¿Bʉra zõrãrã kʼarebabari bakĩrãbʉka?

1. ¿Pablobara sãwũã akʉbasi zõrãrã kʼarebabarirãra?

ZÕRÃRÃ kʼarebabarirabara mejãchade kʼarebapanʉ kongregasione, Pabloba ũdubisi naʉ̃ra mebẽrãra mejãcha kãgabʉta iya Filipodebemara kartara bʉ diabʉeside saludasi zõrãrã kʼarebabarirata akʉza zõrãrã kongregasionebemarata (Filip. 1:1).

2. ¿Luisʼra sãwũã sentibʉ zõrãrã kʼarebabarirade bʉ baera?

² Mejãcha mebẽrã buru kʼoepanʉrabara sobiade kʼarebapanʉ zõrãrã kongregasionebemara krĩcha ẽã ãyi warrarabʉta mawũã ẽ bʉrʉ zõrãrãta. Bari jaradaita, Devanʼra 18 poagabasi iyi zõrãrã kʼarebabari babisidadera adewara mebẽã Luisʼra 50 poaga audre basi zõrãrã kongregasionebema kʼarebabari babisidadera. ¿Mebẽrã zõrãrã kʼarebabarirãra sãwũã sentipanʉ maʉ̃ta opanʉ baera? Luisba jarabʉ: «Mʉ̃ra mejãcha sobiabʉ atia mebẽrãta kʼarebabʉ baera kongregasione akʉza mebẽrãba mʉ̃a kãgata mejãcha ũdubipanʉ baera, maʉ̃ba atiara mʉ̃a ãya ũdubiseabʉ iyabaʉ kãgata». Zõrãrã kʼarebabarira mejãchaʉta Luis kĩrãkʼa sentipanʉ.

3. ¿Kʼãrẽta kʼawuadai naʉ̃ artikulodera?

³ Bʉta yi buru kʼoemabʉrʉ, ¿kʼãrẽa krĩcha ẽ zõrãrã kʼarebabari bʼaita? Bʉta maʉ̃ bʼaita krĩchara, ¿kʼãrẽ kʼãrẽa oibara? ¿Kʼãrẽta oibara abʉ Daizeze Bedʼeabara zõrãrã kʼarebabari bʼaira? Naʉ̃ artikulode maʉ̃ra bedʼea ʉ̃rʉ kʼawuadayi, mamina nããra kʼawuadayi kʼãrẽta obʉta zõrãrã kʼarebabariba.

¿ZÕRÃRÃ KʼAREBABARIRABARA KʼÃRẼTA OBɄ?

4. ¿Zõrãrã kʼarebabaribara kʼãrẽta obʉ? (Akʉra potota).

⁴ Ʉ̃kʉrʉ mebẽrã yumakẽrãta yi buru kʼoemara zõrãrã kʼarebabari babipanʉ, ãyara kʼarebapanʉ zõrãrãba kongregasione nekʼãrẽ mejãcha oibarade. Ãyidebema ʉ̃kʉrʉba kʼarebapanʉ mebẽrã kongregasionebemaraba erpanamarẽã sama jaradia wãita akʉza kartarasi erpanamarẽã jaradia wãita. Ʉ̃kʉrʉba kʼarebapanʉ dayirã ãba yi jʉre bari deta imaita adewara nama nekʼãrẽ ara oita waebʉbʉrʉ kʼarebapanʉ maʉ̃ne, ʉ̃kʉrʉba kʼarebapanʉ audio akʉza bideo bʉeide adewara ʉ̃kʉrʉba kʼarebapanʉ akomodadorde, mamina zõrãrã kʼarebabariraba naʉ̃ trajo oira audrera ãya ũdubidaibara Daizeze Bedʼeadebema sãwũã oita biʼia kʼawuabʉta, Jeowa kãgapanʉta akʉza Jeowaba zokʼabʉde panʉta adewara ãyara soiduba kãgapanʉ mebẽrã kongregasionebemara (Mat. 22:​37-39). ¿Kʼãrẽta oseabʉ yumakẽrã buru kʼoebʉbara zõrãrã kʼarebabari bʼaita?

5. ¿Kʼãrẽta oibara zõrãrã kʼarebabari bʼaita?

⁵ Daizeze Bedʼeade jara ũrĩbibʉ kʼãrẽta oibarata zõrãrã kʼarebabari bʼaita (1 Tim. 3:​8-10, 12, 13). Bʉta zõrãrã kʼarebabarira bakĩrãbʉbʉrʉ estudiaibara maʉ̃ ʉ̃rʉ akʉza mama jarabʉde oũdubibaibara, mamina bʉa nããrãra kʼawuaibara kʼãrẽa zõrãrã kʼarebabari bakĩrãbʉta.

¿KʼÃRẼ KʼÃRẼA ZÕRÃRÃ KʼAREBABARI BAKĨRÃBɄ?

6. ¿Kʼãrẽ kʼarea kʼarebaibara mebẽrara? (Mateo 20:28; akʉza akʉra poto nããrabemata).

⁶ Krĩchadaya Jesúsba dayirãʼa kʼãrẽ jaradia amaenata, iyara nekʼãrẽ jõma obasi kãgaba, yi Zezeta kãgabasi baera akʉza ẽbẽrarãta, iya maʉ̃ kãgata ũdubibasi baera naʉ̃ba kʼarebasi zarea trajaita akʉza wuabemara kʼarebaita nekʼãrẽ kʼãrẽ ẽ kĩrãkʼabʉta oide (akʉra Mateo 20:28; Juan 13:​5, 14, 15). Bʉabida nekʼãrẽ obʉta kãgaba obʉbʉrʉ Jeowaba nebiata diayi bʉaʼa akʉza kʼarebayi bʉ zõrãrã kʼarebabari bʼaita krĩchabʉta aribaemarẽã (1 Cor. 16:14; 1 Ped. 5:5).

7. ¿Kʼãrẽa biga ẽ zõrãrã kʼarebabari bʼaita bari wuabemaraba bia akʉdamarẽã?

⁷ Ẽbẽrarã naʉ̃ drʉadebemabara bia akʉpanʉ jari ẽbẽrarã zarea obʉta wuabemaraira nekʼãrẽ audre bia obʼaita, mamina Jeowa pʉwʉrʉdera mawũã berabari ẽ, mebẽã abaʉba Jesúsde kĩrãkʼa nekʼãrẽ jõma obʉta kãgaba obʉbʉrʉ iyara jʉ̃ã ẽ wuabemara ʉ̃rʉ zokʼaita mia wuabemaraba iyitrʉ audre bia akʉdamarẽã. Mebẽã abaʉba krĩchabʉbʉrʉ wuabemaraba iyitrʉ audre bia akʉdamarẽã mawũã chu mebẽãra zõrãrã kʼarebabari babe ẽ, iyitara zareabai baera trajo kʼãrẽ ẽ kĩrãkʼabʉta omarẽã jarabʉdade oita, mamina maʉ̃ trajo kʼãrẽ ẽ kĩrãkʼabʉ oira jipade yibia Jeowa pʉwʉrʉ kʼarebaita (Juan 10:12). Ẽbẽra abaʉba nekʼãrẽ obʉrʉde wuabemaraba iyita bia akʉdamarẽã obʉbʉrʉ iyabʉrʉ wuabemara zokʼaita obʉbʉrʉ Jeowabara kʼareba ẽ bayi maʉ̃ mebẽãra (1 Cor. 10:​24, 33; 13:​4, 5).

8. ¿Kʼãrẽta jarasi Jesúsba iyi kʼaidubemara?

⁸ Edaʉde Jesús neũdukʼawuarabida nekʼãrẽta audre okĩrãbasi Jeowaita, mamina ãyara maʉ̃ra kãgaba okĩrãba ẽ basi, mawũã berabarisi Santiagota Juanʼʉ̃me, ãya widisida Jesúsʼa Jesús nokʼo babʉrʉde ãyidebema aba Jesús juwarare jewedabimarẽã ababemata iyi juwaʼãkare, Jesúsbara ãya kãgabʉta jarai kaʉde, iyi kʼaidudebemara 12 panʉra naʉ̃ ũrãgʼata diasi: «Marãnebema zhi zromata bʼa krĩña bʼʉra bʼaibara dewaraurãta aribʼaebarita, marãnebema zhi zromata bʼa krĩña bʼʉra bʼaibara jõmaʉ̃ nezokʼata» (Mar. 10:​35-37, 43, 44). Mebẽrãba ãya kʼãrẽ obʉta soiduba opanʉbʉrʉ mawũãra nekʼãrẽ mejãchade kʼarebaseabʉ mebẽrã kongregasionebemarata (1 Tes. 2:8).

¿KʼÃRẼBA KʼAREBAI MEBẼRÃTA KʼAREBAKĨRÃ KʼAREBAITA?

9. ¿Kʼãrẽba kʼarebai wuabemara kʼarebakĩrãita?

⁹ Bʉara Jeowara mejãcha kãga akʉza kʼarebakĩrãbʉ mebẽrãsida, mamina atiara bʉara omabʉbaibara zõrãrã kʼarebabariraba obʉta, ¿kʼãrẽba kʼarebaseabʉ bʉa maʉ̃ta okĩrãmarẽã? Krĩchara mebẽrã kʼarebabʉba bʉta kʼãrẽãba sobiabibʉta. Jesúsba naʉ̃ta zokʼasi: «Audre sobiabʉ daya diabʉde dayaʼa diapanʉira» (Hech. 20:35). Jesúsba wuabemara kʼarebakĩrã kʼarebasidera mejãcha sobiabasi, bʉsida Jesús kĩrãkʼa sobiabaseabʉ.

10. ¿Jesúsba sãwũã ũdubisi awurura kʼarebabʉba mejãcha sobiabibʉta? (Marcos 6:​31-34).

¹⁰ Kĩrãbedaya Jesúsba wuabemara kʼarebakĩrãne kʼarebabasi baera kʼãrẽãba sobiabasita (akʉra Marcos 6:​31-34). Ewari aba Jesúsʼra iyi kʼaidubemarabawara ẽbẽrarã bio bʉmaeba jĩga wãsida enaʉ̃kĩrãpanasi baera, mamina ẽbẽrarãba ãyi sama wãta kʼawuadai ãyi nãã jʉ̃ẽsida mainʉ, mamina maʉ̃nera Jesúsbara maʉ̃ra ẽbẽrarã jaraseabasi ãyiʉ̃me bedʼea be ẽãta iyi kʼaidubemarãra neiwari neko ẽ kisi baera, mawũã ẽ bʉrʉ wiña jaradia kʼãrãpe jaraseabasi deda wãnamarẽã, mamina Jesúsbara mawũã krĩcha ẽ basi awuarabʉrʉ iya ẽbẽrarã mejãcha kãgabʉ baera soiduba kʼarebasi adewara maʉ̃ kʼarea nekʼãrẽ mejãcha jaradiasi ẽbẽrarã, maʉ̃ba iya akʉimara ewarisida kisi (Mar. 6:35). Mamina Jesúsbara maʉ̃ra ajuerzade oẽ basi, awuarabʉrʉ iyara ẽbẽrarãta so zʉbʉria akʉbasi akʉza jaradiakĩrãbasi ẽbẽrarãta kãgabʉ baera. Mawũẽra Jesúsba awurura kʼarebabʉba mejãcha sobiabibasi.

11. ¿Sãwũã kʼarebasi Jesúsbara ẽbẽrarã iyi bedʼea ũrĩpanʉrãra? (Akʉra potota).

¹¹ Jesúsbara ẽbẽrarãra kʼarebasi Daizeze Bedʼea ʉ̃rʉ jaradiaside mamina maʉ̃ awuara nekʼãrẽ ãya nesidabʉde kʼarebasi, diasi yikota akʉza iyi kʼaidubemara jarasi maʉ̃ta ẽbẽrarã dedekamarẽã (Mar. 6:41). Maʉ̃neba jaradiasi iyi kʼaidubemara kʼãrẽãba yibiata wuabemara kʼarebakĩrãita adewara ũdubisi wuabemaraba nesidabʉde kʼarebaisida jipade yibiata zõrãrãra kʼarebabariraba obʉ kĩrãkʼa. Krĩchara kʼãrẽãba sobiasidata Jesús kʼaidubemarata ũdusidade Jesúsba miõba okʼata odata akʉza kʼarebasidade maʉ̃ yikota wuabema ẽbẽrarã dedekaita ãyi jãwũãñiena (Mar. 6:42). Mamina naʉ̃ ewaridebʉrʉ kʼareba ẽ basi Jesúsbara, awuarabʉrʉ Jesús nama egorode basidera ũdubisi ewari jõmaʉ̃nẽ krĩchabʉta wuabemara sãwũã kʼarebaita, iya kʼãrẽ kãgabʉ ʉ̃rʉ krĩchai kaʉde (Mat. 4:23; 8:16). Wuabemara nekʼãrẽ jaradiaiba akʉza wuabemaraba nesidabʉ diaiba mejãchade sobiabibasi Jesúsʼra, bʉta zõrãrã kʼarebabari bara akʉza wuabemarata kʼarebakĩrãne kʼarebabʉbʉrʉ abarika sobiabayi.

12. ¿Kʼãrẽa krĩcha ẽ baibara kongregasione sãwũã kʼarebai neẽãta?

¹² Bʉa krĩchabʉbʉrʉ nekʼãrẽ okʼawuabʉ ẽãta wuabemara kʼarebaita maʉ̃ kʼarea sopʉarãra, bʉara bʉ sode nebiata erbʉ wuabemara kongregasionebema kʼarebaita. Krĩchara Pabloba 1 Corintios 12:​12-30 bayeda jaradata, mõbe Jeowaʼa yiwidʼira kʼarebamarẽã nama jarabʉ kĩrãkʼa krĩchaita. Namara jarabʉ Jeowa ode panʉrãra jõmaʉ̃ta yiya nesidapanʉta akʉza jõmaʉ̃ta nebia kĩrãkʼapanʉta. Bʉta waidide zõrãrã kʼarebabari babe ẽ bʉrʉ nekʼãrẽ awuara oibara kʼarea krĩcha orãra. Awuarabʉrʉ zarea ora bʉa jõma oseabʉta oita Jeowa kʼarea akʉza mebẽrã kʼarea. Kʼawuabara zõrãrãbara bʉ ʉ̃rʉ krĩchadaita akʉza bʉa nekʼãrẽ oseabʉta omarẽã jaradaita (Rom. 12:​4-8).

13. Daizeze Bedʼeaba jarabʉ kʼãrẽta oibarata, ¿mama jarabʉra bari zõrãrã kʼarebabari baibʉrʉ ũdubibaraka?

¹³ Krĩchara naʉ̃ ʉ̃rʉ Daizeze Bedʼeade jarabʉ zõrãrã kʼarebabari bʼaira kʼãrẽ nebiata erbaibarata. Naʉ̃ra nebiaranebema mejãchaʉta mebẽrã kongregasionebemara jõmaʉ̃ba ũdubidaibara. Mebẽrã jõmaʉ̃ta Jeowa kʼawa bʼaibara akʉza sobiabaibara awurura nekʼãrẽ diabʉde adewara Jeowaba kãgabʉde bʼaibara. Maʉ̃ kʼarea bʉara nekʼãrẽ mejãcha ara oira neẽbaibara naʉ̃ranebema mejãchaʉta ũdubibʉ baera, mawũã zõrãrã kʼarebabari bʼaita. Mamina mebẽã yumakẽrãba kongregasione audre kʼarebakĩrãbʉbʉrʉ, ¿kʼãrẽta oibara?

KʼÃRẼTA OIBARA ZÕRÃRÃ KʼAREBABARI BʼAITA

14. ¿Kʼãrẽta jarakĩrãbʉ kʼẽrẽpa bʼaibara? (1 Timoteo 3:​8-10, 12).

¹⁴ Zõrãrã kʼarebabari bakĩrãbʉbʉrʉ 1 Timoteo 3:​8-10, 12de jarabʉ nebiata oũdubibara (akʉra). Maʉ̃ranebema ʉ̃kʉrʉ ʉ̃rʉ kʼawuadaya. Zõrãrã kʼarebabarirãra kʼẽrẽpa bʼaibara. Naʉ̃ba jarakĩrãbʉ iya oya adara aripe obʉta akʉza wuabemara nãã iyi sãwũã bʉdeba ũdubibʉta kʼẽrẽpabʉta akʉza mawũã wawia ũdubidamarẽã. Kʼẽrẽpa bʼaibara jarakĩrãkʉ ẽ maʉ̃ mebẽãra mia kʼãrẽsida ipida ẽ baibarata mia ijaramia oẽ baibarata (Ecl. 3:​1, 4). Mamina bʉra zarea oibara nekʼãrẽ omarẽã zokʼabʉdata jõma aripe oita. Bʉa mawũã obʉbʉrʉ mebẽrã kongregasionebemabara bʉ ʉ̃rʉ ĩjãnañi akʉza wawiadayi.

15. ¿Kʼãrẽta jarakĩrãbʉ sewa nebʉrʉmia ẽ baibara akʉza nezrʉgamia ẽ baibara?

¹⁵ Sewa nebʉrʉmia ẽ baibara. Naʉ̃ba jarakĩrãbʉ ewari jõmaʉ̃nẽ wãrĩnuta jarabaibarata akʉza jʉrʉ ẽ baibarata wuabemara sãwũã sewaita (Prov. 3:32). Mia nezrʉgamia ẽ baibara. Maʉ̃ba jarakĩrãbʉ wuabemara zrʉga ẽ baita akʉza plata mebẽrã kongregasionebemaba diabʉta zrʉga ẽ baita. Adewara mebẽrã kongregasionebemaraʉ̃me bari neũdukʼawua barãra plata audre ũduya.

16. (1) ¿Kʼãrẽta jarakĩrãbʉ itua domia ẽ baiba? (2) ¿Kʼãrẽta jarakĩrãbʉ krĩcha neneẽã bʼaiba?

¹⁶ Itua domia ba ẽ baibara. Maʉ̃ba jarakĩrãbʉ ituata aukʼara do ẽ baibarata akʉza wuabemaraba ũdukʼawua ẽ baibara itua domiata. Adewara krĩcha neneẽã bʼaibara. Maʉ̃ba jarakĩrãbʉ Jeowaba zokʼabʉde baibarata. Wãrĩnubaira jõmaʉ̃ta nemitia omia, mamina Jeowaʉ̃me neũdukʼawua bia bʼaiba kʼarebabʉ krĩcha aduʼa bʼaita.

17. ¿Mebẽã abaʉba sãwũã oũdubiseabʉ iya oseabʉra? (1 Timoteo 3:10; akʉza akʉra potota).

¹⁷ Adewara nããra oũdubibara iya oseabʉta. Naʉ̃ba jarakĩrãbʉ naena oũdubidaibarata ãyi ʉ̃rʉ ĩjaseabʉta badu trajo oide. Maʉ̃ba zõrãrã kʼarebabari bakĩrãbʉrãbara zõrãrãnebema abaʉba nekʼãrẽ omarẽã zokʼabʉrʉdera iya jaradade oũdubibara akʉza dayirã organizasionba jarabʉde. Bia kʼawuabaibara kʼãrẽta oibarata akʉza sõbede maʉ̃ oibarata. Bʉaʼa nekʼãrẽ omarẽã jarabʉta jõma aripe obʉbʉrʉ mebẽrã kongregasionebemarabara audre kãgadayi akʉza ũdudayi ewariza audre nebiata owãta. Zõrãrã kongregasionebemarabara akʉdaibara saʉ̃ra mebẽrã yumakẽrãta kʼarebaseabʉta zõrãrã kʼarebabari bʼaita (akʉra 1 Timoteo 3:10). Zõrãrãbara ãyikʉza widibara, ¿bʉka mʉ̃ kongregasionera mebẽrã yumakẽrãra 15 poaga bʉra mawũã ẽ bʉrʉ audre eda bʉra? ¿Badua doba estudiabʉka? ¿Badua wãbʉka ãba yi jʉrebarieda akʉza badua komentario diabʉka? Mawũãbʉbʉrʉ jaraseabʉ ãya oseabʉta odamarẽã. Mawũã ũdubiseabayi nekʼãrẽ omarẽã jarapanʉra jõma aripe obʉta. Maʉ̃ba kʼarebaseabʉ ãyi 17deba 19 poaga baidubai zõrãrã kʼarebabari bamarẽã.

18. ¿Kʼãrẽta jarakĩrãbʉ mia abaʉta ikayirua bedʼea ẽ baibara?

¹⁸ Adewara zõrãrã kʼarebabari bʼaira mia abaʉta imitia bedʼeaba ẽ baibara iyi ʉ̃rʉ. Maʉ̃ba jarakĩrãbʉ neẽ baibarata kʼai ẽbẽraba jarabʉta iya kʼãrẽ nemitia zroma odata. Wãrĩnubaira, Jeowa ode panʉrã ʉ̃rʉ sewidata jaraseapanʉ, Jesús ʉ̃rʉbida imitia bedʼeasida. Jesúsba iyi kʼaidubemara jarasi ẽbẽrarãbara ãyi ʉ̃rʉra sewa nebʉrʉta jaradaibasita (Juan 15:20). Mawũãsidu bʉa jõma aripe obʉbʉrʉ Jeowaba zokʼabʉde Jesúsba obada kĩrãkʼa, kongregasionera bia akʉdayi bʉra (Mat. 11:19).

19. Daizeze Bedʼeade kima abapai erbaibara abʉbara, ¿kʼãrẽta jarakĩrãbʉ?

¹⁹ Kima aba erbaibara. Jeowaba nããbema ẽbẽrarã juwa jidabisidera jarasi juwa jidaibarata yumakẽrãra yuwẽrãʉ̃me. Maʉ̃ba idibasidu Jeowa ode panʉrãbara Jeowaba jaradade oũdubidaibara (Mat. 19:​3-9). Mia abaʉ ẽbẽra Jeowa ode bʉta Jeowaba kãgabʉ ẽãne mia erkʼãĩbe ẽ (Heb. 13:4). Mamina maʉ̃ awuara yumakẽrãbara ũdubibara yi kimatrʉ aba pai kãgabʉta akʉza akʉ ẽ baibara awuru yuwẽrãra (Job 31:1).

20. ¿Yumakẽrãbara sãwũã ũdubibʉ iyi wũãwũãra bia zokʼabʉta akʉza yi mebẽrãsida?

²⁰ Yi wũãwũãrãra bia zokʼa kʼawuabaibara adewara yi mebẽrãsida. Bʉta mebẽrã burubʉrʉ zarea oibara bʉ mebẽrã biʼia akʉita akʉza semanaza Daizeze Bedʼeata akʉibara bʉ mebẽrãbawara. Akʉza badua Daizeze Bedʼea jaradia wãseabʉ bʉ mebẽrãnebema aba abakaʉme. Adewara kʼarebara bʉ wũãwũãra aba abaka Jeowa neũdukʼawua bamarẽã (Efes. 6:4). Yumakẽrã abaʉba iyi mebẽrãta bia akʉbʉbʉrʉ ũdudibʉ kongregasionebemarasida bia akʉseabʉta (naʉ̃ testoʉ̃me akʉra 1 Timoteo 3:5).

21. ¿Kʼãrẽta oseabʉ waidide zõrãrã kʼarebabari ba ẽ bʉrʉ?

²¹ Mebẽã yumakẽrãta waidide zõrãrã kʼarebabari ba ẽ bʉrʉ Jeowaʼa yiwidʼira akʉza akʉra naʉ̃ artikuloba kʼãrẽ jarabʉta. Akʉra Daizeze Bedʼeaba kʼãrẽta omarẽã zokʼabʉta zõrãrã kʼarebabarira. Akʉza zarea ora mama jarabʉde oũdubita. Krĩchara bʉa kʼãrẽãba kãgabʉta Jeowata akʉza mebẽrã kongregasionebemarata. Akʉza krĩchara kʼãrẽ kʼãrẽa kʼarebakĩrãbʉta ãyita (1 Ped. 4:​8, 10). Zarea ora zõrãrã kʼarebabari bʼaita, mawũã obʉbʉrʉ mejãchade sobiabayi mebẽrã kongregasionebemara kʼarebabʉde. Bʉta zõrãrã kʼarebabari baya nekʼãrẽ jõma obʉbʉrʉ Jeowaba kʼarebayi bʉra (Filip. 2:13).