Pedroba karta ũme bʉdadeba kʼãrẽta kʼawuaseapanʉ dayirãbara

1. ¿Pedro bei nãã Jeowaba kʼãrẽta bʉbisi?

PEDROBARA kʼawuabasi iyi beira arakʼaitabata. Iyi Jeowa ode kʼẽrẽpabasidera Jesu kʼaidubasi, jaradia wãsi miõba jaradiadakama akʉza zõrãrã buru biadebemabasi. Mamina iyara bari maʉ̃ awa oẽ basi. Daizezeba iyi jaure zareadeba bʉbisi kartarata ũme, maʉ̃ra berabarisi Kristo tẽã poaga 62deba 64 bayeda. Iya kʼawuabasi maʉ̃ kartarabara kʼarebaita kristianorata iyi beida tẽã (2 Ped. 1:​12-15).

2. ¿Kartara Pedroba bʉdara kʼãrẽa yibiabasi?

² Pedroba naʉ̃ra kartara bʉsidera mebẽrãrarã mejãcha sopʉapanasi bedʼea zromata ũdupanasi baera (1 Ped. 1:6). Ẽbẽra kayiruarata Daizeze kongregasionʼena eda jʉ̃ẽ kʼãrãpe sewa nebʉrʉta jaradiapanasi akʉza kãgapanasi mebẽrãba kayiruata odamarẽã (2 Ped. 2:​1, 2, 14). Kristianora Jerusalénʼnebemarabara jʉ̃ãpanasi nekʼãrẽ jõma jõi ewari zeita (romanoraba Jerusalén pʉwʉrʉ jõbita akʉza nekʼãrẽ judioraba opanʉta) (1 Ped. 4:7). Kartara Pedroba bʉdaba kʼarebasi mebẽrãra kʼẽrẽpapanamarẽã ãya bedʼea zroma ũdupanasimina akʉza ʉrʉmapanamarẽã bedʼea zroma ʉ̃ra zei kʼarea.b

3. ¿Kʼãrẽa akʉibara kartara Pedroba bʉdara?

³ Naʉ̃ra kartara Pedroba bʉdara mebẽrã siglo nããrabemaraita bʉsimina, Jeowaba iduaribisi iyi bedʼeade eda bamarẽã dayirãta kʼarebamarẽã. Maʉ̃ba idi ewade naʉ̃ba kʼarebaseabʉ dayirãta (Rom. 15:4). Idi ewadera mejãchabʉ nekayiruata akʉza bʉ mejãcha bedʼea zromata, maʉ̃raba oseabʉ dayi Jeowa ode kʼẽrẽpabʉta zarea bamarẽã. Adewara dayirãbara zʉbʉria zromata audre ũduyi mebẽrã siglo nããradebemaba ũdudaira. Kartara ũme Pedroba bʉdabara ũrãgʼa biarata erbʉ dayirãita, naʉ̃raba kʼarebayi ʉrʉmapanaita Jeowa ewari zeita arakʼaitaba baera akʉza ẽbẽrarã kʼarea pera ẽ baita, adewara mebẽrã kãgabʉta audre kãgaita akʉza naʉ̃ra ũrãgʼabara kʼarebayi zõrãrãba kʼawuamarẽã sãwũã kʼarebaita mebẽrã kongregasionebemata.

ɄRɄMA BAIDɄA

4. 2 Pedro 3:​3, 4​ba jarabʉdebara, ¿kʼãrẽba oseabʉ dayirãba ĩjãbʉta aduamarẽã?

⁴ Idi ewadebida dayirã audurabʉ ẽbẽrarã propresiara ʉ̃rʉ ĩjã ẽãrata. Ẽbẽra mejãchaʉta dayirã kʼarea ipidapanʉ, poaga bio baera jarapanʉta naʉ̃ ewari jõira arakʼaitabata akʉza ʉ̃kʉrʉbara jarapanʉ maʉ̃ ewarira ze ẽ baita (akʉra 2 Pedro 3:​3, 4). Dayirãba jaradia wãbʉrʉde, dayirã trajode, mawũã ẽ bʉrʉ dayirã mebẽrãba baduba maʉ̃ bedʼeata jarara, naʉ̃ba dayirãba ĩjãbʉta wiña wiñane aduabiseabʉ. Pedroba jara ũrĩbisi maʉ̃ mawũã berabaribʉrʉde kʼãrẽba kʼarebaseabʉta dayirãra.

5. ¿Kʼãrẽba kʼarebai jʉ̃ãita Jeowaba naʉ̃ ewari jõbiyi abʉ zeita? (2 Pedro 3:​8, 9).

⁵ Ʉ̃kʉrʉraba krĩchapanʉ Jeowaba ẽbẽrarã jõbiyi abʉra mesera we ẽãta, mamina Pedroba jaradaba kʼarebabʉ dayirã ʉrʉma bʼaita maʉ̃ ewari zei nãã, kĩrãbebibʉ baera Jeowabara ewarira awuara akʉbʉta dayirãba akʉbʉira (akʉra 2 Pedro 3:​8, 9). Jeowaitara mil poagara ewari ababʉ kĩrãkʼabʉ akʉza Jeowabara jʉ̃ã kʼawuabʉ, iyara kãga ẽ ẽbẽrarã beimarẽãra. Naʉ̃ drʉara jõñi, kʼãrẽaba yibiabayi dayirãba dayi ewarita bia zokʼapanʉbʉrʉ ẽbẽrarã naʉ̃ drʉa jõmaʉ̃nẽdebemara jaradiaita.

6. ¿Kʼãrẽta oibara ʉrʉma bʼaita Daizeze ewari zei nãã? (2 Pedro 3:​11, 12).

⁶ Pedroba dayirã jarasi «ʉrʉma [jʉ̃ãpanamarẽã] Jeowa ewari zeyeda» (akʉra 2 Pedro 3:​11, 12). Ewariza krĩchadaibara ẽjũã kĩrãwãreãnẽ sãwũã biʼia panai ʉ̃rʉ. Bari jaraita yiko warra koita, akʉza dayirã mebẽrãnebema beida jẽda piradrʉbʉrʉde ũduita, adewara ẽbẽrarã beida dããraba jara ũrĩbita sãwũã Daizeze Bedʼeade propesia jarabʉra aripe berabarisita. Naʉ̃ ʉ̃rʉ krĩchaiba kʼarebayi naʉ̃ ewari zeita jʉ̃ãita akʉza kʼawuaita dayirãra ewari jõbodoare panʉta. Adewara kʼarebabʉ wuabemaraba jarabʉ kʼarea aña krĩcha ẽ baita, biʼia kʼawuapanʉ baera ʉ̃ra zeide kʼãrẽta berabarita (2 Ped. 3:17).

PERARÃRA WUABEMARABA KʼÃRẼ JARAI KʼAREA

7. ¿Kʼãrẽta berabariseabʉ wuabemara kʼarea perabʉbʉrʉ?

⁷ Dayirãba bia kʼawuapanʉbʉrʉ Jeowa ewari zei ʉ̃rʉ, naʉ̃ba kʼarebayi wuabemara maʉ̃ ʉ̃rʉ jaradiakĩrãita. Mawũãsidu edaʉde dayirãra peraseabʉ wuabemara bedʼeaita. ¿Kʼãrẽa? Perapanʉ baera wuabemaraba dayirã ʉ̃rʉ kʼãrẽ krĩchaita. Dayirãsida Pedro kĩrãkʼa berabariseabʉ. Iyira wuabemara kʼarea perasi baera jara ẽ basi Jesu kʼaidubemata akʉza jarasi iyara Jesura ũdukata (Mat. 26:​69-75). Mamina tẽã Pedroba pera ẽã naʉ̃ta jarasi: «Ãyi kʼarea peraraidua akʉza mejãcha krĩcha oraidua» (1 Ped. 3:14). Dayirãta naena ẽbẽrarã kʼarea perabasibʉrʉ Pedroba jaradaba kʼarebabʉ wua pera ẽ baita.

8. ¿Kʼãrẽba kʼarebaseabʉ wuabemara kʼarea pera ẽ baita? (1 Pedro 3:15).

⁸ ¿Kʼãrẽba kʼarebaseabʉ wuabemara kʼarea pera ẽ baita? Pedroba naʉ̃ta jarabʉ: «Wawiara Kristota Yibari kĩrãkʼa mara sode» (akʉra 1 Pedro 3:15). Maʉ̃itara kĩrãbedaibara Jesuba atia kʼãrẽta onʉmʉta akʉza kʼãrẽaba zarea barabʉta. Bʉta wuabemara Jeowa ʉ̃rʉ jaradiai kʼarea perabʉbʉrʉ, krĩchara dayirã nokʼota. Krĩchara iyira ʉ̃tʉbʉta akʉza iyi audura mejãchabʉta angelerata. Kĩrãbera iyara diasidata «zokʼamarẽã nekʼãrẽ ʉ̃tʉbʉta akʉza nama egorodebʉta». Adewara iyira dayirãbawara «bʼaita nrʉemaza naʉ̃ drʉadebʉ jõñiena» (Mat. 28:​18-20). Pedroba jarasi dayirãba ĩjãbʉ ʉ̃rʉ jaradia baya awa bʼaibarata. ¿Bʉara bʉa ĩjãbʉ ʉ̃rʉ jaradiakĩrãbʉka kolegiode, trajode mawũã ẽ bʉrʉ badumae? Naena biʼia krĩchara kʼãrẽta jaraseabʉta akʉza sõbede oseabʉta. Yiwidʼira zowaĩnĩgʉa bʼaita akʉza ĩjãra Jeowaba kʼarebaita wuabemara kʼarea pera ẽ baita (Hech. 4:29).

«MEJÃCHA YI KÃGAPANAIDUA»

9. Ewari aba Pedroba kãgata ũdubi ẽ basi, ¿maʉ̃ra sãwũã berabarisi? (Akʉra potota).

⁹ Pedrobara kʼawuasi sãwũã kãga ũdubibarata. Pedrobara ũrĩsi Jesuba naʉ̃ bedʼea jaradata: «Mʉ̃a mara bedʼea yiwidita jarayi maraba odamarẽã: mayirainʉ yiya kãgadamarẽã, mʉ̃a mara kãga zebʉrʉ kĩrãkʼa, marasida mawũã yiya kãga panamarẽã» (Juan 13:34). Mawũãsidu iyira ẽbẽrarã kʼarea perasi baera, wua nekokĩrã ẽ basi mebẽrã judiora ẽ bawara. Pabloba jarasi Pedroba mawũã odabara ũdubi ẽ basita mebẽrã wãrĩnu kãgabʉta (Gál. 2:​11-14). Pedrobara ũrĩsi Pabloba jaradara. Iya karta ũme bʉdade Pedroba jarasi mebẽrãra bari kãgaibara ẽãta awuarabʉrʉ ũdubibarata wãrĩnu kãgabʉta.

10. ¿Kʼãrẽa «mebẽrã kĩrãkʼa yiya [kãgabʉta]» ũdubipanʉ? Jara ũrĩbira (1 Pedro 1:22).

¹⁰ Pedroba jarabʉ mebẽrã kongregasionebemara mebẽrã kĩrãkʼa kãgaibarata (akʉra 1 Pedro 1:22). Maʉ̃ kãgata ũdubipanʉ «wãrĩnuta ũrĩpanʉ baera». Maʉ̃ wãrĩnunera eda jarabʉ «Daizezebara jõma ẽbẽrarãra awuara akʉ ẽãta» (Hech. 10:​34, 35). Dayirãba kongregasione ʉ̃kʉrʉ mebẽrãbʉrʉ kãga ũdubipanʉbʉrʉ, ũrĩpanʉ ẽ Jesuba bedʼea zokʼadata «dayirãi yiya kãgaita» (Juan 13:23; 20:2). Pedroba jaraside mebẽrã kĩrãkʼa yiya kãgaita jarakĩrãbasi kãgaibarata mebẽrã kongregasionebemara dayirã mebẽrã kĩrãkʼapanʉ baera (1 Ped. 2:17).

11. ¿Kʼãrẽta oibara dayirãi «soiduba yiya» kãgaira?

¹¹ Pedroba jarasi: «Mayirai soidʉba yiya kãgaidʉa». Naʉ̃ testode bedʼea «soidʉba» jarakĩrãbʉ ẽbẽra aba kãgaita zaremina iyaʼa maʉ̃ kãga ũdubita. Bari jaraita, mebẽã abaʉba dayita kĩrʉbira, ¿kʼãrẽta oi? Mawũã berabaribʉrʉdera dayirãbara krĩchadogo abarika oita kãga ũdubi kaude. Mamina Pedroba Jesuba jaradadeba kʼawuasi daya abarika ora, Jeowabara bia akʉ ẽãta (Juan 18:​10, 11). Pedroba bʉsi: «Awuruba kayirua obʉrʉde abarika oraidua, i jʉra bedʼeabʉrʉde abarika i jʉra bedʼearaidua. Awuarabʉrʉ nebiata jaraidua» (1 Ped. 3:9). Bʉa soiduba kãga ũdubibʉdera awururaba bʉ kayirua opanʉmina bia edabʉ.

12. (1) Adewara soiduba yiya kãga ũdubibʉbʉrʉ, ¿kʼãrẽta oibara? (2) Cuidemos nuestra valiosa unidad bideodebara, ¿bʉara kʼãrẽta oũdubikĩrãbʉ?

¹² Iyi kartade Pedroba jaraside mayirai yi kãgaidua, iyara jarakĩrãbasi maʉ̃ kãgabara jõma kĩrãduabʉta kayirua opanʉra (1 Ped. 4:8). Maʉ̃ bedʼea bʉside Pedrobara kĩrãbesibaibara Jesuba bedʼea nãã jaradata. Maʉ̃ ewaridera Pedrobara jarasi yi mebẽãba kayirua obʉra kĩrãduaibarata 7 bayeda, maʉ̃nera iyara krĩchasi aripe jarasita, mamina Jesuba jaradiasi akʉza dayirã jaradiabʉ 77 bayeda kĩrãduaibarata dayirã mebẽrãba kayirua odara. Maʉ̃ba jarakĩrãbʉ krĩcha ẽ baibarata sõbebayeda kĩrãduaibarata dayirã mebẽrãba kayirua obʉra (Mat. 18:​21, 22). Bʉta mawũã berabaribʉbʉrʉ maʉ̃ kʼarea mapaerãra, jõma Jeowa odepanʉraita zareabʉ kĩrãduaita awuruba kayirua obʉrʉde. Bʉta zarea obʉbʉrʉ bʉ mebẽãba kayirua oda kĩrãduaita maʉ̃trʉ jipade yibia.c

ZÕRÃRÃ BIA AKɄIDUA JEOWA KONGREGASIONTA

13. ¿Kʼãrẽba zarea baseabʉ zõrãrãba mebẽrãta bia akʉmarẽã?

¹³ Pedrobara kĩrãdua ẽ basibaibara Jesu jẽda piradrʉda tẽã iyaʼa jaradata: «Jʉredua mʉ pẽwã bʼeta» (Juan 21:16). Bʉta zõrãrãbʉrʉ kʼawuabʉbaibara bʉabida oibarata maʉ̃ra. Edaʉde zõrãrãitara zare ewari jʉrʉita maʉ̃ oita. Nããra zõrãrãbara diaibara yi mebẽrãba nekʼãrẽ nesidabʉta, kãga ũdubibara akʉza kʼarebaibara yi mebẽrã audre Jeowa kʼawapanamarẽã, jaradia wãibara, adewara diskurso diaibara ãba yi jʉrebʉmae akʉza asambleade, ʉ̃kʉrʉra bedʼeaibara medikorabawara akʉza ʉ̃kʉrʉra trajapanʉ Daizeze de parãpanʉne.

14. ¿Kʼãrẽba kʼarebaseabʉ zõrãrãba mebẽrãra bia akʉmarẽã? (1 Pedro 5:​1-4).

¹⁴ Pedroba naʉ̃ ũrãgʼata diasi zõrãrã: «Obeja akʉbariba akʉbari kĩrãkʼa akʉidua Daizeze obejara» (akʉra 1 Pedro 5:​1-4). Bʉta zõrãrãbʉrʉ kʼawuapanʉ bʉara soiduba akʉkĩrãbʉta mebẽrã kongregasionebemara. Mamina bʉa nekʼãrẽ mejãcha oita erbʉ baera, mawũã ẽ bʉrʉ mapaebʉta sentibʉ baera, krĩchaseabʉ oau ẽ baita maʉ̃ trajora. ¿Kʼãrẽta oseabʉ? Jeowaʼa jara ũrĩbira bʉa kʼãrẽ krĩchabʉta. Pedroba bʉsi: «Awuruta kʼarebaibʉrʉ oibara Daizeze zareadeba» (1 Ped. 4:11). Mebẽrã kongregasionebemarabara erbʉ bedʼea zroma idi ewade jipa ara obe ẽãta, mamina kĩrãbera Jesuba zarea erbʉta ãyi kʼarebaita. Iyara maʉ̃ra oseabʉ idi akʉza ẽjũã biade. Jeowaba kãgabʉ zõrãrãba naʉ̃ta odamarẽã: mebẽrãta kãgadamarẽã, bia akʉdamarẽã akʉza yiza biata ũdubidamarẽã ãyaʼa.

15. ¿Zõrãrã abaʉba sãwũã akʉbʉ mebẽã aba? (Akʉra potota).

¹⁵ Williamʼra dããraba zõrãrãta, iya jara ũrĩbibʉ kʼãrẽa yibiata mebẽrã akʉira. COVID-19 jʉ̃drʉside Williamba akʉza iyiʉ̃mepanʉra zõrãrãba krĩchasida ewariza trʉ̃ita mebẽrã aba ãyi grupodebemata. Iya jara ũrĩbibʉ kʼãrẽa mawũã osidata: «Mebẽrã mejãchaʉta dobapanasi ãyi deda, maʉ̃ba ãyi kʼãrẽ krĩchabʉra mesera aña krĩchaseabasi». Mebẽã abaʉba bedʼea zroma erbʉdera Williambara kĩrãkita ũrĩbʉ iya jarabʉta, mawũã kʼawuaita sãwũã kʼarebaita. Iyara kʼareba jʉrʉbʉ dayirã pagina jw.org de, mama ũdubʉ bideorata akʉza kartara mebẽrã kʼarebaseabʉta. Williamba jarabʉ: «Mebẽrã akʉira idi ewadera jipade yibia, daira zarea opanʉ ẽbẽrarã jaradiaita Daizeze ʉ̃rʉ, abarika zarea opanʉ mebẽrã kongregasionebema kʼarebaita Jeoware kʼẽrẽpapanamarẽã».

JEOWA IDU YI JARADIABIRA

16. ¿Sãwũã oseapanʉ Pedroba iyi kartade bʉdata?

¹⁶ Atia kʼawuasida Pedroba ũrãgʼa jarada ʉ̃rʉ. Bʉa naʉ̃ ʉ̃rʉ kʼawuaside krĩchasibaibara kʼãrẽne awuara oseabʉta. Bari jaraita ¿bʉara audre krĩchakĩrãbʉka ẽjũã kĩrãwãreãnẽ kʼãrẽ nebia zei ʉ̃rʉ? ¿Krĩchabarika trajode, kolegiode mawũã ẽ bʉrʉ ode audre jaradiaita Daizeze ʉ̃rʉ? ¿Krĩchabarika sãwũã audre kãga ũdubiseabʉta mebẽrã kongregasionebema? Bʉta zõrãrãbʉrʉ, ¿krĩchabarika mebẽrã kongregasionebema soiduba bia akʉita? Ũduseabʉ kʼãrẽne aña onʉmʉta, mamina maʉ̃ kʼarea krĩcha orãra. Jeowa ẽbẽra bia baera kʼarebayi bʉa maʉ̃ta ara owãmarẽã (1 Ped. 2:3). Pedroba jarasi: «[Daizezeba] zarea babiyi akʉza teitea babiyi» (1 Ped. 5:10).

17. Dayirãta mapae e bʉrʉ akʉza Jeowa idu yi jaradiabibʉbʉrʉ, ¿kʼãrẽta berabari?

¹⁷ Ewari aba Pedrobara krĩchasi iyira Jesu kʼawara babe ẽãta (Luc. 5:8). Mamina Jeowa kʼarebadeba akʉza Jesu kʼarebadeba, Pedrora mapae ẽ basi akʉza Jesu kʼaidu kʼẽrẽpabasi. Maʉ̃ kʼarea Jeowabara Pedrora bia akʉsi akʉza jidasi ʉ̃ta wãita (2 Ped. 1:11). Kʼãrẽ yibia maʉ̃ra. Dayirãbida abarika opanʉbʉrʉ Pedrode kĩrãkʼa akʉza mapaeda ẽ bʉrʉ, Jeowaba diayi ewari jõmaʉ̃nẽ bʼaita. Bʉa mawũã ĩjãbʉba ẽdrʉseabʉ (1 Ped. 1:9).