¿Kʼãrẽta oibara ewari jõmaʉ̃nẽ bʼaita?

1. ¿Kʼãrẽa ʉ̃kʉrʉ ẽbẽrabara ĩjã ẽ ewari jõmaʉ̃nẽ bʼaira?

IDI ewaradera ẽbẽrarãra ejersisio opanʉ, bia nekopanʉ mawũã ãyi bia bʼaita krĩchabʉ baera, mamina ãya bia kʼawuapanʉ zõnabape beita, maʉ̃ kʼarea ẽbẽrabara krĩchabʉ dayirãra ewari jõmaʉ̃nẽ bʼabe ẽãta mamina Daizeze Bedʼeade jarabʉ Juan 3:16 akʉza Juan 5:24de dayirãra ewari jõmaʉ̃nẽ baseabʉta mawũã jarasi Jesúsbara.

2. Juan yi zroma 6dera, ¿kʼãrẽta jarabʉ ewari jõmaʉ̃nẽ bʼai ʉ̃rʉra? (Juan 6:​39, 40).

² Ewari aba Jesúsbara pan akʉza beda wiñabʉdeba ẽbẽrarãta mejãcha nekobisi.a Maʉ̃ra bigabasi mamina maʉ̃ nrʉema Jesúsba ẽbẽrarã iyi Capernaúmʼinu jʉrʉ jʉ̃ẽna jaradara audre yibiabasi, iya jarasi ẽbẽrarã beidara jẽda piradrʉbiseabʉta, mawũã ewari jõmaʉ̃nẽ bamarẽã (akʉra Juan 6:​39, 40). Naʉ̃ bedʼeaba dayirã ĩjãbibʉ dayirã mebẽrãdebema beidara jẽda piradrʉita, mawũẽra dayirãbara jẽda ũduseabʉ mawũã ãyiʉ̃me ewari jõmaʉ̃nẽ bʼaita, mamina Juan yi zroma 6de Jesúsba jarasi bedʼeata, maʉ̃ra wuabemaraba ũrĩta zareabʉ, maʉ̃ ʉ̃rʉ audre biʼia kʼawuadaya (Juan 6:​39, 40).

3. Juan 6:51ne, ¿kʼãrẽta jarasi Jesúsba iyi ʉ̃rʉ?

³ Jesúsba ẽbẽrarã Capernaúmne ẽbẽrarãta nekobiside naʉ̃ra ẽbẽrarãba jẽda kĩrãbesida Jeowaba israelitara mana diadata, manara Daizeze Bedʼeabara jarabʉ pan ʉ̃trebemata (Sal. 105:40; Juan 6:31). Aramaʉ̃ta Jesúsbara maʉ̃ mananeba ẽbẽrarã jaradiasi, jarasi wãrĩnu maʉ̃ manara Daizezeba diasita, mamina maʉ̃ mana koda ẽbẽrarãra ewari jõmaʉ̃nẽ ba ẽ basita (Juan 6:49). Mamina Jesúsba jarasi pan Daizezeba diabʉra iyita akʉza pan bebʉ diabʉra iyita (Juan 6:​32, 33, 35). Mamina Jesúsba jara ũrĩbisi kʼãrẽne awuarabʉta manata iya pan jarakʉta, iya jarasi: «Mʉ̃ pan ʉ̃tʉba zokʼai zedara, yi maʉ̃ pan kobʉrʉra ewari jõmaʉ̃nẽ bayi» (akʉra Juan 6:51). Jesúsba maʉ̃ bedʼea jaradara ãya ũrĩna ẽ basi krĩchapanasi baera sãwũã Jesúsʼra pan ʉ̃tʉba zedata akʉza sãwũã iyitrʉ audre yibiata manaira adewara Jesúsba jarasi Pan mʉã diabʉra mʉ̃ yara. Akʉdaya kʼãrẽta jarakĩrãbasita Jesúsba, naʉ̃ kʼawuaiba kʼarebayi kʼawuaita kʼãrẽta oibarata dayirã ewari jõmaʉ̃nẽ bʼaita.

¿KʼÃRẼTA JARAKĨRÃBɄ PAN ZOKʼAIBɄBA AKɄZA IYI YARABA?

4. ¿Kʼãrẽa ẽbẽrarã kĩrã bia ẽ totosi Jesúsba jarada kʼarea?

⁴ Jesúsba jaraside ẽbẽrarã iyi yarata diaita mawũã ẽbẽrarã ewari jõmaʉ̃nẽ bʼamarẽã, ẽbẽrarã kĩrãbia ẽ totosi ãya krĩchasida baera wãrĩnu Jesús yarata koibarata. Ãya krĩchasida baibara sãwũã Jesús yarata koi ãyira nedʉwʉrʉ ẽ bʉrʉ (Juan 6:52). Maʉ̃ awuara Jesúsba jarasi maraba mʉ̃ yarata koda ẽ bʉrʉ akʉza mʉ̃ wata doda ẽ bʉrʉ mawũãra ewari jõmaʉ̃nẽ ba ẽ bayi (Juan 6:53).

5. ¿Kʼãrẽa kʼawuapanʉ Jesúsbara wãrĩnu iyi wata ko ẽ marẽã jarakʉa ẽ basita?

⁵ Mamina Noé ewaridera Daizezebara jarasi wata koda ẽ marẽã (Gén. 9:​3, 4). Maʉ̃ tẽã Jeowaba jarasi israelitara wata koda ẽ marẽã, yi wa kobʉrʉra jarasi beadaibarata (Lev. 7:27). Jesús bida jarasi judiora Moisés Leyba jarabʉra ũrĩbarata (Mat. 5:​17-19). Naʉ̃neba kʼawuapanʉ Jesúsbara judiora widiba ẽ basita wãrĩnu iyi yarata akʉza iyi wata kodamarẽã awuarabʉrʉ iya naʉ̃neba jaradiakĩrãbasi ẽbẽrarãbara kʼãrẽta oibarata ewari jõmaʉ̃nẽ bʼaita (Juan 6:54).

6. ¿Sãwũã kʼawuapanʉ Jesúsba bedʼea jaradara bari yiza basita?

⁶ Naʉ̃ nãã Jesúsba jarasi samaritanaʼa: «Mamina yi mʉ̃a bania diabʉrʉta dora, wua obisiakabayi. Awuarabʉrʉ mʉ̃a bania diabʉrʉra iyide drʉbayi ewari jõmaʉ̃nẽ bʼaita» (Juan 4:​7, 14).b Mamina Jesúsba samaritanaʼa jarakĩrãkʉa ẽ basi chuta pozo aba daya maʉ̃ bania dora ewari jõmaʉ̃nẽ bʼabibʉta, abarika Jesúsba ẽbẽrarã Capernaúmnebemara jaraside ewari jõmaʉ̃nẽ bʼaita iyi wata akʉza iyi yarata koibarata, maʉ̃bara Jesúsbara jarakĩrãkua ẽ basi wãrĩnu mawũã oibarata.

NEKʼÃRẼ ŨMENE AWUARABɄ

7. ¿Kʼãrẽta jarapanʉ ʉ̃kʉrʉba Juan 6:53de Jesúsba bedʼea jarada ʉ̃rʉ?

⁷ Ʉ̃kʉrʉ ẽbẽrarãba jarapanʉ Juan 6:53de Jesúsba panta akʉza binota domarẽã jaradara Jesúsba iyi bei nãã yiko oda ʉ̃rʉ bedʼeabʉta, maʉ̃nera Jesúsbara naʉ̃ bedʼea kĩrãkʼabʉta jarasi baera (Mat. 26:​26-28). Adewara naʉ̃ra ẽbẽrarãba jarapanʉ Jesús beida jẽda kĩrãbepanʉ ewaridera yi ẽbẽrarã jʉ̃ẽbʉrʉbara panta akʉza bino berabaripanʉra koibarata, ¿ãya jarabʉra warĩnuka? Maʉ̃ ʉ̃rʉ kʼawuaira biode yibia, poagaza mebẽrãra mejãchabawara ãba yi jʉrepanʉ baera Jesús beida jẽda kĩrãbeita. Atia bia kʼawuadayi Juan 6:53de bedʼea jarabʉra kʼãrẽne awuarabʉta Jesúsba iyi bei nãã yiko odade bedʼea jaradaʉ̃me.

8. ¿Kʼãrẽne awuarabʉ Jesúsba jaradara? (akʉra potota).

⁸ Nekʼãrẽ ũmene awuarabasi Jesúsba jaradara. Nããrãra, Jesúsbara Juan 6:​53-56 bayeda jarabʉra jarasi poaga 32de, ¿sama? Pʉwʉrʉ Galileade ẽbẽrarã biobʉ kĩrãbita, maʉ̃ra berabarisi Jesúsba iyi bei nãã yiko oita poaga aba waebʉde. Yi ũmera, maʉ̃ra ẽbẽrarã Galileadebemarabara audrera Jesúsʼra jʉrʉpanasi ãyaʼa yikota diamarẽã, mawũã jʉrʉpana ẽ basi wãrĩnu Jeowa ʉ̃rʉ kʼawuakĩrãbʉ baera (Juan 6:26). Maʉ̃ba Jesúsba bedʼea zareabʉta jaraside naʉ̃ra ẽbẽrarãbara Jesús ʉ̃rʉ ĩjãbʉra idubʉsida akʉza Jesús kʼaidubemara ʉ̃kʉrʉbida Jesúsʼra idubʉsida (Juan 6:​14, 36, 42, 60, 64, 66). Mamina poaga aba berabarida tẽã poaga 33de, Jesúsba iyi bei nãã yiko osidera Jesús kʼaidubemara 11 bʉrãra iyiʼʉ̃mepanasi Jesúsba jaradiabʉta biʼia ũrĩna ẽ basimina, adewara Jesús kʼaidubemara 11 panʉrãra awuarapanasi ẽbẽrarã Galileadebemaraira, ãyara wãrĩnu ĩjãpanasi baera Jesúsʼra Daizeze warrata akʉza ʉ̃tʉba zedata (Mat. 16:16). Maʉ̃ kʼarea Jesúsba jarasi iyi kʼaidubemaratrʉ iyi kʼawapanʉta iyi bedʼea zromane berabaribʉmina (Luc. 22:28). Naʉ̃ bedʼea kʼawuatabedaba ũdubibʉ Juan 6:53de Jesúsba bedʼea jaradara jarakĩrãkʉa ẽ basita iyi bei nãã yiko obʉrʉde kãrẽ berabarita, mamina naʉ̃ awa bʉ ẽ ũdubibʉta Jesúsba jaradara awuarabasita.

JESÚSBA JARADA Ʉ̃RɄRA BɄARA SÃWŨÃ KRĨCHABɄ

9. ¿Jesúsʼra kʼaiʉ̃me bedʼea abarika zesi iyi bei nãã yiko osidera?

⁹ Jesús bei nãã yiko odadera Jesúsbara iyi kʼaidubemara diasi panta mõbe jarasi maʉ̃ panbara jarakĩrãbʉta iyi kakuata, maʉ̃ tẽa diasi binota, mõbe jarasi maʉ̃bara jarakĩrãbʉta iyi wa bedʼea abarika zei yiwidita (Mar. 14:​22-25; Luc. 22:20; 1 Cor. 11:24). Naʉ̃ bedʼea abarika zedara yibiabasi, ¿kʼãrẽa? Jesúsʼra bedʼea abarika ze ẽ basi baera ẽbẽrarã jõmaʉ̃mẽ awuarabʉrʉ bedʼea abarika zesi ẽbẽrarã iyiʉ̃me ʉ̃tʉba zokʼaiʉ̃me (Heb. 8:​6, 10; 9:15). Jesús kʼaidubemarabara maʉ̃ ewaridera Jesúsba jarakĩrãkuadara bia ũrĩ ẽ basi, mamina Jeowabara ãyira jidaibasi Jesúsʼʉ̃meba ʉ̃tʉba zokʼadamarẽã(Juan 14:​2, 3).

10. ¿Kʼãrẽne awuarabʉ Jesúsba bedʼea jaradara Galileade akʉza iyi bei nãã yiko odade? (Akʉra potota).

¹⁰ Jesús iyi bei naena yiko oside bedʼea abarika zesidera maʉ̃ ewaridera iyi kʼaidubemara awabʉrʉbasi, neẽbasi wuabemara ẽbẽrarã. Jesúsʼra maʉ̃ ewaridera bedʼea abarika zesi iyi kʼaidupanʉra 11ʉ̃me akʉza ẽbẽrarã ʉ̃ta wãiʼʉ̃me, naʉ̃ra 11 parʉrata Jeowabara nããra jidasi ʉ̃ta wãita (Luc. 12:32). Maʉ̃ ewaridera Jesúsbara maʉ̃rabʉrʉ kobisi panta binota, ãyira ʉ̃ta wãi baera iyiʉ̃meba zokʼaita, maʉ̃ba idi ewadebida yi ʉ̃ta wãirabara Jesús beida jẽda kĩrãbepanʉnera kopanʉ panta binoʉ̃me, ãyabida Jesúsʼʉ̃meba zokʼai baera. Naʉ̃ba ũdubibʉ Jesúsba iyi bei nãã bedʼea jaradara bedʼeasita ẽbẽrarã ʉ̃ta wãiraʉ̃mebʉrʉ, mamina Galileade bedʼea jaradara beʼdeasi ẽbẽrarã jõma ʉ̃rʉ.

11. ¿Kʼãrẽa jaraseapanʉ Jesúsba Galileade bedʼea jaradara ʉ̃ta wãira ʉ̃rʉ jara ẽ basita?

¹¹ Poaga 32de Galileade Jesúsba bedʼea jarasidera naʉ̃ra ẽbẽrarãbara Jesúsʼra audrera jʉrʉpanasi yiko kʼarea, naʉ̃ ewaridera Jesúsbara naʉ̃ra ẽbẽrarãra bari yiko ʉ̃rʉ bedʼea ẽ basi, iyara audre bedʼea biata jarasi, ¿saʉ̃ta? Jarasi ãyira ewari jõmaʉ̃nẽ baseabʉta. Jesúsba jarasi ẽbẽrarã beidarãra ewari jõbodoare jẽda piradrʉita ewari jõmaʉ̃nẽ bʼaita, mamina nama Juan 6dera Jesúsʼra bedʼea ẽ basi bari ẽbẽrarã wiñabʉ ʉ̃rʉ iyi bei nãã yiko oside jarada kĩrãkʼa, awuarabʉrʉ naʉ̃nera jarasi ẽbẽrarã jõmaʉ̃ba ũduseabasita maʉ̃ ewari jõmaʉ̃nẽ bʼaita, maʉ̃ne Jesúsba jarasi: «Yi maʉ̃ pan kobʉrʉra ewari jõmaʉ̃nẽ bayi. Wãrĩnubaira maʉ̃ panʼra mʉ̃ yara, mʉ̃a maʉ̃ta diayi ewari jõmaʉ̃nẽ panamarẽã» (Juan 6:51).

12. ¿Kʼãrẽta oibara ewari jõmaʉ̃nẽ bʼaira?

¹² Jesúsba Galileade jaradabara jarakĩrãkʉa ẽ basi ẽbẽrarã maʉ̃ ewaridebadaraba akʉza idi ewade panʉra jõmaʉ̃ba ũduibasita maʉ̃ nebiara, awuarabʉrʉ jarasi yi maʉ̃ pan kobʉrʉratrʉ ewari jõmaʉ̃nẽ bʼaita, ¿kʼãrẽta jarakĩrãbasi maʉ̃ba? Jarakĩrãbasi yi Jesús ʉ̃rʉ ĩjãbʉrʉratrʉ ewari jõmaʉ̃nẽ panaita. Religionebemara mejãchaʉba krĩchapanʉ bari Jesús ʉ̃rʉ ĩjãibarata mawũã ĩjãbʉba Jesúsba ãyita ẽdrʉbi baera (Juan 6:​29, Nueva Versión Internacional). Ẽbẽrarã Galileade pananarabara ĩjãpanasi Jesús ʉ̃rʉ, mamina ãyara tẽã idubʉsida Jesúsʼra, ¿kʼãrẽta berabarisi mõbera?

13. ¿Kʼãrẽta oibara wãrĩnu Jesús ʉ̃rʉ ĩjãbʉta ũdubita?

¹³ Audrera naʉ̃ra ẽbẽrarãbara Jesúsʼra jʉrʉbasi ãya nesidabʉta diamarẽã. Bari jaraita, ãyi kayabʉta bebimarẽã, ãyaʼa yikota bari diamarẽã mawũã ẽ bʉrʉ ãya ũrĩkĩrãkʉtrʉ jaradiamarẽã. Jesúsbara naʉ̃ ẽbẽrarã kʼawuabisi iyira ze ẽ basita bari ẽbẽrarãba kãgabʉta diaita awuarabʉrʉ zesita ẽbẽrarã jaradiaita kʼãrẽta oibarata iyi kʼaidubemara bamarẽã. Audrera naʉ̃ra ẽbẽrarãbara Jesústa orradaibarabasi Jesúsba jaradiadade oũdubita (Juan 5:40; 6:44).

14. Dayirãta ewari jõmaʉ̃nẽ bakĩrãpanʉbʉrʉ, ¿kʼãrẽta oibara?

¹⁴ Jesúsba ẽbẽrarã Galileadebemara jara ũrĩbisi ãyara ĩjãbʉta ũdubibarata, naʉ̃ra ẽbẽrarãbara ĩjãĩbarabasi Jesúsba iyi kakuata akʉza iyi wata diasita dayirãbari, mawũã ewari jõmaʉ̃nẽpanamarẽã, maʉ̃ ʉ̃rʉ ĩjãira jipade yibiabasi judioraitara, idi ewadebida dayirãitarabida yibia baibara (Juan 6:40). Dayirãba Juan 6:53ba jarabʉ nebiata ũdubikĩrãpanʉbʉrʉ ĩjãibara Jesústa dayirã bari beisita dayirã ẽdrʉbita. Yi audre yibiara naʉ̃ra bari ẽbẽra wiñabʉrʉ ũduseabʉ ẽ jõmaʉ̃ba ũduseapanʉ (Efes. 1:7).

15, 16. ¿Kʼãrẽta kʼawuapanʉ Juan yi zroma 6ba jarabʉdeba?

¹⁵ Juan yi zroma 6ba jarabʉra jipade yibia dayirãita akʉza dayirã mebẽrãita, Jesúsba nama ũdubisi baera iya dayirã kʼãrẽãba kãgabʉta, bari jaraita Jesúsbara maʉ̃ ewaridera yi kayabʉra bebikuasi akʉza jaradiasi Daizeze Nokʼo ʉ̃rʉ adewara diasi ãya nesidabʉta (Luc. 9:11; Juan 6:​2, 11, 12). Adewara jaradiasi pan zokʼaibʉra iyita (Juan 6:​35, 48).

¹⁶ Wãrĩnu yi ʉ̃ta wã ẽãrabara Jesús beida jẽda kĩrãbebʉrʉdera ko ẽ panʼra akʉza do ẽ binosida (Juan 10:16). Mamina ãyabida koibara pan zokʼaibʉdebemara, maʉ̃ba jarakĩrãbʉ ĩjãĩbarata Jesúsʼra beisita ãyibari, ãyita ewari jõmaʉ̃nẽ panamarẽã (Juan 6:53). Mamina yi ʉ̃ta wãirabara dopanʉ binora akʉza kopanʉ panʼra, maʉ̃ba ũdubibʉ ãyirã Jesúsba iyi bei nãã bedʼea abarika zedade edapanʉta akʉza ãya ʉ̃tʉ Jesúsʼʉ̃meba zokʼaita, mawũẽra Juan yi zroma 6ba jarabʉra jipade yibia yi ʉ̃ta wãirata akʉza nama egorode bʼairaita, ¿kʼãrẽa? Dayirã ewari jõmaʉ̃nẽ bʼaira ĩjãnaibara baera Jesúsʼra dayirã bari beisita.