Juanba ũdubʉ nekʼãrẽ ʉ̃ra berabarita

Patmos islade karselta basi, mama eda basi Apostol Juanʼra, mama Jesúsba ũdubisi nekʼãrẽ berabarita 16 bayeda. Maʉ̃ba ũdubibasi sãwũã Daizeze trʉ̃ ʉ̃rʉ ibia bedʼeadaita akʉza Daizeze Nokʼoba sãwũã zokʼaita, mawũã drʉade akʉza ʉ̃tʉ Daizezeba kãgabʉta odaita.

Maʉ̃ra ũdubidadebema abaʉde Juanbara ũdusi Jeowata ʉ̃tʉ jewedabʉta bʉguede, adewara iyi audu ũdusi 24 zõrãrãbʉta akʉza ãyi burudera jʉ̃bʉta korona oro omata akʉza wua torrota jʉ̃bʉta. Maʉ̃ bʉgue jewedabʉdeba bachidiwa baebʉta. Maʉ̃ra 24 zõrãrãbʉra Daizeze nãã sãkokode yiwidʼipanʉta. Akʉza Jesúsbara ũdubisi ẽbẽrarã pʉwʉrʉ biodebemata, adewara bedʼea awuara awuarakadebemata Daizezeʼa yiwidʼipanasita. Maʉ̃ra ẽbẽrarãra korderoba edebasi bania bebʉ diabʉeda, maʉ̃ korderora Jesúsbasi. Maʉ̃ tẽã Juanbara akʉza ũdusi Jesúsʼra nokʼobasita ʉ̃tʉ akʉza 24 zõrãrãbawaraʉba zokʼabʉta. Juanba ũdusi Jesúsʼra yõbʉta dragonʼʉ̃me, maʉ̃ra Diarubasi, maʉ̃ kʼaidu basi angelera kayiruarata. Jesúsbara ãyira ʉ̃tʉba naʉ̃ drʉaeda jʉretasi.

Tẽã Juanbara ũdusi korderota akʉza 144.000 ẽbẽrarã Sión katumanebʉta. Tẽã ũdusi angel aba wãbari wãbʉta naʉ̃ drʉa jõmaʉ̃nẽ, mõbe jarabasi: «Wawiaidua Daizezera, mõbe iyi ʉ̃rʉ ibia bedʼeaidua».

Adewara ũdusi Armagedón yõta. Maʉ̃ yõnera Jesúsba akʉza iyi gorogororabawaraʉba ẽbẽrarã Diaruba zokʼabʉra jõma makenabʉ. Yi jõbodoare ũdusi jõma ʉ̃tʉ akʉza naʉ̃ drʉade aduaʼpanʉta. Adewara ũdusi sãwũã Diaruta, adewara iyi kʼaidupanʉrata jõma makenapanʉta. Ʉ̃tʉ akʉza naʉ̃ drʉade jõmaʉ̃ba Daizeze trʉ̃ra neneẽã akʉyi mawũã Jeowa abaʉʼabʉrʉ yiwidʼidayi.