¿Kʼãrẽa buru kʼoeita krĩchaibara?

1, 2. ¿Buru kʼoebʉrʉdera kʼãrẽta ũdupanʉ akʉza kʼãrẽta odaita krĩchadaibara?

¿ŨDUBADAKA ẽbẽra buru kʼoenʉmʉta asambleade? ¿Ũdubadaka sãwũã ãya soiduba panʉbʉta ãyaʼa bedʼea widipanʉta? Akʉpanasi ãyi mebẽrãra mejãcha sobiapanasita akʉza yi ẽbẽra buru kʼoeda doeda joaeda kʼãrãpe ʉ̃tʉ zebʉrʉdera, mejãcha sobiapanasi akʉza jõmaʉ̃ba juwa tachipanasi. Semanaza ẽbẽrarã mejãchaʉta ãyi bebʉta Jeowaʼa diapanʉ akʉza buru kʼoepanʉ mawũã Jeowa ʉ̃rʉ Kʼawuabipanʉrã bʼaita.

² Bʉta buru kʼoeita krĩchabʉbʉrʉ, maʉ̃ra audre yibia, bʉa jʉrʉbʉ baera Jeowata akʉza ẽdrʉita naʉ̃ drʉade nemitia obʉdeba (Sal. 14:1, 2). Naʉ̃ artikulora yibia bʉita, kʼãrẽ ẽ bʉta zõrãrã baya mawũã ẽ bʉrʉ warrara baya. Mamina yi buru kʼoemarabara ewari jõmaʉ̃nẽ Jeowaba zokʼabʉta okĩrãpanʉ, maʉ̃ kʼarea akʉdaya bedʼea ũbea kʼãrẽa Jeowa ode bʼaibarata.

KÃGA WÃRĨNUTA AKɄZA ARIPE OBɄTA

3. ¿Kʼãrẽa Jeowa odepanʉrabara kãga wãrĩnura akʉza aripe oita? (Salmo 119:128, 163).

³ Jeowabara zokʼasi iyi pʉwʉrʉrabara wãrĩnuta kãgamarẽã (Zac. 8:19). Jesuba jarasi iyi kʼaidubemara aripe odamarẽã (Mat. 5:6). Naʉ̃ba jarakĩrãbʉ nekʼãrẽ jõma aripe okĩrã bʼaita akʉza Daizeze nãã neneẽã baita. ¿Bʉara kãgaka wãrĩnuta akʉza aripe oita? Kʼawuapanʉ kãgata akʉza kʼawuapanʉ bʉara jʉrata sewa nebʉra jarapanʉra akʉza nekayirua opanʉra (akʉra Salmo 119:128, 163). Dayirãba sewa nebʉrata jarapanʉbʉrʉ Diarude kĩrãkʼa opanañi, iyara naʉ̃ drʉata zokʼabʉ baera. Diarubara krĩchabʉ ewari jõmaʉ̃nẽ Jeowa ʉ̃rʉ imitia bedʼeabita (Juan 8:44; 12:31). Diarubara Daizeze ʉ̃rʉ sewa nebʉra jara zebʉrʉ jardin Edénʼneba, mama jarasi Jeowara nokʼo bia ẽãta akʉza ẽbẽrarã bia akʉ ẽãta (Gén. 3:1, 4, 5). Maʉ̃ba idibasidu Diarubara aña krĩchabibʉ ẽbẽrarã Jeowa ʉ̃rʉ. Ẽbẽrarãba Jeowaba zokʼabʉta okĩrã ẽãnera Diarubara obibʉ iya kãgabʉta (Rom. 1:25-31).

4. ¿Sãwũã ũdubi zebʉrʉ Jeowabara wãrĩnuta jarabʉra? (Akʉra potota).

⁴ Jeowabara wãrĩnuta jarabʉ akʉza ẽbẽra iya kãgabʉara wãrĩnuta jaradiabʉ (Sal. 31:5). Mawũã jaradiabʉba kʼarebabʉ Diarua yi sewabida ẽ marẽã akʉza jaradiabʉ iyi odepanʉra sewa nebʉrata jarada ẽ marẽã, adewara jõma aripe odamarẽã. Naʉ̃ba kʼarebabʉ dayikʉza kãgaita akʉza aduʼa bʼaita (Prov. 13:5, 6). ¿Bʉsida Jeowabara kʼarebasika bʉa Daizeze Bedʼea kʼawua jʉ̃drʉdadeba ʉ̃ta? Bʉa kʼawuasi Jeowa ode bʼaira audre yibiata ẽbẽrarãita adewara bʉitabida (Sal. 77:13). Maʉ̃ kʼarea Jeoware bakĩrãbʉ (Mat. 6:33). Wãrĩnuare bakĩrãbʉ akʉza ẽbẽraba Daizeze ʉ̃rʉ sewa nebʉra jarabʉta ũdubikĩrãbʉ sewidata, ¿sãwũã Jeoware bedʼea baseapanʉpe?

5. ¿Kʼãrẽta oibara wãrĩnuare bʼaita akʉza aripe oita?

⁵ Bʉa obʉba ũdubiseabʉ kʼaiarebʉta, maʉ̃ba jarabʉ kĩrãkʼabʉ: «Mʉ̃ara sewa nebʉra jarakĩrã ẽ Diarude kĩrãkʼa, awuarabʉrʉ wãrĩnuta jarakĩrãbʉ, kãgabʉ Jeowaba mʉ̃ta zokʼamarẽã akʉza okĩrãbʉ iya zokʼabʉta». ¿Sãwũã oseabʉ maʉ̃ra? Jeowa yiwidʼibʉde bʉ bebʉ iyaʼa diakĩrãbʉ jaraita akʉza tẽã buru kʼoebʉrʉde. Dayirãra buru kʼoepanʉ wãrĩnuta kãgapanʉ baera akʉza jõma aripe okĩrãpanʉ baera.

KÃGA JESUKRISTOTA

6. Salmo 45:4ba, ¿kʼãrẽta jarabʉ dayirãba Jesu kãgai ʉ̃rʉra?

⁶ ¿Kʼãrẽa kãga Jesukristora? Akʉra Salmo 45:4ba kʼãrẽta jarabʉta maʉ̃ ʉ̃rʉ (akʉra). Jesubara wãrĩnuta jarabʉ, eda krĩchabʉta ũdubibʉ akʉza jõma aripe obʉ. Bʉa wãrĩnuta kãgabʉrʉ akʉza aripe oita kãgabʉrʉ mawũãra Jesusida kãga. Krĩchara Jesuba kʼãrẽta osita wãrĩnuarare bedʼeaita akʉza jõma aripe oita (Juan 18:37). Mamina, ¿Jesubara sãwũã ũdubibʉ eda krĩchabʉta?

7. ¿Sãwũã krĩchabʉ bʉara Jesu eda krĩchabʉ ʉ̃rʉra?

⁷ Jesubara iya obʉba ũdubibʉ eda krĩchabʉta. Bari jaraita, Jesubara ẽbẽra jõmaʉ̃ta Jeowa ʉ̃rʉ ibia bedʼeamarẽã kãgabʉ, mawũã iyi ʉ̃rʉ ibia bedʼeadamarẽã kãga ẽ (Mar. 10:17, 18; Juan 5:19). Bʉa Jesuba eda krĩchabʉta ũdubibʉ baera, ¿iyita audre kãgabʉ ẽka akʉza iyide kĩrãkʼa okĩrãbʉ ẽka? ¿Kʼãrẽa Jesubara eda krĩchabʉta ũdubibʉ? Iya Jeowata kãga baera akʉza iyide kĩrãkʼa obʉ baera, adewara Jeowabara eda krĩchabʉta ũdubibʉ (Sal. 18:35; Heb. 1:3). ¿Bʉara Jesude kĩrãkʼa okĩrãbʉ ẽka Jeowade kĩrãkʼa obʉ baera?

8. ¿Kʼãrẽa kãgapanʉ Jesura dayirã Nokʼo bamarẽã?

⁸ Kãgapanʉ Jesura dayirã Nokʼo bamarẽã nokʼo bia baera. Jeowabara Jesuʼa nejaradiasi akʉza jidasi Nokʼo bamarẽã (Is. 50:4, 5). Jesubara dayirãta kãgabʉ baera jõmaʉ̃bari beisi (Juan 13:1). Jesura bʉ Nokʼo baera iyi kãgabʉta ũdubibara. Jesubara jarasi iyi wãrĩnu kãgabʉbara ũrĩbʉta iya zokʼabʉra, maʉ̃ratrʉ iya jarabʉ iyi neũdukʼawuarata (Juan 14:15; 15:14, 15). Arigʉ yibia Jesu neũdukʼawua bʼaira.

9. ¿Kʼãrẽne abarikabʉ Jesu buru kʼoedara idibema kristianora buru kʼoebʉmera?

⁹ Jesubara jarasi iyi kʼaidubemarãra buru kʼoedamarẽã (Mat. 28:19, 20). Jesubara yiza biata diasi iyi buru kʼoeside (akʉra rekuadro, «¿Kʼãrẽne awuarabʉ Jesu buru kʼoedara iyi kʼaidubemara buru kʼoedaʉ̃mera?»). Bʉ Jesu buru kʼoedara kʼãrẽne abarikabʉta idi dayirã buru kʼoebʉme. Jesu buru kʼoedaba ũdubisi Jeowaba zokʼabʉde okĩrãbʉta (Heb. 10:7). Idi ewade Jesu kʼaidupanʉra buru kʼoebʉbara ũdubibʉ ãyi bebʉ Jeowaʼa diabʉta akʉza Jeowaba zokʼabʉde bakĩrãpanʉta, mawũã ũdubipanʉ Jesude kĩrãkʼa obʉta.

10. ¿Kʼãrẽa buru kʼoeibara Jesuta kãgabʉbʉrʉ?

¹⁰ Bʉa ĩjãbʉ Jesura Jeowa warrata akʉza sobiabʉ iya zokʼai baera. Bʉa kʼawuabʉ Jesubara eda krĩchabʉta ũdubibʉta akʉza yi Zeze Jeowade kĩrãkʼa obʉta. Bʉa kʼawuabʉ Jesubara yiko diasita yi jarrapanʉra, kayabera bebisita akʉza sopʉabera so zarea diasita (Mat. 14:14-21). Adewara akʉbʉ Jesuba sãwũã zokʼabʉta kongregasionʼra (Mat. 23:10). Akʉza kʼawuabʉ Jesuba Daizeze Nokʼo zokʼa jʉ̃drʉbʉrʉdera nekʼãrẽ bia mejãcha weita. ¿Sãwũã ũdubibʉ Jesu kãgabʉta? Iyide kĩrãkʼa obʉde (Juan 14:21). Jesude kĩrãkʼa oira, nãã Jeowaʼa yiwidʼibara bʉ bebʉ iyaʼa diaya jaraita, maʉ̃ tẽã buru kʼoeibara.

KÃGA JEOWARA

11. Buru kʼoeidera, ¿saʉ̃ta audre yibiabaibara akʉza kʼãrẽa?

¹¹ Atia kʼawuada kĩrãkʼa, buru kʼoeira arigʉ yibia, mamina audre buru kʼoepanʉ Jeowata kãgapanʉ baera. Jesuba jara ũrĩbisi Daizezeba zokʼabʉdebema yi audre yibiara naʉ̃ta: «Kãgaibara bʉ Zeze Jeowara bʉ soiduba, bʉ krĩchaiduba, bʉ kakua jõmainʉba akʉza bʉ zarea jõmainʉba» (Mar. 12:30). ¿Naʉ̃ bedʼeaba ũdubibʉka bʉa Jeowa kʼãrẽaba kãgabʉta?

12. ¿Kʼãrẽa kãgapanʉ Jeowara? (Akʉra potota).

¹² ¿Kʼãrẽa kãgapanʉ Jeowara? Krĩchara naʉ̃ta, bʉa kʼawuasi Jeowaba dayirã bebʉ diabʉta akʉza «jõma kʼãrẽ biara akʉza jõma nekʼãrẽ aripe bʉra» Jeowadeba zebʉta (Sal. 36:9; Sant. 1:17). Mawũẽra nekʼãrẽ bia jõma bʉa erbʉra Daizezeba diada.

13. ¿Kʼãrẽa Jesu beidara Jeowaba dayirã nebia zroma diada?

¹³ Jesu dayirãbari beidara Daizezeba dayirã nebia diada, ¿kʼãrẽa mawũã jarapanʉ? Krĩchara kʼãrẽaba neũdukʼawua biata Jeowata Jesuʉ̃mera. Jesuba jarasi: «Mʉ Zezebara mʉrã kʉãgʼa» akʉza «Mʉãrã mʉ Zezera kʉãgʼata» (Juan 10:17; 14:31). Jeowata Jesuʉ̃mera neũdukʼawua bia basida poaga mejãcha bayeda ãbapanʉ baera (Prov. 8:22, 23, 30). Maʉ̃ kʼarea krĩchara Jeowaitara kʼãrẽaba pʉbasita yi warra dayirã bari idu beabiside. Jeowabara ẽbẽrarãta mejãcha kãgabʉ baera idu beabisi yi warrata, mawũã bʉta akʉza wuabema ẽbẽrarãta ewari jõmaʉ̃nẽ panamarẽã (Juan 3:16; Gál. 2:20). Maʉ̃ba dayirãbara mejãcha kãgadaibara Jeowara.

14. ¿Kʼãrẽta oũdubibara dayirãbara?

¹⁴ Bʉa Jeowara kãga wã iyi ʉ̃rʉ audre kʼawua wãne. Dayirãra iyi kʼawa baseapanʉ, maʉ̃ta oseabʉ iya mawũã jarabʉ baera iyi sobiabita (Prov. 23:15, 16). Dayirã sãwũã bʉdeba ũdubiyi Jeowara kãgabʉta, mawũã dayi bedʼea awaʉba jara ẽ baibara, awuarabʉrʉ oũdubibara (1 Juan 5:3). Dayirãitara audre yibiabayi Jeowaba kãgabʉ obadaita.

15. ¿Sãwũã ũdubiseabʉ Jeowa kãgabʉta?

¹⁵ ¿Sãwũã ũdubiseabʉ Jeowa kãgabʉta? Nããra, Jeowaʼa yiwidʼibara dayi bebʉ iyaʼa diaya jaraita (Sal. 40:8). Maʉ̃ tẽã ẽbẽra jõmaʉ̃ra ũdubira Jeowa odebidata buru kʼoebʉrʉde. Naʉ̃ artikulode kʼawuada kĩrãkʼa buru kʼoebʉrʉdera dayirãra mejãcha sobiabʉ akʉza kʼawuapanʉ maʉ̃neba ʉ̃ta dayi bebʉra awuarabidata. Maʉ̃neba ʉ̃ta Jeowaba kãgabʉta ojʉ̃drʉbʉrʉ, mawũã daya kãgabʉta oda ẽ bayi (Rom. 14:8; 1 Ped. 4:1, 2). Buru kʼoeira audre yibia, naʉ̃ba kʼarebabʉ baera bʉ bebʉra bia wãmarẽã akʉdaya kʼãrẽa kʼarebabʉta maʉ̃bara.

16. Salmo 41:12de jarabʉdera, ¿kʼãrẽ nebiata diai Jeowabara ẽbẽra iyi odebidara?

¹⁶ Jeowabara nekʼãrẽ diakĩrã. Dayirãba iyaʼa nekʼãrẽ diabʉmina, iya dayirãʼa audre diabʉ (Mar. 10:29, 30). Jeowabara dayirãra sobia babiyi akʉza aduʼa babiyi naʉ̃ drʉa nekayirua omianepanʉmina. Buru kʼoebʉrʉdera ʉ̃rabʉrʉ Jeowaba zokʼabʉta ojʉ̃drʉbʉrʉ maʉ̃ba jõma mama taʉbita nesida ẽ, awuarabʉrʉ ewari jõmaʉ̃nẽ obaseabʉ Jeowaba zokʼabʉta. Dayirãba Jeowa kãgabʉra dayi zokʼai bʉedara ewariza audre kãga wãñi, adewara ẽjũã biadera dayirã jõmaʉ̃ta beika bʼai baera mama taʉ ẽ bayi (akʉra Salmo 41:12).

17. ¿Bʉa kʼãrẽta diaseabʉ Jeowaʼa iya erbʉ ẽãta?

¹⁷ Jeowa yiwidʼibʉrʉdera jaraita bʉ bebʉ iyaʼa diaita akʉza tẽã buru kʼoebʉrʉde, mawũã obʉba ũdubibʉ Jeowaʼa nebia diabʉrʉta. Jeowabara nekʼãrẽ biata bʉa dia zebʉrʉ, maʉ̃ba bʉra mejãcha sobia zebʉrʉ, maʉ̃ kʼarea bʉa diaseabʉ Jeowaba erbʉ ẽãta, maʉ̃ra naʉ̃: dayi buru kʼoeita, mawũã Jeowaba kãgabʉta soiduba obayi (Job 1:8; 41:11; Prov. 27:11). ¿Sãwũã bia zokʼaseabʉ bʉ bebʉra? Bʉ buru kʼoebʉrʉde akʉza mawũã ũdubibʉ Jeowa kãgabʉta.

¿BURU KʼOEYA AWA BɄKA?

18. ¿Bʉyikʉza kʼãrẽta widiseabʉ?

¹⁸ Ẽbẽra abaʉba bʉaʼa widira sõbede buru kʼoeita, maʉ̃ra bʉabʉrʉ kʼawua panʉseabʉ, maʉ̃ kʼarea bʉyikʉza widibara: «¿Mʉ̃ara kʼãrẽta jʉ̃ãbʉ buru kʼoeita?» (Hech. 8:36). Kĩrãbera bedʼea ũbea kʼawuadata. Nããra, bʉa kãgabʉ wãrĩnuta akʉza aripe oita. Bʉyikʉza widira: «¿Kãgabʉka ewari zemarẽã jõmaʉ̃ba wãrĩnuta kãgamarẽã akʉza aripe odamarẽã?». Ũmeta, kãgabʉ Jesuta. Bʉyikʉza widira: «¿Kãgabʉka Jesura mʉ̃ Nokʼo bamarẽã akʉza iyide kĩrãkʼa okĩrãbʉka?». Yi ũbeata, audre yibiata, kãgabʉ Jeowata. Bʉyikʉza widira: «¿Soiduba okĩrãbʉka Jeowaba zokʼabʉra iyita sobia bamarẽã?». Bʉa naʉ̃ta jõma bia panʉsibʉrʉ akʉza bʉmabʉbʉrʉ, ¿kʼãrẽa wabida buru kʼoe ẽ bʉra? (Hech. 16:33).

19. ¿Kʼãrẽa mejãcha krĩcha ẽ baibara buru kʼoeita? Yizata jara ũrĩbira (Juan 4:34).

¹⁹ Wabida bia kʼawua ẽ bʉrʉ buru kʼoeita, mawũã ẽ bʉrʉ buru kʼoe ẽãta, krĩchara Jesuba yiza jarada ʉ̃rʉ (akʉra Juan 4:34). Jesuba jarasi Jeowaba zokʼabʉ oira yiko koi kĩrãkʼabʉta, ¿kʼãrẽa? Yiko koira jõmaita yibia baera. Jesubara kʼawuabasi Jeowaba dayirã omarẽã zokʼabʉra jõma yibiata. Jeowabara zokʼa ẽ dayirã zʉbʉriabibʉra, ¿Jeowaba kãgabʉka buru kʼoemarẽã? Mawũã (Hech. 2:38). Bʉa ĩjãseabʉ Jeowaba zokʼabʉta obʉbʉrʉ bʉra bia wãita. Bʉa yiko koita biode krĩcha ẽ kĩrãkʼa abarika buru kʼoeisida mejãcha krĩcha ẽ baibara.

20. ¿Kʼãrẽta kʼawuadai wuarebema artikulodera?

²⁰ ¿Buru kʼoeya awa bʉka? Mejãchaʉba jaraseapanʉ: «Mʉ̃ra wabida buru kʼoekĩrã ẽ». Bʉ buru kʼoebʉrʉba ũdubiyi bʉa jidadara audre yibiata, mamina mawũã oira nesidabʉ ewarita, bia krĩchaita, mawũã buru kʼoeya awa bʼaita. Bʉta buru kʼoekĩrãbʉbʉrʉ, ¿kʼãrẽta oibara? Wuarebema artikulode kʼawuadayi naʉ̃ ʉ̃rʉ.