Jeowabara so zarea diabʉ yi sopʉapanʉra

1. Jeowara iyi ode panʉra kʼareara, ¿sãwũã sentibʉ?

JEOWABARA dayirã aba abaka bia akʉbʉ. Iya kʼawuabʉ dayirã aba abaka sõbede sobiabʉta akʉza sõbede zʉbʉriade berabarinʉmʉta (Sal. 37:18). Iya ũdubʉrʉde dayirãba bedʼea ũdubʉmina iyi ode kʼẽrẽpa bakĩrãpanʉta, naʉ̃nera mejãcha sobiabʉ dayirã kʼarea. Adewara Jeowabara dayirã zʉbʉriade berabaribʉrʉdera kʼarebakĩrãbʉ, dayirãʼa so zarea diakĩrãbʉ maʉ̃neba ẽdrʉita.

2. ¿Kʼãrẽta obʉ Jeowabara yi zʉbʉriade berabaribʉraʉ̃me akʉza naʉ̃raba kʼãrẽta oseabʉ iya yi kʼarebabita?

² Salmo 147:3ba ũdubibʉ sãwũã mediko abaʉba ẽbẽra bebibari kĩrãkʼa, Jeowaba abarika akʉbʉta ẽbẽrarã zʉbʉriade berabari bʉrata. Maʉ̃ bia ũrĩta naʉ̃ ʉ̃rʉ krĩchaseapanʉ. Ẽbẽra aba medikoma wãbʉta, naʉ̃ medikora mediko bia, mõbe iyaʼa jaraseabʉ kʼãrẽta oita iyi bia beita, mamina naʉ̃ ẽbẽraba medikoba jaradade obʉ ẽ bʉrʉ be ẽ bayi, mamina iya medikoba jaradade obʉbʉrʉ beyi. Abarikabʉ Jeowaʉ̃me, Jeowabara dayirãra kʼarebakĩrãbʉ akʉza iya jarabʉ kʼãrẽta oseabʉta iya kʼarebabʉdeba nebia ũduita. Mamina dayirãta iyaʼa yi kʼarebabida ẽ bʉrʉ, iya kʼareba diabʉta oda ẽ bʉrʉ, dayirãsida aduʼa ba ẽ bayi. Naʉ̃ artikulode akʉdayi Jeowaba iyi bedʼeadeba sãwũã kʼarebabʉta ẽbẽrarãra zʉbʉriade berabaribʉrata akʉza naʉ̃ra ẽbẽrarãba sãwũã oũdubiseabʉta Jeowaba jaradata.

JEOWABARA DAYIRÃRA MEJÃCHA KÃGA

3. ¿Kʼãrẽa ʉ̃kʉrʉ ẽbẽrarãba krĩchabʉ ãyira kʼãrẽita zeri ẽãta?

³ Idi ewadera ẽbẽrarãba kãga ũdubida ẽ awurura, maʉ̃ kʼarea bia edada ẽ wuabema ẽbẽrarã. Adewara ãya jarabʉdeba zʉbʉriabiseapanʉ wuabemarata. Mebẽã Helentaa mawũã berabarisi. Iya jarasi: «Mʉ̃yi yibarirabara daiara kãga ũdubi ẽ basi. Mʉ̃ zezebara daira bia eda ẽ basi, badua imitia bedʼeabasi daia akʉza jarabasi kʼãrẽita zeri ẽãta daira». Bʉra bʉ deda ¿mawũã berabaribarika? ¿Bʉaʼa jarabadaka bʉra kʼãrẽita zeri ẽãta, kãgada ẽãta? ¿Bʉaʼa imitia bedʼeabadaka? Bʉta mawũã berabaribaribʉrʉ zarea baseabʉ bʉita ĩjãita ẽbẽra abaʉba bʉ kãgaseabʉta.

4. ¿Salmo 34:18dera Jeowabara kʼãrẽta jarabʉ yi sopʉapanʉra?

⁴ Bʉta zʉbʉriade berabaribʉbʉrʉ biʼia kʼawuaibara Jeowabara bʉra kãgata, iyira yi jipa sopʉapanʉra kʼawabʉ (akʉra Salmo 34:18). Bʉta zʉbʉriade berabaribʉ kʼarea sopʉabʉbʉrʉ kĩrãbera Jeowabara bʉra kãgata, iyara akʉbʉ bʉa kʼãrẽ nebiata erbʉta bʉ sode. Akʉza kĩrãbera iyara bʉra maʉ̃ kʼarea iyi pʉwʉrʉ eda wesita (Juan 6:44). Jeowabara bʉra ewari jõmaʉ̃nẽ kʼarebakĩrãbʉ iyara bʉra wãrĩnu kãgabʉ baera.

5. Jesúsba ẽbẽrarã zʉbʉriade berabarida sãwũã edabadaba, ¿kʼãrẽta ũdubibʉ?

⁵ Dayirãba audre bia kʼawuaita Jeowaba zʉbʉriade berabaribʉra sãwũã akʉbʉ ʉ̃rʉ, kʼawuadaibara Jesúsba ẽbẽrarã sãwũã edabadata iyi nama egorode baside. Iyara yi zʉbʉriade berabaribʉrãra so zʉbʉria akʉbasi (Mat. 9:​9-12). Bari jaradaita, ewari aba yuwẽrã mejãcha kayabʉba iyi wua tõbarisidera Jesúsbara naʉ̃ ẽbẽra wẽrãra kʼẽã ẽ basi, awuarabʉrʉ so zarea diasi akʉza ibia bedʼeasi. Adewara biga diasi iya ĩjãta ũdubibʉ baera (Mar. 5:​25-34). Jesúsbara yi zezede kĩrãkʼa wuabemara so zʉbʉriata ũdubibasi (Juan 14:9). Maʉ̃ba bʉa ĩjãseabʉ Jeowabara bʉra bia akʉbʉta. Iya akʉbʉta bʉ sode bʉa kʼãrẽ nebia erbʉta. Bari jaraita, bʉa iyi ʉ̃rʉ kʼãrẽaba ĩjãbʉta akʉza iyi kʼãrẽaba kãgata.

6. ¿Kʼãrẽta oseabʉ bʉta kʼãrẽita zeri ẽãta krĩchabʉbʉrʉ?

⁶ Bʉa krĩchabʉbʉrʉ bʉra kʼãrẽita zeri ẽãta, ¿kʼãrẽta oseabʉ? Lera testo Jeowaba bʉ kʼãrẽãba kãgabʉ ʉ̃rʉ bedʼeabʉta, mõbe maʉ̃ ʉ̃rʉ krĩchara (Sal. 94:19).b Adewara krĩchara bʉa kʼãrẽta okĩrãbʉta, mõbe bʉa wuabemarane kĩrãkʼa abarika obe ẽ bʉrʉ Jeowa kʼarea, maʉ̃ kʼarea sopʉarãra, krĩcha orãra maʉ̃ kʼarea. Kĩrãbera Jeowabara jʉ̃ã ẽãta bʉa obe ẽãsidu wũẽta omarẽãra (Sal. 103:​13, 14). Bʉta zʉbʉria osidabʉrʉ akʉza krĩchabʉbʉrʉ maʉ̃ra mawũã berabarisita bʉ kʼarea, wua mawũã krĩcharãra. Kĩrãbera Jeowabara yi zʉbʉriabidapeadata kʼawua oi ẽãta, awuarabʉrʉ Jeowabara kʼawua oyi yi ẽbẽrarã awurura zʉbʉriabibʉta (1 Ped. 3:12). Sandraʼra, wiña kirueda zʉbʉria osida. ¿Iyara kʼãrẽta obʉ? Iya jarabʉ: «Mʉ̃ara ewariza Jeowaʼa kʼareba widibʉ. Iyaʼa widibʉ kʼarebamarẽã mʉ̃ne nebia ũduita Jeowaba ũdubʉ kĩrãkʼa».

7. Bʉ sãwũã berabaridadeba, ¿sãwũã audre diaseabʉ Jeowaʼa?

⁷ Edaʉde bʉa krĩchaseabʉ awuru ẽbẽrarãra kʼarebabe ẽãta bʉtrʉ zʉbʉriade berabaribʉ baera, mamina wãrĩnubaira, Jeowabara bʉta zokʼaseabʉ awuru ẽbẽrarã kʼarebaita. Yi audre yibiara Jeowabara iduaribibʉ bʉa iyi ʉ̃rʉ jaradiamarẽã awuru ẽbẽrarã, mõbe kĩrãbera maʉ̃ra badu ẽbẽraba obe ẽãta (1 Cor. 3:9). Bʉa ũdubʉrʉde awuru ẽbẽra bʉ berabarida kĩrãkʼa berabarinʉmʉta, maʉ̃nera bʉa kʼawuaseabʉ maʉ̃ ẽbẽra kʼãrẽãba sopʉabʉra akʉza kʼawuaseabʉ iyi sãwũã kʼarebaita, bʉta maʉ̃ne barabaribari baera. Helenbara kʼarebata ũdusi, maʉ̃ba iyara awururata kʼarebabʉ. Iya jarabʉ: «Mʉ̃a nãã krĩchabasi mʉ̃ra kʼãrẽita zeri ẽãta, mia abaʉba kãgada ẽãta, mamina Jeowaba ũdubisi iya mʉ̃ kʼãrẽãba kãgabʉta akʉza mʉ̃ta zokʼasi awurura ẽbẽrarã kʼarebaita». Helenbara sobiade obʉ yi nãã edebari 50 ora diabarita.

WÃRĨNU ĨJÃRA BɄA AÑA ODARA JEOWABARA JIPA KĨRÃDUASITA

8. Isaías 1:18ba jarabʉta odara, ¿kʼãrẽta oi Jeowabara?

⁸ Ʉ̃kʉrʉ mebẽrãba ãyi buru kʼoei nãã, mawũã ẽ bʉrʉ buru kʼoeda tẽã nemitiata osi baera krĩchapanʉ Jeowaba ãyi nemitiara kĩrãdua ẽãta. Mamina kĩrãbedaibara Jeowabara yi warrata zokʼasita dayirã nemitiadeba ẽdrʉbita akʉza dayirãta kãgabʉ baera. Maʉ̃ kʼarea Jeowaba kãgabʉ bʉa kʼawuamarẽã iyara bʉ nemitiara kĩrãduasita. Iya dayirã jarabʉ «zera dayi bedʼea ara odaita».c Maʉ̃ bedʼea ara oda tẽãra Jeowabara bʉ nemitiara jipa kĩrãduabʉ (akʉra Isaías 1:18). Sobiapanʉ kʼawuapanʉ baera Jeowabara dayirãba nãã nemitia odara jipa kĩrãduabʉta. Mamina audrera mejãcha sobiapanʉ kʼawuapanʉ baera daya nãã nebia odara Jeowabara kĩrãdua ẽãta (Sal. 103:​9, 12; Heb. 6:10).

9. Bʉa nãã nemitia oda kʼarea aukʼara krĩcha oẽ baira, ¿kʼãrẽta oseabʉ?

⁹ Bʉa nãã nemitia oda kʼarea waidide krĩcha obʉbʉrʉ, ¿kʼãrẽba kʼarebaseabʉ? Bʉa nãã nemitia odata waidide krĩchanʉmai kaude zarea ora krĩchaita bʉa atia kʼãrẽ obʉ ʉ̃rʉ akʉza bʉa ʉ̃ra zeide kʼãrẽ oseabʉ ʉ̃rʉ. Krĩchara Pablo ʉ̃rʉ. Pablobara nawedara kristianorãra mejãcha zʉbʉria osi. Iyira maʉ̃ kʼarea mejãcha sopʉabasi, mamina iya biʼia kʼawuabasi Jeowabara iya nemitia odara wãrĩnu kĩrãduasita (1 Tim. 1:​12-15). Maʉ̃ kʼarea Pablobara jẽda krĩcha ẽ basi iya nãã kʼãrẽ kayirua obada ʉ̃rʉra, mia krĩcha ẽ basi iya kʼãrẽta osita pariseo bʼaita (Filip. 3:​4-8, 13-15). Awuarabʉrʉ Pablobara audrera krĩchabasi sãwũã Daizeze Bedʼea ẽbẽrarã jaradia wãita iya nãã kʼãrẽ nemitia oda ʉ̃rʉ krĩchai kaude. Bʉabida abarika oseabʉ. Bʉa nãã kʼãrẽ nemitia oda ʉ̃rʉ krĩchai kaude zarea ora krĩchaita bʉa atia kʼãrẽta oseabʉta Jeowa kʼarea akʉza krĩchara Jeowaba aranʉbai bʉaʼa kʼãrẽ nebia diaya abʉ ʉ̃rʉ.

10. Daya nãã kʼãrẽ odaba awuruta zʉbʉriabisibʉrʉ, ¿kʼãrẽta oseapanʉ?

¹⁰ Edaʉde bʉa nekʼãrẽ aña odaba awuru ẽbẽrarãta zʉbʉriabiseabʉ. Maʉ̃nera, ¿bʉara, kʼãrẽta oseabʉ? Nekʼãrẽ jõma ora naʉ̃ ẽbẽra ũdubita bʉara wãrĩnu jẽda krĩchabʉta, maʉ̃ nemitiara jẽda oẽ baita. Adewara iyaʼa widida kĩrãduamarẽã bʉa aña odata (2 Cor. 7:11). Maʉ̃ awuara Jeowaʼa widira kʼarebamarẽã naʉ̃ mebẽã bʉa kʼãrẽ odadeba zʉbʉriadara iyi odeba ãĩ wã ẽ baita adewara kʼarebamarẽã aduʼa bamarẽã iyi nãã bada kĩrãkʼa.

11. ¿Kʼãrẽta kʼawuapanʉ Jonás nebʉradeba? (Akʉra poto nããranebemata).

¹¹ Kĩrãbedaya propeta Jonásta. Jeowaba iyi Níniveʼeda wãmarẽã zokʼasidera Jonásʼra aña mĩrʉ wãsi. Jeowabara iyira maʉ̃ kʼarea kʼẽãsi, maʉ̃neba Jonásba nebiata kʼawuasi (Jon. 1:​1-4, 15-17; 2:​7-10). Mawũãsidu Jeowabara krĩcha ẽ basi wua Jonásta zokʼa ẽ baita iyi propeta kĩrãkʼa, awuarabʉrʉ jẽda zokʼasi Níniveʼeda wãmarẽã iya nãã jaradata aripe oita. Jonásʼra iya nãã kʼãrẽ aña oda kʼarea sopʉabasimina, iduaribi ẽ basi maʉ̃ba idubimarẽã iya Jeowaba zokʼabʉ oita. Abarika dayirãbida Jonásde kĩrãkʼa kʼãrẽ aña obʉrʉdera zarea oibara maʉ̃ta jẽda oẽ baita akʉza idu Jeowa yi zokʼabidaibara iya kãgabʉ kĩrãkʼa (Jon. 3:​1-3).

JEOWABARA DAYIRÃʼÃ SO ZAREA DIABɄ IYI JAURE ZAREADEBA

12. Dayirã zʉbʉriade berabaribʉrʉdera Jeowabara, ¿sãwũã kʼarebabʉ? (Filipenses 4:​6, 7).

¹² Dayirãta zʉbʉriade berabarida kʼarea sopʉapanʉnera Jeowabara iyi jaure zareadeba so zarea diabʉ dayirãʼa. Mawũã berabarisi Ron akʉza Carolta, ãyi wũãwũã 39 poaga bʉta iyikʉza beiside. Ãya nebʉrabʉ: «Daibara bedʼea zromara maʉ̃nebʉrʉ ũdu ẽ basi, daibara nawedaiduba ũdubaribasi bedʼea zromara, mamina dai wũãwũã kʼãwũã berabaridara jipa audre zare basi. Diamasi kʼãĩbe ẽ baera daira Jeowaʼa yiwidʼipanasi, maʉ̃ne Filipenses 4:​6, 7ba jarabʉta sentipanasi, daira aduʼa sentipanasi yiwidʼida tẽãra» (akʉra). Bʉta zʉbʉriade berabarinʉmʉbʉrʉ akʉza mejãcha sopʉabʉbʉrʉ maʉ̃ kʼarea Jeowaʼa jarada jõma bʉ sãwũã sentibʉra. Bʉra iyiʉ̃mera bedʼeaseabʉ bʉya kãgade akʉza bʉya kãga ũmadaʉbayeda (Sal. 86:3; 88:1). Jeowaʼa badua widibara iyi jaure zareata diamarẽã akʉza ĩjãra Jeowabara bʉ bedʼeara ũrĩbʉta (Luc. 11:​9-13).

13. ¿Jeowa jaure zareaba sãwũã kʼarebaseabʉ dayirãba iya zokʼabʉta ewari jõmaʉ̃nẽ opanamarẽã? (Efesios 3:16).

¹³ Bʉ zʉbʉriade berabaribʉrʉdera zarea neẽbʉ kĩrãkʼa sentiseabʉ. Maʉ̃nera Jeowabara iyi jaure zareata diayi bʉaʼa mawũã zarea bamarẽã akʉza iya zokʼabʉta kʼẽrẽpa odamarẽã (akʉra Efesios 3:16). Akʉdaya Flora nebʉrata. Iyira yi kimaʉ̃mera misionerode panasi, mamina tẽã yi kimara ãĩ basi, maʉ̃ba ãyira yi idubʉsida. Floraba jara ũrĩbibʉ: «Mʉ̃ kimaba mawũã odaba mʉ̃ra mejãcha sopʉabisi, maʉ̃ba edaʉde maʉ̃ ʉ̃rʉ krĩchabʉba kʼãĩ ẽ basi. Maʉ̃ba mʉ̃ra Jeowaʼa badua yiwidʼibasi iya kʼarebamarẽã. Jeowabara mʉ̃aʼa so zareata diasi. Mʉ̃ita maʉ̃ bedʼea zromaneba ẽdrʉira zare kĩrãkʼa basimina, Jeowa kʼarebadeba zarea erbasi akʉza awuantasi maʉ̃ bedʼea zromata». Florabara kʼawuabʉ iyira Jeowaba kʼarebasita iyi ʉ̃rʉ audre ĩjãmarẽã akʉza iya kʼawuabʉ tẽã awuru bedʼea zroma ũdura Jeowaba kʼarebaita iyira. Floraba jarabʉ: «Jeowaba Salmo 119:32ba jarabʉta osi: ‹Mʉ̃ra zarea oyi bʉ ode bʉa jarabʉde bʼaita, bʉa kʼarebai baera mʉ̃a soiduba oita›».

14. ¿Kʼãrẽta oseapanʉ Jeowa jaure zarea erbaita?

¹⁴ Bʉa Jeowaʼa iyi jaure zarea widida tẽãra piki barãra. Jʉrʉda audre oita nekʼãrẽ Jeowadebemata, mawũã Jeowa jaure zarea erbaita. Maʉ̃itara ãba yi jʉrebarima wãibara, jaradiade akʉza Daizeze Bedʼeata ewariza akʉibara, mawũã nekʼãrẽ Daizezedebema ʉ̃rʉ krĩcha bʼaita (Filip. 4:​8, 9). Bʉa Daizeze Bedʼea akʉnʉmʉena krĩchara kʼai ẽbẽrata zʉbʉriade berabarisita akʉza Jeowaba sãwũã kʼarebasita naʉ̃ ẽbẽra zarea bʼaita. Sandrara mejãcha zʉbʉriade berabarisi, bedʼea zromata ũdusi, iya jarabʉ: «Mʉ̃ara mejãcha kãga José nebʉrara. Josébara bedʼea zroma mejãcha ũdusimina akʉza iyi wuabemaraba bia edada ẽ basimina, iyira Jeowadeba jĩga wã ẽ basi» (Gén. 39:​21-23).

JEOWABARA SO ZAREA DIABɄ MEBẼRÃNEBA

15. ¿Kʼairaba so zarea diaseabʉ dayirãʼa akʉza sãwũã kʼarebaseapanʉ? (Akʉra potota).

¹⁵ Dayirã bedʼea zroma berabaribʉrʉdera mebẽrã kongregasionebemaraba kʼarebaseapanʉ so zarea panaita (Col. 4:11). Jeowabara dayirã kʼãrẽãba kãgabʉta ũdubiseabʉ mebẽrã kongregasionebemaneba. Naʉ̃ra mebẽrãʼa bʉ sãwũã berabarinʉmʉta jara ũrĩbira, ãyara so zʉbʉria akʉdayi bʉra akʉza ũrĩnañi bʉ bedʼeara mawũã ẽ bʉrʉ ãyi bʉmebʉba so zarea diaseabʉ bʉaʼa. Adewara naʉ̃ra mebẽrãbara testo Daizeze Bedʼeadebemata ũdubiseapanʉ bʉaʼa so zarea diaita akʉza bʉme ãba yiwidʼiseapanʉ (Rom. 15:4).d Edaʉde mebẽrãbara dayirãʼa jara ũrĩbiseabʉ Jeowaba sãwũã krĩchabʉta, naʉ̃ba kʼarebaseabʉ dayabida aukʼara krĩcha ẽ baita dayi zʉbʉria ʉ̃rʉ. Mebẽrãbara nekʼãrẽ awurudeba kʼarebaseabʉ dayirãra. Bari jaraita, dayirã yikota diaseabʉ mawũã ãyi kãgata ũdubita.

16. Edaʉde awururaba kʼarebamarẽãra, ¿kʼãrẽta odaibara?

¹⁶ Mebẽrãbara dayirãra mejãcha kãga akʉza ãyara kʼarebakĩrãpanʉ (Prov. 17:17). Mamina mebẽrãba dayirãta kʼarebamarẽã kãgabʉbʉrʉ, ¿kʼãrẽta oibara? Bʉyiareba widibara kʼarebadamarẽã, edaʉde naʉ̃ra mebẽrãbara kʼawuada ẽ baera dayirã sãwũã sentibʉra, mawũã ẽ bʉrʉ dayirãba kʼãrẽta nesidabʉra (Prov. 14:10). Bʉta sopʉabʉbʉrʉ, bʉ neũdukʼawua audre krĩcha bia erbʉʼa kʼareba widira, iyaʼa jarada bʉ sãwũã kʼarebaseabʉta. Adewara kʼareba widiseabʉ zõrãrã. Zõrãrãʉ̃me bedʼeaseabʉ mõbe ãyaʼa jara ũrĩbiseabʉ bʉ sãwũã sentibʉta. Edaʉde ʉ̃kʉrʉ mebẽrã wẽrãrãra kʼareba widipanʉ mebẽrã wẽrãrãra audre krĩcha erbʉa.

17. (1) ¿Edaʉde kʼãrẽa zareabʉ mebẽrã yi kʼarebabira? (2) ¿Kʼãrẽta oseapanʉ ãyaʼa yi kʼarebabita?

¹⁷ Edaʉde dayirã zʉbʉriade berabaribʉrʉdera doba bakĩrãbʉ, wuabemaraʉ̃me ãba bakĩrã ẽ. Dayima wuabemaraba dayi sãwũã berabarinʉmʉ biʼia ũrĩ ẽ kĩrãkʼabʉ, mawũã ẽ bʉrʉ edaʉde jarapanʉ bedʼea dayima ẽã bʉta (Sant. 3:2). Mamina maʉ̃ kʼarea mebẽrãba bʉ kʼarebakĩrãbʉde ãyideba jĩga wãrãra, wãrĩnubaira ãyi kʼarebata nesidabʉ baera. Mebẽã aba yi trʉ̃ Gavinʼra mejãcha zʉbʉriabʉ depresionba, iya jarabʉ: «Mʉ̃ sopʉabʉdera yãrãʉ̃me bedʼeakĩrã ẽ». Mawũãsidu iyira zarea obʉ mebẽrãbawara ãba baita. Iya mawũã obʉrʉba aduʼa babibʉ. Mebẽã wẽrã yi trʉ̃ Amy naʉ̃ta jarabʉ: «Mʉ̃ nãã sãwũã berabarida kʼarea mʉ̃itara zare awurura ʉ̃rʉ ĩjãira, mamina atiara zarea obʉ mebẽrãʼa kãga ũdubita akʉza ãyi ʉ̃rʉ ĩjãita Jeowaba obʉ kĩrãkʼa. Mʉ̃a kʼawuabʉ maʉ̃ba Jeowata sobiabibʉta akʉza mʉ̃sida sobiabibʉ».

JEOWABA NEBIA DIAYA ABɄBA SO ZAREA DIABɄ

18. ¿Kʼãrẽ nebiata jʉ̃ãpanʉ akʉza kʼãrẽta odaibara maʉ̃ zeyeda?

¹⁸ Mejãchade sobiapanʉ kʼawuapanʉ baera dayirã zʉbʉriabibʉra akʉza sopʉabibʉra jõma jõbita (Apoc. 21:​3, 4). Ẽjũã bia zebʉrʉdera dayirã zʉbʉriabidara dayirãbara kĩrãduadayi (Is. 65:17). Mawũãsidu idibida zʉbʉriade berabaribʉmina Jeowabara mejãcha kʼarebabʉ. Jeowabara nekʼãrẽ mejãcha diabʉ dayirã so zarea diaita. Maʉ̃ba bʉta zʉbʉriade berabarinʉmʉbʉrʉ idu Jeowa yi kʼarebabira (1 Ped. 5:7).