Jeowabara sãwũã kʼarebabʉ iyi ʉ̃rʉ jaradiamarẽãra

1. ¿Ʉ̃ra zeidera kʼãrẽta berabari, mamina kʼãrẽ ʉ̃rʉ ĩjãseapanʉ?

DAYIRÃBA awurura jaradia wãbʉrʉdera kʼawuapanʉ pẽwãnaita. Naʉ̃ kʼãwũã pẽwãpanʉra ʉ̃ra zeidera audre pẽwãnañi (Dan. 11:44; 2 Tim. 3:12; Apoc. 16:21). Dayirãbara ĩjãnaibara Jeowabara kʼarebaita dayirãba nesidabʉde, ¿kʼãrẽa? Jeowabara iyi nezokʼarãra kʼarebabʉ baera ãya zokʼadapeadata odamarẽã ãyita zareabʉmina. Maʉ̃ ʉ̃rʉ biʼia kʼawuadaita, kʼawuadaya propeta Ezequiel ʉ̃rʉ. Iyara jaradiasi judiora Babiloniane pananara.

2. ¿Kʼãrẽta jarasi Jeowabara ẽbẽrarã Ezequiel ewaridebemara ʉ̃rʉ akʉza kʼãrẽta akʉdayi naʉ̃ artikulodera? (Ezequiel 2:3-6).

² ¿Ezequielba Daizeze Bedʼea jaradiabasidera sãwũã panasi ẽbẽrarãra? Jeowaba jarabʉ ãyira buru zarebasita, so zarebasita akʉza ãyara jipa ũrĩkĩrã ẽ basita, ãyira jipa so kayiruabasi. Maʉ̃ba ʉrʉ kĩrãkʼa akʉza drʉzõre kĩrãkʼa panasi. Maʉ̃ba Jeowaba jarada ʉ̃rʉ jarabasi Ezequielʼa: «Perarãra» (akʉra Ezequiel 2:3-6). Ezequielbara Daizeze Bedʼeara soiduba jaradiabasi naʉ̃ra bedʼea ũbea kʼarea, nããra, Jeowaba zokʼasi baera, yi ũmera, Daizeze jaure zareaba so zarea diasi baera, yi ũbeara, Daizeze Bedʼeaba kʼarebasi baera iya ĩjãbʉta audre zarea ĩjãita. Naʉ̃ra bedʼea ũbeabara, ¿sãwũã kʼarebasi Ezequielʼra akʉza sãwũã kʼarebabʉ dayirãta idi ewade?

JEOWABA ZOKʼA BɄESI EZEQUIELTA

3. ¿Ezequielʼra kʼãrẽ bedʼeaba so zarea diasi akʉza Jeowabara sãwũã kʼawuabisi iya kʼarebaita?

³ Jeowaba Ezequielʼa jarasi: «Mʉ̃a bʉta zokʼa bʉeyi» (Ezeq. 2:3, 4). Naʉ̃ bedʼeaba so zarea diasi Ezequielʼa, ¿kʼãrẽa? Iya kĩrãbesibaibara Jeowaba Moisésta akʉza Isaías propeta bamarẽã jidasidera naʉ̃ bedʼea kĩrãkʼabʉta jarasita (Éx. 3:10; Is. 6:8). Adewara iyara kʼawuabasi, Jeowaba sãwũã kʼarebasita naʉ̃ra propetaraba iya zokʼadata omarẽã zarebasimina. Maʉ̃ba Jeowaba Ezequielʼa jarada ũme jaraside: «Mʉ̃a bʉta zokʼa bʉeyi», iyara ĩjãsi Jeowaba kʼarebaita. Akʉza Ezequielba naʉ̃ta bʉsi: «Jeowaba naʉ̃ bedʼeata mʉ̃aʼa jarasi» (Ezeq. 3:16). Akʉza iya edaʉde naʉ̃ta bʉsi: «Akʉza Jeowaba mʉ̃aʼa bedʼeata jarasi» (Ezeq. 6:1). Ezequielbara biʼia kʼawuabasi Jeowabara iyira kʼarebaita. Akʉza yi zezera propetabasi, maʉ̃ba yi zezeba jaradiasibaibara Jeowabara biʼia akʉbʉta iyi propetarãra. Bari jaraita, Jeowaba Isaacʼa, Jacobʼa akʉza Jeremíasʼa naʉ̃ bedʼeata jarasi: «Mʉ̃ra bʉmebʉ» (Gén. 26:24; 28:15; Jer. 1:8).

4. ¿Kʼãrẽ bedʼearaba so zarea diasi Ezequielʼara?

⁴ ¿Kʼãrẽta osida israelitarabara, Ezequielba Daizeze Bedʼea jaradiasidera? Jeowaba jarasi: «Mamina Israelbara ũrĩamabayi bʉ bedʼeara mʉ̃ bedʼeasida ũrĩkĩrã ẽ baera» (Ezeq. 3:7). Israelitaraba Ezequiel bedʼea ũrĩamabasidera, wãrĩnu bʼaira Jeowa bedʼeata ũrĩamapanasi, naʉ̃ bedʼeaba kʼawuabisi Ezequielʼa iya trajo obadara aña oba ẽ basita. Jeowaba Ezequielʼa kʼawuabisi iya kʼawua oya adata aripe berabaribʉrʉdera ẽbẽrarãbara kʼawuaibasita «ãyide edabasita propetata aba» (Ezeq. 2:5; 33:33). Naʉ̃ bedʼeaba so zarea diasi Ezequielʼa iya ẽbẽrarã Daizeze Bedʼea jaradiamarẽã.

JEOWABA DAYIRÃTA ZOKʼABɄ IDI EWADE

5. ¿Kʼãrẽta jarabʉ Isaías 44:8bara dayirã zowaĩnĩgʉa erbaita?

⁵ Dayirãsida zowaĩnĩgʉapanʉ, kʼawuapanʉ baera dayirãsida Jeowaba zokʼasita jaradia wãmarẽã, iya jarabʉ dayirãra iyi ʉ̃rʉ kʼawuabibarita (Is. 43:10). Naʉ̃ra arigʉ yibia. Jeowaba Ezequielʼa pera ẽ marẽã jarada kĩrãkʼa, dayirãbida jarabʉ peraraidua. ¿Kʼãrẽa perada ẽ baibara dayirã nejʉra kʼareara? Dayirãsida Ezequiel kĩrãkʼa Jeowaba zokʼasi baera akʉza iya kʼarebai baera (akʉra Isaías 44:8).

6. (1) ¿Sãwũã ũdubibʉ Jeowabara dayirã kʼarebabʉta? (2) ¿Kʼãrẽba so zarea diabʉ dayirãra?

⁶ Jeowabara jarabʉ dayirãra kʼarebaita. Bari jaraita, Jeowaba naʉ̃ bedʼea jarai nãã: «Marãra mʉ̃ ʉ̃rʉ kʼawuabipanʉra», naʉ̃ta jarasi: «Do kĩrãbaribʉrʉde, mʉ̃ra bʉmebayi, bʉa do kĩrãbaribʉrʉdera maʉ̃bara joga ẽ bayi. Tʉbʉ pʉrea ʉ̃rʉ berabaribʉrʉde, bawa ẽ bayi akʉza tʉbʉ pʉreaba pʉrea ẽ bayi» (Is. 43:2). Dayirãbara edaʉde ũdupanʉ bedʼea zroma dayirã jogabibʉ kĩrãkʼa sentibibʉta akʉza tʉbʉ pʉrea ʉ̃rʉ berabaribʉ kĩrãkʼabʉta, mamina Jeowabara kʼarebabʉ dayirãba Daizeze Bedʼeaba jaradia bamarẽã (Is. 41:13). Ezequiel ewaridebema kĩrãkʼa idi ewadebida ẽbẽrarãbara ũrĩkĩrã ẽ dayirã bedʼeara, mamina naʉ̃ba jarakĩrãbʉ ẽ dayirãba trajo obʉra aña opanʉta. Mamina dayirãra so zareapanʉ, kʼawuapanʉ baera dayirãba obʉba Jeowata sobiabibʉta. Apostol Pablobara jarasi: «Mamina ẽbẽra aba abakaʉba ãyi trajabʉdeba nebiata ũduyi» (1 Cor. 3:8; 4:1, 2). Mebẽã wẽrã aba yi nãã edebari dããrababa naʉ̃ta jarasi: «Mejãcha sobiabʉ kʼawuabʉ baera Jeowabara nebia diabʉta daya obʉ kʼarea».

DAIZEZE JAURE ZAREABA ZAREA DIASI EZEQUIELʼA

7. ¿Sãwũã kʼarebasi Ezequielʼra iya ũduda ʉ̃rʉ krĩchabʉrʉdera? (Akʉra poto yi nããrabemata).

⁷ Ezequielba ũdusi Daizeze jaure zareara kʼãrẽaba zareabʉta. Ezequielba ũdudaba kʼawuabisi Jeowa jaure zareabara kʼarebabʉta angelerãra akʉza Jeowa karru jĩrʉ zromara pirabibʉta (Ezeq. 1:20, 21). ¿Kʼãrẽta osi Ezequielbara maʉ̃ ũdusidera? Iya jarasi iyira sãkokode kʉbesita (Ezeq. 1:28). Tẽã Ezequielba iya ũduda ʉ̃rʉ krĩchabasidera, naʉ̃ba iyaʼa ĩjãbisi Jeowa jaure zareaba kʼarebaita iya Daizeze Bedʼea jaradia bʼaita.

8, 9. (1) ¿Kʼãrẽta jarasi Jeowabara Ezequielʼara? (2) ¿Jeowabara sãwũã audre so zarea diasi Ezequielʼara ẽbẽrarã jaradiamarẽãra?

⁸ Jeowaba jarasi Ezequielʼa: «Yumakẽrã warra, piradrʉra mʉ̃ta bʉme bedʼeai baera». Jeowaba zokʼadaba akʉza jaure zareaba Ezequielba zarea nesidabadata diasi. Ezequielba bʉsi: «Jaureta mʉ̃ ʉ̃rʉ zesi mõbe piradrʉbisi» (Ezeq. 2:1, 2). Tẽã juneane Ezequielʼra Daizeze jaure zareaba kʼarebasi Daizeze Bedʼea jaradiaita (Ezeq. 3:22; 8:1; 33:22; 37:1; 40:1). Daizeze jaure zareaba, zarea diasi Ezequielʼa jaradiamarẽã ẽbẽrarã buru zareara akʉza so zareara (Ezeq. 3:7). Jeowaba Ezequielʼa jarasi: «Mʉ̃a osi bʉ kĩrãta zarea bamarẽã ãyi kĩrã kĩrãkʼa akʉza bʉ datrʉta zarea bamarẽã ãyi datrʉ kĩrãkʼa. Mʉ̃a obʉrʉ bʉ datrʉra diamante kĩrãkʼa bamarẽã, naʉ̃ra audre zareabʉ baera mõgaraira. Perarãra ãyi kʼarea, ãyi kĩrã kʼarea perarãra, ãyara jipa ũrĩkĩrã ẽ baera» (Ezeq. 3:8, 9). Jeowaba naʉ̃ bedʼea jarasidera, naʉ̃ta jarakĩrãbasibaibara Ezequielʼa: ‹Sopʉarãra naʉ̃ra ẽbẽrarãba bʉ bedʼeata jipa ũrĩkĩrã ẽ baera, mʉ̃a zarea diayi bʉaʼa›.

⁹ Maʉ̃ tẽã Daizeze jaure zareabara kʼareba wãsi Ezequielʼra Daizeze Bedʼea jaradiamarẽã. Ezequielba bʉsi: «Jeowa juwara zareabasi mʉ̃ ʉ̃rʉ». Propetabara semana aba berabaribʉrʉdebʉrʉ ũrĩsi iya kʼãrẽ jaraibadara (Ezeq. 3:14, 15). Aramaʉ̃ta Jeowabara Ezequielʼra koribieda edesi, mainʉ iyi jaure zareata Ezequiel ʉ̃rʉ zebisi (Ezeq. 3:23, 24). Mawũãtrʉ Ezequielbara Daizeze Bedʼeara jaradia jʉ̃drʉsi.

DAIZEZE JAURE ZAREBARA ZAREA DIABɄ DAYIRÃʼA IDI EWADE

10. ¿Kʼãrẽ kʼarebata nesidapanʉ Daizeze Bedʼea jaradia wãita akʉza kʼãrẽa?

¹⁰ ¿Kʼãrẽ kʼarebata nesidapanʉ Daizeze Bedʼea jaradia wãita? Naʉ̃ bedʼea kʼawuaita, krĩchadaya kʼãrẽta berabarisita Ezequielta. Iya Daizeze Bedʼea jaradia jʉ̃drʉi nãã, Jeowaba iyi jaure zareadeba zarea iya nesidabʉta diasi. Idi ewadera dayirãbara Daizeze Bedʼeara jaradiaseapanʉ Daizeze jaure zareabʉrʉ kʼarebabʉ baera. ¿Kʼãrẽa mawũã jarapanʉ? Diarura dayirãʉ̃me yõbʉ baera, mawũã dayirãba Daizeze Bedʼea jaradiabʉta, idubʉdamarẽã (Apoc. 12:17). Ẽbẽra mejãchaʉba krĩchapanʉ Diarura zarea mejãcha barabʉta akʉza maʉ̃ba dayirãra iyiʉ̃mera yõbeda ẽãta, mamina dayirãbara daizeze Bedʼea jaradiabʉdeba ũdubiseapanʉ maʉ̃ra sewidata (Apoc. 12:9-11). Dayirãba Daizeze Bedʼea jaradiabʉrʉdera ũdubipanʉ Diaru kʼarea perapanʉ ẽãta akʉza iyira mejãcha zareabarabʉ ẽãta, dayirã pẽwãbʉdade Daizeze Bedʼea jaradiapanʉneba, ¿kʼãrẽta kʼawuapanʉ? Kʼawuapanʉ Jeowabara dayirãʼa zarea diabʉta iyi jaure zareadeba akʉza iya dayirãra biʼia akʉbʉta (Mat. 5:10-12; 1 Ped. 4:14).

11. ¿Sãwũã kʼarebabʉ jaure zareabara akʉza kʼãrẽta odaibara Jeowaba maʉ̃ta diamarẽã?

¹¹ Adewara, ¿kʼãrẽta kʼawuapanʉ Jeowaba Ezequielʼa zarea diadadeba jaradia wãmarẽã? Kʼawuapanʉ Jeowa jaure zareaba kʼarebaseabʉta dayirãba jaradia wãbʉrʉde bedʼea zroma ũdubʉ awuantaita (2 Cor. 4:7-9). ¿Kʼãrẽta oseapanʉ Jeowaba iyi jaure zarea diamarẽã? Yiwidʼida ʉ̃rʉ yiwidʼibara akʉza ĩjãibara Jeowabara ũrĩbʉta dayirã yiwidʼira. Jesuba iyi kʼaidubemaraʼa jarasi «ne widʼiudua», «ne widʼi bʼeba jʉrʉudua», «ne widʼi bʼeba trʉ̃ũdua». Mawũã yiwidʼipanʉbʉrʉ Jeowaba «audre diayi jaure zareata» (Luc. 11:9, 13; Hech. 1:14; 2:4).

DAIZEZE BEDʼEABARA AUDRE ĨJÃBISI EZEQUIELʼA

12. Ezequiel 2:9–3:3 bayeda jarabʉdebara, ¿samaʉ̃ba ʉ̃tʉ zesi akʉza kʼãrẽta eda jarabasi royodera?

¹² Daizeze jaure zareaba zarea diasi Ezequielba Daizeze bedʼea jaradia wãmarẽã, mamina maʉ̃ awa ẽ basi. Daizeze Bedʼeabara audre ĩjãbisi Ezequielʼa. Jeowaba Ezequielʼa ũdubisi juwa abaʉba royota erbʉta (akʉra Ezequiel 2:9–3:3). ¿Samaʉ̃ba ʉ̃tʉ zesi maʉ̃ royora? ¿Kʼãrẽta edabasi maʉ̃ royodera? ¿Akʉza sãwũã zarea diasi Ezequielʼa? Maʉ̃ra zesi Daizeze bʉguedeba. Ezequielba nãã angelera kimare ũdudadebema abaʉta zokʼasibaibara Jeowaba, maʉ̃ royota diamarẽã (Ezeq. 1:8; 10:7, 20). Maʉ̃ royodera eda jarabasi Jeowaba sãwũã kʼawua oibasita israelitara Daizeze Bedʼea jipa ũrĩkĩrã ẽãrata (Ezeq. 2:7). Naʉ̃ bedʼeara royo nãã akʉza ãbʉdearebida bʉbasi.

13. ¿Kʼãrẽta omarẽã zokʼasi Jeowabara Ezequielʼara akʉza kʼãrẽa maʉ̃ra iyitara kũabasi?

¹³ Jeowaba Ezequielʼa jarasi maʉ̃ royota komarẽã akʉza maʉ̃ba jãwamarẽã, aramaʉ̃ta Ezequielbara osi Jeowaba jaradata. ¿Kʼãrẽta jarakĩrãbasi maʉ̃bara? Ezequielbara biʼia kʼawuaibarabasi iya kʼãrẽta jaradiaibarabasita, iyara ĩjãibarabasi naʉ̃ bedʼea ʉ̃rʉ, naʉ̃ba kʼarebai baera iya Daizeze bedʼea jaradiaita. Mamina iya maʉ̃ royo kobʉrʉdera kʼawuasi maʉ̃ra kũrabari kĩrãkʼa kũabasita (Ezeq. 3:3). ¿Kʼãrẽa mawũãbasi? Ezequielʼitara Daizeze Bedʼea jaradia wãira audre yibiabasi baera (Sal. 19:8-11). Iyira mejãcha sobiabasi Jeowaba jidasi baera propeta bamarẽã.

14. ¿Kʼãrẽba kʼarebasi Ezequielba iya zokʼadapeadata aripe omarẽã?

¹⁴ Tẽã Jeowaba Ezequielʼa jarasi: «Bʉ sode wuagara mʉ̃a bedʼea jõma jarabʉta» (Ezeq. 3:10). Naʉ̃ba Jeowaba Ezequielʼa jarakĩrãbasi naʉ̃ bedʼeara iyi burude kʼawuaibarabasita akʉza maʉ̃ ʉ̃rʉ krĩchaibarabasita, Ezequielba maʉ̃ta obʉrʉdera iya ĩjãbʉra audre zarea bʼaibasi adewara Jeowaba Ezequielʼa bedʼeata diasi ẽbẽrarã maʉ̃ta jaramarẽã (Ezeq. 3:11). Maʉ̃ta iyi sode erbasi baera jaradia wãseabasi Jeowaba zokʼada kĩrãkʼa (naʉ̃ testoʉ̃me akʉra Salmo 19:14).

DAIZEZE BEDʼEABARA DAYIRÃʼA ZAREA ĨJÃBIBɄ IDI EWADE

15. Dayirãba Daizeze Bedʼea jaradiabʉ idubʉ ẽ baira, ¿kʼãrẽta nesidapanʉ?

¹⁵ Dayirãba Daizeze bedʼea jaradiabʉ idubʉ ẽ baira, nesidapanʉ dayirãba ĩjãbʉta zarea erbaita Daizeze Bedʼea akʉbʉdeba akʉza soiduba oibara Jeowaba omarẽã zokʼabʉta. Idi ewadera Jeowara dayirãʉ̃me bedʼeabʉ iyi Bedʼeadeba. ¿Kʼãrẽba kʼarebai dayirãra Daizeze Bedʼeaba jarabʉde krĩchabʉ kʼawuaita akʉza bedʼeabʉ kʼawuaita?

16. ¿Kʼãrẽta oibara Daizeze Bedʼeaba jarabʉta dayi soidu jʉ̃ẽmarẽã?

¹⁶ Dayirãba yiko kobʉrʉdera dayirã kakuara bia erpanʉ, abarikabʉ dayirãba Daizeze Bedʼea estudiabʉrʉde akʉza maʉ̃ ʉ̃rʉ krĩchabʉrʉde dayirãba ĩjãbʉra audre zarea erbayi. Jeowabara kãgabʉ dayirãba iyi Bedʼeata biʼia ũrĩmarẽã. Maʉ̃ra oseapanʉ Daizezeʼa yiwidʼibʉde, iyi Bedʼea lebʉde akʉza maʉ̃ ʉ̃rʉ krĩchabʉrʉde. Nãã Daizezeʼa yiwidʼipanʉ mawũã iyi Bedʼeata lekĩrã leita, tẽã iyi Bedʼeata lepanʉ, maʉ̃are biʼia krĩchapanʉ dayirãba lebʉ ʉ̃rʉ. Maʉ̃ta opanʉbʉrʉ, ¿kʼãrẽta berabari? Daizeze Bedʼeaba jarabʉta biʼia kʼawuabʉrʉde, naʉ̃ba kʼarebayi audre zarea ĩjãita.

17. ¿Kʼãrẽa yibia dayirãba biʼia krĩchaita Daizeze Bedʼeade lebʉ ʉ̃rʉ?

¹⁷ ¿Kʼãrẽa yibia Daizeze Bedʼea leita akʉza maʉ̃ ʉ̃rʉ biʼia krĩchaita? Zarea diabʉ idi ẽbẽrarã jaradia wãita akʉza ʉ̃ra zeide Jeowaba ẽbẽrarã sãwũã kʼawua oi ʉ̃rʉ jaradiaita. Dayirãba Jeowaba nebia erbʉ ʉ̃rʉ krĩchabʉrʉde naʉ̃ba kʼarebayi audre Jeowa kʼawa bʼaita adewara dayirãra aduʼapanañi akʉza sobiapanañi (Sal. 119:103).

ZAREA ERPANɄ AWUANTAITA

18. ¿Kʼãrẽta kʼawuadayi ẽbẽrarãbara akʉza kʼãrẽa?

¹⁸ Jeowaba dayirãra propeta bʼaita jida ẽ basi Ezequiel kĩrãkʼa. Mawũãsidu zarea opanʉ ẽbẽrarã jaradiaita Jeowaba iyi Bedʼeade jarabʉ ʉ̃rʉ, naʉ̃ drʉa jõmaʉ̃mae jaradiayeda Jeowaba kãgabʉ kĩrãkʼa. Maʉ̃ba Jeowaba ẽbẽrarã kʼawua oi ewari zebʉrʉdera mia abaʉba jara ẽ bayi ãyara kʼawua ẽ basita akʉza ãyara jaradiada ẽ basita (Ezeq. 3:19; 18:23). Awuarabʉrʉ kʼawuadayi dayirãba jaradiapananara Daizezedeba zesita.

19. ¿Kʼãrẽba zarea diai Daizeze bedʼea jaradia wãita?

¹⁹ ¿Kʼãrẽba zarea diai Daizeze Bedʼea jaradia wãita? Nekʼãrẽ ũbea Ezequiel kʼarebadaba: jaradia wãnañi kʼawuapanʉ baera dayirãra Jeowaba zokʼasita, kʼawuapanʉ baera iyara zarea diabʉta iyi jaure zareadeba adewara Daizeze Bedʼeaba dayirãba ĩjãbʉta audre zarea babibʉ baera. Jeowa kʼarebadeba soiduba jaradiadayi akʉza awuantadayi naʉ̃ «ewarita jõñeẽna» (Mat. 24:13).