Kʼãrẽba kʼarebaseabʉ dayi sopʉabibʉ ʉ̃rʉ krĩcha zebʉrʉdera

1, 2. (1) Edaʉde dayikʉza, ¿kʼãrẽta widiseabʉ? (2) ¿Kʼãrẽ ʉ̃rʉ kʼawuadai naʉ̃ artikulodera?

ZÕRÃRÃPANɄRABA mawũã ẽ bʉrʉ warrarapanʉraba jõmaʉ̃ba krĩcha zeseabʉ ãyira Jeowabara biʼia akʉbʉ kʼawuaita akʉza ãya nãã nekʼãrẽ oita jidadara biga basi kʼawuaita. Krĩchara naʉ̃ra yiza ʉ̃rʉ, kʉ̃ra abaʉba iyikʉza krĩchabʉ Jeowabara iyi ʉ̃rʉ krĩchabʉ kʼawuaita. Maʉ̃ba idu buru kʼoebi ẽ iyira. Mawũã ẽ bʉrʉ krĩchaseapanʉ mebẽã aba iyi warrara basieda plata mejãcha ganai kaude Jeowaita audre trajaita krĩchadata, mamina atiara iyira kima barabʉ akʉza wũãwũãra barabʉ. Mamina yi mebẽrãba nesidabʉra jõma diabe ẽ, maʉ̃ kʼarea edaʉde krĩchabʉ iya nãã kʼãrẽ oita jidadara wãrĩnu biga basi kʼawuaita. Adewara mebẽã wẽrã yõdrakiruba iya nãã Jeowaita nekʼãrẽ obada kĩrãkʼa atiara obe ẽ baera iyikʉza widibʉ Jeowaba biʼia akʉbʉ kʼawuaita iyira. Bʉabida edaʉde bʉyikʉza kʼãwũã krĩcha zebari baibara: «¿Jeowabara mʉ̃ra wãrĩnu krĩchabʉka? ¿Mʉ̃a Jeowa kʼarea kʼãrẽ oita jidadara biga basika? ¿Jeowabara mʉ̃ra wãrĩnu bia akʉbʉka?».

² Dayirãba mawũã krĩchapanʉbʉrʉ akʉza Jeowaba dayi ʉ̃rʉ kʼãrẽta krĩchabʉ kʼawuaita jʉrʉ ẽ bʉrʉ, daya Jeowa ʉ̃rʉ ĩjãbʉra aduaseabʉ akʉza iyi odeba ãĩ wãseabʉ. Naʉ̃ artikulodera akʉdayi sãwũã Daizeze Bedʼeaba kʼarebaseabʉta naʉ̃ra ʉ̃rʉ widibʉrʉde: «¿Jeowabara mʉ̃ ʉ̃rʉ wãrĩnu krĩchabʉka? ¿Mʉ̃a nãã nekʼãrẽ oita jidadara biga basika? ¿Jeowabara mʉ̃ra wãrĩnu bia akʉbʉka?».

KʼÃRẼBA KʼAREBASEABɄ

3. Dayirãba nekʼãrẽ ʉ̃rʉ bia kʼawua ẽ bʉrʉ, ¿kʼãrẽba kʼarebai?

³ Bʉbʉrʉ nekʼãrẽ dayirãba bia kʼawua ẽãta Daizeze Bedʼeaba kʼarebaseabʉ maʉ̃ ʉ̃rʉ bia kʼawuaita. Naʉ̃ba kʼarebayi Jeowa ʉ̃rʉ audre ĩjãita akʉza audre yi neũdukʼawua bia bʼaita. Adewara kʼarebayi Jeowa ode kʼẽrẽpa bʼaita (1 Cor. 16:13).

4. Dayirãba nekʼãrẽ abaʉ ʉ̃rʉ bia kʼawua ẽ bʉrʉ, ¿kʼãrẽta oibara? (1 Tesalonicenses 5:21).

⁴ (Akʉra 1 Tesalonicenses 5:21). Daizeze Bedʼeaba dayirãʼa kʼãwũã ũrãgʼabʉ: «Nekʼãrẽ jõmabera bia akʉidua». ¿Maʉ̃ra sãwũã oseabʉ? Maʉ̃itara yibia bayi Daizeze Bedʼeata akʉita, mawũã kʼawuai baera Daizeze Bedʼeaba kʼãrẽta jarabʉta daya krĩchabʉ ʉ̃rʉ. Krĩchadaya naʉ̃ ʉ̃rʉ, kʉ̃ra abaʉba iyikʉza widibʉ Jeowabara iyi ʉ̃rʉ wãrĩnu krĩchabʉ kʼawuaita. Mamina naʉ̃ kʉ̃rabara, ¿bari mamapai krĩchaibaraka? ¿Kʼãrẽ oẽ baibaraka? Mawũã ẽ, audre biga bayi iya akʉita Daizeze Bedʼeade kʼãrẽta jarabʉta, mawũã kʼawuaita Jeowaba kʼãrẽta krĩchabʉta iyi ʉ̃rʉ.

5. ¿Sãwũã kʼawuaseabʉ Jeowaba kʼãrẽta krĩchabʉta?

⁵ Dayirãba Daizeze Bedʼea lebʉrʉdera Jeowara dayirã maʉ̃neba bedʼeabʉ kĩrãkʼabʉ. Mamina dayirãba nekʼãrẽ abaʉ ʉ̃rʉ bia kʼawua ẽ bʉrʉ bari mamapai akʉibara ẽ, nekʼãrẽ awuruta oibara, jʉrʉibara testora daya krĩchabʉ ʉ̃rʉ bedʼeabʉta. Adewara dayirã organizasionba nekʼãrẽ mejãcha diabʉ audre bia estudiaita, maʉ̃ kʼarea maʉ̃sida zokʼaseapanʉ (Prov. 2:​3-6). Adewara dayirãba maʉ̃ ʉ̃rʉ jʉrʉbʉdera Jeowaʼa widibara kʼarebamarẽã dayirãba nesidabʉta ũduita. Maʉ̃ tẽã jʉrʉseapanʉ testo mawũã ẽ bʉrʉ kartara dayirãba kʼawuakĩrãbʉ ʉ̃rʉ bedʼeabʉta. Adewara jʉrʉseapanʉ Daizeze Bedʼeade nebʉra ẽbẽrarã dayirã berabarinʉmʉ kĩrãkʼa berabarida ʉ̃rʉ bedʼeabʉta.

6. Ãba yi jʉrebarima wãbʉba, ¿sãwũã kʼarebabʉ?

⁶ Adewara ãba yi jʉrebarimae ũrĩpanʉ Jeowa bedʼeara dayirãbara. Maʉ̃ba dayirãta ãba yi jʉrebarieda wãpanʉbʉrʉ, mama ũrĩnañi diskursota mawũã ẽ bʉrʉ awuru mebẽrãba komentario diabʉta. Edaʉde naʉ̃ra mebẽrãba jarabʉba panʉbʉ daya nãã widibadata (Prov. 27:17). Atia akʉdayi edaʉde dayirãba bedʼea widibʉ ʉ̃rʉ akʉza maʉ̃ bedʼea sãwũã panʉseabʉta.

¿JEOWABARA KRĨCHABɄKA BɄRA?

7. ¿Edaʉde kʼãrẽta widiseapanʉ?

⁷ Edaʉde bʉyikʉza kʼãwũã widibarika: «¿Jeowabara wãrĩnu krĩchabʉka mʉ̃ ʉ̃rʉra?». Bʉa krĩchabʉbʉrʉ bʉra mia abaʉba kãgada ẽãta, mawũãra zare bayi ĩjãita Jeowabara bʉ ʉ̃rʉ wãrĩnu krĩchabʉta. Nokʼo Davidsida bʉ kĩrãkʼa sentisibaibara, maʉ̃ kʼarea iya Jeowaʼa widisi kʼãrẽ nebiata ũdubʉta iyide, iyira kʼãrẽ ẽ kĩrãkʼa bʉbʉrʉ (Sal. 144:3). Atia akʉdayi kʼãrẽta oseapanʉta kʼawuaita Jeowaba dayirã ʉ̃rʉ wãrĩnu krĩchabʉ kʼawuaita.

8. ¿Jeowabara audrera kʼãrẽta akʉbʉ? (1 Samuel 16:​6, 7, 10-12).

⁸ Edaʉde awuru ẽbẽrarãita kʼãrẽ ẽ kĩrãkʼabʉra Jeowaitara jipade nebia zroma. Daizeze Bedʼeade ẽbẽrarã mawũã berabarida ʉ̃rʉ nebʉrabʉ, bari jaradaita Davidta. Jeowaba Samuelta zokʼa bʉesi Jeséidu wãmarẽã Jesé wũãwũãranebemata aba nokʼo bʼaita jidaita. Jesébara yi wũãwũãra siete ũdubisi Samuelʼa, mamina yi tẽãbemara ũdubi ẽ basi, maʉ̃ra David basi.a Yi zezema Davidʼra waidide warrara basimina Jeowabara Davidta jidasi nokʼo bamarẽã (akʉra 1 Samuel 16:​6, 7, 10-12). ¿Kʼãrẽa mawũã jidasi? Jeowabara ũdusi David sode kʼãrẽ nebiata bʉta akʉza kʼawuabasi Davidbara iyira wãrĩnu kãgabʉta.

9. ¿Kʼãrẽba ũdubibʉ Jeowabara bʉ ʉ̃rʉ wãrĩnu krĩchabʉta? (Akʉra potota).

⁹ Jeowabara bʉ kʼareara nekʼãrẽ mejãcha ozebʉrʉ. Bari jaraita, diabaribaibara ũrãgʼa biata bʉa audre nesidabʉde (Sal. 32:8). Mawũã bʉa nesidabʉde ũrãgʼa bia diaira Jeowabara bʉra bia ũdukʼawuabaibara (Sal. 139:1). Jeowaba ũrãgʼa diabʉta bʉa ũrĩbʉbʉrʉ nebiata ũduyi. Bʉa mawũã nebia ũdubʉrʉdera kʼawuayi Jeowabara bʉra wãrĩnu kãgabʉta (1 Crón. 28:9; Hech. 17:​26, 27). Bʉa Jeowa kʼarea kʼãrẽ ozebʉrʉra Jeowabara kĩrãdua ẽ, iyara bia akʉbʉ maʉ̃ra akʉza Jeowabara akʉbʉ bʉa bʉ sode kʼãrẽ nebia erbʉta (Jer. 17:10). Adewara kãgabʉ bʉra iyi neũdukʼawua bia bamarẽã (1 Juan 4:19).

¿BɄA NÃÃ NEKʼÃRẼ OITA JIDADARA BIGA BASIKA?

10. ¿Ʉ̃kʉrʉ mebẽrãba kʼãrẽta widiseabʉ?

¹⁰ Ʉ̃kʉrʉ mebẽrãba nawedara ãya trajo bia erbadara idubʉsida mawũã ẽ bʉrʉ krĩchasida trajo bia jʉrʉ ẽ baita audre Jeowaita oita. Mamina atiara ũdupanʉ awuru ẽbẽrarã ãyi dauchabemara trajo biata erpanʉ baera ãyiʼira audre bia wãta. Maʉ̃ba edaʉde krĩchaseapanʉ: «¿Mʉ̃a nãã nekʼãrẽ oita jidadara wãrĩnu biga basika? Naʉ̃ta oita jida ẽ basibʉrʉ, ¿audre bia bakasika?».

11. ¿Kʼãrẽa krĩcha obasi Salmo 73 bʉdara?

¹¹ Bʉa bʉyikʉza mawũã widibaribʉrʉ krĩchara Salmo 73 bʉda ʉ̃rʉ. Iya akʉbasi ẽbẽrarã Jeowa ode bʉ ẽãrãra sãwũã bia wã kĩrãkʼabasita iyimara maʉ̃ra ẽbẽrarã kaya ẽ kĩrãkʼabasi, aduʼabʉ kĩrãkʼabasi akʉza nekʼãrẽ bia mejãcha erpanʉ kĩrãkʼabasi (Sal. 73:​3-5, 12). Iya ũdubasi baera maʉ̃ra ẽbẽrarã mawũã bia wã kĩrãkʼabʉta maʉ̃ kʼarea krĩchasi Jeowa ode bʼaira biga ẽãta. Naʉ̃ salmistabara maʉ̃ ʉ̃rʉ badua krĩchabasi (Sal. 73:​13, 14). ¿Kʼãrẽba kʼarebasi mawũã krĩchabʉa yi edebi ẽ baita?

12. ¿Kʼãrẽba kʼarebasi salmistaba audre bia krĩchaita? (Salmo 73:​16-18).

¹² (Akʉra Salmo 73:​16-18). Naʉ̃ salmistara Jeowaʼa yiwidʼibaridu jʉ̃ẽsi. Mamara aduʼa basi baera bia krĩchaseabasi iya widida ʉ̃rʉ. Iya mama kʼawuasi jari ẽbẽrarã iyima bia wã kĩrãkʼabʉra atiaedabʉrʉ kʼãwũã bia panʉta mamina ʉ̃ra zeidera nebiata jʉ̃ãna ẽãta. Maʉ̃ba iya kʼawuasi Jeowa ode bʼaira audre yibiata. Maʉ̃ kʼarea iya soiduba okĩrãsi Jeowaba zokʼabʉta (Sal. 73:​23-28).

13. ¿Kʼãrẽba kʼarebaseabʉ bʉ aduʼa bʼaita? (Akʉra potota).

¹³ Bʉta salmista kĩrãkʼa sentibaribʉrʉ akʉza iyi kirãkʼa aduʼa bakirãbʉbʉrʉ, ¿kʼãrẽta oseabʉ? Krĩchara bʉa atia kʼãrẽ nebia erbʉta akʉza Jeowaba bʉra atiara sãwũa bia akʉbʉta. Krĩchara ẽbẽrarã idi ewadebemabara atiaedara nebiata erbʉ kĩrãkʼa bʉ, mamina ʉ̃ra zeidera naʉ̃ra ẽbẽrarãbara kʼãrẽ nebia jʉ̃ãpanʉ ẽ. Mamina Jeowabara atiara bʉara nebia mejãcha diabʉ. Mamina naʉ̃ nebiara bari idibʉrʉ diabʉ ẽ Jeowabara, awuarabʉrʉ ʉ̃ra zeidera bʉa jʉ̃a ẽ bada nebiaidu diayi Jeowabara (Sal. 145:16). Wãrĩnubaira bʉara biʼia kʼawua ẽ nekʼãrẽ naʉ̃ drʉadebemata oita jidasibʉrʉ bʉra atiara sãwũã bakasita, audre bia bakasita mawũã ẽ bʉrʉ audre mitia bakasita. Mamina naʉ̃ta biʼia kʼawuabara, bʉa nekʼãrẽ oita jidabʉrʉde Jeowa kãgaba akʉza ẽbẽra kãgaba nekʼãrẽ obʉbʉrʉ mawũãra erbayi nekʼãrẽ bʉ sobiabibʉta.

¿JEOWABARA BɄRA WÃRĨNU BIA AKɄBɄKA?

14. ¿Ʉ̃kʉrʉ mebẽrãbara kʼãrẽ bedʼeata ũdupanʉ akʉza maʉ̃ kʼarea sãwũã sentipanʉ?

¹⁴ Ʉ̃kʉrʉ mebẽrãba Jeowa kʼarea mejãcha okĩrãpanʉ mamina edaʉde ãyira zõrãpanʉ baera, kayapanʉ baera mawũã ẽ bʉrʉ nekʼãrẽ awuru kʼarea audre diabe ẽ baera ãyikʉza naʉ̃ta kʼãwũã widipanʉ: «¿Mʉ̃ra Jeowabara waidide bia akʉbʉka?».

15. ¿Kʼãrẽta biʼia kʼawuabasi Salmo 71 bʉdabara?

¹⁵ Salmo 71 bʉdara mawũã sentisi, iya maʉ̃ kʼarea Jeowaʼa jarasi: «Mʉ̃ zarea jõbʉrʉde doba idubʉrãra» (Sal. 71:​9, 18). Salmistara mawũã zarea neẽ sentibasimina iyara biʼia kʼawuabasi Jeowaba zokʼabʉta oita jidasibʉrʉ Jeowabara iyaʼa jaradiaibasita sãwũã audre bia bʼaita akʉza ewari jõmaʉ̃nẽ iyi kʼawa baibasita. Adewara kʼawuasi edaʉde Jeowaita audre diabe ẽ kĩrãkʼabʉmina zarea obʉbʉrʉ Jeowaba kãgabʉta oita mawũãra Jeowara sobia bʼaita iyi kʼarea (Sal. 37:​23-25).

16. ¿Mebẽrã zõrãpanʉrãra kʼãrẽa yibia Jeowaitara? (Salmo 92:​12-15).

¹⁶ Bʉta zõrãbʉbʉrʉ zarea ora Jeowaba akʉbʉ kĩrãkʼa akʉita bʉyikʉza. Jeowaba kʼarebayi bʉa ũdumarẽã kʼãrẽta oseabʉta iyi kʼarea bʉma iyi kʼarea kʼãrẽ obe ẽ kĩrãkʼa bʉmina (akʉra Salmo 92:​12-15). Badua krĩcharãra bʉa kʼãrẽ obe ẽã ʉ̃rʉ awuarabʉrʉ audre krĩchara bʉara kʼãrẽta oseabʉta Jeowa kʼarea. Bari jaraita, bʉara wuabemarãra kʼarebaseabʉ ãyaʼa yiza bia ũdubibʉdeba akʉza ãyi ʉ̃rʉ krĩchabʉta ũdubibʉdeba. Adewara awuru mebẽrã jara ũrĩbiseabʉ Jeowaba bʉ sãwũã kʼareba zebʉrʉ ʉ̃rʉ akʉza bʉa sãwũã sobiade jʉ̃ãbʉta Jeowaba nebia diaya abʉ zemarẽã. Akʉza kĩrãbera bʉta awurura kʼarea yiwidʼibʉbʉrʉ naʉ̃bara mejãcha kʼarebaita ãyira (1 Ped. 3:12). Dayirã kʼãrẽne berabaribʉ krĩcha ẽã jõmaʉ̃ba nekʼãrẽ oseapanʉ Jeowa kʼarea akʉza awuru mebẽrã kʼarea.

17. ¿Kʼãrẽa akʉ ẽ baibara daya kʼãrẽ onʉmʉta wuabemaraba obʉme?

¹⁷ Bʉa Jeowa kʼarea nekʼãrẽ mejãcha obe ẽ bʉrʉ akʉza maʉ̃ kʼarea mejãcha krĩcha obʉbʉrʉ kĩrãbera Jeowara mejãcha sobiabʉta bʉa iyi kʼarea kʼãrẽ obʉ kʼarea akʉza bʉra bia akʉbʉta. Bʉara edaʉde krĩchabaribaibara awuru mebẽrãba sãwũã Jeowa kʼarea nekʼãrẽ audre obʉta akʉza bʉa sãwũã ãyide kĩrãkʼa obe ẽãta. Mawũã krĩchabaribʉrʉ zarea ora mawũã wua krĩcha ẽ baita. Jeowabara akʉnʉmʉ ẽ baera saʉ̃ba iyaʼa audre dianʉmʉta akʉza saʉ̃ba iyaʼa audre eda dianʉmʉta (Gál. 6:4). Bari jaradaita, Mariabara aseite mejãcha balebʉta Jesús jĩrʉne weasi (Juan 12:​3-5). Mamina pẽdrabara Jeowa templodera moneda ũme diasi, naʉ̃ra monedara mejãcha baleba ẽ basimina (Luc. 21:​1-4). Jesúsbara akʉ ẽ basi naʉ̃ra wẽrãra ũmenebemaba saʉ̃ba audre wiña diasita akʉza saʉ̃ba mejãcha diasita, iyimara naʉ̃ra wẽrãra ũmeba ũdubisida wãrĩnu ĩjãbʉta. Abarika Jeowabida akʉ ẽ dayirãnebemaba saʉ̃ba audre diabʉta akʉza saʉ̃ba audre wiña diabʉta awuarabʉrʉ dayirãba nekʼãrẽ obʉrʉde iyita kãga baera akʉza iyi ʉ̃rʉ ĩjãbʉ baera mawũã opanʉbʉrʉ, Jeowabara naʉ̃ra biʼia akʉbʉ dayirãita kʼãrẽ ẽ kĩrãkʼabʉmina.

18. Bedʼea abaʉ kʼarea krĩchapanʉbʉrʉ, ¿kʼãrẽta oseapanʉ? (Akʉra rekuadro «Daizeze Bedʼeaba kʼarebabʉ bʉa bedʼea widibʉ panʉita»).

¹⁸ Dayirã jõmaʉ̃ta bedʼea abaʉ kʼarea krĩcha opanʉ mamina kĩrãbedaibara Daizeze Bedʼeaba kʼarebaita Jeowaba maʉ̃ ʉ̃rʉ sãwũã krĩchabʉta kʼawuaita. Maʉ̃ kʼarea Daizeze Bedʼeade jʉrʉda kʼãrẽta panʉbʉta bʉa bedʼea widibʉ ʉ̃rʉ. Bʉa maʉ̃ta obʉbʉrʉ bʉ sora aduʼa beyi. Jeowabara wãrĩnu krĩchabʉ bʉ ʉ̃rʉra akʉza bʉa iyi Nokʼota nãã bʉeya nekʼãrẽ idubʉsibʉrʉ Jeowabara maʉ̃ra kĩrãdua ẽ, iyira sobiabʉ maʉ̃ kʼarea akʉza aranʉbai nebiata diayi bʉa naʉ̃ta obʉ kʼarea. Naʉ̃ta kĩrãduarãra Jeowabara iyi ode kʼẽrẽpa panʉrãra jõmaʉ̃ta mejãcha kãga akʉza sobiabʉ ãya kʼãrẽ obʉ kʼarea.