Zʉbʉria 10debemata

Moisésba jarasi paraonʼa wua iyara jʉrʉ ẽ baita, mõbe iyi wãi nãã naʉ̃ta jarasi: «Diamasi ewari ẽzadra makiniñi jõma Egiptodebema wũãwũãra nããbemara, adewara paraon wũãwũã nããbemasida akʉza nezokʼara wũãwũã nããbemarasida makiniñi».

Jeowaba jarasi israelitara: «Oidua yiko awuarabʉta. Beaidua kabrito zake poaga ababʉta, mõbe maʉ̃ waba puerta bakuruta zoaidua, yi chichira ba koidua akʉza koidua panʼena, mamina maʉ̃ panʼra ne oreguea neẽ baibara». Wãñawa panaidua, wuasida jʉ̃panaidua akʉza jĩrʉne jʉ̃barisida jʉ̃panaidua. Maʉ̃ diamasi mʉ̃ara marara ãĩ bʉeyi. Krĩchara israelitara sãwũã mejãcha sobiapanasita.

Diamasi ewari ẽzadra Daizeze angelʼra egipsiora deza deza wãsi. De aba abakaʉde puertade wa neẽmaera, wũãwũã nããbemarata beisi. Mamina jari de puertade wa barabʉra, mia abaʉta bei ẽ basi. Ẽbẽra Egiptodebema nekʼãrẽ erbʉta akʉza nekʼãrẽ nẽẽãbʉta maʉ̃ranebemara wũãwũã nããbema aba abaka beikʉasida. Mamina mia abaʉ wũãwũã Israeldebemarãra bei ẽ basi.

Paraon wũãwũã nããbemasida beisi. Paraonba wua oẽã a kʼãrãpe jarasi Moisésʼa akʉza Aarónʼa: «¡Wãidua namaʉ̃bara! ¡Edeidua mara nedʉwʉrʉrasida! ¡Wãidua mayi Daizezeʼa yiwidʼita!».

Maʉ̃ diamasira jedeko eguewaribasi. Israelitara Egiptodeba wãsidera ãyi triburaza wãsi akʉza yi mebẽrãza. Mamara mejãcha wãsi, wẽrãrata, warrarata akʉza yumakẽrãra 600.000 wãsi. Akʉza mejãcha wãsi ãyi kʼaidu ʉ̃kʉrʉ ẽbẽrarã israelitara ẽãta Daizeze Jeowa yiwidʼita. ¡Idibʉrʉrʉ israelitarãra wua nezokʼa ba ẽ basi!

Kõbebʉrʉ Jeowaba jarasi ãya yiko odata poagaza odamarẽã, mawũã kĩrãbeita Jeowaba ãyira ẽdrʉbisita ãyi nezokʼaraneba. Ãya maʉ̃ mawũã poagaza oira, jarapanasi Pascua.