YI 10
¿Kʼãrẽa yibia bʉ Jeowa ʉ̃rʉ Kʼawuabipanʉrã ãba yi jʉrebʉma wãita?
¿Bʉra jʉ̃ẽbarika Jeowa ʉ̃rʉ Kʼawuabipanʉrã ãba yi jʉrebʉmaera? Bʉta jʉ̃ẽkabʉrʉ bʉa krĩchaseabʉ: «¿Kʼãrẽta opanʉ Jeowa ʉ̃rʉ Kʼawuabipanʉrã ãba yi jʉrebʉdera? ¿Kʼãrẽa yibia naʉ̃ra ãyitara? ¿Mʉ̃sida wãibaraka?». Naʉ̃ne kʼawuayi sãwũã ãba yi jʉrebʉba kʼarebaita Jeowa neũdukʼawua bʼaita akʉza bʉta.
1. ¿Kʼãrẽa ãba yi jʉreibara?
Ẽbẽra abaʉba Salmo bʉdaba jarasi kʼãrẽa yibiata ãba yi jʉreira: «Kongregasione eda bʉ ʉ̃rʉ ibia bedʼeaya» (Salmo 22:22). Idi ewadera Jeowa ʉ̃rʉ Kʼawuabipanʉrãra ãba zepanʉ, maʉ̃ba ãyira mejãcha sobia obʉ. Naʉ̃ drʉa jõmaʉ̃nẽ semanaza ãba yi jʉrepanʉ Daizezeʼa trãnaita akʉza yiwidʼita. Poagaza kabana ãba yi jʉrepanʉ Jeowa ʉ̃rʉ kʼawuaita akʉza Iyaʼa yiwidʼita.
2. ¿Kʼãrẽta kʼawuai ãba yi jʉrebʉdera?
Ãba yi jʉrebʉrʉdera jaradiabʉ Daizeze Bedʼeadeba, adewara bia jara ũrĩbipanʉ kʼãrẽta jaradiabʉta naʉ̃ba (akʉra Nehemías 8:8). Bʉta wãra kʼawuayi Jeowaba kʼãrẽ nebiata erbʉta iyi sode. Bʉa audre kʼawua wãne iya bʉ kãgabʉta, bʉra iyi neũdukʼawua bakĩrãñi. Adewara kʼawuayi, sãwũã Daizezeba kʼarebaseabʉta bʉ sobia bʼaita (Isaías 48:17, 18).
3. ¿Sãwũã kʼarebaseabʉ ãba yi jʉrebʉrʉde ẽbẽra ũdukʼawuaibara?
Jeowaba jarabʉ «Krĩchaidua mayirai kʼarebaita akʉza kãgaita, adewara nebia oita, idubʉraidua ãba yi jʉrepanʉta» (Hebreos 10:24, 25). Dai ãba yi jʉrebʉdera bʉa ũduyi ẽbẽrarã yiya kãga ũdubipanʉta, adewara maʉ̃rabida Daizeze ʉ̃rʉ audre kʼawuakĩrãbʉ bʉre kĩrãkʼa. Adewara ãyibawara bedʼeaseapanʉ Daizeze Bedʼea ʉ̃rʉ kʼawuadata (akʉra Romanos 1:11, 12). Bedʼeaseabʉ ẽbẽra juwa jidabʉme mawũã ẽ bʉrʉ dobabʉme, ãya jara ũrĩbiseabʉ bedʼea zroma ãya erbʉra sãwũã awuanta zebʉrʉta. Maʉ̃ kʼarea Jeowabara kãgabʉ dayirãra audre ẽãne ãba yi jʉrepanamarẽã.
AUDRE BIʼIA KʼAWUADADRɄ
Kʼawuadaya kʼãrẽa yibiata Jeowa ʉ̃rʉ Kʼawuabipanʉrã ãba yi jʉrebʉma wãita akʉza kʼãrẽa zarea oibarata mama wãita.
4. Jeowa ʉ̃rʉ Kʼawuabipanʉrãra ãba yi jʉrepanʉ
Nããbema kristianorãra ãba yi jʉrepanasi Jeowa ʉ̃rʉ ibia bedʼeaita (Romanos 16:3-5). Akʉra Colosenses 3:16, mõbe naʉ̃ta panʉidua:
¿Nããbema kristianorabara kʼãrẽta opanasi Jeowa ʉ̃rʉ ibia bedʼeaita?
Idi ewadera, Jeowa ʉ̃rʉ Kʼawuabipanʉrãra audre ẽãne ãba yi jʉrepanʉ Jeowa ʉ̃rʉ ibia bedʼeaita. Bʉa kʼawuaita ãyi ãba yi jʉrebʉrʉde kʼãrẽ obʉta, akʉra BIDEOTA. Akʉra potodebʉta ãba yi jʉrepanʉta, mõbe naʉ̃ta panʉidua.
¿Kʼãrẽne abarikabʉ Daizeze Nokʼo ʉ̃rʉ bedʼeabarideda obʉta Colosenses 3:16de jarabʉmera?
Bideota akʉza dibujo akʉbʉrʉdera, ¿bʉa saʉ̃ta audre kãgasi ãba yi jʉrebʉdera?
Akʉra 2 Corintios 9:7, mõbe naʉ̃ta panʉidua:
¿Kʼãrẽa Jeowa ʉ̃rʉ Kʼawuabipanʉrã ãba yi jʉrepanʉnera plata widida ẽ?
Bʉ nejaradiabariʉ̃meba akʉra kʼãrẽta kʼawuadaita ãba yi jʉrebarabʉde naʉ̃ semanane.
Naʉ̃ semanane ãbabaramʉne kʼawuadaira, ¿bʉa saʉ̃ta audre kãgasi?
¿Kʼawuabasika?
Bʉa kʼawuakĩrãbʉbʉrʉ Jeowa ʉ̃rʉ Kʼawuabipanʉrãta naʉ̃ drʉa jõmaʉ̃nẽ sõbede akʉza sama ãba yi jʉrepanʉta, akʉra jw.org.
Dai ãba yi jʉrepanʉmaera diapanʉ diskursota, mebẽrãba oũdubipanʉ adewara bideota ũdubipanʉ. Ãba yi jʉrepanʉ jʉ̃drʉdaita akʉza jõbidaita trãpanʉ maʉ̃ tẽã yiwidʼipanʉ.
Ãba yi jʉrebarabʉdera juwa ʉ̃ta wuaseabʉ.
Jõmaʉ̃ta wãseapanʉ: yumakẽrãta, yuwẽrãta, zõrãrãta, warrarata.
Jeowa ʉ̃rʉ Kʼawuabipanʉrã ãba yi jʉrebʉmaera bari eda wãseabʉ, mia kʼãrẽ platasida widida ẽ.
5. Zarea oibara ãba yi jʉrebarima wãita
Krĩchadrʉ Jesu mebẽrãta. Ãyirabasi Nazaretde, poagaza ãyira wãbasi Jerusalén temploeda. Mama wãira jĩrʉne katuma bio wãibarabasi ewari ũbeabayeda. Akʉra Lucas 2:39-42, mõbe naʉ̃ta panʉidua:
Bʉmara, ¿ãyitara zareabasika Jerusalénma wãira?
Bʉitara, ¿kʼãrẽa zareabaseabʉ ãba yi jʉrebarima wãita?
¿Bʉitara yibia baika ãba yi jʉrebarima wãita zareabʉmina? ¿Kʼãrẽa mawũã krĩchabʉ?
Daizeze Bedʼeabara jaradiabʉ kʼãrẽa yibiata ãba yi jʉredaira. Akʉra Hebreos 10:24, 25, mõbe naʉ̃ta panʉidua:
¿Kʼãrẽa audre ẽãne ãba yi jʉrepanaibara?
Ʉ̃KɄRɄBA KRĨCHAPANɄTA: «Daizeze ʉ̃rʉ kʼawuaita wuabema ẽbẽrabawara ãba bʼaita nesida ẽ».
¿Bʉa saʉ̃ testode ũdubiseabʉ Jeowaba kãgabʉta dayirãba omarẽã?
KĨRÃBEITA
Bʉta ãba yi jʉrebarima wãra kʼarebayi Jeowa ʉ̃rʉ audre kʼawuaita, iyi neũdukʼawuara bʼaita akʉza wuabemarabawaraʉba iyi ʉ̃rʉ ibia bedʼeaita.
Panʉnadrʉ
¿Kʼãrẽa Jeowabara kãgabʉ dayirã ãba yi jʉredamarẽã?
¿Kʼãrẽta kʼawuai Jeowa ʉ̃rʉ Kʼawuabipanʉrã ãba yi jʉrebarima wãra?
Bʉra ãba yi jʉrebʉbara, ¿kʼãrẽne kʼarebaseabʉ?
JɄRɄDA AUDRE KʼAWUAITA
¿Ãba yi jʉrebarima wãita krĩchabʉrʉdera bʉra perãbʉka? Ẽbẽra aba mawũã krĩchabasi, mamina tẽãne iya mejãcha kãgasi ãba yi jʉrebarira. Kʼawuara kʼãrẽa mawũã krĩchasita.
Kʼawuara ẽbẽra abaʉba ãba yi jʉreita mejãcha kãga badata akʉza iya kʼãrẽta osita ãba yi jʉrebʉ idubu ẽ baita.
Kʼawuara ʉ̃kʉrʉ ẽbẽraba sãwũã krĩchapanʉta ãba yi jʉrei ʉ̃rʉ.
«¿Kʼãrẽa yibia Daizeze Nokʼo ʉ̃rʉ bedʼeabaridema wãita?» (Artikulo jw.org)
Kʼawuara ẽbẽra aba iyi nezrʉgamia badata Jeowa ʉ̃rʉ Kʼawuabipanʉrã ãba yi jʉrebʉma jʉ̃ẽna tẽã iyi bebʉ sãwũã awuara besita.
«Ewari jõmaʉ̃nẽ põgara mʉ̃ juwade erbasi» (Jarakabʉ, 1ne juliode 2014de)