Jʉra kʼawuabara kayiruade bae ẽ baita

1, 2. (1) ¿Kʼãrẽne jʉra kʼawuabamarẽã jarasi Jesúsbara? (2) ¿Kʼãrẽa yi kayirua yi edebisida Jesús kʼaidubemarãra? (Akʉra potota).

«MARABARA nebiata okĩrãbʉmina kakuabara obe ẽã»a (Mat. 26:41b). Jesúsba maʉ̃ bedʼea jarasidera ũdubikĩrãbasi iyara bia kʼawuabʉta dayirãra egoro oma baera kayirua ozeseabʉta adewara iya jarasi jʉra kʼawua bʼaibarata dayikʉza krĩcha ẽ baita dayirã zareabʉta akʉza maʉ̃ kayiruara oze ẽ baita. Jesúsba maʉ̃ bedʼea jarai nãã iyi kʼaidubemaraba jarasida ãyara Jesúsʼra doba amaena ẽ baita (Mat. 26:35). Maʉ̃ra ãyara soidʉba okĩrãpanasi, mamina ãya krĩchada ẽ basi wãrĩnʉ bedʼea zroma ũdubododera ãyira yi kayirua yi edebidaibasita, maʉ̃ kʼarea Jesúsba ãyaʼa jarasi: «Ʉrʉmapanaidua akʉza badua yiwidʼipanaidua mawũã kayiruade baebibari krĩchade baeda ẽ baita» (Mat. 26:41a).

² Jesús jidasidadera, ¿kʼãrẽta osida iyi kaidubemarabara? Wãrĩnʉbaira ãyara oda ẽ basi Jesúsba omarẽa jaradata, ãyira ʉrʉma pana ẽ basi, maʉ̃ba ãya Jesús doba amae ẽ baya adara oda ẽ basi awuarabʉrʉ doba amaesida (Mat. 26:56).

3. (1) Dayirãta Jeoware kʼẽrẽpa bakĩrãpanʉbʉrʉ, ¿kʼãrẽa aukʼara krĩcha ẽ baibara dayikʉza? (2) ¿Kʼãrẽta akʉdayi naʉ̃ artikulode?

³ Dayirã jõmaʉ̃ta zarea odaibara dayikʉza krĩcha ẽ baita zareabʉta yi kayiruade bae ẽ baita. Wãrĩnʉbaira jõma mebẽrã Jeowa odepanʉrãra Jeoware kʼẽrẽpa bakĩrãpanʉ, iyideba jĩga wãmapanʉ, mamina dayirãra kayirua omia baera, kayiruata oseapanʉ (Rom. 5:12; 7:​21-23). Dayirãba jʉ̃ã ẽãne ũduseabʉ bedʼea zroma dayirã kayiruade baebiseabʉta, mamina dayirãta Jeoware kʼẽrẽpa bakĩrãpanʉbʉrʉ akʉza Jesúsʼare kʼẽrẽpa bakĩrãpanʉbʉrʉ, ũrĩbara Jesúsba jaradata, ʉrʉmapanaibara. Naʉ̃ artikulode maʉ̃ ʉ̃rʉ bedʼeadayi. Nããra akʉdayi kʼãrẽne jʉra kʼawuapanaibarata. Tẽã akʉdayi kʼãrẽta oseabʉta nemitia oẽ baita. Maʉ̃are akʉdayi kʼãrẽta oibarata dauba bʼaita.

¿KʼÃRẼNE JɄRA KʼAWUAPANAIBARA?

4, 5. ¿Kʼãrẽa zarea odaibara kayirua dayima yi zroma ẽ kĩrãkʼabʉ oẽ baita?

⁴ Bʉ ʉ̃kʉrʉ kayirua aukʼara yi zroma ẽãta, mamina mawũãsidʉ maʉ̃bara dayirã Jeowadeba jĩga babiseabʉ adewara maʉ̃bara dayaʼa kayirua audre yi zromata obiseabʉ.

⁵ Dayirã jõmaʉ̃ba ũduseapanʉ dayi yi kayiruade baebiseabʉta, mamina dayirãnebema aba abakaʉba erbʉ saʉ̃ kayiruade audre mesera baeseabʉta. Bari jaraita, ʉ̃kʉrʉra zarea opanʉbaibara juwa jidaena mia erkʼãĩ ẽ baita adewara ʉ̃kʉrʉbara zarea obʉbaibara ãyikʉza ãyi kakua tã ẽ baita adewara ẽbẽrarã ãkadabe akʉ ẽ baita, mawũã ẽ bʉrʉ ʉ̃kʉrʉra zarea opanʉ baibara naʉ̃ drʉadebema bʉ kĩrãkʼa ba ẽ baita. Bari jaraita, ʉ̃tabʉta krĩcha ẽ baita, ẽbẽrarã kʼarea pera ẽ baita akʉza kĩrʉmia ẽ baita. Maʉ̃ kʼarea Santiagoba naʉ̃ta jarasi: «Aba abakaʉba kʼãrẽ krĩcha erbʉba, edebʉ iya kãgabʉ oita» (Sant. 1:14).

6. ¿Kʼãrẽta ĩjãnaibara dayirãkʉza?

⁶ ¿Bʉa kʼawuabʉka kʼãrẽba ñabasea nemitia obiseabʉra? Jʉra kʼawuabaibara dayirã maʉ̃ nekayiruade eda bae ẽ baita akʉza krĩcha ẽ baita daya maʉ̃ra oẽ baita (1 Juan 1:8). Pablobida jarasi Daizezedebema nebia erpanʉrasida nekayiruade baeseabʉta jʉra kʼawuapanʉ ẽ bʉrʉ (Gál. 6:1). Biga bayi dayikʉzaʉba ĩjãita bʉta dayi nekʼãrẽba nekayirua obiseabʉta (2 Cor. 13:5).

7. ¿Kʼãrẽta audre kĩrãkita akʉibara dayirãbara? Yizata jara ũrĩbira.

⁷ Daya kʼawuasibʉrʉ dayi kʼãrẽba nekayirua obiseabʉta, ¿kʼãrẽta oibara? Audre zarea oibara kʼawuaita sãwũã maʉ̃ʼa yi edebi ẽ baita. Krĩchara naʉ̃ta: nããra pʉwʉrʉ zroma aʉdʉra basi murota, mawũã yi nejʉraraba kʼai beada ẽ marẽã, gorogorora mejãcha bʉeibarabasi yi puertaya, yi nejʉrara eda wã ẽ marẽã mama. Mawũẽra, ¿saʉ̃ta audre bia akʉdaibarabasi? Yi puertata. Maʉ̃ kĩrãkʼa dayirãbida kĩrãkita akʉdaibara dayi kʼãrẽba ñabasea nekayirua obiseabʉta, mawũã maʉ̃ne bae ẽ baita (1 Cor. 9:27).

¿KʼÃRẼTA OSEAPANɄ YI KAYIRUA YI EDEBI Ẽ BAITA?

8, 9. Proverbios kapitulo 7de jarabʉ kʉ̃rabara, ¿kʼãrẽta oẽ baide basi? (Proverbios 7:​8, 9, 13, 14, 21).

⁸ ¿Kʼãrẽta oseapanʉ yi kayirua yi edebi ẽ baita? Akʉdaya kʼãrẽta jaradiabʉta Proverbios yi zroma 7ba. Nama jarabʉ kʉ̃ra aba nekayirua osita wẽrã odebemaʉ̃me, bersikulo 22 de jarabʉ iya kʼawuaimara maʉ̃ yuwẽrã kʼaidʉbasi, mamina wãrĩnʉbaira yi bersikulo nããbemaraba ũdʉbibʉ iyira atiaʉde maʉ̃ne eda bae toto ẽ basita awuarabʉrʉ iya wiña wiñane maʉ̃ nekʼãrẽ o wãba mainʉ edesita.

⁹ ¿Kʼãrẽta osi naʉ̃ kʉ̃raba iya maʉ̃ nekayirua oi nãã? Nããra, maʉ̃ yuwẽrã de eskina kʼawa berabarisi, maʉ̃are wãsi maʉ̃ yuwẽrã deare (akʉra Proverbios 7:​8, 9). Maʉ̃are maʉ̃ yuwẽrã ũdʉbʉrʉde aña wã ẽ basi, mawũã oi kaʉde idʉ yi ñegabisi akʉza ũrĩsi maʉ̃ yuwẽrãba sakripisio osi ada ʉ̃rʉ, iya maʉ̃ra mawũã nebʉrasi ũdubita iyira ẽbẽra wẽrã biata (akʉra Proverbios 7:​13, 14, 21). Naʉ̃ kʉ̃raba maʉ̃ta oẽ basibʉrʉ naʉ̃ nekayiruade eda bae ẽ bakasi.

10. ¿Kʉ̃ra Proverbiosde berabarida kĩrãkʼa kʼãrẽta berabariseabʉ Jeowa odepanʉrasida?

¹⁰ Daizeze odepanʉra badʉta mawũã berabariseabʉ, nemitia zromata oseabʉ, mõbe krĩchaseabʉ maʉ̃ra atiaʉde mawũã berabarisita, iyikʉza krĩchaseabʉ: «Mʉ̃a kʼawua ẽ sãwũã mawũã berabarisita». Mamina jẽda biʼia krĩchara kʼawuayi iyi sãwũã wiña wiñane maʉ̃ne eda baesita. Iya maʉ̃itara nekʼãrẽ bio osibaibara. Bari jaraita, jemene basibaibara Daizezeba kãga ẽãta akʉza neũdukʼawua zeri ẽãta jʉrʉsi baibara adewara internetʼne akʉsi baibara nekʼãrẽ akʉ ẽ baibarata akʉza Daizezeʼa yiwidʼi ẽ basi akʉza Daizeze Bedʼeasida akʉ ẽ basi akʉza jaradia wã ẽ basi adewara ãba yi jʉre ẽ basi. Kʉ̃ra Proverbiosde jarabʉ kĩrãkʼa maʉ̃ra atiaʉde mawũã berabari ẽ basi.

11. ¿Dayirãba nekayiruata oamapanʉbʉrʉ kʼãrẽta oibara?

¹¹ ¿Kʼãrẽta kʼawuapanʉ? Bari jʉra kʼawua baibara ẽ nekayirua oẽ baita, awuarabʉrʉ jʉra kʼawua baibara wiña wiñane maʉ̃ kayiruama edebʉta oẽ baita, maʉ̃ta jarasi Salomónba kʉ̃ra aba yuwẽrã odebema kʼaidu wãna ʉ̃rʉ nebʉraside, maʉ̃ yuwẽrã ʉ̃rʉ bedʼeabʉrʉta jarasi adʉarara iyi ode (Prov. 7:25). Adewara ũrãgʼasi jĩga bʼaibarata maʉ̃ ẽbẽra wẽrã demaebara, mia kʼãrẽsida orra ẽ baibarata (Prov. 5:​3, 8). Naʉ̃ba jaradiabʉ nekayiruata oamapanʉbʉrʉ oẽ baibarata wiña wiñane maʉ̃ kayirua obiseabʉta.b Maʉ̃ba jarakĩrãbʉ bʉta nekʼãrẽ Daizeze odepanʉraita kayirua ẽãta mamina dayita maʉ̃ba nekayirua obiseabʉbʉrʉ oẽ baibara (Mat. 5:​29, 30).

12. ¿Kʼãrẽta sãwũã oita jidasi Jobʼbara akʉza naʉ̃ba sãwũã kʼarebasi nekayirua oẽ baita? (Job 31:1).

¹² Dayirãba nemitia oamapanʉbʉrʉ dayirã nekayiruama edebiseabʉta oda ẽ baibara. Jobʼba oda kĩrãkʼa oseabʉ, iyira bedʼea abarika zesi iyi dabʉme akʉ ẽ baita awuru yuwẽrãta (akʉra Job 31:1). Abarika dayirãsida bedʼea abarika zeibara dayikʉza nekayiruama edebiseabʉ oẽ baita.

13. ¿Kʼãrẽa jʉra kʼawua panaibara dayirãba kʼãrẽ krĩchanʉmʉ ʉ̃rʉ? (Akʉra potota).

¹³ Adewara jʉra kʼawuabaibara dayi kʼãrẽ krĩcha bʉdebida (Éx. 20:17). Ʉ̃kʉrʉba krĩchapanʉ nemitia ʉ̃rʉ krĩchaseabʉta daya maʉ̃ta onʉmʉ ẽ bʉrʉ maʉ̃ra kʼãrẽ ẽãta. Mamina jipa aña krĩchapanʉ ãyara, nekayirua ʉ̃rʉ krĩchanʉmʉbʉrʉ maʉ̃ta wãrĩnʉ okĩrãñi, mawũã obʉbʉrʉ zarea bayi daya nemitia oẽ baita. Mamina edaʉde krĩcha kayiruara iyi doba zebʉ, ¿kʼãrẽta oseabʉ mawũãbʉrʉdera? Ñabasea ãĩbʉeibara maʉ̃ krĩcha kayiruara mõbe krĩchaibara krĩcha biata, mawũã odara krĩcha kayirua yi edebi ẽ bayi (Filip. 4:8; Col. 3:2; Sant. 1:​13-15).

14. ¿Adewara kʼãrẽba kʼarebai yi kayirua yi edebi ẽ baita?

¹⁴ ¿Adewara kʼãrẽta oibara yi kayirua yi edebi ẽ baita? Wãrĩnʉ ĩjãnaibara Jeowaba ley diabʉtrʉ audre yibiata, iya zokʼabʉta aripe opanʉbʉrʉ bia wãñi. Edaʉde zare krĩchaita akʉza sentita Jeowaba kãgabʉ kĩrãkʼa, mamina zarea opanʉbʉrʉ Jeowaba kãgabʉ kĩrãkʼa oita wãrĩnʉ sobia panañi.

15. ¿Dayirã nebia oi krĩchabʉba sãwũã kʼarebabʉ?

¹⁵ Dayirãbara nebiata krĩchaibara adewara kʼawuara sãwũã jʉraita nekayiruara akʉza sãwũã nebia kãgaita (Amós 5:15). Mawũã opanʉbʉrʉ nebiata audre okĩrãñi, maʉ̃ba kʼarebayi nekayirua oẽ baita. Dayirãba nekʼãrẽ aripe oita krĩchapanʉbʉrʉ naʉ̃ba kʼarebayi atiaʉde nekayirua oita zebʉrʉde maʉ̃ oẽ baita.

16. ¿Kʼãrẽa Daizezedebema ewariza obʉba kʼarebabʉ jʉra kʼawua bʼaita? (Akʉra potota).

¹⁶ ¿Kʼãrẽba kʼarebai nebia ʉ̃rʉ krĩchaita? Nekʼãrẽ Daizezedebemata audre odaibara. Dayirãta ãba yi jʉrebarima wãpanʉbʉrʉ akʉza jaradiade wãpanʉbʉrʉ audre okĩrãñi nekʼãrẽ Jeowa sobiabibʉta akʉza nekayiruata oda ẽ bayi (Mat. 28:​19, 20; Heb. 10:​24, 25). Dayirãba Daizeze Bedʼeata akʉra akʉza maʉ̃ ʉ̃rʉ biʼia krĩchara, naʉ̃ba kʼarebayi kãgaita nebiata akʉza jʉraita nekayiruata (Jos. 1:8; Sal. 1:​2, 3; 119:​97, 101). Jesúsbida naʉ̃ta jarasi: «badua yiwidʼipanaidua mawũã kayiruade baebibari krĩchade baeda ẽ baita» (Mat. 26:41). Dayirãba Jeowaʼa yiwidʼibʉrʉde kʼareba widipanʉbʉrʉ mawũãra ũdʉdayi iya dayirã sãwũã kʼarebabʉta akʉza iyita aʉdre sobiabikĩrã panañi (Sant. 4:8).

EWARI JÕMAɄ̃NẼ JɄRÃ KʼAWUAPANAIBARA

17. ¿Pedroitara kʼãrẽ kayirua idubʉita zare basi?

¹⁷ Ʉ̃kʉrʉ nekʼãrẽ dayirãba aña obadara jipa idʉbʉseabʉ, mamina bʉ ʉ̃kʉrʉta dayita ewari jõmaʉ̃nẽ jʉra kʼawuabʉ ẽ bʉrʉ maʉ̃bara nekayiruama edebiseabʉta. Bari jaraita, Pedrobara wawia basi ẽbẽrarãta maʉ̃ kʼarea iyara jarama ũbea jarasi Jesura ũdukata (Mat. 26:​69-75). Ewari bio berabarida tẽã Pedroba ũdʉbibʉrʉ kĩrãkasi iyira wua pera ẽãta ẽbẽrarã kʼarea, Sanedrín kĩrãbita bedʼeaside (Hech. 5:​27-29). Mamina maʉ̃ tẽã, iyira kristianora judiora ẽã bawara wua neko ẽ basi, perabasi baera kristianora judioraba iyi ʉ̃rʉ kʼãrẽta jarai kʼarea (Gál. 2:​11, 12). Mawũẽra Pedroba ẽbẽrarã wawia ũdʉbi badara idʉbʉ ẽ basi, maʉ̃ne ũdʉbisi waidide mawũãbʉta. Dayirãbara bia kʼawuada ẽ iya maʉ̃ra jipa idʉbʉsi kʼawuaita.

18. ¿Edaʉde dayirãba nekʼãrẽ aña obʉme kʼãrẽta odaibara?

¹⁸ Abarika berabariseabʉ dayirãta. Dayirãba nekʼãrẽ aña obadata dayima idʉbʉsi kĩrãkʼabʉta tẽã jʉ̃neane jẽda oseabʉ baera. Mebẽã aba mawũã berabarisi. Iya jarabʉ: «Mʉ̃ara 10 poagabayeda ẽbẽrarã ãkadabe akʉbadara akʉ ẽ basi, maʉ̃ba mʉ̃a krĩchasi jipa idʉbʉsita maʉ̃ akʉbʉra, mamina tẽã mʉ̃ra mejãcha zarea oibarabasi maʉ̃ akʉ ẽ baita». Kʼãrẽ yibia naʉ̃ mebẽãba iyi maʉ̃ kayiruade jẽda bae ẽ baita zarea obʉta idʉbʉ ẽ basi baera, iya kʼawuasi iyi mawũã zarea obʉra, bari ewari abapai oibaibara ẽ basita awuarabʉrʉ ewari jõmaʉ̃nẽ oibara basi. Yi kimaba akʉza zõrãrã kongregasionebemaba kʼarebapanʉ iya maʉ̃ ẽbẽrarã ãkadabe akʉbʉta akʉ ẽ marẽã.

19. ¿Kʼãrẽta oseapanʉ dayirãba nekʼãrẽ aña obʉta jipa idubʉ au ẽ bʉrʉ?

¹⁹ ¿Dayirãba nekʼãrẽ aña obʉta jipa idubʉda ẽ bʉrʉ, kʼãrẽba kʼarebayi maʉ̃ba kayiruata obi ẽ marẽã? Jesuba ũrãgʼa diadata ũrĩbara, dayirãra ewari jõmaʉ̃nẽ jʉra kʼawuapanaibara. Bʉma bʉa nekʼãrẽ aña obadata jipa idubʉsi kĩrãkʼa bʉbʉrʉ aukʼara ĩjãrara maʉ̃ ʉ̃rʉ, awuarabʉrʉ zarea ora oẽ baita nekʼãrẽ bʉ maʉ̃ kayirua eda jẽda baebiseabʉta (1 Cor. 10:12). Bʉa maʉ̃ kayirua jẽda oẽ baya nekʼãrẽta obʉbʉrʉ akʉza bʉa maʉ̃ obʉde bia wãbʉrʉ, maʉ̃ mawũã obʉta idubʉrãra ewari jõmaʉ̃nẽ obara. Proverbios 28:14​ba jarabʉ: «Ẽbẽra ewari jõmaʉ̃nẽ dau kʼawuabʉra sobiabʉ» (2 Ped. 3:14).

¿SÃWŨÃ KʼAREBABɄ JɄRA KʼAWUABAIBA?

20, 21. (1) ¿Kʼãrẽ nebiata ũdudai zarea opanʉbʉrʉ yi kayirua yi edebi ẽ baita? (2) ¿Dayirãreba zarea opanʉbʉrʉ kʼãrẽta oi Jeowaba? (2 Corintios 4:7).

²⁰ Jipade yibia dayirãra ewari jõmaʉ̃nẽ jʉra kʼawuapanaita, dayirãba nekʼãrẽ aña obʉrʉdera atia eda sobiabʉ, mamina dayirãba Jeowaba nekʼãrẽ omarẽã zokʼabʉta opanʉbʉrʉ mawũãra ewari jõmaʉ̃nẽ wãrĩnu sobiapanañi (Heb. 11:25; Sal. 19:8). Wãrĩnubaira dayirãra parãsida ewari jõmaʉ̃nẽ Jeowaba kãgabʉta oita (Gén. 1:27). Dayirãba maʉ̃ta opanʉbʉrʉ dayirã krĩchara aduʼa bayi akʉza ewari jõmaʉ̃nẽ sobiapanañi (1 Tim. 6:12; 2 Tim. 1:3; Jud. 20, 21).

²¹ Wãrĩnubaira dayirãra nemitia omia, mamina maʉ̃ba jarakĩrãbʉ ẽ dayirãra yi kayirua yi edebibarata Jeowata dayirã kʼawabʉ baera dayirã kʼarebaita (akʉra 2 Corintios 4:7). Wãrĩnubaira dayirãba zarea nesidabʉrʉdera maʉ̃ zareara Jeowaba diabʉ, mawũãsidu dayirãsida zarea oibara ewari jõmaʉ̃nẽ maʉ̃ kayirua yi edebi ẽ baita. Mawũẽra dayirãʼareba zarea opanʉbʉrʉ ĩjãseapanʉ dayirãba Jeowa kʼareba widibʉrʉdera iya diaita dayirãba nesidabʉra (1 Cor. 10:13). Dayirãra Jeowa kʼarebadeba ewari jõmaʉ̃nẽ jʉra kʼawua baseapanʉ yi kayirua yi edebi ẽ baita.