YI 56
Zarea ora mebẽrãbawara ibiade bʼaita kongregasione
Dayirã mebẽrãbawara ãbapanʉne David kĩrãkʼa krĩchapanʉ, iya jarasi: «Kʼãrẽaba yibia akʉza kʼãrẽaba jipa biga, mebẽrãbawara ãba panaira» (Salmo 133:1). Dayirã jõmaʉ̃ta zarea opanʉ dayirã mebẽrã bawara ibiade ãba bʼaita.
1. Ẽbẽrarãba kʼãwũã Daizeze pʉwʉrʉ akʉpanʉnebara, ¿saʉ̃ta audre bia akʉbʉ?
Bʉa awuru kongregasionta akʉ wãra, mama bʉa ãyi bedʼea ũrĩ ẽ mina dedabʉ kĩrãkʼa krĩchabʉ. ¿Kʼãrẽa mãwũã baseabʉ? Jeowa odepanʉrãbara iyabaʉ kartarata akʉpanʉ akʉza Daizeze Bedʼeadebema iyabaʉta akʉbʉ. Daibara zareata opanʉ soiduba kãga ũdubita dayirã mebẽrã krĩcha ẽã samaʉ̃ba zedata, jõmaʉ̃ba Jeowa trʉ̃ ʉ̃rʉ ibia bedʼeabikĩrãbʉ akʉza iyi abaʉʼabʉrʉ yiwidʼipanʉ (Sofonías 3:9).
2. ¿Sãwũã mebẽrã bawara ibiade baseabʉ kongregasione?
«Mayirai soiduba yiya kãgaidua» (1 Pedro 1:22). ¿Sãwũã oi maʉ̃ra? Ãya jõma bia oẽ ʉ̃rʉ krĩchai kaʉde krĩchaibara ãya nebia obʉ ʉ̃rʉ. Ũdukʼawuara wuabemara mebẽrãrasida mawũã ãba barara bʉ kĩrãkʼa krĩchabʉmebʉrʉ adewara mebẽrã bʉ awuara bʉrasida. Bʉa ãña krĩchabʉbʉrʉ ʉ̃kʉrʉ ẽbẽrarã ʉ̃rʉ, maʉ̃ krĩchata ãĩbʉera bʉ sodebara (akʉra 1 Pedro 2:17).a
3. ¿Kʼãrẽta oseabʉ bedʼea abarika zeda ẽ bʉrʉ mebẽrãʉ̃me?
Dayirã yiya kãgapanʉmina edaʉde dayirãba sopʉabiseabʉ dayirã mebẽrãra, dayirãta nekayirua omia baera. Maʉ̃ba Daizeze Bedʼeaba jarabʉ: «Kĩrãduaidua bʉ ʉ̃rʉ nemitiata osidamina. Jeowaba mara nemitia ibiade kĩrãduabʉ kĩrãkʼa marabida abarika mawũã oibara» (akʉra Colosenses 3:13). Dayirãba badua Jeowata sopʉabibʉ, mawũãsidu iyara kĩrãduabʉ dayirã nemitiara, maʉ̃ kʼarea dayirãbida kĩrãduaibara mebẽrãba obʉra. Bʉa mebẽã abaʉta sopʉabisibʉrʉ, iyiʉ̃me bedʼeara ibiade panaita (akʉra Mateo 5:23, 24).b
AUDRE BIʼIA KʼAWUADADRɄ
Krĩchara bʉa kʼãrẽta oseabʉta kongregasione aduʼa bʼaita akʉza ãba panaita.
¿Bʉara kʼãrẽta oseabʉ ibiade bʼaita?
4. Bʉa ẽbẽrarã ʉ̃rʉ aña krĩchabʉra wua krĩcharãra
Dayirã mebẽrã jõmaʉ̃ʼa kãgata ũdubikĩrãpanʉ, mamina dayirã kĩrãkʼa bʉ ẽ bʉrʉ edaʉde zarea baseabʉ. ¿Kʼãrẽba kʼarebaseabʉ ãyi kãgaita? Akʉra Hechos 10:34, 35, mõbe naʉ̃ta panʉidua:
Jeowabara kãga ẽbẽrarã jõma naʉ̃ drʉadebemata iyi ode panamarẽã. Jeowaba kʼãwũã akʉbʉdebara dayirãba, ¿sãwũã akʉseabʉ wuabema ẽbẽrarãra dayirãi awuarabʉmina?
Bʉ chumaera ¿kʼaira ẽbẽrarã ʉ̃rʉ aña krĩchapanʉ? ¿Kʼãrẽã bʉra maʉ̃ra ẽbẽrarã aña krĩchabʉ kĩrãkʼa krĩcha ẽ baibara?
Akʉra 2 Corintios 6:11-13, mõbe naʉ̃ta panʉidua:
¿Bʉara kʼãrẽta oseabʉ mebẽrãra audre kãga wãita?
5. Soiduba nemitiara kĩrãduaidua akʉza ibiade panaidua
Dayirãba Jeowa ʉ̃rʉ kʼãrẽ nemitia kĩrãduaira neẽ, mamina iya dayirãba nemitia obʉra kĩrãduabʉ. Akʉra Salmo 86:5, mõbe naʉ̃ ʉ̃rʉ bedʼeaidua:
Naʉ̃ testobara dayirãra ¿kʼãrẽta jaradiabʉ Jeowaba nemitia kĩrãduabʉ ʉ̃rʉra?
¿Bʉra sobiabʉka Jeowaba dayirãba nemitia obʉ kĩrãduabʉ baera? ¿Kʼãrẽa?
¿Sãwũãbʉde zareabaseabʉ wuabemarabawara ibiade bʼaita?
¿Kʼãrẽta odaibara Jeowaba obʉ kĩrãkʼa oita, mawũã dayirã mẽbẽra bawara ãba ibiade bʼaita? Akʉra Proverbios 19:11, mõbe naʉ̃ ʉ̃rʉ bedʼeaidua:
Kʼãwũãne badu mebẽãba bʉa kãga ẽãta obʉbʉrʉ, ¿bʉara kʼãrẽta oseabʉ ibiade panaita?
Edaʉde dayirãba wuabemarata sopʉabibʉ. Maʉ̃ta berabarira, ¿kʼãrẽta odaibara? Akʉra BIDEOTA, mõbe naʉ̃ ʉ̃rʉ bedʼeaidua:
Mebẽã eda bideode ũdubidabara, ¿kʼãrẽta osi iyi mebẽãʉ̃me ibiade panaita?
6. Bʉ mebẽrãba nebia erbʉta akʉra
Dayirã mebẽrã ũdukʼawuabʉrʉdera, akʉseabʉ ãya kʼãrẽ nebia erbʉta akʉza akʉseabʉ ãya nekʼãrẽ aña obʉta. Mamina, ¿kʼãrẽta oseabʉ audre ãya nebia erbʉ akʉita? Akʉra BIDEOTA, mõbe naʉ̃ ʉ̃rʉ bedʼeaidua:
¿Kʼãrẽba kʼarebaseabʉ audre akʉita mebẽrãba nebia erbʉ ʉ̃rʉ?
Jeowabara akʉbʉ dayirãba nebia obʉta. Akʉra 2 Crónicas 16:9a, mõbe naʉ̃ ʉ̃rʉ bedʼeaidua:
¿Bʉa sãwũã krĩchabʉ Jeowaba kʼãwũã akʉbʉ baera bʉ nebia ʉ̃rʉ?
Diamantera wiña ariseabʉmina plata mejãchaʉbari nẽdopanʉ, abarikabʉ dayirã mebẽrãsida nekayirua omiamina, Jeowabara ãyira jõma biʼia akʉbʉ.
Ʉ̃KɄRɄBA KRĨCHAPANɄTA: «Maʉ̃ ẽbẽraba kayirua odata mʉ̃a jẽda kĩrãduaira iya nãã ũdubibara wãrĩnu iya odara wua oẽ baita».
¿Kʼãrẽa dayirãbara wãrĩnu jẽda kĩrãduaibara ẽbẽra abaʉba dayirã ʉ̃rʉ nemitiata osibʉrʉ?
KĨRÃBEITA
Bʉa bʉ mebẽãba bʉ ʉ̃rʉ nemitia odata kĩrãduara akʉza jõmaʉ̃ʼa kãgata ũdubira, kʼarebayi kongregasione sobiapanaita.
Panʉnadrʉ
¿Sãwũã bʉara ẽbẽrarã ʉ̃rʉ aña krĩchabʉra idu amaeseabʉ?
¿Bʉara kʼãrẽta oi bʉ mebẽrãbawara bedʼea abarika ze ẽ bʉrʉ?
¿Bʉara kĩrãduakĩrãbʉka wuabemaraba bʉ ʉ̃rʉ nemitia odara Jeowaba kĩrãduabʉ kĩrãkʼa? ¿Kʼãrẽa?
JɄRɄDA AUDRE KʼAWUAITA
Jesuba yiza jaradadeba, dayirãta kʼarebabʉ wuabemara ʉ̃rʉ aña bedʼea ẽ baita, akʉra maʉ̃ yizara saʉ̃ta iyita.
Dayirãba nemitia oẽ mina, ¿jaraibaraka kĩrãduamarẽã kʼãrẽ berabaridata?
Akʉra sãwũã ẽbẽra mejãchaʉba kʼawuabʉdata awuru ẽbẽrarã sãwũã bia edaita.
Bari ʉ̃rʉ akʉbʉrʉba wuabemara ʉ̃rʉ aña bedʼea ẽ baibara (5:06)
Kʼawuara sãwũã ara oita dayirã mebẽrã bawara bedʼea abarika ze ẽãne, mawũã kongregasione aduʼa bʼaita.
«Kãgade ara oibara bʉ mebẽrãʉ̃me bedʼea abarika ze ẽãne» (Jarakabʉ, mayo 2016de)