YI 09
Yiwidʼibʉba Daizezeta orrabibʉ
¿Edaʉde nesidabarika bʉ kʼarebadamarẽã? ¿Jʉrʉbʉka bʉ bedʼea zromaneba kʼareba ẽdrʉbidamarẽã? ¿Nesidabʉka so zarea diadamarẽã mawũã e bʉrʉ bedʼea biata jaradamarẽã? ¿Audre Jeowa kʼawa sentikĩrãbʉka? Yiwidʼibaiba kʼarebaseabʉ maʉ̃ ʉ̃rʉ. Mamina, ¿sãwũã yiwidʼibara? ¿Jõma ũrĩbʉka Daizezebara yiwidʼipanʉra? ¿Sãwũã kʼawuaseabʉ Daizezeba ũrĩbʉta bʉ yiwidʼira? Akʉdaya.
1. ¿Kʼaiʼa yiwidʼibara? ¿Kʼãrẽ ʉ̃rʉ yiwidʼiseabʉpe?
Jesubara jaradiasi Daizeze abapaiʼabʉrʉ yiwidʼibarata. Iya mawũã oũdubisi iya Jeowaʼa yiwidʼibaside. Ewari aba jarasi: «Marara kʼãwũã yiwidʼidua: Zeze ʉ̃tʉbema» (Mateo 6:9). Dayirãta Jeowaʼa yiwidʼipanʉbʉrʉ iyiʉ̃me audre neũdukʼawua baseabʉ.
Dayirã Daizezeʼa yiwidʼibʉrʉdera nekʼãrẽ badu ʉ̃rʉ nebʉraseabʉ. Mamina iya dayirãba yiwidʼibʉta ũrĩmarẽã kãgabʉbʉrʉ, widi ẽ baibara iya jʉrabʉra. Daizeze Bedʼeaba jarabʉ «dayirãba iya kãgabʉde wididara, iya wãrĩnu ũrĩñi» (1 Juan 5:14). Jesuba yizata jarasi dayirãta yiwidʼibʉrʉde kʼãrẽta eda jaraseabʉta (akʉra Mateo 6:9-13). Adewara dayi bedʼea zroma ʉ̃rʉ jarabʉrʉdera, kĩrãdua ẽ baibara Daizezeʼa biga diaita dayi kʼarea nekʼãrẽ ozebʉrʉ baera akʉza widita kʼarebamarẽã wuabemara ẽbẽrarãsida.
2. ¿Sãwũã yiwidʼibara?
Daizeze Bedʼeaba jarabʉ: «iyi daidu zarrabidua mara sora» (Salmo 62:8). Dayirãba Daizezeʼa yiwidʼibʉde jõma jarabʉra dayi sodeba jaraibara. Bʉra yiwidʼiseabʉ nemi jĩgʉa mawũã ẽ bʉrʉ bʉyi krĩchade. Yiwidʼiseabʉ piradrʉ mawũã ẽ bʉrʉ jeweda mamina bʉ yiwidʼibʉrʉde ũdubibara Jeowa wawiabʉta. Adewara yiwidʼiseabʉ badumaeba akʉza badu ewaride.
3. ¿Daizezebara sãwũã panʉbʉ dayirã yiwidʼira?
Edaʉde Daizeze Bedʼeadeba panʉbʉ dayirã yiwidʼira. Adewara Daizeze Bedʼea lebʉba «burubia diabʉ yi kʼawua ẽ bada» (Salmo 19:7; akʉra Santiago 1:5). Dayirã bedʼea zroma mejãcha erbʉde Jeowabara kʼarebabʉ dayirã aduʼa bʼaita. Adewara zokʼabʉ mebẽrãta dayirãba nesidabʉde kʼarebamarẽã.
AUDRE BIʼIA KʼAWUADADRɄ
Kʼawuayi bʉ sãwũã soiduba yiwidʼibarata Daizezeʼa akʉza bʉ yiwidʼibʉba kʼãrẽne kʼarebaita.
4. ¿Kʼãrẽta oibara Daizezeba dayirã yiwidʼi ũrĩmarẽã?
¿Kʼãrẽa Daizezebara jõma ũrĩ ẽ yiwidʼipanʉra? Akʉra BIDEOTA.
Jeowaba kãgabʉ iyi abapaiʼabʉrʉ yiwidʼidamarẽã. Akʉra Salmo 65:2, mõbe naʉ̃ta panʉidua:
Bʉmara, ¿Daizezebara kãgabʉka bʉta iyaʼa yiwidʼimarẽã? ¿Kʼãrẽa mawũã krĩchabʉ?
Dayirãba kãgapanʉbʉrʉ dayirã yiwidʼita Daizezeba ũrĩmarẽã, zarea oibara iya zokʼabʉta ũrĩta. Akʉra Miqueas 3:4; 1 Pedro 3:12, mõbe naʉ̃ta panʉidua:
¿Sãwũã kʼawuaseapanʉ Daizezeba dayi yiwidʼibʉra wãrĩnu ũrĩbʉ kʼawuaita?
Gorogorora drʉazadebemata Daizezeʼa yiwidʼipanʉbʉrʉ ãyi yõta gana diamarẽã ¿Daizezebara ãyi yiwidʼira ũrĩka?
5. Dayirãra soiduba yiwidʼibara
Ʉ̃kʉrʉ ẽbẽrabara Daizezeʼa yiwidʼibʉrʉdera iyabaʉ bedʼeata jarabʉ burude kʼawuadata. ¿Jeowabara kãgaka mawũã yiwidʼidamarẽãra? Akʉra Mateo 6:7, mõbe naʉ̃ta panʉidua:
¿Kʼãrẽta oseapanʉ iyabaʉ bedʼeata jara ẽ baita dayirã yiwidʼibʉde?
Bʉa ewariza krĩchaseabʉ nekʼãrẽ biʼiabʉ ʉ̃rʉ akʉza maʉ̃ ʉ̃rʉ biga diaseabʉ Jeowaʼa. Bʉa mawũã ora, bʉ yiwidʼibʉrʉza semanane bedʼea 7 awuara awuaraka jarayi.
Zeze abaʉba kãgabʉ yi warraba iyaʼa soiduba bedʼeamarẽã. Abarika Jeowabida kãgabʉ dayirã yiwidʼibʉrʉdera soiduba jaradamarẽã.
6. ¿Kʼãrẽa yibia yiwidʼira?
¿Dayi yiwidʼibʉbara sãwũã kʼarebaseabʉ bedʼea zroma erbʉdera? Akʉra BIDEOTA.
Daizeze Bedʼeabara jarabʉ, yiwidʼibʉbara kʼarebaita dayi aduʼa bʼaita bedʼea zroma erbʉmina. Akʉra Filipenses 4:6, 7, mõbe naʉ̃ta panʉidua:
Dayi yiwidʼibʉbara dayi bedʼea zroma jõma erbʉra ara oẽ. Mawũẽra, ¿kʼãrẽne kʼarebasebʉ?
¿Bʉara kʼãrẽta jara kĩrãbʉ Daizezeʼa yiwidʼibʉrʉdera?
¿Kʼawuabasika?
Bedʼea amén jarakĩrãbʉ «bedʼea abarikabʉta». Dããraba bedʼea «amén» jara zebʉdata Daizezeʼa yiwidʼibʉ jõbita. (1 Crónicas 16:36).
7. Ewari jʉrʉda Daizezeʼa yiwidʼita
Edaʉde dayirã nekʼãrẽ mejãcha onʉmʉba kĩrãduabʉ Daizezeʼa yiwidʼita. ¿Jesuitara yibiabasika yiwidʼibaira? Akʉra Mateo 14:23 akʉza Marcos 1:35, mõbe naʉ̃ta panʉidua:
¿Kʼãrẽta obasi Jesubara ewari jʉrʉita Daizezeʼa yiwidʼita?
Kõbe bʉra, ¿sãwũã ewari jʉrʉseabʉ Daizezeʼa yiwidʼita?
Ʉ̃KɄRɄBA KRĨCHAPANɄTA: «Daizezeba dayi yiwidʼita ũrĩmarẽãra yiwidʼibara kapũrĩa bedʼeade».
¿Bʉara sãwũã krĩchabʉ naʉ̃ ʉ̃rʉra?
KĨRÃBEITA
Soiduba yiwidʼibʉbara kʼarebabʉ Daizeze kʼawa bʼaita. Adewara kʼarebabʉ dayirã bedʼea zroma erbʉde aduʼa bʼaita akʉza zarea diabʉ Jeowaba zokʼabʉde oita.
Panʉnadrʉ
¿Kʼaiʼa yiwidʼidaibara?
¿Sãwũã yiwidʼidaibara?
¿Kʼãrẽne kʼarebabʉ yiwidʼibʉbara?
JɄRɄDA AUDRE KʼAWUAITA
Kʼawuara ẽbẽraba widibʉta dayi yiwidʼi ʉ̃rʉ.
«Kĩrã siete widibʉ dayi yiwidʼibʉ ʉ̃rʉ» (Jarakabʉ, 1ne octubrede 2010de)
Kʼawuara kʼãrẽa yibiata bʉ yiwidʼita akʉza sãwũã audre bia yiwidʼita.
Kʼawuara kʼãrẽta jaradiabʉta Daizeze Bedʼeaba kʼaiʼa yiwidʼibara ʉ̃rʉ.
Naʉ̃ bideo trãbide akʉra sãwũã yiwidʼibarata badumae akʉza badu ewaride.