basi, mamina zokʼai babisi mawũã ũdubita iyira so kayirua baera beibarabasita. Jeowaba kʼãrẽa mawũã odara ũdubibʉ nama Éxodo 9:16: «Mamina mʉ̃a bʉra naʉ̃ kʼarea zokʼaibʉ kʼãrẽ: mʉ̃a ũdubita mʉ̃ zareata akʉza mawũã mʉ̃ trʉ̃ra naʉ̃ drʉa jõmaʉ̃nẽ jaradamarẽã».
Zʉbʉria kĩrãtana 10debema Egipto ʉ̃rʉ zedata akʉza paraon beadata iyi gorogororabawara mar Rojode, naʉ̃ba ũdubibʉ Jeowara zarea mejãcha barabʉta (Éx. 7:14–12:30; Sl 78:43-51; 136:15). Poaga mejãcha berabarida tẽã, Egipto kʼawabada pʉwʉrʉbara bedʼeapanasi maʉ̃ ʉ̃rʉ, mawũã Daizeze trʉ̃ra naʉ̃ drʉa jõmaʉ̃nẽ ũdukʼawuasida (Jos 2:10, 11; 1Sa 4:8). Maʉ̃ kʼarea Jeowaba waña beasibʉrʉ paraonta, ẽbẽra mejãchaʉba kʼawua ẽ bakasi Jeowa zareara kʼãrẽababʉta iyi ʉ̃rʉ ibia bedʼeadaita akʉza iyi pʉwʉrʉ ẽdrʉbita.
Jʉrʉda nekʼãrẽ biʼiabʉta Daizezedebemata
(Éxodo 8:21) Mamina, bʉa mʉ̃ pʉwʉrʉta idu wãbi ẽ bʉrʉ, mʉ̃a zokʼa bʉeya ororota bʉma, bʉ nezokʼarama, bʉ pʉwʉrʉma akʉza bʉ dedabʉrama. Orororaba Egipto dera jõma birayi adewara anañi egoro mayibʉidu.
it-2-S 1077
Ororo
Ebreodera bia kʼawua ẽ kʼãrẽ nedʉwʉrʉbasita zʉbʉria kĩrãtana yi kimarene zokʼadara Egiptoma, mamina maʉ̃bara neida oẽbasi israelitarãra Gosénera (Éx 8:21, 22, 24, 29, 31; Sl 78:45; 105:31). Bedʼea ʽA·róv awuara tradusi zebʉda: «ororo» (EMN, 1988; FS; NC; Mod; NM; VP), «ʉ̃gana» (ATI; Val, 1989) akʉza «ʉ̃gana pãwãra» (LXX).
Kapũrĩa bedʼeade «tábano» jarakĩrãbʉ nedʉwʉrʉra kĩrãtanabʉta. Ororo wẽrãbara kabari nedʉwʉrʉrata akʉza dayi ẽbẽrata mõbe wata dobari, iya kadamae purba mõga amaebari. Ʉ̃kʉrʉ pʉwʉrʉ Áfricadera ororo mejãchabʉba ẽbẽrarãta idu wãbi ẽ ode. Naʉ̃ra nedʉwʉrʉrabara mejãcha zʉbʉria osibaibara egipsiorata, ãyi pakarata adewara naʉ̃ra nedʉwʉrʉrabara beasibaibara.
(Éxodo 8:25-27) Paraonbara trʉ̃si Moisésta Aarónʼʉ̃me mõbe jarasi: «Wãidua, oidua sakripisiota ãyi Daizezeʼa naʉ̃ drʉade». 26 Mamina Moisésba panʉsi: «Daiba mawũã oira biga ẽ. Egipsiorabara jipa igara daiba sakripisio oita Daizeze Jeowaita. Daiba ãyi dabʉ nãã naʉ̃ sakripisio ãya igara oira, ¿ãyara daira mõgaraba bata bea ẽka? 27 Maʉ̃ kʼarea daira wãñi drʉa ibʉawa bʉeda ewari ũbeabayeda, mama Daizeze Jeowa sakripisio oyi, iya jarada kĩrãkʼa».
w04-S 15/3 25 parr. 9
Bedʼea audre yibiata Éxododebemata
8:26, 27. ¿Kʼãrẽa Moisésbara jarasi egipsiorabara «igaraita» israelitaraba sakripisio obadara? Mejãcha nedʉwʉrʉra yiwidʼipanasi Egiptodera. Maʉ̃ kʼarea Moisésba Jeowa sakripisio oya asidera zare ẽ basi ãyi idu wãbita mawũã drʉa ibʉawabʉde sakripisio oita.
Daizeze Bedʼea leita
(Éxodo 8:1-15) Aramaʉ̃ta Jeowaba zokʼasi Moisésta: «Wãra paraon chuidu mõbe jarada: Naʉ̃ta Jeowaba jarabʉ: Mʉ̃ pʉwʉrʉta idu wãbira mʉ̃a yiwidʼidamarẽã. 2 Mamina bʉa idu bʉe ẽ bʉrʉ, mʉ̃a zokʼayi baʉbata bʉ drʉa jõmaʉ̃mae. 3 Do Nilora jõma birayi baʉbaba, naʉ̃ra jõma doedaʉba ʉ̃tʉ zeyi, bʉ deda iwãnañi, bʉ kʼãĩbaride, bʉ korrade, bʉ nezokʼara deda akʉza bʉ pʉwʉrʉ jõma birabayi, bʉ itarrade edabayi akʉza bʉ neobaride. 4 Mawũã baʉbaba birayi bʉta, bʉ pʉwʉrʉta akʉza jõma bʉ nezokʼarata». 5 Maʉ̃ tẽã Jeowaba jarasi Moisésʼa: «Aarónʼa jarada: Bakuru bʉa juwade erbʉba wuara do ʉ̃rʉ, Nilo taede, zenigade, jõma birabira Egipto drʉara baʉbaba». 6 Maʉ̃ kʼarea Aarónbara maʉ̃ Egipto do ʉ̃rʉ juwa wuasi, mawũã baʉbaba birasi maʉ̃ drʉara. 7 Mamina saserdotera jai opanʉrabida abarika osida ãyi jaideba, Egipto drʉade baʉbaba birabisida. 8 Maʉ̃ tẽã paraonbara trʉ̃si Moisésta Aarónʼʉ̃me mõbe jarasi: «Jeowaʼa yiwidʼidua mʉ̃ta ẽdrʉbimarẽã akʉza mʉ̃ pʉwʉrʉta naʉ̃ra baʉbadeba, mʉ̃a marara idibʉrʉ idu bʉei baera pʉwʉrʉra mawũã Jeowaʼa sakripisio odamarẽã». 9 Aramaʉ̃ta Moisésba jarasi paraonʼa: «Bʉa jarada mʉ̃a kʼãrẽ ewaride yiwidʼita Daizezeʼa bʉ kʼarea, bʉ nezokʼa kʼarea, bʉ pʉwʉrʉ kʼarea akʉza bʉ dedabema kʼarea baʉbarata ãĩ wãmarẽã. Nilo dodebʉrʉ bayi baʉbarãra». 10 «Nʉ», panʉsi paraonba. Mawũã Moisésba jarasi: «Kʼawuadamarẽã Jeowa Daizeze kĩrãkʼara neẽãta jãpera, bʉa jarada kĩrãkʼa oyi. 11 Bʉ dedaʉbara baʉbarãra neẽãnʉmeñi, mawũã aduʼabayi bʉta, bʉ nezokʼarata akʉza bʉ pʉwʉrʉrata Nilodebayi baʉbarãra». 12 Mawũã Moisésta Aarónʼʉ̃me wãsi paraonebara akʉza Moisésʼra Jeowaʼa yiwidʼisi baʉbarata iya zokʼadata ãĩ bʉemarẽã paraoneba. 13 Jeowabara osi Moisésba widida kĩrãkʼa akʉza baʉbara ãyi deda beikuabʉsasi, de uda akʉza ne u ubadamae. 14 Egipsiorabara ãba pipia wãsida mõbe mejãcha boremeasi. Drʉara mĩguia bʉsawasi. 15 Paraonba ũduside bedʼea zroma taʉdogota, jẽda so kayiruasi mawũã Moisésba akʉza Aarónʼʉ̃meba jarabʉra ũrĩ ẽ basi, Jeowaba jarada kĩrãkʼa.
20-26 JULIOBAYEDA
BEDʼEA BIA DAIZEZE BEDʼEADE ŨDUDATA | ÉXODO 10, 11
«Moisésta Aarónʼʉ̃mera zowaĩnĩgʉapanasi»
(Éxodo 10:3-6) Aramaʉ̃ta Moisésta Aarónʼʉ̃me paraon nãã jʉ̃ẽsida mõbe jarasida: «Naʉ̃ta jarasi Jeowaba, ebreora Daizezeba: ¿Bʉra kʼai sõbede mʉ̃ juwa edre bʼaita krĩchai? Mʉ̃ pʉwʉrʉra idu wãbira mʉ̃a yiwidʼidamarẽã. 4 Bʉa idu bʉekĩrã ẽ baera mʉ̃ pʉwʉrʉta, mʉ̃a nʉ zokʼayi adichichi zromata bʉ drʉama. 5 Naʉ̃rabara jõma birayi drʉara, maʉ̃ba egorora ũdu ẽ bayi. Ne u yeloba ãrĩna ẽãra adichichiba jõma makoyi, adewara bakuru ʉ̃ra pãwãrabʉsida jõma koyi. 6 Bʉ deta birayi, bʉ nezokʼara desida birayi, Egipto desida jõma birayi. Mia bʉ yibariraba akʉza bʉ zezõnaraba ãyi naʉ̃ drʉade bʉeda kʼãwũã ũdukabasi». Maʉ̃ tẽã, maʉ̃ jõma jara kʼãrãpe wãsi paraonebara.
w09-S 15/7 20 parr. 6
Jesude kĩrãkʼa oibara: zowaĩnĩgʉabara Daizeze bedʼea jaradiabʉrʉde
6 Moisés paraon Egiptodebema nãã jʉ̃ẽsidera zowaĩnĩgʉata ũdubisi, egipsiorãra yiwidʼipanasi ũmadaʉʼa, maʉ̃ra trʉ̃gasida Ra, paraonbara ũmadaʉ wũãwũã baera krĩchabasi iyikʉza daizezeta. Naʉ̃ nokʼobara osibaibara wuabemara nokʼo paraonʼraba oda kĩrãkʼa ãyikʉza yiwidʼibaside. Naʉ̃ nokʼora jipa yãrã ʉ̃tabʉta krĩchabʉ baera akʉza yãrã bedʼea ũrĩkĩrã ẽ baera, mia kʼaiba kʼãrẽ jara ẽ basi ãyara. Mamina Moisés, obeja akʉbarita paraonma bio wãibarabasi. ¿Kʼãrẽta jarasi Moisésbara paraonʼa? Iya jarasi israelitara mejãchabʉta idu wãbimarẽã iyi drʉadeba, adewara jarasi mawũã oẽbʉrʉ Daizezeba zʉbʉria kĩrãtana zebita Egipto jõma ãrĩta. ¿Moisésba mawũã jaraira zowaĩnĩgʉata nesidabasika? Mawũã (Núm. 12:3; Heb. 11:27).
(Éxodo 10:24-26) Paraonbara Moisés trʉ̃ kʼãrãpe mõbe jarasi: «Wãidua, Jeowaʼa yiwidʼide. Mara wũãwũãrasida edeseabʉ mara kʼaidu. Mamina mara obejarata akʉza pakarata namabayi». 25 Aramaʉ̃ta Moisésba panʉsi: «Bʉabida diaibara nedʉwʉrʉta beaita mawũã oprendade babʉeita, maʉ̃ta daiba Daizeze Jeowaʼa diaya. 26 Dai nedʉwʉrʉrasida dai kʼaidu wãña. Daibara amae ẽ bayi nedʉwʉrʉrãra mia ababida, maʉ̃ranebemata daibara zokʼayi Daizeze Jeowaʼa yiwidʼita. Daibara kʼawua ẽ kʼãrẽta diaita Jeowaʼa mainʉ jʉ̃ẽ ẽ nããra».
(Éxodo 10:28) Paraonba jarasi: «Wãidua mʉ̃nebara. Akʉza jẽda zeraidua mʉ̃ma, marata mawũã zera maʉ̃ ewaride beiyi marara».
(Éxodo 11:4-8) Moisésba jarasi paraonʼa: «Naʉ̃ta jarasi Jeowaba: Mʉ̃ra Egiptode berabariyi diamasi ewari ẽzadra. 5 Wũãwũãra nabema Egipto drʉadebʉra jõma beiyi, paraon wũãwũã nabemaneba nezokʼa wẽrã yuba trajabʉ wũãwũã nabemainʉ. Adewara jõma beiyi nedʉwʉrʉra wũãwũã nabemasida. 6 Egipto drʉa jõmaʉ̃nẽ ũrĩnañi so pʉaba mejãcha bʉgadrʉnʉmʉta, maʉ̃ ewari naenara so pʉara maʉ̃ kĩrãkʼa ũrĩkabasi akʉza maʉ̃ kĩrãkʼara wuara ũrĩna ẽ bayi. 7 Mia usasida berʉ ẽ bayi israelitarãra mia ãyi pakaraʼa. Mawũã kʼawuayi maraba Jeowa akʉbʉta saʉ̃ta egipsiorata akʉza saʉ̃ta israelitarata. 8 Aramaʉ̃ta bʉ nezokʼarãra zeyi mʉ̃inʉ mõbe mʉ̃ nãã sãkokode bayi mõbe jaradayi: Wãidua bʉta, bʉ pʉwʉrʉrabawara. Maʉ̃ tẽã mʉ̃ra wãñi». Maʉ̃ jõma jara berabarida tẽã paraonmaeba kĩrʉ wãsi Moisésʼra.
it-2-S 415 parr. 2
Moisés
Nesidabasi zowaĩnĩgʉa bʼaita akʉza ĩjã bʼaita paraonma wãita. Moisésba akʉza Aarónʼʉ̃mebara Jeowa jaure zareadeba naʉ̃ta osida. Krĩchadaibara maʉ̃ ewaribasidera paraonbara drʉara jõma iyi juwa edre erbasita. Paraonbara iyikʉza krĩchabasi daizezeta akʉza kʼawa erbasi ẽbẽrarã ũrãgʼa diabarirata, gorogorora nokʼota, jenenerata, nezokʼarata, nokʼo religionʼrata, mamina saserdotera jai obʉrãra audre Moisés nejʉrabasi. Naʉ̃ra ẽbẽrarãbara paraon awuara zokʼapanasi Egiptode. Naʉ̃ ẽbẽrarã jõma paraon kʼawabasi Egiptodebema daizeze zeri ẽã yiwidʼita. Moisésta akʉza Aarónʼʉ̃mera mawũã ewari aba jʉ̃ẽ ẽ basi paraonmara. Mamina paraonʼra jipa so kayiruabasi, iya kãga ẽ basi baera ebreora idu bʉeita. Paraonba jipa ũrĩkĩrã ẽ basi baera Moisésba akʉza Aarónʼʉ̃meba zʉbʉria kĩrãtana 8debema jarasidadera jʉretasida, adewara zʉbʉria kĩrãtana 9debema jarabʉde paraonbara jarasi beaita jẽda zera (Éx 10:11, 28).
Jʉrʉda nekʼãrẽ biʼiabʉta Daizezedebemata
(Éxodo 10:1, 2) Aramaʉ̃ta Jeowaba jarasi Moisésʼa: «Wãra paraonʼinʉ, mʉ̃a iyira so kayirua bamarẽã iduaribibʉ kʼare akʉza iyi nezokʼaranesida, mawũã ũdudamarẽã mʉ̃a kʼãrẽ oita iyi nãã. 2 Mʉ̃a kʼãwũã iduaribibʉ kʼare, bʉa nebʉra amarẽã bʉ wũãwũãra, bʉ wũãwũã wũãwũãra mʉ̃a sãwũã zʉbʉria osita egipsiorãra akʉza mʉ̃a kʼãrẽ odata ãyide eda. Mawũã maraba kʼawuadayi mʉ̃ra Jeowata».
w95-S 1/9 11 parr. 11
Wãrĩnu kʼawuapanʉrãra daizeze zeri ẽã ʉ̃rʉ panʉ
11 Wabida israelitara Egiptodebʉde Jeowabara zokʼasi Moisésta paraonʼinʉ wãmarẽã mõbe jarasi: «Wãra paraonʼinʉ, mʉ̃a iyira so kayirua bamarẽã iduaribibʉ kʼare akʉza iyi nezokʼaranesida, mawũã ũdudamarẽã mʉ̃a kʼãrẽ oita iyi nãã. Mʉ̃a kʼãwũã iduaribibʉ kʼare, bʉa nebʉra amarẽã bʉ wũãwũãra, bʉ wũãwũã wũãwũãra mʉ̃a sãwũã zʉbʉria osita egipsiorãra akʉza mʉ̃a kʼãrẽ odata ãyide eda. Mawũã maraba kʼawuadayi mʉ̃ra Jeowata» (Éxodo 10:1, 2). Maʉ̃ tẽã israelitara yi ũrĩbʉbara nebʉrabasi ãyi wũãwũãra Jeowaba odata. Akʉza maʉ̃ra wũãwũãraba jaradiaibarabasi ãyi wũãwũãra mawũã owãibarabasi ewari jõmaʉ̃nẽ. Mawũã kĩrãbepanasi Jeowaba sãwũã zokʼadata iyi zareara. Idi ewadebida yibarirabara jaradiaibara ãyi wũãwũãra Jeowa ʉ̃rʉ (Deuteronomio 6:4-7; Proverbios 22:6).
(Éxodo 11:7) Mia usasida berʉ ẽ bayi israelitarãra mia ãyi pakaraʼa. Mawũã kʼawuayi maraba Jeowaba akʉbʉta saʉ̃ta egipsiorata akʉza saʉ̃ta israelitarata.
it-1-S 895 parr. 7
Éxodo
Jeowaba iyi zarea ũdubiside, osi iyi trʉ̃ yi zroma bamarẽã akʉza ẽdrʉbisi Israelta. Ãyi mar Rojo kĩrãbarisidade Moisésta israelitarabawara trã jʉ̃drʉsida, maʉ̃ne Mírian Moisés mebẽãba wuabema wẽrãrabawaraʉba zasida tonoata adewara berasida (Éx 15:1, 20, 21). Jeowabara awuarabʉsi Israelta ãyi nejʉradeba. Israelitara Egiptodeba ãĩ wãsidera neida oda ẽ basi ẽbẽrarãba akʉza mia nedʉwʉrʉraba, mia usasida berʉ ẽ basi ãyi kʼareara (Éx 11:7). Éxododera jara ẽ paraonʼra pusade eda wãsita iyi gorogororabawara mawũã beisita, mamina Salmo 136:15de jarabʉ «ãĩ bʉesi paraonta akʉza iyi gorogorora mar Rojode ta bʉeside».
Daizeze Bedʼea leita
(Éxodo 10:1-13) Aramaʉ̃ta Jeowaba jarasi Moisésʼa: «Wãra paraonʼinʉ, mʉ̃a iyira so kayirua bamarẽã iduaribibʉ kʼare akʉza iyi nezokʼaranesida, mawũã ũdudamarẽã mʉ̃a kʼãrẽ oita iyi nãã. 2 Mʉ̃a kʼãwũã iduaribibʉ kʼare, bʉa nebʉra amarẽã bʉ wũãwũãra, bʉ wũãwũã wũãwũãra mʉ̃a sãwũã zʉbʉria osita egipsiorãra akʉza mʉ̃a kʼãrẽ odata ãyide eda. Mawũã maraba kʼawuadayi mʉ̃ra Jeowata». 3 Aramaʉ̃ta Moisésta Aarónʼʉ̃me paraon nãã jʉ̃ẽsida mõbe jarasida: «Naʉ̃ta jarasi Jeowaba, ebreora Daizezeba: ¿Bʉra kʼai sõbede mʉ̃ juwa edre bʼaita krĩchai? Mʉ̃ pʉwʉrʉra idu wãbira mʉ̃a yiwidʼidamarẽã. 4 Bʉa idu bʉekĩrã ẽ baera mʉ̃ pʉwʉrʉta, mʉ̃a nʉ zokʼayi adichichi zromata bʉ drʉama. 5 Naʉ̃rabara jõma birayi drʉara, maʉ̃ba egorora ũdu ẽ bayi. Ne u yeloba ãrĩna ẽãra adichichi zromaba jõma makoyi, adewara bakuru ʉ̃ra pãwãrabʉsida jõma koyi. 6 Bʉ deta birayi, bʉ nezokʼara desida birayi, Egipto desida jõma birayi. Mia bʉ yibariraba akʉza bʉ zezõnaraba ãyi naʉ̃ drʉade bʉeda kʼãwũã ũdukabasi». Maʉ̃ tẽã, maʉ̃ jõma jara kʼãrãpe wãsi paraonebara. 7 Maʉ̃ tẽã paraon nezokʼaraba jarasida iyaʼa: «¿Kʼai sõbeda naʉ̃ ẽbẽrabara dayirãra bebʉde erbida? Idu wãbira naʉ̃ra ẽbẽrarã ãyi Daizeze Jeowaʼa yiwidʼimarẽã. ¿Bʉa wabida kʼawua ẽka Egipto drʉara ãrĩnʉmʉta?». 8 Maʉ̃ kʼarea akʉza jẽda wesida Moisésta Aarónʼʉ̃me paraon nãã. Iya jarasi: «Wãidua mara Daizeze Jeowaʼa yiwidʼide. Mamina jaraidua, ¿kʼairata wãi mara kʼaidura?». 9 Aramaʉ̃ta Moisésba jarasi: «Daibara Jeowaita piestata oi baera, daira wãñi warrarabawara, dai zõrãrabawara, dai waurabawara, dai kaurabawara, dai obejarabawara akʉza dai pakarabawara». 10 Mamina paraonba panʉsi: «¿Maraba wãrĩnu krĩchapanʉka mʉ̃a mara idu bʉeita akʉza mara wũãwũãta? Maʉ̃ta mawũã berabarira, mʉ̃a ĩjãñi Jeowara marabawarabʉta. Marabara biata krĩchakʉanʉ ẽ. 11 Marara wã ẽ. Yumakẽrã awabʉrʉ wãñi Jeowaʼa yiwidʼide, marabara maʉ̃trʉ widisida baera». Aramaʉ̃ta jʉretasida paraonebara. 12 Jeowaba jarasi Moisésʼa: «Juwa ʉ̃ta wuara Egipto drʉa ʉ̃rʉ mawũã adichichi zromaba maʉ̃ pʉwʉrʉta biramarẽã adewara jõma makoramarẽã chiruata yeloba ãrĩna ẽãta». 13 Mawũã mesera, Moisésbara iyi bakuruba juwa ʉ̃ta wuasi Egipto drʉa ʉ̃rʉ. Aramaʉ̃ta Jeowabara mejãcha pʉãdrʉbisi juwarareba maʉ̃ pʉwʉrʉ ʉ̃rʉ ewaride akʉza diamasibida. Maʉ̃ nrʉena pʉãdrʉba mejãcha wesi adichichi zromara.
27 JULIODEBA-2 AGOSTO EDA
BEDʼEA BIA DAIZEZE BEDʼEADE ŨDUDATA | ÉXODO 12
«¿Kʼãrẽta jarakĩrãbasi kristianoraita Paskuabara?»
(Éxodo 12:5-7) Karnero yumakẽrã zakera neneẽã baibara akʉza poaga. Jidaseabʉ korderota mawũã ẽ bʉrʉ kabritota. 6 Marabara wagadaibara maʉ̃ jedekode ewari 14 bayeda, jõma Israel pʉwʉrʉrabara beibara maʉ̃ diamasi. 7 Maʉ̃ tẽã maʉ̃ waba yiya zoara puerta bakuruta akʉza zoara puerta burusida mara deda koimae.
w07-S 1/1 20 parr. 4
«Marara arigʉ sobiapanañi»
4 Jesura beisi 14 nisane poaga 33de. Maʉ̃ ewaribaside Paskua piestata opanasi Israeldera. Maʉ̃ ewaridera Israel mebẽrãra kordero neneẽã kiruta kopanasi, maʉ̃ba kĩrãbebibasi kordero waba kʼarebasita israelitara wũãwũãra nabema bei ẽ baita, angelba jõma makenaside Egiptodebema wũãwũãra nabemata 14 nisane poaga 1513de kristo nãã (Éxodo 12:1-14). Kordero paskuade beabadabara jarakĩrãbasi Jesuta, maʉ̃ kʼarea Pabloba jarasi, kristo dayirã paskua kĩrãkʼabʉra beabʉda obeja kĩrãkʼa (1 Corintios 5:7). Kordero waba kʼarebada kĩrãkʼa, Jesu waba kʼarebabʉ mejãcha ẽbẽrarãta (Juan 3:16, 36).
(Éxodo 12:12, 13) Naʉ̃ diamasi mʉ̃ra Egiptode berabariyi mõbe mʉ̃ara beayi wũãwũã nabema ẽbẽrarãneta akʉza nedʉwʉrʉraneta jõma Egipto drʉadebʉra. Mʉ̃a kʼawua oyi akʉza zʉbʉria oyi daizeze zeri ẽ Egitodebemara. Mʉ̃ra Jeowa. 13 Waba ũdubiyi mara saʉ̃ dedabʉta. Mʉ̃a wa ũdubʉrʉdera neida oẽbayi. Akʉza Egipto drʉade zʉbʉria kĩrãtana zokʼabʉrʉdera marara bea ẽ bayi.
it-2-S 603 parr. 3
Paskua
Paskuade nekʼãrẽ obadara Jesude aripe berabarisi. Nããra aripe berabaridara Egipto de puertade waba zoasidade, mawũã angelba bea ẽ marẽã wũãwũãra nabemata. Pabloba naʉ̃ ʉ̃rʉ nebʉrasidera jarasi kristianora ungidorãra wũãwũãra nabema kĩrãkʼabʉta (Heb 12:23), adewara Jesubara iyi wa zarradadeba ẽdrʉbisita (1Te 1:10; Ef 1:7). Akʉza naʉ̃ne aripe berabarisi, kordero paskuade beapananara mia iyi bʉwʉrʉra bʉa ẽ baibarabasi. Maʉ̃ kĩrãkʼa jarasida Jesu ʉ̃rʉ, maʉ̃ra aripe berabarisi Jesu beasidade yi bʉwʉrʉ mia kʼãrẽsida bʉa wã ẽ baside (Sl 34:20; Jn 19:36). Paskua judioaraba poagaza opananabara ũdubibasi nekʼãrẽ ʉ̃rabʉrʉ zeita, maʉ̃bara jarakĩrãbasi Jesuta, Daizeze korderota (Heb 10:1; Jn 1:29).
(Éxodo 12:24-27) Marabara naʉ̃ra kʼãwũã owãnaibara. Naʉ̃ kʼãwũã zokʼadara bʉa oibara akʉza bʉ wũãwũãraba. 25 Mara eda wãbʉrʉde Jeowaba maraʼa drʉa diaya adade (iya jarada kĩrãkʼa), naʉ̃ ewarira poagaza opanaidua. 26 Mara warraraba widira, ¿kʼãrẽa poagaza kʼãwũã opanʉ?, 27 maraba panʉña, Paskuade sakripisio opanʉra Jeowaita opanʉ. Israelitara Egiptodebasidera neida oẽ basi akʉza ẽdrʉbisi dayi mebẽrãta egipsiora zʉbʉria oside». Aramaʉ̃ta naʉ̃ pʉwʉrʉra sãkokode besida.
w13-S 15/12 20 parr. 13, 14
«Marabara kĩrãbeibara»
13 Ẽbẽra ʉ̃ra zeirabara nebiata kʼawuaibarabasi yibariraba jaradiai baera yi warrara. Kʼawuaibasi Jeowaba akʉbʉta iyi odepanʉra. Wũãwũãrabara kʼawuaibasi Daizeze ʉ̃rʉ kʼawuaira zare ẽãta akʉza wãrĩnubʉta, iyi pʉwʉrʉ krĩchabʉ baera kʼarebabʉ, mawũã ũdubisi iya israelitara wũãwũãra nabema kʼarebaside egipsiora zʉbʉria oside.
14 Idi ewadera yibarira kristianorabara israelitaraba obada kĩrãkʼa oita nesida ẽ. Mamina bʉara, ¿jaradiabʉka bʉ warrara Daizezeba Kʼarebabʉta iyi pʉwʉrʉra? ¿Bʉ warrarabara akʉbʉka bʉa wãrĩnu ĩjãbʉta Jeowaba idibasidu iyi pʉwʉrʉ akʉbʉta? (Sal. 27:11; Is. 12:2). Bʉa naʉ̃ bedʼea jaradiabʉrʉdera, ¿bʉtrʉ mejãcha bedʼeabʉka wũãwũã bedʼeabi ẽã? Mawũã ẽ bʉrʉ, ¿iyiʉ̃me ibiade bedʼeabʉka? Mawũã obʉbʉrʉ kʼarebayi Jeowa audre ĩjãita.
Jʉrʉda nekʼãrẽ biʼiabʉta Daizezedebemata
(Éxodo 12:12) Naʉ̃ diamasi mʉ̃ra Egiptode berabariyi mõbe mʉ̃ara beayi wũãwũã nabema ẽbẽrarãneta akʉza nedʉwʉrʉraneta jõma Egipto drʉadebʉra. Mʉ̃a kʼawua oyi akʉza zʉbʉria oyi daizeze zeri ẽ Egitodebemara. Mʉ̃ra Jeowa.
it-2-S 601 parr. 5
Paskua
Zʉbʉria kĩrãtana 10debadara Jeowata daizeze zeri ẽãʉ̃me yõbasi mamina maʉ̃ne yi 10debemara audre yibiabasi, nama jõma makenasi baera wũãwũã nabemata (Éx 12:12). Ra daizeze zeri ẽãitara mejãcha yibiabasi karnerora, mamina karnero waba puerta zoasidadera egipsiorabara akʉsida ãyi daizeze wawiada ẽãta. Osiris daizeze zeri ẽãitara mejãcha yibiabasi torora, maʉ̃ba torora wũãwũãra nabema jõma beisidera ũdubisi daizeze zeri ẽãta. Paraonʼra krĩchabasi daizezeta, Ra wũãwũãta krĩchabasi baera, mamina iyi wũãwũã nabema beiside ũdubisi daizeze ẽãta.
(Éxodo 12:14-16) Marabara kĩrãbeibara naʉ̃ ewarira Jeowaita piesta obʉde. Naʉ̃ra kʼãwũã owãnaibara ewari jõmaʉ̃nẽ. Naʉ̃ra ewari jõmaʉ̃nẽ omarẽã zokʼasi baera. 15 Pan ne oreguea neẽãbʉta koibara ewari 7 bayeda. Maʉ̃ kʼarea maʉ̃ ojʉ̃drʉbʉrʉ ewaridera mara dedaʉbara jõma ãĩ bʉeibara pan ne oregueara, yi ẽbẽra maʉ̃ ne oreguea kobʉrʉra, naʉ̃ ewarideba ewari 7 bayeda maʉ̃ra beadaibarabasi Israelde. 16 Maʉ̃ ewari ojʉ̃drʉbʉrʉ ewaridera ãba yi jʉredaibara Daizezeʼa yiwidʼidaita akʉza ewari 7dera ãba yi jʉredaibara abarika oita. Maʉ̃ ewaridera mia kʼaita traja ẽ baibara. Awuarabʉrʉ neoseabʉ ãya koibitabʉrʉ.
it-1-S 548
Ãba yi jʉrepanʉ
Naʉ̃ kʼãwũã ãba yi jʉrebʉrʉdera Daizezeʼa yiwidiʼta mia kʼãrẽ trajosida opana ẽ basi. Ojʉ̃drʉbʉrʉ ewaride akʉza ewari 7de pan ne oreguea neẽãbʉ piesta opanasidera ãba yi jʉrepanasi Daizezeʼa yiwidʼita, maʉ̃ kʼarea Jeowaba jarasi: «Maʉ̃ ewaridera mia kʼaita traja ẽ baibara. Awuarabʉrʉ neoseabʉ ãya koibitabʉrʉ» (Éx 12:15, 16). Mamina Daizezeʼa yiwidʼita ãba yi jʉrepanʉ ewaridera, saserdoterãra Jeowaita sakripisiota opanasi (Le 23:37, 38), naʉ̃ba jarakĩrã ba ẽ basi Jeowaba zokʼadata ãya ũrĩ ẽãta. Ãyi kʼãwũã ãba yi jʉrepanasidera bari ba ẽ basi awuarabʉrʉ maʉ̃bara kʼarebabasi audre Jeowa kʼawa bʼaita. Sabadoza ãba yi jʉrepanasi Jeowaʼa yiwidʼita akʉza ãyaʼa jaradiadamarẽã. Daizeze Bedʼea lepanasi akʉza maʉ̃ta jaradiapanasi maʉ̃ba ãyira kʼarebabasi, maʉ̃ra tẽã jʉ̃neane sinagogade opanasi (Hch 15:21). Ẽbẽrarã sabadode traja ẽ mina akʉza badu ewaride ãba yi jʉrepanʉne, Daizezeʼa yiwidʼipanasi, krĩchapanasi Jeowaba nekʼãrẽ parãna ʉ̃rʉ akʉza iya kʼãrẽ okĩrãbʉ ʉ̃rʉ (akʉra ASAMBLEA).
Daizeze Bedʼea leita
(Éxodo 12:1-15) Aramaʉ̃ta Jeowaba jarasi Egipto drʉade Moisésʼa akʉza Aarónʼa: 2 «Idiba ʉ̃ta naʉ̃ jedekora yi nabema jedekobayi; naʉ̃ maraita yi nabema jedekobayi poaga abaʉdebemata. 3 Bedʼeara jõma Israeldebema pʉwʉrʉra mõbe jarada: Naʉ̃ jedeko ewari 10dera mebẽrã abaʉba jidaibara kordero aba adewara kordero aba jidaibara de abaʉba. 4 Mamina bʉa mebẽrã mejãcha erba ẽ basibʉrʉ kordero jõma makoita ẽbẽra bʉ de kʼawabʉmeba koibarabasi. Marabara dedekaibara ãyi ẽbẽra sõbebʉde akʉza ãya kʼãrẽaba kobʉde. 5 Karnero yumakẽrã zakera neneẽã baibara akʉza poaga aba bʼaibara. Jidaseabʉ korderota mawũã ẽ bʉrʉ kabritota. 6 Marabara wagadaibara maʉ̃ jedekode ewari 14 bayeda, jõma Israel pʉwʉrʉrabara beaibara maʉ̃ diamasi. 7 Maʉ̃ tẽã maʉ̃ waba yiya zoara puerta bakuruta akʉza zoara puerta burusida mara deda koimae. 8 »Maʉ̃ diamasira jõma koibarabasi yi chichira. Tʉbʉde bada kʼãrãpe akʉza koibarabasi pan ne oreguea neẽãʉ̃me akʉza yi chirua soabʉme. 9 Koraidua chichi õgoabʉta akʉza chichi yumata. Baidua jõma tʉbʉde, yi buruta, yi jĩruta akʉza jõma yi jʉ̃sisida. 10 Mia kʼãrẽsida wagarãra chichira nrʉemaita. Chichita wiña bera nrʉemaita ba bʉera tʉbʉde. 11 Mara nekonʉmʉena, maraba kʉrrʉde jʉ̃badara biʼia tajʉ̃ibara akʉza jĩrune jʉ̃badasida jʉ̃ibara adewara bakuruta juwade erbaibara. Mesera nekoibara. Jeowa Paskua baera. 12 Naʉ̃ diamasi mʉ̃ra Egiptode berabariyi mõbe mʉ̃ara beayi wũãwũã nabema ẽbẽrarãneta akʉza nedʉwʉrʉraneta jõma Egipto drʉadebʉra. Mʉ̃a kʼawua oyi akʉza zʉbʉria oyi daizeze zeri ẽ Egitodebemara. Mʉ̃ra Jeowa. 13 Waba ũdubiyi mara saʉ̃ dedabʉta. Mʉ̃a wa ũdubʉrʉdera neida oẽbayi. Akʉza Egipto drʉade zʉbʉria kĩrãtana zokʼabʉrʉdera marara bea ẽ bayi. 14 Marabara kĩrãbeibara naʉ̃ ewarira Jeowaita piesta obʉde. Naʉ̃ra kʼãwũã owãnaibara ewari jõmaʉ̃nẽ. Naʉ̃ra ewari jõmaʉ̃nẽ omarẽã zokʼasi baera. 15 Pan ne oreguea neẽãbʉta koibara ewari 7 bayeda. Maʉ̃ kʼarea maʉ̃ ojʉ̃drʉbʉrʉ ewaridera mara dedaʉbara jõma ãĩ bʉeibara pan ne oregueara, yi ẽbẽra maʉ̃ ne oreguea kobʉrʉra, naʉ̃ ewarideba ewari 7 bayeda maʉ̃ra beadaibarabasi Israelde.