Reperensia Karta nekʼawuabari Bʼaita Kristianora kĩrãkʼa akʉza Trajaita Daizezeita
2-8 NOVIEMBREBAYEDA
BEDʼEA BIA DAIZEZE BEDʼEADE ŨDUDATA | ÉXODO 39, 40
«Moisésbara jõma aripe osi iyaʼa zokʼadapeadara»
(Éxodo 39:32) Idibʉrʉ jõma aribaesida tabernakulode waebadara iyabaʉta karpa de ãba yi jʉrebarita. Israelitarabara jõma aripe osida Jeowaba Moisésʼa zokʼada kĩrãkʼa. Jõma iya jarada kĩrãkʼa osida.
w11 15/9 27 parr. 13
¿Jeowabara mʉ̃ra ũdukʼawuabʉka?
13 Coréira, «Moisésʼra naʉ̃ drʉade yumakẽrãrabʉraira audre urumʉ̃rʉãbasi» (Núm. 12:3). ¿Sãwũã ũdubisi urumʉ̃rʉãbʉta? Jõma ũrĩside Daizezeba zokʼabʉta (Éxo. 7:6; 40:16). Daizeze Bedʼeaba jara ẽ Moisésʼra imitia bedʼeasita Daizezeba zokʼabada ʉ̃rʉ. Bari jaradaita, Jeowaba zokʼaside tabernakulo omarẽã mama iyaʼa yiwidʼidaita. Jeowaba zokʼasi Moisésʼa wua kasumarẽã, ilo kolor barabʉta jʉrʉmarẽã akʉza wuabema nekʼãrẽ okʉamarẽã (Éxo. 26:1-6). Dããraba Jeowaba iyi organizasionera ẽbẽra zõrãrãta zokʼa zebʉrʉta iyi pʉwʉrʉ zokʼamarẽã. Dayirã edaude sobia ẽ baseabʉ ãya zokʼabʉta zare baera dayirãita. Mamina dayirã Zeze Jeowara nemitia oka baera, dayirãta bia akʉbʉ akʉza wuabemara trajota diabʉ. Maʉ̃ kʼarea nekʼãrẽ jõma biʼia jara ũrĩbibʉrʉdera iya kʼawuabʉ kʼãrẽa mawũã jarabʉta. Moisésʼra tabernakulo oita nekʼãrẽ jõma biʼia jara ũrĩbisidera Jeowaʉ̃me kĩrʉ ẽ basi akʉza krĩcha ẽ basi Jeowaba mawũã obʉta iyi zeri ẽãta jaraita. Awuarabʉrʉ ũrĩsi Daizezeba zokʼabʉta akʉza iyibawara trajabʉra jõma aripe obisi Daizezeba zokʼada kĩrãkʼa (Éxo. 39:32). Moisésʼra edabʉta krĩchabasi baera iya kʼawuabasi Daizezeba iyita jʉrʉsita iya kãgabʉ obita.
(Éxodo 39:43) Moisésba akʉ wãside ãyi trajota, ũdusi Jeowaba zokʼada kĩrãkʼa osidata. Aramaʉ̃ta Moisésba nebiata jarasi ãyi ʉ̃rʉ.
(Éxodo 40:1, 2) Aramaʉ̃ta Jeowaba jarasi Moisésʼa: 2 «Nabema jedekode akʉza nabema ewaride nʉmʉñi tabernakulota iyabaʉta karpa de ãba yi jʉrebarita.
(Éxodo 40:16) Moisésbara jõma aripe osi Jeowaba zokʼadata. Jõma aripe osi iya zokʼada kĩrãkʼa.
w05 15/7 26 parr. 3
¿Dayirãba nekʼãrẽ jõma obʉde kʼẽrẽpabʉka?
3 Moisésbara jõma aripe osi Hebreos 3:5ba jarabʉ kĩrãkʼa. ¿Kʼãrẽba kʼarebasi Moisés kʼẽrẽpa bʼaita? Tabernakulo parã kʼãrãpe bʉeside, «Moisésbara jõma aripe osi Jeowaba zokʼadata. Jõma aripe osi iya zokʼada kĩrãkʼa» (Éxodo 40:16). Jeowa ode panʉrabara ũdubibʉ kʼẽrẽpapanʉta ũrĩbʉde. Akʉza kʼẽrẽpabʉta ũdubibara bedʼea zromabʉde. Dayi kʼẽrẽpabʉta ũdubira bari bedʼea zroma awa awuantaibara ẽ. Jesuba jarasi «Iabʼaʉba ne wĩkata bia ora ne biosidʼa bia oya. Iabʼaʉba ne wĩkata bia o ẽbʉrʉ ne biosidʼa bia o ẽã» (Lucas 16:10, Daizeze Bedʼea, Wycliffe Inc.). Dayirãra kʼẽrẽpa bʼaibara nekʼãrẽ dayirãita kʼãrẽ ẽ kĩrãkʼabʉmina.
Jʉrʉda nekʼãrẽ biʼiabʉta Daizezedebemata
(Éxodo 39:34) Karnero e yi purruba zoabʉ anebaribarita akʉza poka e anebaribarita adewara wua yi drabarita.
it-2 663
Poka eta
Sãwũã ũdusida israelitarabara. Daizeze Bedʼeade tá·jasch jarabʉdera jarakĩrãbʉkĩrã poka kĩrã aba, maʉ̃ kʼarea widibʉ ¿sama ũdusida israelitarabara poka era? Ẽbẽraba poka ʉ̃rʉ krĩchabʉrʉdera krichapanʉ drʉa kʉrãzata, mamina ʉ̃kʉrʉ pokabara kãga drʉa jʉ̃wʉrʉata. Idi ewadera naʉ̃ra pokara ũduseapanʉ mar Mediterráneone, adewara drʉa bania jʉ̃wʉrʉabʉmae. Ewari berabari wãne yumakẽrãrabara naʉ̃ pokara bea wãna, Daizeze Bedʼea bʉ jʉ̃drʉda ewaribasidera pokarãra mejãcha basi mar Mediterráneone akʉza mar Rojode. Poaga 1832de, Dictionary of the Holy Bible ingles bedʼeade (de Calmet, pag. 139) naʉ̃ta jarabʉ: «Maʉ̃ mar Rojode drʉa zakerane eda badarane mejãcha basi pokarata, peninsula Sinaí audu» (akʉra The Tabernacleʼs Typical Teaching, de A. J. Pollock, Londres, pag. 47).
it-2 664 parr. 1
Poka eta
Nabema egipsiorãra ne edapanasi akʉza nedobasi mar Rojo kʼawa adewara nekʼãrẽ bio zebasi pʉwʉrʉ mediterraneoradeba. Maʉ̃ba ãyara ũdukʼawuapanasibaibara poka era. Maʉ̃ poka era israelitarabara edesidabaibara Egiptodeba wãside, maʉ̃ awuara egipsioraba diasidabaibara nekʼãrẽ bia mejãcha diasidade (Éx 12:35, 36).
(Éxodo 40:34) Jãrãraba karpa de ãba yi jʉrebarira ana jʉ̃drʉsi akʉza Jeowa zareaba birasi tabernakulora.
w15 15/7 21 parr. 1
¿Bʉa obʉra audre yibiaka wuabemaraba ũdudamarẽã?
Daizeze Bedʼeabara jarabʉ «jãrãraba karpa de ãba yi jʉrebarira ana jʉ̃drʉsi akʉza Jeowa zareaba birasi tabernakulora» maʉ̃ jõma maparãsidade (Éx. 40:34). Naʉ̃ba ũdubisi ãya odara Daizezebara bia akʉbasita. ¿Bezalelba akʉza Oholiabʼba ãya naʉ̃ ũdusidera sãwũãbasiba? Ãya trajo odade ãyi trʉ̃ bʉda ẽ basimina, ãyira sobiapanasi Jeowaba bia akʉbasi baera ãya odata (Prov. 10:22). Ewari berabari wãne ãyira mejãcha sobiapanasi ãya odata wuabida zokʼapanasi baera Jeowaʼa yiwidʼita. Ãyi ũmena jẽda piradrʉbʉrʉdera mejãcha sobiabayi maʉ̃ tabernakuloba 500 poaga berabarida tẽã ibia bedʼeabisi baera Jeowa ʉ̃rʉ.
Daizeze Bedʼea leita
(Éxodo 39:1-13) Ilo pãwãraba, ilo batataba, ilo purruba, wua biʼia kasusida neneẽãbʉmae zokʼadaita. Adewara wua neneẽãbʉta osida Aarónʼitabida Jeowaba Moisésʼa jarada kĩrãkʼa. 2 Efodʼra osida oroba, ilo pãwãraba, ilo batataba, ilo purruba akʉza linoaraba. 3 Orora birachisida martiyoba naʉ̃chayeda. Maʉ̃ tẽã zebisida ilo oro omata ãba kaita ilo pãwãrabawara, ilo batatabawara, ilo purrubawara adewara linoarabawara, mawũã kasida efodʼra. 4 Okiwa ũmene jʉ̃baribara osida, maʉ̃ra ʉ̃tʉbemata ãba zebibasi. 5 Akʉza kʉrrʉde jʉ̃barira ãbabasi efodʼʉ̃me mawũã maʉ̃ta teitea bamarẽã, maʉ̃ra iyabaʉba yi omabasi: oroba, ilo pãwãraba, ilo batataba, ilo purruba akʉza linoaraba, Jeowaba Moisésʼa jarada kĩrãkʼa. 6 Aramaʉ̃ta mõgara onise omaba audu purrasida oroba akʉza seyoba obari kĩrãkʼa Israel 12 wũãwũãra trʉ̃ta bʉsida mõgarade. 7 Maʉ̃ tẽã iyara efod okiwa ʉ̃rʉ bʉesi mõgararata mawũã Israel wũãwũãraba kĩrãbedamarẽã, Jeowaba Moisésʼa jarada kĩrãkʼa. 8 Maʉ̃are osi petoralta. Maʉ̃ra kasida efod oda kĩrãkʼa: oroba, ilo pãwãraba, ilo batataba, ilo purruba akʉza linoaraba. 9 Maʉ̃ petoral bedabʉdade yi drazoata basi 22,2 sentimetro akʉza yi joʉbʉata basi 22,2 sentimetro. 10 Mõgarata kĩrã kimare bʉesida. Nããrabemanera basi rubi, topasio akʉza esmeralda. 11 Yi ũmenebemanera basi turkesa, zapiro akʉza jaspe. 12 Yi ũbeadebemanera basi mõgara léshem, agata akʉza amatista. 13 Yi kimarenebemanera basi krisolito, onise akʉza jade. Naʉ̃ra mõgara jõma audu purrakedea asi oroba.
9-15 NOVIEMBREBAYEDA
BEDʼEA BIA DAIZEZE BEDʼEADE ŨDUDATA | LEVÍTICO 1-3
«¿Kʼãrẽa diapanasi oprendara?»
(Levítico 1:3) Baduba oprenda babaride pakadebemata diakĩrãbʉbʉrʉ, maʉ̃ nedʉwʉrʉra yumakẽrã bʼaibara akʉza kʼãrẽ neneẽã baibara. Jeowa nãã soiduba diaibara karpa de ãba yi jʉrebarimae.
(Levítico 2:1) Aramaʉ̃ne, baduba oprenda netadebemata Jeowaʼa diara, maʉ̃ra arinara bʼaibara. Iya aseiteta maʉ̃ ʉ̃rʉ weibara akʉza olibanosida maʉ̃ ʉ̃rʉ bʼaibara.
(Levítico 2:12) Naʉ̃ra marabara Jeowa diaseabʉ oprenda kĩrãkʼa, maraba ne u nãã jʉrepekʉadata, mamina maʉ̃ra diada ẽ bayi oprenda tũãpoabʉ kĩrãkʼa.
it-2 523 parr. 1
Oprendarata
Oprendara bamata. Oprendara bama diabʉrʉdera jõma diapanasi Daizezeʼa; ẽbẽraba maʉ̃ nedʉwʉrʉ diadara mia kʼãrẽsida jirada ẽ baibarabasi maʉ̃nebemata (akʉra Jue 11:30, 31, 39, 40). Maʉ̃ oprenda nabemara diapanasi Jeowaba ãyita bia akʉmarẽã, ãya ababema oprenda diabʉrʉde kĩrãduamarẽã ãya nekayirua odata. Jesukristora maʉ̃ nedʉwʉrʉ oprendade diabari kĩrãkʼabasi, iyi bebʉta jõma diasi baera.
it-2 525 parr. 8
Oprendarata
Oprendara netadebemata. Oprenda netadebema diapananara naʉ̃rabawara diapanasi, oprendara bamata, oprendara neneẽã erbaita, oprendara nekayirua oda kʼarea akʉza ne u nãã jʉrepekʉadata; mawũã diapanasimina edaude abapai diapanasi (Éx 29:40-42; Le 23:10-13, 15-18; Nú 15:8, 9, 22-24; 28:9, 10, 20, 26-28; nejʉacha zroma 29). Maʉ̃ra mawũã diapanasi Daizezeʼa biga diaita iya nebia diabʉ kʼarea; edaude diapanasi aseiteta akʉza olibanoʉ̃me. Oprendara netadebemara naʉ̃rabasi: nepono arinanebemata, neta pokeabʉta, beka naʉ̃chabʉta. Maʉ̃ oprenda netadebema diapanasidera ʉ̃kʉrʉta bapanasi altarde, ʉ̃kʉrʉta saserdoteraba kopanasi, adewara oprenda neneẽãbʉ erbaita diabasidera maʉ̃bida kobasi maʉ̃ra (Le 6:14-23; 7:11-13; Nú 18:8-11). Naʉ̃ oprendara netadebema diapanasidera ne oreguea neẽã diaibarabasi akʉza kũrabari kũa neẽã (Le 2:1-16).
(Levítico 3:1) Abaʉba pakadebemata oprenda neneẽã erbaita diara, krĩcha ẽã yumakẽrãta mawũã ẽ bʉrʉ yuwẽrãta, maʉ̃ nedʉwʉrʉra Jeowa nãã diabʉrʉdera neneẽã baibara.
it-2 523 parr. 6
Oprendarata
Oprendara neneẽã erbaita. Jeowaba maʉ̃ oprenda bia akʉbasidera ũdubibasi maʉ̃ ẽbẽraʉ̃me biabasita. Maʉ̃ oprenda diadabara yi mebẽrãbawaraʉba maʉ̃ra koseabasi. (Zõrãrã nãã obadaba jarabʉdera, tabernakulo audu basi wuata, maʉ̃ wuade eda audu basi de zakerata; templode osida nekobadarata). Saserdote maʉ̃ okʉadabara kobasi maʉ̃ra akʉza saserdotera mama trajabadarabida. Nedʉwʉrʉ draga bapanasidera Jeowabara biʼia akʉbasi akʉza wara diapanasi Daizezeʼa, bebʉta iyideba zebʉ baera. Maʉ̃ kʼarea saserdoterata, Daizezeʼa yiwidʼipanʉrata, Jeowata ãyibawara ãba nekobʉ kĩrãkʼabasi, maʉ̃ba ũdubikĩrãbasi ãyira neneẽãbasita. Yi ẽbẽra maʉ̃ kobadata jaigʉabasibʉrʉ (Leyba jarabada kĩrãkʼa) mawũã ẽ bʉrʉ maʉ̃ chichi ewari bio badata kobasibʉrʉ (ãrĩsi baera) maʉ̃ra beadaibarabasi maʉ̃ pʉwʉrʉdebara. Maʉ̃ ẽbẽraba iyi jaigʉbʉde maʉ̃ yikota kobasibʉrʉ mawũã ẽ bʉrʉ maʉ̃ ẽbẽraba yiko jaigʉata kobasibʉrʉ Jeowa nãã wawiata ũdubi ẽ bakasi (Le 7:16-21; 19:5-8).
Jʉrʉda nekʼãrẽ biʼiabʉta Daizezedebemata
(Levítico 2:13) Jõma oprendara netadebemata tãta ariguide bʼaibara. Iduaribirãra bʉa oprendara netadebema diabʉta tã wae bʼaita maʉ̃ra bedʼea abarika zeda baera Daizezeʉ̃me. Oprendara diabʉrʉza, tãta dia bʼaibara.
(Ezequiel 43:24) Maʉ̃ta diaibara Jeowaʼa akʉza saserdoteraba tãta bʉeibara adewara maʉ̃ta oprenda bama kĩrãkʼa Jeowa nãã ũdubibara.
w04 15/5 22 parr. 1
Bedʼea audre yibiata Levíticodebemata
2:13. ¿Kʼãrẽa «jõma oprendara» tãena diaibarabasi? Maʉ̃ra mawũã opana ẽ basi sakripisio diabʉrʉde warra bamarẽã. Tãra zokʼapanʉ naʉ̃ drʉa jõmaʉ̃nẽ yikota mesera ãrĩ ẽ marẽã. Tãta oprendaʉ̃me diabasibaibara mawũã ũdubita maʉ̃ oprendara nenẽẽãbʉta akʉza ãrĩ ẽãbʉta.
(Levítico 3:17) Naʉ̃ leyʼra maraba akʉza maraneba zedarabida ewari jõmaʉ̃nẽ oibara, krĩcha ẽã samabʉta: jipa kobe ẽ baibara dragata akʉza wata».
it-1 1039
Draga
Kʼãrẽa maʉ̃ leyʼra diasida. Leyba jarabʉdera wata dragaʉ̃mera maʉ̃ra Jeowadebasita. Dayi bebʉra wadebʉ baera akʉza Jeowabʉrʉ dayirã bebʉ diasi baera, dayirã bebʉra Jeowade (Le 17:11, 14). Krĩchapanasi maʉ̃ chichi nedʉwʉrʉ dragata audre warrabasita. Yi ẽbẽraba maʉ̃ nedʉwʉrʉ draga mawũã diabasi baera ũdubibasi yi audre yibiata diabʉta Jeowaʼa, Jeowaba maʉ̃ draga bama ʉ̃basidera sobiabasi (Le 3:11, 16). Maʉ̃ kʼarea maʉ̃ ẽbẽraba maʉ̃ dragata kobasibʉrʉ Jeowaʼa diadapeadata, zrʉgai kĩrãkʼabasi. Maʉ̃ ẽbẽrarã beadaibarabasi. Nedʉwʉrʉta iyidoba beisibʉrʉ mawũã ẽ bʉrʉ awuru nedʉwʉrʉba beasibʉrʉ yi dragara zokʼaseapanasi nekʼãrẽ awuru oita, mamina wara mia kʼãrẽsida zokʼada ẽ baibarabasi Jeowade baera (Le 7:23-25).
w04 15/5 22 parr. 2
Bedʼea audre yibiata Levíticodebemata
3:17. Kʼawuapanasi baera maʉ̃ draga nedʉwʉrʉdebemara audre yibiabasita akʉza warrabasita, maʉ̃ kʼarea israelitara kĩrãbebipanasi audre yibiara Jeowaitabasita (Génesis 45:18). Naʉ̃ba dayirã kĩrãbebibʉ dayirãnebema audre yibiata Jeowaʼa diaibarata (Proverbios 3:9, 10; Colosenses 3:23, 24).
Daizeze Bedʼea leita
(Levítico 1:1-13) Jeowaba Moisés trʉ̃ kʼãrãpe bedʼeasi karpa de ãba yi jʉrebaridʉba. Iya jarasi: 2 «Israelitarabawara bedʼeara mõbe jarada: Ʉ̃kʉrʉ maranebemaba Jeowaʼa diaibʉrʉ oprendade nedʉwʉrʉ urumʉ̃rʉãbʉta, pakadebema bʼaibara mawũã ẽ bʉrʉ ʉ̃kʉrʉ nedʉwʉrʉdebema bʼaibara. 3 »Baduba oprenda babaride pakadebemata diakĩrãbʉbʉrʉ, maʉ̃ nedʉwʉrʉra yumakẽrã bʼaibara akʉza kʼãrẽ neneẽã baibara. Jeowa nãã soiduba diaibara karpa de ãba yi jʉrebarimae. 4 Yi juwara bʉeibara maʉ̃ oprenda buru bai ʉ̃rʉ, maʉ̃ba kʼarebayi iyi nemitia odara kĩrãduamarẽã. 5 »Mõbe toro zaketa beadaibara Jeowa nãã. Aarón wũãwũãra saserdoteraba, diaibara wata akʉza maʉ̃ba jĩzoabibara altar audu, maʉ̃ra bʉ karpa de ãba yi jʉrebari eda wãbaride. 6 Maʉ̃ oprenda baira jodaibara akʉza wiñane drakʉaibara. 7 Aarón wũãwũãra saserdoteraba, tʉbʉ ara bʉeda kʼãrãpe altarde pʉreabidaibara. 8 Aarón wũãwũãra saserdoteraba, yi drakʉadarata yi buruʉ̃me akʉza yi dragata bʉeibara tʉbʉ ʉ̃rʉ altarde. 9 Yi jʉ̃sirata akʉza yi bʉwʉrʉrata sʉgʉibara baniaba, maʉ̃ saserdotebara maʉ̃rãra jõma chiwãbibara altarde. Maʉ̃ra oprenda bama, mama babari oprenda chiwã tũãbita, Jeowaba ʉ̃kĩrãne. 10 »Baduba oprenda bama nedʉwʉrʉdebemata diakĩrãbʉbʉrʉ (maʉ̃ne karnero warrarabʉta mawũã ẽ bʉrʉ kabrarata), maʉ̃ nedʉwʉrʉra yumakẽrã bʼaibara akʉza neneẽã baibara. 11 Akʉza maʉ̃ra beaibara Jeowa nãã altar wãdeare. Aarón wũãwũãra saserdoteraba, jĩzoabibara maʉ̃ wara altar audu. 12 Iyara wiñane drakʉayi, saserdoteba buruʉ̃me akʉza yi dragata bʉeibara tʉbʉ ʉ̃rʉ altarde. 13 Iya yi jʉ̃sirata akʉza yi bʉwʉrʉrata sʉgʉibara baniaba, maʉ̃ saserdotebara maʉ̃rãra jõma chiwãbibara altarde. Mama babari oprendata chiwã tũãbita, Jeowaba ʉ̃kĩrãne.
16-22 NOVIEMBREBAYEDA
BEDʼEA BIA DAIZEZE BEDʼEADE ŨDUDATA | LEVÍTICO 4, 5
«Dayirãnebema audre yibiata diaibara Jeowaʼa»
(Levítico 5:5, 6) Maʉ̃nebemata baduba nemitiata ora, maʉ̃bara jaraibara kʼãrẽ nemitia odara. 6 Adewara Jeowaita oprendata edeibara iya mawũã nemitiata oda kʼarea, nedʉwʉrʉdebemata obeja wũãwũã yuwẽrã zaketa mawũã ẽ bʉrʉ kabrita yuwẽrã zaketa, diaibara oprenda nekayirua oda kʼarea. Maʉ̃are saserdotebara oyi iya nemitia odata kĩrãduamarẽã.
it-2 524 parr. 13
Oprendarata
Oprendara nemitia oda kʼarea. Maʉ̃ra oprendara diapanasi nekayirua oda kʼarea, dayirãra nekayirua omia baera nemitiata opanʉ. Oprenda nemitia oda kʼarea oprenda nekayirua oda kʼareaʉ̃mera wiña awuarabasi. Oprenda nemitia oda kʼareadebemata yibiabasi jẽda diadaita nekʼãrẽ erbadata. Jeowa nãã aña obasibʉrʉ oprenda nemitia oda kʼareadebemata diapanasi Jeowa sobiabita iya jaradapeadata ũrĩ ẽ basi baera. Maʉ̃ ẽbẽra nemitia odaba iya wua oẽbasibʉrʉ diaseabasi oprenda nemitia oda kʼareadebemata, mawũã jẽda nebia ũduita Jeowaʉ̃me bedʼea abarika zeda kʼarea akʉza iyi aduʼa bʼaita maʉ̃ nekayirua berabaridadeba (akʉra Isa 53:10).
(Levítico 5:7) Iyita obeja diaita neẽbʉrʉ, Jeowaita edeibara tortola ũme mawũã ẽ bʉrʉ pũsĩra wũãwũãta ũme, iya nemitiata osi baera oprenda nemitia oda kʼareadebemata diaibara, ibana aba diaibara oprenda nekayirua oda karea akʉza aba oprenda bama kĩrãkʼa.
w09 1/6 26 parr. 3
Iyara kʼawuabʉ kʼãrẽaba oseabʉta dayirãba
Jeowara so borekeabʉ akʉza wuabemara ʉ̃rʉ krĩchabʉ, Leyba mawũã ũdubisi naʉ̃ta jaraside: «Iyita obeja diaita neẽbʉrʉ, Jeowaita edeibara tortola ũme mawũã ẽ bʉrʉ pũsĩra wũãwũãta ũme, iya nemitiata osi baera oprenda nemitia oda kʼareadebemata diaibara» (nejʉacha zake 7). Bedʼea «diaita neẽbʉrʉ» ebreo bedʼeade naʉ̃ta jarakĩrãbʉ «iyi juwaba ara ẽ bʉrʉ». Israelitaba obeja diaita neẽbasibʉrʉ, Daizezera sobiabasi iya diaseabʉta diabasibʉrʉ: tortola ũme mawũã ẽ bʉrʉ pũsĩra wũãwũãta ũme.
(Levítico 5:11) Kõbe, iya tortola ũme mawũã ẽ bʉrʉ pũsĩra wũãwũã ũme diaita neẽbʉrʉ, 9 sãbʉ arinaradebemata zebira 10, maʉ̃ 10debemata aba jidaibara, maʉ̃ta diaita oprenda nekayirua oda kʼarea. Maʉ̃nera aseiteta olibanoʉ̃me bʉe ẽ baibara, oprenda nekayirua oda kʼareadebema baera.
w09 1/6 26 parr. 4
Iyara kʼawuabʉ kʼãrẽaba oseabʉta dayirãba
¿Maʉ̃ ẽbẽraba ibanata ũme diaita neẽbasibʉrʉ? Leyba jarabasi: «Kõbe, iyita tortola ũme mawũã ẽ bʉrʉ pũsĩra wũãwũã ũme diaita neẽbʉrʉ, 9 sãbʉ arinaradebemata zebira 10, maʉ̃ 10debemata aba jidaibara, maʉ̃ta diaita oprenda nekayirua oda kʼarea. Maʉ̃nera aseiteta olibanoʉ̃me bʉe ẽ baibara, oprenda nekayirua oda kʼareadebema baera» (nejʉacha zake 11). Jeowaba ẽbẽra kʼãrẽ neẽãbʉta ũdubasidera ĩjãbasi diamarẽã oprenda kʼãrẽ wa zarra ẽãbʉsida. Israelde ẽbẽra nekʼãrẽ neẽãbasimina kayiruata osibʉrʉ jʉrʉibarabasi iyi nekayirua kĩrãduamarẽã Daizezeba, mawũã Daizezeʉ̃me bia bʼaita.
Jʉrʉda nekʼãrẽ biʼiabʉta Daizezedebemata
(Levítico 5:1) Yi kʼawuabʉta trʉ̃nara jaramarẽã iya kʼawuabʉta ẽbẽra abaʉba kayirua ochuta, ũdusi baera mawũã ẽ bʉrʉ ũrĩsi baera, mamina jara ẽ bʉrʉ, iya maʉ̃ba nemitia oda kʼarea panʉibara.
w16.02 30 parr. 14
Nabema ẽbẽrarã Daizeze ode kʼẽrẽpapanʉra yizata jidaibara
14 Bia oũdubibʉba kʼarebayi jipa kʼẽrẽpa kãga ũdubita badumae. Krĩchara naʉ̃ta, bʉa mebẽã abaʉba nekayirua odata ũdubita erbʉ. Bʉara kʼẽrẽpa kãgabʉta ũdubikĩrãbʉ bʉ mebẽã, audre bʉ neũdukʼawuabʉrʉ akʉza bʉ mebẽãrabʉrʉ. Mamina bʉa kʼawuachu nããra Jeowaʼa kʼẽrẽpa kãgabʉta ũdubibarata, maʉ̃ kʼarea bʉara Jeowa bedʼeata ũrĩbʉ baera mebẽãta kʼarebabʉ. ¿Bʉra kʼãrẽta oseabʉ? Natáne kĩrãkʼa kãgata ũdubira mõbe mesera ora. Maʉ̃ kʼarea jarada mebẽãʼa zõrãrã kʼarebata jʉrʉmarẽã. Ewari berabarida tẽã bʉa maʉ̃ mebẽãta ũdu ẽ bʉrʉ zõrãrãbawara bedʼeabʉta, bʉa jaraseabʉ. Bʉa maʉ̃ta mawũã ora jipa kʼẽrẽpa kãgabʉta ũdubiyi Daizezeʼa. Akʉza mebẽãʼa kãgata ũdubiyi, zõrãrãba kʼarebai baera kãgade adewara ibiade (akʉra Levítico 5:1 akʉza Gálatas 6:1).
(Levítico 5:15, 16) «Ẽbẽra abaʉba kʼẽrẽpa kãgabʉta ũdubi ẽ basibʉrʉ nemitiata kriña oẽ baera Jeowa nekʼãrẽ neneẽãbʉ nãã, iyara edeibara Jeowa nãã karnero nedʉwʉrʉdebema neneẽãbʉta oprenda nemitia oda kʼarea. Maʉ̃ sõbe balebʉ kʼawuaita zokʼaibara Jeowa deda siklozabʉta. 16 Diaibara iya nemitia oda kʼarea neneẽãbʉmae, adewara iya diaita jarada kĩrãkʼa bʼaibara ababemasida, mamina maʉ̃ ababemanebemara juesoma drakʉa kʼãrãpe aba diaibara. Maʉ̃ra jõma diaibara saserdoteʼa mawũã maʉ̃ oprenda karnerodeba kĩrãduamarẽã iya nemitia odata.
it-2 940 parr. 6
Neneẽãbʉ
Nedʉwʉrʉra akʉza ne u upanʉta. Nedʉwʉrʉ wũãwũã nabema yumakẽrãra, pakadeta, obejadeta akʉza kabradeta, maʉ̃ra Jeowaitara jõma neneẽãbasi, naʉ̃ra kʼareara kʼaiba ẽdrʉbi neẽbasi. Maʉ̃ra nedʉwʉrʉrãra beaibarabasi akʉza maʉ̃nebemata saserdotera diaibarabasi maʉ̃rãra neneẽãbasi baera (Nú 18:17-19). Neta u kʼãrãpe nããra jʉrepebadata, diesmota, sakripisio obʉta, soiduba nekʼãrẽ diabadata maʉ̃rãra neneẽãbasi tabernakuloitabasi baera (Éx 28:38). Naʉ̃ nekʼãrẽ jõma kʼãwũã opanʉra Jeowaita baera arigʉ neneẽãbasi, maʉ̃ kʼarea obe ẽ baibarabasi ẽbẽrarãita adewara wawia ũdubidaibarabasi. Maʉ̃ yizadebemara diesmo leydebemabasi. Bari jaraita ẽbẽra abaʉba maʉ̃ ne u trigodebema jʉrepe kʼãrãpe Jeowaita diesmota jidabasibʉrʉ, maʉ̃ tẽã mawũã jidadata iya, mawũã ẽ bʉrʉ yi mebẽrãba maʉ̃ta jidabasibʉrʉ nedʉwʉrʉra diaita, neoita, mawũãra naʉ̃ ẽbẽrabara ũrĩ ẽ bakasi Daizeze leyba zokʼabʉta nekʼãrẽ neneẽãbʉ ʉ̃rʉ. Leybara zokʼabasi daya diadadeba mawũã abarikʼa diaibarabasi adewara 20% audre maʉ̃nebemata, diaibarabasi. Adewara sakripisiode diaibarabasi karnero neneẽãbʉta. Mawũã obibasi ẽbẽrarãba wawiamarẽã nekʼãrẽ neneẽãbʉ Jeowadeba zebʉta (Le 5:14-16).
Daizeze Bedʼea leita
(Levítico 4:27–5:2) Pʉwʉrʉdebema abaʉba kriña nekayiruata oẽbʉrʉ, Jeowaba kãga ẽ bʉta osi baera, 28 mawũã ẽ bʉrʉ iya kʼawuara nekayirua odata, edeibarabasi kabra zake neneẽãbʉta oprenda nekayirua oda kʼareabʉta. 29 Iyi juwara bʉeibara oprenda nekayirua oda kʼareadebema buru ʉ̃rʉ, maʉ̃ra beadaibara oprenda bama beadamae. 30 Saserdotebara iyi juwa jiwiniba wa oprenda nekayiruadebemaba zoaibara altardebema kachubʉraza oprenda badamae, maʉ̃ wadebemata zarrabibara altar jĩrʉ kʼawa. 31 Sakripisio neneẽã erbaita draga ãĩ bʉebʉ kĩrãkʼa mawũã abarika ãĩ bʉeibara dragasida. Maʉ̃ saserdotebara maʉ̃ra chiwãbibara altarde, mama babari oprendata chiwã tũãbita, Jeowaba ʉ̃kĩrãne. Saserdotebara oyi iya nemitia odata kĩrãduamarẽã. 32 »Mamina, iya maʉ̃ oprenda nekayirua oda kʼarea obeja wũãwũã zaketa diara, maʉ̃ra yuwẽrã zake neneẽã baibara. 33 Iyi juwara bʉeibara oprenda nekayirua oda kʼareadebema buru ʉ̃rʉ, maʉ̃ra beadaibara oprenda bama beadamae. 34 Saserdotebara iyi juwa jiwiniba wa oprenda nekayiruadebemaba zoaibara altardebema kachubʉraza oprenda badamae, maʉ̃ wadebemata zarrabibara altar jĩrʉ kʼawa. 35 Karnero zake sakripisio neneẽã erbaita draga ãĩ bʉebʉ kĩrãkʼa mawũã abarika ãĩ bʉeibara dragasida. Maʉ̃ saserdotebara maʉ̃ra chiwãbibara altarde, wuabemara oprenda bama ʉ̃rʉ. Saserdotebara oyi iya nemitia odata kĩrãduamarẽã, mawũã iya nemitia odata kĩrãduayi.
5 »Yi kʼawuabʉta trʉ̃nara jaramarẽã iya kʼawuabʉta ẽbẽra abaʉba kayirua ochuta, ũdusi baera mawũã ẽ bʉrʉ ũrĩsi baera, mamina jara ẽ bʉrʉ, iya maʉ̃ba nemitia oda kʼarea panʉibara. 2 »Nedʉwʉrʉ beida jaigʉabʉta, oidebemata, dedabemata, egorodebemata, ẽbẽra abaʉba tãbʉbʉrʉ maʉ̃si jaigʉayi akʉza kayiruata oyi, iya kʼawua ẽ nãã.
23-29 NOVIEMBREBAYEDA
BEDʼEA BIA DAIZEZE BEDʼEADE ŨDUDATA | LEVÍTICO 6, 7
«Biga diabʉ ũdubibʉde»
(Levítico 7:11, 12) Naʉ̃ta yi ley sakripisio neneẽã erbaita Jeowaʼa diabʉrʉde. 12 Naʉ̃ta diara biga ũdubita, sakripisio neneẽã erbaita diabʉrʉde diaibara naʉ̃rata, pan borokoabʉ ne oreguea neẽãbʉta aseitebara, adewara gayeta naʉ̃chabʉ ne oreguea neẽãbʉta aseiteba zoaibara akʉza pan borokoa arinarata maʉ̃ra dodoa bʼaibara aseiteba.
w19.11 22 parr. 9
Levítico libroba jaradiabʉrata
9 Yi ũmenebemata jaradiabʉ: Jeowaba kãgabʉta opanʉ iyaʼa biga diapanʉ baera. Akʉdaya Israelde sãwũã Daizezeʼa yiwidʼipanasita: oprendara neneẽã erbaita. Levítico librodeba kʼawuapanʉ, israelitarabara sakripisio neneẽã erbaita diapanasi «biga ũdubita» (Lev. 7:11-13, 16-18). Israelitarabara maʉ̃ oprendara diabasi diakĩrãbasi baera. Maʉ̃ oprendara soiduba opanasi Daizeze Jeowata kãgapanasi baera. Maʉ̃ oprenda diabʉba, yi mebẽrãba akʉza saserdoteraba kopanasi maʉ̃ nedʉwʉrʉ sakripisio chichira. Mamina ʉ̃kʉrʉ maʉ̃ nedʉwʉrʉdeta Jeowadebasi. ¿Saʉ̃rape maʉ̃ra?
(Levítico 7:13-15) Iya oprenda diabʉrʉde naʉ̃rata diaibara, pan borokoabʉta ne oregueabara akʉza sakripisio neneẽã erbaita biga ũdubita. 14 Ʉ̃kʉrʉ maʉ̃ra oprendadebemata Jeowaʼa diaibara. Maʉ̃nebemata saserdoteba sakripisio wa neneẽã erbaita jĩzoabikʉadara, iyidebayi. 15 Sakripisio biga diaita diabʉrʉde, maʉ̃ chichi nedʉwʉrʉ diadara iyabaʉ ewaride koibara. Nrʉemaita amae ẽã.
w00 15/8 15 parr. 15
Sakripisio Dazizezeba kãgabʉta
15 Kapitulo 3 Levítico libroba jarabʉ sakipisio neneẽã erbai ʉ̃rʉ. Ebreo bedʼeade «paz» jarabʉdera bari jarakĩrãkʉ ẽ yõ neẽãta. «Daizeze Bedʼeabida naʉ̃ta jarakĩrãkʉ Daizezeʉ̃me aduʼa bʼaita, biʼia wãita akʉza sobia bʼaita», naʉ̃ta jarabʉ libro Studies in the Mosaic Institutions (Estudio de las instituciones mosaicas). Naʉ̃ sakripisio neneẽã erbaita diapana ẽ basi Diazezeta kĩrʉ ẽ marẽã, awuarabʉrʉ naʉ̃ sakripisiora diapanasi biga diaita Daizezeʉ̃me bia panasi baera akʉza Daizezeba ãyita bia akʉbasi baera. Saserdoteraba Jeowaʼa wata dragaʉ̃me diapanaside, maʉ̃ tẽã saserdoteraba, maʉ̃ yi diadabida koseabasi sakripisiora (Levítico 3:17; 7:16-21; 19:5-8). Maʉ̃ ewaribasidera arigʉ yibiabasi, saserdoterata, oprenda diabarita akʉza Jeowata ãba jewedabʉ kĩrãkʼabasi baera yiko koita maʉ̃ba ũdubibasi ãyirai bia wãita.
(Levítico 7:20) Badu ẽbẽra jaigʉabʉba chichi sakripisio neneẽã erbaidebemata Jeowadeta kora, maʉ̃ra maʉ̃ pʉwʉrʉdebara beadaibara.
w00 15/8 19 parr. 8
Sakripisiora ibia bedʼeabibʉta Jeowaba kãgata
8 ¿Kʼãrẽta krĩchapanʉ maʉ̃ ẽbẽraba oprenda diada ʉ̃rʉ? Leybara jarabasi jõma ẽbẽrarã Jeowaʼa orrapanʉrãra jaigʉa ẽã baibarabasita. Ẽbẽra aba badu kʼãrẽa jaigʉabasibʉrʉ oprenda bamata mawũã ẽ bʉrʉ oprenda neneẽã erbaita diai naweda diaibarabasi oprenda nekayirua oda kʼareadebemata Jeowaba iyita jaigʉa ẽã akʉmarẽã adewara bia akʉmarẽã (Levítico 5:1-6, 15, 17). Mõbe, ¿dayirãbara kʼawuabʉka kʼãrẽa yibiata jaigʉa ẽã baita Jeowa nãã? Dayirãba Jeowaba bia akʉmarẽãbʉbʉrʉ nemitia obʉra oẽ baibara wuara. Maʉ̃ kʼarea dayirãbara zokʼaibara Jeowaba diabʉta iyiʉ̃me bia bʼaita: «zõrãrã kongregasionebemata» akʉza Jesukristota, «iyira beisi dayirã kayirua kĩrãduamarẽã» (Santiago 5:14; 1 Juan 2:1, 2).
Jʉrʉda nekʼãrẽ biʼiabʉta Daizezedebemata
(Levítico 6:13) Tʉbʉra pʉrea bʼaibara altarde. Kia ẽã.
it-1 970
Tʉbʉ pʉrea
Tʉbʉ pʉreara sãwũã zokʼapanasi tabernakulode akʉza templode. Maʉ̃ tʉbʉ pʉreara zokʼasida tabernakulode akʉza maʉ̃ tẽã templode Daizezeʼa yiwidʼita. Diapeda akʉza diamasi sumo saserdotebara baibarabasi insiensora altar insiensode (Éx 30:7, 8). Daizeze leyba jarabasi tʉbʉra pʉrea bʼaibarabasita ewari jõmaʉ̃nẽ altar oprenda nekʼãrẽ ba diabaride (Le 6:12, 13). Judioraba krĩchapanasi Daizezeba pʉreabibasita tʉbʉra altarde, mamina Daizeze Bedʼeabara maʉ̃ra jara ẽ. Jeowaba Moisésʼa jaradadeba, Aarón wũãwũãrabara «tʉbʉ ara bʉeda kʼãrãpe altarde pʉrebidaibara» sakripisio maʉ̃ altar ʉ̃rʉ bʉei nãã (Le 1:7, 8). Saserdoteraba trajo ojʉ̃drʉi nãã diasida sakripisiota. Maʉ̃ra sakripisio diada tẽã Jeowaba bajã tabernakulo ʉ̃rʉ badadeba zokʼa bʉesi tʉbʉ pʉreara maʉ̃ sakripisio baita. Jeowabara maʉ̃ta oẽbasi tʉbʉ pʉreabita, awuarabʉrʉ osi maʉ̃ nedʉwʉrʉ oprenda baita akʉza yi dragata (Le 8:14–9:24). Salomónba templo oda tẽã Jeowaʼa yiwidʼibʉde jarasi maʉ̃ templora iyi Jeowade bʼaita, maʉ̃ jara berabarida tẽã Jeowaba zokʼasi tʉbʉta ʉ̃tʉba maʉ̃ra sakripisiora baita (2Cr 7:1; akʉra Jue 6:21; 1Re 18:21-39; 1Cr 21:26, nama maʉ̃rata jara ũrĩbibʉ sãwũã Jeowaba ʉ̃tʉba tʉbʉ zokʼadata, maʉ̃ oprenda diada bia ũdubita iya diapananaraba).
(Levítico 6:25) «Jarada Aarónʼa akʉza yi wũãwũãra: Naʉ̃ta yi ley oprenda nekayirua oda kʼarea. Oprenda nekayirua oda kʼareadebemata beaibara Jeowa nãã, oprenda bama beadamae. Maʉ̃ra nekʼãrẽ neneẽãbʉ.
si 27 parr. 15
Libro Daizeze Bedʼeadebema numero 3: Levítico
15 3) Diaibarabasi oprenda nekayiruadebema kʼarea nemitia kriña oẽbadata. Kʼãrẽ nedʉwʉrʉ diada kʼawuaita, kʼawuadaibarabasi kʼaiba nemitia odata: saserdoteba, pʉwʉrʉba, nokʼoba mawũã ẽ bʉrʉ badu ẽbẽraba. Oprenda bamata akʉza oprenda neneẽã erbaita maʉ̃ra soiduba diaseapanasi, mamina oprenda nekayirua oda kʼareadebemara awuarabasi, maʉ̃ra diaibarabasi baera (4:1-35; 6:24-30).
Daizeze Bedʼea leita
(Levítico 6:1-11) Jeowaba jarasi Moisésʼa: 2 «Ẽbẽra abaʉta nemitia ora Daizeze nãã, iya wuaga jaradapeadata jẽda diamabʉba zrʉgara maʉ̃ ẽbẽraneta, 3 iya ũdudata ũdu ẽãra, jarara iya oẽbasita nekayirua odata, maʉ̃ kʼarea naʉ̃ta odaibara: 4 maʉ̃ nekayiruata osibʉrʉ jẽda diaibara iya zrʉgadara, adewara iya sewa kʼãrãpe erbadata, iya wuaga erbedata akʉza iya ũduda ũdu ẽ bada jaradata 5 iya oya adara oibara, iya mawũã erbadata jõma diaibara yibariʼa, maʉ̃ awuara abarika diaibara iya jãrĩna kĩrãkʼa, maʉ̃ranebemata juesoma zebi kʼãrãpe aba diaibara. Diaibara yi yibariʼa kʼawuabʉdade maʉ̃ba nemitia odata. 6 Jeowaʼa diaibara iya oprenda nemitia oda kʼarea, saserdoteidu karnero neneẽãbʉta edeibara, maʉ̃ra iya zrʉgada kĩrãkʼa abarika bale bʼaibara. 7 Saserdotebara oyi mama iyira jaigʉa ẽ bamarẽã Jeowa nãã akʉza iya badu nekayirua odata jẽda kĩrãduaseabʉ». 8 Jeowara Moisésʼʉ̃me bedʼeabasi. Iya jarasi: 9 «Naʉ̃ta omarẽã jarada Aarónʼa akʉza yi wũãwũãra: Naʉ̃ta yi ley oprenda bama kʼarea. Oprenda bamara altar ʉ̃rʉ bʼaibara diamasiduba ũnadrʉ zeyeda, maʉ̃ tʉbʉra pʉrea bʼaibara maʉ̃ altarde kia ẽã. 10 Saserdotebara linoara wuata jʉ̃ibara. Adewara ãdia linoaradebemata jʉ̃ibara ãkadabʉ anaita. Maʉ̃are itarra oprenda bamanebemata ãĩ bʉeibara tʉbʉ pʉreaba ba bʉedata altar ʉ̃rʉ akʉza maʉ̃ta altar kʼawa bʉeibara. 11 Iya wua nãã jʉ̃chuada wea kʼãrãpe awuruta jʉ̃ibara, mõbe maʉ̃ pʉwʉrʉ chuadadeba itarrara edeibara neneẽãbʉidu.
30 NOVIEMBREDEBA-6 DICIEMBRE EDA
BEDʼEA BIA DAIZEZE BEDʼEADE ŨDUDATA | LEVÍTICO 8, 9
«Jeowaba dayirã sãwũã nebia diabʉ ʉ̃rʉ»
(Levítico 8:6-9) Moisésba Aarónta yi wũãwũãrabawara zemarẽã jarasi, mõbe sʉgʉsi baniaba. 7 Maʉ̃ tẽã wua jʉ̃bisi Aarónʼra akʉza kurrude jʉ̃barita jʉ̃bisi, wua juwa mosoabʉta jʉ̃bisi, efodta jʉ̃bisi mõbe kurrude jʉ̃barita jʉ̃bisi teitea. 8 Adewara jʉ̃bisi petoralta maʉ̃ne eda bʉesi Urimta akʉza Tumimta. 9 Aramaʉ̃ne buru jʉ̃barita jʉ̃bisi burude akʉza buru jʉ̃ra iyi datrʉde bʼai jʉ̃basi maʉ̃ra oro omabasi, maʉ̃ra ũdubibasi Daizezeita bʼaita, Jeowaba Moisésʼa jarada kĩrãkʼa.
(Levítico 8:12) Jõbodoare, Aarón buru ʉ̃rʉ wea bʉesi aseite neneẽãbʉ jidabarita, jidasi neneẽã bamarẽã.
it-1 1239
Nʉmʉtada
Moisésbara sʉgʉsi Aarónta akʉza yi wũãwũãrata, Nadabta, Abihúta, Eleazarta adewara Itamarta (mawũã ẽ bʉrʉ zokʼasi sʉgʉmarẽã) ewarade ponchera kobre oma chuadaba, maʉ̃are Aarónʼara jʉ̃bisida wua arigʉ biʼiabʉta sumo saserdotedeta (Nú 3:2, 3). Naʉ̃ wua kʼãwũã arigʉ biʼiabʉ jʉ̃bidaba ũdubibasi kʼãrẽ nebiata erbaibarabasita akʉza kʼãrẽta oibarabasita sumo saserdotebasi baera. Maʉ̃ tẽã Moisésbara jarasi maʉ̃ tabernakulora Jeowadeta akʉza jõma maʉ̃ tabernakulode edabadasida, altar oprenda nekʼãrẽ ba diabaridebemata, poncherata adewara nekʼãrẽ jõma mama zokʼabadata Daizezeʼa yiwidʼita. Jõbodoare, Moisésba Aarón buru ʉ̃rʉ wea bʉesi aseite neneẽãbʉ jidabarita (Le 8:6-12; Éx 30:22-33; Sl 133:2).
(Levítico 9:1-5) Ewari 8dera, Moisésbara trʉ̃si Aarónta, yi wũãwũãrata akʉza zõrãrã Israeldebemata. 2 Aarónʼa jarasi: «Bʉita jidara paka zake wũãwũã neneẽãbʉta akʉza karnero aba oprenda bama kĩrãkʼa diaita, mõbe Jeowa nãã ũdubira. 3 Mamina israelitara jarada: Jidara yumakẽrã aba kabradebemata oprenda nekayirua oda kʼarea, paka wũãwũã aba akʉza karnerota aba warrarabʉta (maʉ̃ra neneẽã baibara adewara poaga aba bʼaibara aba abaka) maʉ̃ra diaibara oprenda bama kĩrãkʼa, 4 toro aba akʉza karnero aba diaibara sakripisio neneẽã erbaita, beaibara Jeowa nãã, adewara diaibara opreda netadebemata aseite eda, Jeowata mara idi yi ũdubi baera». 5 Mawũã edesida karpa de ãba yi jʉrebari nãã Moisésba zokʼadata. Maʉ̃are pʉwʉrʉ jõmaʉ̃ba orrasida mõbe piradrʉ besida Jeowa nãã.
it-1 1240 parr. 8
Nʉmʉtada
Ewari 8dera, saserdoterabara ãyi trajora ojʉ̃drʉsida (Moisés kʼareba neẽã) maʉ̃ra okata ojʉ̃drʉsida Israel pʉwʉrʉrane neneẽã panamarẽã. Ãya nesidabasi neneẽã babimarẽã, ãyira nemitia omiabasi baera akʉza ewari bio ẽ basi baera paka zake oro oma yiwidʼipananata, maʉ̃ba Jeowara ãyibawara kĩrʉsi (Le 9:1-7; Éx 32:1-10). Saserdoteraba ãyi trajo maʉ̃ nãã obada jõbisidade, Jeowaba maʉ̃ta ĩjãsi baera zokʼasi tʉbʉta bajã tabernakulo ʉ̃rʉ badadeba, maʉ̃bara jõma ba bʉesi sakripisio altar ʉ̃rʉ badara (Le 9:23, 24).
(Levítico 9:23, 24) Maʉ̃ne, Moisésta Aarónʼʉ̃me eda wãsida karpa de ãba yi jʉrebarima, maʉ̃are ãĩ wãna kʼãrãpe pʉwʉrʉ ʉ̃rʉ nebiata jarasida. Aramaʉ̃ta Jeowa zareara pʉwʉrʉra yi ũdubisi, 24 tʉbʉ pʉreara Jeowadeba ze kʼãrãpe oprenda bamata bawãsi akʉza draga altar ʉ̃rʉ badata. Pʉwʉrʉ jõmaʉ̃ba maʉ̃ta ũdusidade, mejãcha jʉra jʉ̃drʉsida akʉza sãkokode akʼãrãpe kĩrãbarrusida.
w19.11 23 parr. 13
Levítico libroba jaradiabʉrata
13 Yi kimarenebemata jaradiabʉ: Jeowabara iyi organizasionʼa naʉ̃ drʉadebema nebiata diabʉ. Akʉdaya kʼãrẽta berabarisita poaga 1512de Kristo nãã, tabernakulo nʉmʉsidade katuma Sinaíne (Éx. 40:17). Moisésta nãã bedʼeasi ãba yi jʉresidade Aarónta yi wũãwũãrabawara saserdote babisidade. Israel pʉwʉrʉra ãba yi jʉresida saserdoteraba sakripisio sãwũã diabʉ akʉita (Lev. 9:1-5). ¿Jeowabara sãwũã ũdubisi maʉ̃ra saserdotera bia akʉbasita? Aarónba Moisésʼʉ̃meba israelitara ʉ̃rʉ nebia jaraside, Jeowaba ʉ̃tʉba tʉbʉ pʉreata zokʼa bʉesi maʉ̃ sakripisio altar ʉ̃rʉ badata bamarẽã (akʉra Levítico 9:23, 24).
Jʉrʉda nekʼãrẽ biʼiabʉta Daizezedebemata
(Levítico 8:6) Moisésba Aarónta yi wũãwũãrabawara zemarẽã jarasi, mõbe sʉgʉsi baniaba.
w14 15/11 9 parr. 6
Kʼãrẽa dayirãra neneẽã baibara
6 Saserdoterãra jaigʉa ẽ baibarabasi maʉ̃ba dayirã idi nekʼãrẽ jaradiabʉ. Daizeze Bedʼea kʼawuabarirabara kãga ãba yi jʉrebarita jaigʉa ẽãbʉta akʉbʉ baera, adewara kãga baera dayirã sãwũã yobʉta. Maʉ̃ awuara jaradiabʉ jõma Daizeze ode bakĩrãpanʉra ãyi sora kʼãrẽ kayirua neneẽã baibarata (akʉra Salmo 24:3, 4; Is. 2:2, 3). Dayirã Jeowaʼa yiwidʼibʉrʉde, iya kãgabʉ kʼãrẽ kayirua neneẽã bamarẽã dayirã sota, dayirã krĩchata, dayirã kakuata. Maʉ̃ kʼarea ewariza akʉnʉmaibara dayirã sode kʼãrẽtabʉta. Maʉ̃ obʉrʉde dayirãba ũduseabʉ kʼãrẽne awuara bʼaibarata (2 Cor. 13:5). Jeowa ʉ̃rʉ Kʼawuabipanʉrã baduba kriña akʉra ẽbẽrarã ãkadabeta, naʉ̃ta iyikʉza widibara: «¿Mʉ̃ara ũdubibʉka mʉ̃ra neneẽãbʉta?» akʉza kʼarebata jʉrʉibara maʉ̃ nemitia idu bʉita (Sant. 5:14).
(Levítico 8:14-17) Maʉ̃are osi edemarẽã toro oprenda nekayirua oda kʼareadebemata, Aarónba yi wũãwũãrabawaraʉba toro oprenda nekayirua oda kʼarea buru ʉ̃rʉ bʉesi ãyi juwara. 15 Moisésba naʉ̃ nedʉwʉrʉra beasi, maʉ̃ tẽã iyi juwa jiwiniba wata zoasi altardebema kachubʉraza, mawũã maʉ̃ altarta neneẽã babisi. Maʉ̃ wadebemata zarrabisi altar jĩrʉ kʼawa maʉ̃ba nenẽẽã babimarẽã mawũã maʉ̃ ʉ̃rʉ nekayirua kĩrãduabita. 16 Maʉ̃are jõma jidasi draga jʉ̃si ʉ̃rʉ badata, trãine draga eda badata akʉza kotrua ũme yi dragabawara, maʉ̃rata Moisésba chiwãbisi altar ʉ̃rʉ. 17 Mamina maʉ̃ torodebemata (yi eta, yi chichita akʉza yi ãta) pʉwʉrʉ badabeba ãĩ basida, Jeowaba Moisésʼa zokʼada kĩrãkʼa.
it-2 416 parr. 1
Moisés
Daizezeta Moisésdeba Israelʼʉ̃me Ley ʉ̃rʉ bedʼea abarika zesi, mawũã Moisés kĩrãkʼara jãpera neẽbasi wuara, awuarabʉrʉ Jesutrʉ abapai mawũãbasi, Daizezeta Jesudeba ẽbẽrarãbawara Bedʼea abarika zesi. Moisésbara nedʉwʉrʉ sakripisio wa jida kʼãrãpe jĩzoabisi libro bedʼea abarika zeda ʉ̃rʉ, maʉ̃ librobara jarabasi Jeowata pʉwʉrʉrabawara bedʼea abarika zedata (zõrãrã pʉwʉrʉra bari bedʼeabadata). Moisésba maʉ̃ libro akʉda tẽã pʉwʉrʉba panʉsi: «Daibara ũrĩñi jõma Jeowaba jarabʉrʉra» (Éx 24:3-8; Heb 9:19). Iyira Daizeze bari bedʼeabasi baera akʉbasi tabernakulo sãwũã obarabʉta akʉza maʉ̃ne edabʉta Jeowaba zokʼada kĩrãkʼa, adewara ãba yi jʉresi, mamara aseite neneẽãbʉ jidabarita bʉesi Aarón ʉ̃rʉ akʉza tabernakulo ʉ̃rʉ, mamaʉ̃ba ʉ̃ta ojʉ̃drʉsi saserdotera babita. Maʉ̃are iya akʉ jʉ̃drʉsi saserdoteraba trajo obadara (Éx 25–29; Le 8, 9).
Daizeze Bedʼea leita
(Levítico 8:31–9:6) Mõbe Moisésba Aarónʼa jarasi akʉza iyi wũãwũãra: «Yura maʉ̃ chichira karpa de ãba yi jʉrebari wãbarimae. Mama koibara pan eda ẽnebʉmaeʉ̃me saserdote bʼairaita, mʉ̃a zokʼadapeada kĩrãkʼa: Aarónba akʉza yi wũãwũãrabawaraʉba kodayi. 32 Eda chichi bidata akʉza panʼʉ̃me ba bʉedayi tʉbʉde. 33 Jĩga wãbe ẽ baibara karpa de ãba yi jʉrebari eda wãbaride ewari 7 bayeda, ãyi ewari saserdote jidabʉta jõñiena, maʉ̃ra bayi ewari 7 bayeda. 34 Jeowaba zokʼadara obʉda, mara kayirua kĩrãduaita. 35 Marara bʼaibara karpa de ãba yi jʉrebari eda wãbaride diapeda akʉza diamasi ewari 7, marabara Jeowaba jaradara ũrĩbara mawũã bei ẽ baita, mawũã mʉ̃a zokʼasida baera». 36 Aarónba akʉza yi wũãwũãrabawaraʉba osi jõma Jeowaba zokʼadata Moisésdeba.
9 Ewari 8dera, Moisésbara trʉ̃si Aarónta, yi wũãwũãrata akʉza zõrãrã Israeldebemata. 2 Aarónʼa jarasi: «Bʉita jidara paka zake wũãwũã neneẽãbʉta akʉza karnero aba oprenda bama kĩrãkʼa diaita, mõbe Jeowa nãã ũdubira. 3 Mamina israelitara jarada: Jidara yumakẽrã aba kabradebemata oprenda nekayirua oda kʼarea, paka wũãwũã aba akʉza karnerota aba warrarabʉta (maʉ̃ra neneẽã baibara adewara poaga aba bʼaibara aba abaka) maʉ̃ra diaibara oprenda bama kĩrãkʼa, 4 toro aba akʉza karnero aba diaibara sakripisio neneẽã erbaita, beaibara Jeowa nãã, adewara diaibara oprenda netadebemata aseite eda, Jeowata mara idi yi ũdubi baera». 5 Mawũã edesida karpa de ãba yi jʉrebari nãã Moisésba zokʼadata. Maʉ̃are pʉwʉrʉ jõmaʉ̃ba orrasida mõbe piradrʉ besida Jeowa nãã. 6 Moisésba jarasi: «Naʉ̃ta Jeowaba omarẽã zokʼasi iyi zarea mawũã ũdubita».