Daizeze Nokʼobara zokʼanʉmʉ

1. ¿Kʼãrẽta kʼawuapanʉ akʉza kʼãrẽa?

NAɄ̃ drʉade nekʼãrẽ mejãcha berabarinʉmʉ kʼarea, ¿bʉitara zareabʉka jõma bia akʉita? Idi ewadera yi mebẽrãra ãyirainʉ yi kãga ũdubida ẽ. Ẽbẽra naʉ̃ drʉadebemara yõmiara, kĩrʉmiara akʉza ãyitrʉ ʉ̃ta krĩchabʉ, ʉ̃kʉrʉ ẽbẽraitara zare ĩjãita ãyi zokʼabʉraba jarabʉra. Mawũãsidu dayirãbara wãrĩnu ĩjãpanʉ ʉ̃rabʉrʉ nebia zeita, Daizeze Bedʼeaba naʉ̃ drʉa jõbodo ʉ̃rʉ 2 Timoteo 3:1-5 bayeda jarabʉra idi aripe berabarinʉmʉ baera. Mawũẽra mia kʼai ẽbẽraba jarabe ẽ naʉ̃ propesiara aripe berabarinʉmʉ ẽãta, naʉ̃ propesia kʼãwũã aripe berabaribʉba ũdubibʉ Jesuba zokʼanʉmʉta Daizeze Nokʼora. Mamina maʉ̃ awa ẽ, atia kʼawuadayi sãwũã ʉ̃kʉrʉ propesiata aripe berabaridata akʉza naʉ̃ba dayirã wãrĩnu ĩjãbibʉta.

2. ¿Kʼãrẽta kʼawuadai naʉ̃ artikulodera akʉza kʼãrẽa? (Jara ũrĩbira poto yi nããrabemata).

² ¿Kʼãrẽta kʼawuadai naʉ̃ artikulodera? Nããra, kʼawuadayi propesia aba, naʉ̃ba kʼawuabiyi sõbede Daizeze Nokʼoba zokʼa jʉ̃drʉsita. Yi ũmeta, akʉdayi awuru propesiata naʉ̃ propesiaba kʼawuabiyi Jesuba zokʼanʉmʉta Daizeze Nokʼora. Yi ũbeata, kʼawuadayi propesiarane, sãwũã jõita Daizeze Nokʼo nejʉrara. Ẽbẽra wua obʉrʉdera nekĩrãtana kasubʉ yi wuama, mawũã ũdubʉ sãwũãbidata maʉ̃ ẽbẽra wuara, maʉ̃ kĩrãkʼa propesia za berabari wãba ũdubibʉ samabata Jeowaba oita krĩchabʉra.

¿SÃWŨÃ KʼAWUAPANɄ SÕBEDE DAIZEZE NOKʼOBA ZOKʼA JɄ̃DRɄSITA?

3. ¿Kʼãrẽta jarabʉ Daniel 7:13, 14bara Daizeze Nokʼo zokʼai ʉ̃rʉra?

³ Daniel 7:13, 14de propesia abaʉba jarabʉ yibiata Jesuba zokʼaita Daizeze Nokʼora. Akʉza jarabʉ ẽbẽrarã naʉ̃ drʉa jõmaʉ̃nẽbemaba ũrĩbasita iyi bedʼeara, adewara iya zokʼabʉra kʼaiba jãrĩna ẽãta. Mawũẽra, ¿sõbede zokʼa jʉ̃drʉibasi Jesubara? Awuru propesia Danielde eda jarabʉbara jarasi naʉ̃ra berabarita 7 ewari berabarida tẽã, akʉdadrʉ sãwũã kʼawuaseabʉta maʉ̃ra sõbede aripe berabarisita.

4. ¿Sãwũã kʼarebabʉ Daniel 4:10-17 bayeda propesia jarabʉba kʼawuaita sõbede zokʼa jʉ̃drʉsita Jesuba? (Akʉra notata).

⁴ (Akʉra Daniel 4:10-17). «7 ewaribara» jarakĩrãbʉ 2.520 poaga. Maʉ̃ra jʉ̃drʉsi poaga 607de Kristo nãã, babilonioraba jõbisidade nokʼo Daizezeba jʉrʉdata Jerusalénʼne. Maʉ̃ ewarira jõsi 1914de Jeowaba Jesuta Nokʼo babiside, iya zokʼaibarabasi baera (Ezeq. 21:25-27).b

5. ¿Sãwũã kʼarebabʉ propesia «7 ewari» biʼia kʼawuaibara?

⁵ ¿Sãwũã kʼarebabʉ naʉ̃ propesiabara? Propesia «7 ewari» dayirãba biʼia ũrĩba kʼarebayi ĩjãita Jeowaba jarabʉra aripe berabarita iya kãgabʉde. Jeowaba yi jidamabasi iya kʼãrẽ ewaride bʉita iyi Nokʼora, maʉ̃ba maʉ̃ ewari zebʉrʉdera aripe osi. Abarika wuabema propesiarasida aripe berabaribiyi iya jidada ewaride, mawũẽra Daizeze ewarira iyi zei ewaride zeyi (Hab. 2:3).

¿SÃWŨÃ KʼAWUAPANɄ JESUBARA ZOKʼABɄTA DAIZEZE NOKʼORA?

6. (1) ¿Sãwũã kʼawuapanʉ Jesuba ʉ̃tʉ zokʼanʉmʉta? (2) Apocalipsis 6:2-8 bayeda jarabʉbara, ¿sãwũã ũdubibʉ naʉ̃ bedʼeara aripe berabaribʉta?

⁶ Jesuba nama Egorode Daizeze Bedʼea jaradiabʉta jõbodoare jarasi, naʉ̃ drʉade nekʼãrẽ berabaribʉba iyi kʼaidubemarabara kʼawuaibasita iya zokʼa jʉ̃drʉsita. Jarasi bʼaita yõta, jarrabata akʉza drʉa ureta akʉza jarasi bʼaita kayara «drʉaza», COVID-19 kĩrãkʼa. Naʉ̃ jõma kʼãwũã berabarinʉmʉba ũdubibʉ Jesuba zokʼabʉta (Mat. 24:3, 7; Luc. 21:7, 10, 11). Jesu beidata akʉza ʉ̃ta wãnata 60 poaga audre berabarida tẽã, iya jarasi naʉ̃ bedʼeata Juanʼa aripe berabarita (akʉra Apocalipsis 6:2-8). Naʉ̃ra aripe berabarinʉmʉ Jesuba poaga 1914deba zokʼa jʉ̃drʉdadeba.

7. ¿Kʼãrẽa naʉ̃ Drʉadera mejãchabʉ nekayiruara Jesuba zokʼa jʉ̃drʉdadeba ʉ̃ta?

⁷ ¿Kʼãrẽa wuabʉrʉ nekayiruata ũdusida Jesuba zokʼa jʉ̃drʉsidera? Apocalipsis 6:2ba jara ũrĩbibʉ: nããra Jesuba zokʼa jʉ̃drʉbʉrʉdera iyira yõsi Diaruʉ̃me akʉza iyi angelera kayiruarabawara. Apocalipsis 12ba jarabʉ Diaruta akʉza iyi angelera kayiruarabawara aduasida baera, ʉ̃tʉba nama egoroeda jʉretasidata. Maʉ̃ kʼarea Diarura mejãcha kĩrʉsi baera, iyara ẽbẽrarãta mejãcha zʉbʉria osi, maʉ̃ kʼarea Daizeze Bedʼeaba jarabʉ: «Drʉadebera akʉza pusadebera kaʉ bʼaidua» (Apoc. 12:7-12).

8. ¿Kʼãrẽne kʼarebabʉ propesia Daizeze Nokʼo ʉ̃rʉ aripe berabarinʉmʉ kʼawuaibara?

⁸ ¿Sãwũã kʼarebabʉ naʉ̃ propesiabara? Dayirãba naʉ̃ drʉade nekʼãrẽ berabarinʉmʉ ũdubʉdeba, kʼawuaseapanʉ Jesuba zokʼanʉmʉta, ẽbẽrarãba ewariza jipa awuara owã baera. Maʉ̃ kʼarea dayirãra krĩcha zroma oẽ ẽbẽraba nemitia obʉ kʼareara, awuarabʉrʉ kʼawuapanʉ ãyira mawũã bʼaibarata, propesiaba jarabʉde aripe berabarinʉmʉ baera. Naʉ̃ba dajada ũdubibʉ Daizeze Nokʼoba zokʼanʉmʉta (Sal. 37:1). Awuarabʉrʉ jʉ̃ãpanʉ naʉ̃ drʉara wuabʉrʉ mitia wãita Armagedónta arakʼaita ba baera (Mar. 13:8; 2 Tim. 3:13). Daizeze Jeowaba dayirãta mejãcha kãgabʉ baera iya jara ũrĩbibʉ naʉ̃ drʉara kʼãrẽa mawũã berabaribʉta, ¿maʉ̃ kʼarea iyaʼa biga diaibara ẽka?

¿SÃWŨÃ JÕI DAIZEZE NOKʼO NEJɄRARA?

9. ¿Daniel 2:28, 31-35 bayeda sãwũã jara ũrĩbibʉ nokʼo zroma naʉ̃ drʉa jõmaʉ̃mae zokʼabʉ ʉ̃rʉ akʉza sõbeda ʉ̃tʉ zesi?

⁹ (Akʉra Daniel 2:28, 31-35). Idi ewadera nama naʉ̃ propesiaba jarabʉta aripe berabarinʉmʉta ũdupanʉ. Kʼãĩmokʼãrãde Nabucodonosorba ũdusi «naʉ̃ drʉa jõbodoare kʼãrẽta berabarita», Jesuba zokʼa jʉ̃drʉda tẽã. Jesu nejʉra naʉ̃ Drʉadebema abaʉra, nokʼo zroma naʉ̃ drʉa jõmaʉ̃mae zokʼabʉ bʼaibara Daizeze Bedʼeaba jarabʉ kĩrãkʼa. Nokʼo zroma naʉ̃ drʉade jõmaʉ̃mae zokʼabʉbara jarakĩrãbʉ nekʼãrẽ oma zroma jĩrʉra egoroba akʉza jiorrobabʉta, maʉ̃ra idira chubʉ. Naʉ̃ nokʼo zromara zesi Primera Guerra Mundial nʉmaside, Gran Bretañata Estados Unidosʼʉ̃me bedʼea abarika zeside. Nabuconodosorba nekʼãrẽ zroma ʉ̃rʉ kʼãĩmokʼãrãdaba, nekʼãrẽ ũme ũdubibʉ maʉ̃ nokʼo zroma ʉ̃rʉ akʉza jara ũrĩbibʉ kʼãrẽne awuarabʉta naʉ̃ nokʼo zromara nããbema nokʼo zromara badaira.

10. (1) ¿Kʼãrẽ bedʼea Danielba jaradaba biʼia jara ũrĩbibʉ nokʼo zroma Gran Bretaña akʉza Estados Unidos ʉ̃rʉ? (2) ¿Kʼãrẽa kʼarea jʉra kʼawuabaibara? (Akʉra rekuadro «Jʉra kʼawuabara egoroba kʼarea»).

¹⁰ Nokʼo zroma naʉ̃ drʉa jõmaʉ̃mae zokʼabʉra Estados Unidos akʉza Gran Bretaña, ¿kʼãrẽne awuarabʉ ãyira? Nããra, nããbema nokʼo zromara ũdubipanasi plata oma kĩrãkʼabʉta akʉza oro oma kĩrãkʼabʉta. Mamina naʉ̃ nokʼo zromara awuarabʉ egorobaba akʉza jiorroba parãbʉ kĩrãkʼabʉ baera. Egorobabara jarakĩrãbʉ, ẽbẽrarãta (Dan. 2:43, nota). Kʼawuapanʉ naʉ̃ nokʼo zromaitara zareabʉta iya zokʼabʉ oita, ẽbẽrarãbara nekʼãrẽ mejãcha ozebʉrʉ baera. Bari jaraita, ẽbẽrarãra mingata opanʉ akʉza botapanʉ ãya kãgabʉta widita.

11. ¿Kʼãrẽ nekʼãrẽba ũdubibʉ dayirãra naʉ̃ ewari jõbodoare panʉta?

¹¹ Yi ũmeta, naʉ̃ nokʼo zromara naʉ̃ drʉa jõmaʉ̃mae zokʼabʉra, nekʼãrẽ oma zroma jĩrʉ. Naʉ̃ nokʼo zromara Estados Unidos akʉza Gran Bretaña, adewara Daizeze Bedʼeabara jarabʉ wua neẽ baita naʉ̃ nokʼo zroma kĩrãkʼara. Naʉ̃ nokʼo zromata akʉza wuabema nokʼorata, Daizeze Nokʼoba mesera makenañi Armagedón zebʉrʉde (Apoc. 16:13, 14, 16; 19:19, 20).c

12. ¿Daniel propesiabara kʼãrẽta audre jara ũrĩbibʉ naʉ̃ ewari jõbodoare panʉ ʉ̃rʉ?

¹² ¿Sãwũã kʼarebabʉ naʉ̃ propesiabara? Daniel propesiabara audre jara ũrĩbibʉ dayirãra naʉ̃ ewari jõbodoare panʉta. 2.500 audre poaga ba Danielba iyi propesiade jaradata, Babilonia makenana tẽã nokʼo zromara kimare ʉ̃tʉ zeibasita akʉza maʉ̃ra nokʼo zromarabara nekʼãrẽ bio ozebʉrʉta Daizeze pʉwʉrʉita. Adewara jarasi nokʼo zromaba naʉ̃ drʉa jõmaʉ̃mae zokʼabʉ kĩrãkʼara wua neẽbaita, maʉ̃ nokʼo zromara Estados Unidos akʉza Gran Bretaña. Naʉ̃ba dayirãʼa so zarea diabʉ akʉza nebiata jʉ̃ãbibʉ, kʼawuapanʉ baera aranʉ Daizeze Nokʼoba makenaita namabema nokʼora akʉza iyi Nokʼobʉrʉ zokʼa jʉ̃drʉita (Dan. 2:44).

13. Apocalipsis 17:9-12 bayeda jarabʉdera, ¿kʼai yi nokʼo 8debemara akʉza nokʼora 10 bʉra? ¿Maʉ̃ propesiara sãwũã aripe berabarisi?

¹³ (Akʉra Apocalipsis 17:9-12). Primera Guerra Mundialbara ẽbẽrarãta mejãcha zʉbʉriabisi, mawũã aripe berabaribisi propesia naʉ̃ ewari jõbodoare jarabʉta. Nokʼora naʉ̃ drʉa jõmaʉ̃nẽbemaba jõmaʉ̃ta ãba sobia erbakĩrãpanʉ baera, enero 1920de osida Sociedad de Naciones, maʉ̃ta octubre 1945de maʉ̃ bari bʉsida Naciones Unidasta. Daizeze Bedʼeabara jarabʉ naʉ̃ nokʼora yi nokʼo 8debemata, mamina jara ẽ naʉ̃ nokʼora nokʼo zroma naʉ̃ drʉa jõmaʉ̃mae zokʼabʉdebemata, iyira zarea barabʉ wuabemara nokʼoraba zareata diabʉ baera. Naʉ̃ra nokʼota Daizeze Bedʼeabara jarabʉ yi nokʼora 10bʉta.

14, 15. (1) ¿Apocalipsis 17:3-5 bayeda kʼãrẽta jarabʉ «Babilonia Pʉwʉrʉ Zroma» ʉ̃rʉ? (2) Idi ewade ẽbẽrarã religion zeri ẽãne badarabara, ¿kʼãrẽta obarabʉ?

¹⁴ (Akʉra Apocalipsis 17:3-5). Jeowabara ũdubisi Juanʼa wẽrã odebemata yi trʉ̃ra «Babilonia Pʉwʉrʉ Zroma». Naʉ̃ wẽrãbara jarakĩrãbʉ religion zeri ẽãra naʉ̃ drʉa jõmaʉ̃nẽbemata, ¿kʼãrẽta jarakĩrãbʉ Juanba ũdudabara? Religion zeri ẽãrabara mejãchade kʼareba zebʉrʉ nokʼorata, mamina aranʉ Jeowaba nokʼora burude bʉeyi iya krĩchabʉta «odamarẽã». Mawũẽra, ¿kʼãrẽta berabariyi? Nokʼora 10 bʉbara (nokʼora naʉ̃ drʉa jõmaʉ̃nẽnebema) jõbiyi religion zeri ẽãta (Apoc. 17:1, 2, 16, 17).

¹⁵ ¿Sãwũã kʼawuapanʉ aranʉ jõita Babilonia Pʉwʉrʉ Zromara? Naʉ̃ kʼawuaita kĩrãbedadrʉ sãwũãbasita nããbema Babiloniata. Iyi audura purrabasi do Éufratesba, naʉ̃ba kʼarebabasi iyi nejʉraraba neida oda ẽ marẽã. Apocalipsisbara jarabʉ idi ẽbẽrarã Babilonia Pʉwʉrʉ Zromarebʉra, naʉ̃ do kĩrãkʼabʉta ãyita kʼarebabʉ baera (Apoc. 17:15). Akʉza Apocalipsisbara jarasi dora errʉibasita, naʉ̃bara jarakĩrãbʉ ẽbẽrarã mejãchaʉba kʼarebada ẽ baibasita religion zeri ẽãra (Apoc. 16:12). Idi aripe berabaribʉ naʉ̃ propesiara: ẽbẽrarã mejãchaʉta ãĩ wãpanʉ religion zeri ẽãnebara, mawũã awurumae jʉrʉbʉ kʼarebata.

16. ¿Sãwũã kʼarebabʉ propesia biʼia ũrĩba sãwũã osidata Naciones Unidasta akʉza Babilonia Pʉwʉrʉ Zroma sãwũã jõi ʉ̃rʉ?

¹⁶ ¿Sãwũã kʼarebabʉ naʉ̃ propesiabara? Naciones Unidas odadeba akʉza ẽbẽrarã mejãchaʉta religion zeri ẽãneba ãĩ wãneba, ũdubibʉ dayirãra naʉ̃ ewari jõbodoare panʉta. Wãrĩnu idi ewadera ẽbẽrarã mejãchaʉta ãĩ wãnʉmʉ religion zeri ẽãneba, mamina naʉ̃ba jarakĩrãbʉ ẽ jõbita religion zeri ẽãra. Atia kʼawuada kĩrãkʼa Jeowabara naʉ̃ra 10 nokʼora sode bʉeyi (nokʼora naʉ̃ drʉadebema Naciones Unidas kʼarebabʉta) iya krĩchabʉta odamarẽã. Naʉ̃ra nokʼorabara atiaʉde jõma makenañi religion zeri ẽãrata, naʉ̃ra ẽbẽrarãbara jʉ̃ã ẽ bayi mawũã berabarira (Apoc. 18:8-10).d Babilonia Pʉwʉrʉ Zroma jõbʉrʉdera naʉ̃ drʉa jõmaʉ̃nẽ bedʼea zromata weseabʉ. Mamina Jeowa odepanʉrãra naʉ̃ ũme kʼarea sobiabaseabʉ: aba, naʉ̃ Jeowa nejʉrara wua neẽ bai baera. Ũmeta, dayirã naʉ̃ drʉa kayiruadeba ẽdrʉita arakʼaita ba baera (Luc. 21:28).

ĨJÃRÃ JEOWABA KʼAREBAITA IYI PɄWɄRɄRA NEKʼÃRẼ Ʉ̃RA ZEIDE

17, 18. (1) ¿Kʼãrẽta oibara dayirãba audre zarea ĩjãita? (2) ¿Kʼãrẽta kʼawuadai wuarebema artikulodera?

¹⁷ Danielbara jarasi: Wãrĩnu ʉ̃rʉ kʼawuaira audre mejãcha «eaba» wãita. Naʉ̃ra wãrĩnu berabaribʉ, ¿kʼãrẽa? Idi dayirãba idi ewaridebema propesiata bia ũrĩpanʉ baera (Dan. 12:4, 9, 10). Naʉ̃ propesiara jõma aripe berabaribʉ baera naʉ̃ba obibʉ dayirãba Jeowata wawia ũdubimarẽã akʉza iyi Bedʼeata (Is. 46:10; 55:11). Maʉ̃ kʼarea dayirãra zarea oseapanʉ audre ĩjãita, ¿sãwũã oseapanʉ? Daizeze Bedʼeata estudiakĩrã estudiabʉde, adewara kʼarebabʉrʉde awuru ẽbẽrata Daizeze neũdukʼawua bamarẽã. Daizezebara kʼarebayi iyiare kʼẽrẽpapanʉrãra akʉza neneẽã babiyi (Is. 26:3).

¹⁸ Wuarebema artikulode kʼawuadayi propesiara kristianora idibemara ʉ̃rʉ bedʼeabʉta akʉza akʉdayi naʉ̃ propesiara sãwũã aripe bedʼeabʉta naʉ̃ ewari jõbodoarebema propesiaʉ̃me, adewara ũdudayi, ¿kʼãrẽba ũdubibʉta Jesuba zokʼabʉta Jeowa ode kʼẽrẽpapanʉrãra?