Kʼãrẽa yibia mebẽrã kʼawa bʼaira

1, 2. (1) ¿Kʼãrẽta audre yibia Jeowaitara? (2) ¿Kʼãrẽta omarẽã kãgabʉ Jeowabara?

JEOWABARA bia akʉbʉ dayirãba wuabema ẽbẽrarã sãwũã edabʉra. Jesúsba jarasi dayirãbara wuabemarãra kãgaibarata dayikʉza kãgabʉ kĩrãkʼa (Mat. 22:​37-39). Maʉ̃ba jarakĩrãbʉ dayirãbara wuabemarãra bia edaibarata ãyi Daizeze ode bʉ ẽ mina. Mawũã obʉdera dayirãba Jeowade kĩrãkʼa opanʉ. Jeowabara «bisiara ʉ̃tʉzebibʉ baera yi kayiruara ʉ̃rʉ akʉza yi biara ʉ̃rʉ akʉza kuera zebibʉ ẽbẽra kayiruara ʉ̃rʉ akʉza ẽbẽra biara ʉ̃rʉ» (Mat. 5:45).

² Jeowabara ẽbẽrarã jõmaʉ̃ta kãga mamina iyara audre kãga ẽbẽrarã iyi ode kʼẽrẽpa panʉrata (Juan 14:21). Jeowaba kãgabʉ dayirãbida iyide kĩrãkʼa odamarẽã, kãgabʉ dayirãba mebẽrãta mejãcha kãgadamarẽã akʉza soiduba (1 Ped. 4:8; Rom. 12:10). Maʉ̃ba jarakĩrãbʉ dayirãbara mebẽrãra dayirã mebẽãʼara kãgabari kĩrãkʼa kãgaibarata mawũã ẽ bʉrʉ dayi neũdukʼawuaʼara kãgabari kĩrãkʼa.

3. ¿Kʼãrẽta kĩrãbedaibara dayirãbara kãga ʉ̃rʉ?

³ Kĩrãbedaibara kãga ũdubira daya nepono deda u erbʉ kĩrãkʼabʉta. Naʉ̃ neponota bania wea ẽ bʉrʉ beiseabʉ, maʉ̃ba badua bania weaibara. Apostol Pabloba jarasi kristianora mebẽrãra badua kãga ũdubipanamarẽã (Heb. 13:1). Jeowabara kãgabʉ dayirãba mebẽrã kãga ũdubidamarẽã. Maʉ̃ba naʉ̃ artikulode kʼawuadayi kʼãrẽa dayirãta mebẽrã kʼawa bʼaibarata akʉza kʼãrẽta oseapanʉta mawũã obʉta idubʉ ẽ baita.

KʼÃRẼA MEBẼRÃ KʼAWA PANAIBARA

4. ¿Kʼãrẽba kʼarebaseabʉ dayirãba ewariza akʉita mebẽrãta Salmo 133:1ba jarabʉ kĩrãkʼa? (Akʉra potota).

⁴ (Akʉra Salmo 133:1). Dayirãra salmista kĩrãkʼa sentiseapanʉ. Iya jarasi Jeowa kãgapanʉra neũdukʼawua bʼaira jipade yibiata dayirãitabida mawũãbʉ. Dayirãba Jeowa organizasion ũdukata ũdusidera mejãcha sobiasi, ũdusi baera ãyira mejãcha sobiapanʉta. Mamina jʉra kʼawua panaibara. Krĩchadaya naʉ̃ta. Ẽbẽra abaʉba ũdura bakuru aba wuabemaraira audre yi zroma chuta, maʉ̃nera iyira mejãcha sobiabʉ bakuru zromata ũdusi baera. Mamina iya maʉ̃ bakuru zromata ewariza ũdubʉbʉrʉ ewari berabari wãne kʼãrẽ ẽ kĩrãkʼa akʉbayi maʉ̃ bakuru zromara. Abarika berabariseabʉ dayirãta. Dayirãba Jeowa organizasionebemarata ũdukata ũdusidera mejãcha sobiasida ũdusi baera sãwũã ãba panʉta akʉza ãyirai sobiapanʉta, mamina dayirãba maʉ̃ta badua ũdubʉ kʼarea ewari berabari wãne kʼãrẽ ẽ kĩrãkʼa akʉseabʉ maʉ̃ra. ¿Kʼãrẽta oseapanʉ dayirã mawũã berabari ẽ marẽãra? Akʉibara mebẽrã kongregasionebema aba abakaʉba kʼãrẽ nebiata erbʉta akʉza ãyi mawũã bʉba sãwũã kʼarebabʉta dayita adewara kongregasionebemarata.

5. ¿Dayirãi kãga ũdubibʉba kʼãrẽta obiseabʉ wuabemara?

⁵ Ẽbẽra abaʉba ũdubʉrʉde dayirãba sãwũã dayirãi wãrĩnu kãga ũdubibʉta maʉ̃nera naʉ̃ ẽbẽrabara kʼawuabʉ naʉ̃ta religion wãrĩnuarata. Jesúsba jarasi naʉ̃ta: «Mawũãtrʉ jõmaʉ̃ba kʼawuadayi marara mʉ̃ kʼaidubemarata, mayirai yiya kãgapanʉbʉrʉ» (Juan 13:35). Akʉdaya Chaithra nebʉrata. Iya Daizeze Bedʼeata kʼawua jʉ̃drʉsi Jeowa ʉ̃rʉ Kʼawuabipanʉrãbawara akʉza ewari aba ĩjãsi asamblea regional eda wãita. Iyi mainʉ jʉ̃ẽbʉrʉde ewari aba berabaribʉrʉde iyaʼa Daizeze Bedʼea jaradiabʉa naʉ̃ta jarasi: «Mʉ̃ dedara mʉ̃ yibarirabara kãga ũdubida ẽ basi mʉ̃ara, bʉrada ẽ basi mʉ̃ra, mamina naʉ̃ asambleadera mebẽrã 52ba bʉrasida mʉ̃ra. Naʉ̃ra mebẽrãba mʉ̃aʼa ũdubibʉda Jeowa kãgata, mʉ̃sida Jeowa mebẽrãne bakĩrãbʉ». Chaithrabara idubʉ ẽ basi Daizeze Bedʼea kʼawuabʉra, maʉ̃ta buru kʼoesi poaga 2024de. Naʉ̃ba ũdubibʉ ẽbẽrarã Jeowa pʉwʉrʉ eda jʉ̃ẽkata jʉ̃ẽbʉrʉdera naʉ̃rabara ũdupanʉta dayirãba kʼãrẽ nebia opanʉta, maʉ̃ne edabʉ sãwũã dayirãi yiya kãga ũdubibʉta. Maʉ̃ ũdubʉba kʼarebabʉ ãyabida Jeowadeta okĩrãita (Mat. 5:16).

6. ¿Mebẽrã kʼawa bʼaiba sãwũã kʼarebabʉ?

⁶ Dayirã mebẽrã kʼawa bʼaira jipade yibia kʼarebabʉ baera neida berabari ẽ baita. Pabloba kristianora jarasi ãyirai so zarea diadamarẽã mawũã yi kayirua oita bʉa yi edebida ẽ baita akʉza Jeowadeba jĩga wã ẽ baita (Heb. 3:13). Jeowaba ũdubʉrʉde dayita nebia oita zareabʉta maʉ̃nera Jeowaba mebẽã aba zokʼaseabʉ dayirã kʼarebaita dayirãba nesidabʉde (Sal. 73:​2, 17, 23). Mebẽrãba dayirãʼa mawũã so zarea diabʉra jipade yibia.

7. ¿Kãga ũdubibʉba sãwũã kʼarebabʉ ãba bʼaita? (Colosenses 3:​13, 14).

⁷ Dayirãra jõmaʉ̃ta zarea opanʉ dayirãi yiya kãga ũdubita, mawũã opanʉneba nebiata ũdupanʉ (1 Juan 4:11). Bari jaradaita, mebẽrãba nekʼãrẽ dayima ẽã bʉta obʉrʉdera dayirãbara maʉ̃ra awuantapanʉ, ¿kʼãrẽa mawũã opanʉ? Mebẽrãta kãga baera akʉza mawũã awuantabʉba kʼarebabʉ ãba panaita (Efes. 4:​2-6; akʉra Colosenses 3:​13, 14). Dayirã ãba yi jʉre barimaera mebẽrã jõmaʉ̃ba kãgata ũdubipanʉ, jõmaʉ̃ta sobiapanʉ. Mawũã yiya kãga ũdubibʉra naʉ̃ drʉadera mia abaʉmae ũduda ẽ bayi dayirãbara.

DAYIRÃI WAWIA ŨDUBIDADRɄ

8. ¿Sãwũã kʼarebabʉ Jeowabara dayirãra mebẽrã kʼawa bʼaita?

⁸ Jeowa ode panʉrãra ãbapanʉ, ãyira nemitia omiamina ãyirai yiya kãga ũdubipanʉ, maʉ̃ra mawũã berabaribʉ Jeowaba kʼarebabʉ baera (1 Cor. 12:25). Daizeze Bedʼeaba naʉ̃ta jarabʉ: «Daizezebara maraʼa jaradianʉmʉ baera sãwũã yiya kãgaibarata» (1 Tes. 4:9). ¿Jeowabara sãwũã jaradiabʉ dayirãra? Iyara Daizeze Bedʼeata zokʼabʉ, nama jaradiabʉ kʼãrẽta oibarata mawũã mebẽrã kʼawa bʼaita. Dayirãra iya yi jaradiabipanʉ iya maʉ̃ Daizeze Bedʼea diabʉta ewariza lepanʉne akʉza akʉpanʉne sãwũã mama jarabʉde oũdubita (Heb. 4:12; Sant. 1:25). Jeowa ʉ̃rʉ Kʼawuabipanʉrã jõmaʉ̃ta zarea opanʉ Daizeze Bedʼeaba jarabʉde odaita.

9. ¿Romanos 12:​9-13 bayeda jarabʉba kʼãrẽta jaradiabʉ yiya kãga ũdubi ʉ̃rʉ?

⁹ ¿Daizeze Bedʼeaba sãwũã kʼarebabʉ mebẽrã kʼawa bʼaita? Nããra akʉdaya Pabloba kʼãrẽ jaradata Romanos 12:​9-13 (akʉra). Akʉdaya naʉ̃ bedʼeata: «Yiya wawia ũdubira maraba nãã ojʉ̃drʉidua». ¿Kʼãrẽta jarakĩrãbʉ naʉ̃ bedʼeaba? Dayirãbara mebẽrãra kãga ũdubibarata nekʼãrẽ biodeba. Bari jaradaita, ãya nekʼãrẽ aña obʉrʉde kĩrãduabʉde ãya aña odata. Adewara dayi deda zemarẽã trʉ̃bʉrʉde akʉza nekʼãrẽ diabʉrʉde mebẽrã (Efes. 4:32). Mamina dayirãbara jʉ̃ã ẽ baibarara mebẽrãba dayirãʼa kãga ũdubimarẽã, awuarabʉrʉ dayirãreba zarea oibara ũdubita maʉ̃ kãgara. Mawũã opanʉbʉrʉ Jesúsba jaradata odayi: «Audre sobiabʉ daya diabʉde dayaʼa diapanʉira» (Hech. 20:35).

10. ¿Dayirãba wawia ũdubibʉdeba sãwũã ũdubiseabʉ trajamiata? (Akʉra potota).

¹⁰ Pabloba dayirãreba awurura wawia ũdubi ʉ̃rʉ jarada tẽã jarasi dayirã trajamia baibarata, koa ba ẽ baibarata. Wãrĩnubaira ẽbẽra aba trajamiabʉrʉ maʉ̃ ẽbẽrabara nekʼãrẽ iyaʼa omarẽã zokʼapanʉra mesera obʉ. Adewara Proverbios 3:​27, 28de jarabʉ dayi juwade bʉbʉrʉ ẽbẽra aba kʼarebaita naʉ̃ta oibarata. Naʉ̃ testoba jarabʉdebara dayirãba ũdura ẽbẽra aba kʼareba nesidabʉta maʉ̃ ẽbẽrarã mesera kʼarebaibara, jʉ̃ã ẽ baibara tẽã oita mawũã ẽ bʉrʉ awuru ẽbẽraba kʼarebamarẽã (1 Juan 3:​17, 18).

11. ¿Kʼãrẽba kʼarebaseabʉ mebẽrã kʼawa bʼaita?

¹¹ Adewara dayirãba mebẽrã wawiabʉ ũdubira ãya nekʼãrẽ aña obʉrʉde zarea odaibara mesera kĩrãduaita ãya nekʼãrẽ aña odara. Efesios 4:26ba jarabʉ: «Ũmadaʉ baebirãra bʉ kĩrʉbʉeda». ¿Kʼãrẽa mawũã oibara? Yi bersikulo 27ba jarabʉ Diarua yi kʉrʉgabi ẽ baita. Wãrĩnubaira Jeowaba dayirã jarada ʉ̃rʉ jarabʉ kĩrãduaibarata wuabemaraba dayi ʉ̃rʉ aña odara. Adewara Colosenses 3:13de jarabʉ ẽbẽra abaʉba dayi ʉ̃rʉ nemitiata osibʉrʉ zarea oibarata maʉ̃ kĩrãduaita akʉza mawũã obʉta idubʉ ẽ baibara. Maʉ̃ba dayirãba mawũã opanʉbʉrʉ naʉ̃ba kʼarebayi mebẽrã kʼawa bʼaita. Dayirãba mebẽrãba nekʼãrẽ aña obʉta kĩrãduabʉrʉdera kʼarebapanʉ ãba bʼaita akʉza aduʼa bʼaita (Efes. 4:3). Dayirãba kĩrãdua ẽ bʉrʉ kongregasionera ãba pana ẽ bayi akʉza aduʼa pana ẽ bayi.

12. ¿Sãwũã kʼarebabʉ Jeowabara dayirãba awururaba nemitia oda kĩrãduaita?

¹² Awururaba dayirã ʉ̃rʉ nemitia obʉrʉdera wãrĩnubaira jipade zare kĩrãduaira. Mamina Jeowa jaure zareaba kʼarebaseabʉ kĩrãduaita. Pabloba mebẽrã ũrãgʼaside jarasi nããra ãyirai yiya kãga ũdubidamarẽã akʉza trajamia badamarẽã. Mamina iya maʉ̃ awuara jarasi naʉ̃ta: «Jaure zareaba diamarẽã soiduba okĩrãita». ¿Naʉ̃neba kʼãrẽta jarakĩrãbasi? Jarakĩrãbasi dayirãba Daizeze jaure zarea erbʉdera, naʉ̃bara kʼarebabʉta dayi soiduba okĩrã zeita nekʼãrẽ bia Jeowaba kãgabʉta (akʉra nota ũmeta Romanos 12:11debemata). Maʉ̃ra nebiara Daizezeba omarẽã kãgabʉdebʉ awurura kãga ũdubita akʉza kĩrãduaita awururaba nemitia odata. Maʉ̃ jõma aribaeira Daizeze jaure zareaba kʼarebayi. Maʉ̃ba dayirãbara soiduba wididaibara Jeowaʼa iyi kʼarebata (Luc. 11:13).

«AWUARA AWUARAKA NɄMA Ẽ MARẼA»

13. ¿Kʼãrẽba awuara krĩchabiseabʉ?

¹³ Dayirã kongregasionera kultura awurudebemata bʉ baera akʉza mebẽrã awuru drʉadebemata bʉ baera (1 Tim. 2:​3, 4). Awuara krĩchaseabʉ sãwũã yobai ʉ̃rʉ wua sãwũã jʉ̃i ʉ̃rʉ mamina dayirãta jʉra kʼawuapanʉ ẽ bʉrʉ maʉ̃ kʼarea krĩcha abapai pana ẽ bayi (Rom. 14:4; 1 Cor. 1:10). Mamina Jeowabara dayirã jaradiabʉ jõmaʉ̃ta daucha kãgaibarata. Maʉ̃ kʼarea dayirãbara jara ẽ dayirãba krĩchabʉta audre yibiata wuabemaraba krĩchabʉira (Filip. 2:3).

14. ¿Dayirãba ewari jõmaʉ̃nẽ kʼãrẽta odaita krĩchapanaibara akʉza kʼãrẽa?

¹⁴ Dayirãta kongregasione zarea opanʉbʉrʉ wuabemara so zarea diaita akʉza ibiade erbaita naʉ̃ba kʼarebayi krĩcha abapai erbaita (1 Tes. 5:11). Aranʉwedaʉba kongregasionʼenara mebẽrã Daizeze ode bʉta kʉrãzadata mawuã ẽ bʉrʉ kongregasioneba ãĩ wãnata jʉ̃ẽpanʉ, maʉba dayirãba bia edadara biode kʼarebayi (2 Cor. 2:8). Akʉdaya mebẽã wẽrã aba iyi Daizeze odebʉta kʉrãzadata 10 poaga badata jẽda ãba yi jʉrebarieda jʉ̃ẽbʉrʉde naʉ̃ta ũdusi iya. Iya jarabʉ: «Mebẽrãbara mʉ̃ra jõmaʉ̃ba sobia saludasida» (Hech. 3:19). ¿Kʼãrẽba kʼarebasi naʉ̃ mebẽã jẽda zeita? Iya jarabʉ: «Mʉ̃ra mebẽrãbara bia edasida, mʉ̃a sentisi Jeowaba mʉ̃ta jẽda zemarẽã kãgabʉta». Mawũẽra dayirãta zarea opanʉbʉrʉ wuabemarata bia edadaita akʉza ãyaʼa ipida bʼaita, Jesúsba kʼarebaseabʉ dayirãneba ãyaʼa so zarea diaita (Mat. 11:​28, 29).

15. ¿Adewara sãwũã krĩcha abapai babiseabʉ kongregasionera? (Akʉra potota).

¹⁵ Adewara dayirãbara kʼarebaseabʉ krĩcha abapai bʼaita dayi sãwũã bedʼeabʉdeba. Maʉ̃ kʼarea Job 12:11ba jarabʉ: «¿Abarika kirameba yiko zẽakʉbari kĩrãkʼa abarika kʉwʉrʉbara ũrĩbʉ ẽka bedʼeara?». Mamina, ¿sãwũã kʼarebaseabʉ daya jarabʉdeba krĩcha abapai bʼaita? Naʉ̃ ũrĩnaita krĩchara naʉ̃ yizata. Ẽbẽra abaʉba iya yiko wiadata awurura diai nããra, nãã koa akʉbʉ naʉ̃ta warrachu kʼawuaita. Abarika dayirãba awuru ẽbẽra nekʼãrẽ jarai naweda nãã bia krĩchaibara kʼãrẽ jaraita. Dayirãba ãyaʼa jarabʉbara so zarea diaibara, aduʼa sentibibara akʉza kʼarebaibara (Sal. 141:3; Efes. 4:29).

16. ¿Kʼairata audre zarea oseapanʉ ãyi bedʼeabʉdeba awurura so zarea diaita?

¹⁶ Juwa jidapanʉrata, zezerata akʉza paparata zarea odaibara ãya sãwũã jarabʉdeba ãyi sãwũã bedʼeabʉdeba wuabemara so zarea diaita (Col. 3:​19, 21; Tito 2:4). Akʉza zõrãrã kongregasionebemarabara mebẽrãra bia akʉibara. Adewara zõrãrãbara mebẽrãra kongregasionebemara ãyi sãwũã bedʼeabʉdeba so zarea diaibara (Is. 32:​1, 2; Gál. 6:1). Maʉ̃ kʼarea Daizeze Bedʼeaba jarabʉ bia Proverbios 15:23de: «Kʼãrẽ kĩrãkʼa yi bia bedʼea bia jaraira nesidabʉde».

WÃRĨNU KÃGABɄTA ŨDUBIDADRɄ DAYA OBɄDEBA

17. ¿Sãwũã wãrĩnu kãgabʉta ũdubidai mebẽrãra?

¹⁷ Apostol Juanba jarasi: «Kãgada ẽ baibara bedʼea awaʉba mia i awaʉba, awuarabʉrʉ oũdubipanʉne akʉza wãrĩnune» (1 Juan 3:18). Mamina, ¿sãwũã wãrĩnu kãga ũdubi dayirãbara? Mawũã oira ewari jʉrʉdaibara ãyibawara audre ãba bʼaita akʉza zarea odaibara ũdukʼawuadaita, mawũã odara mejãcha kãgadayi. Bari jaraita, dayirãbara kʼawuaseabʉ audre Daizeze Bedʼea jaradia wãbʉrʉde, ãba yi jʉrebʉrʉde bedʼeapanʉne adewara ãyita deidu akʉ jʉ̃ẽpanʉne. Mawũã opanʉbʉrʉ wuabemarabara ũdudayi Jeowaba jaradianʉmʉta sãwũã kãgaibarata wuabemarara (1 Tes. 4:9). Dayirãba mawũã opanʉbʉrʉ ũdudayi kʼãrẽãba yibiata mebẽrãbawara ãba panaira (Sal. 133:1).