ARTIKULO KʼAWUAITA 18
TRÃBI 65 Audre bia owãibara
Warrara: Marcos akʉza Timoteode kĩrãkʼa odaibara
«Wera Marcosʼra bʉ kʼaidu iya mejãcha kʼarebai baera jaradiaide» (2 TIM. 4:11).
KʼÃRẼTA ŨDUDAITA
Naʉ̃ artikulode kʼawuadayi sãwũã Marcos akʉza Timoteo yizaba kʼarebaseabʉta warraraba audre odamarẽã Jeowaita akʉza kongregasionebida.
1, 2. ¿Kʼãrẽba oseabasi Marcosba akʉza Timoteoʉ̃meba Daizezeita audre dia ẽ baita?
BɄTA warrarabʉrʉ, audre nekʼãrẽ okĩrãbʉ bʼaibara Jeowaita akʉza kongregasione ¡kʼãrẽ bia bʉa mawũã oita krĩchabʉ baera! (Sal. 110:3). Mamina edaʉde mawũã oira perabʉ bʼaibara bʉara kʼawua ẽ baera bʉ bebʉra sãwũã berabarita akʉza Jeowaba kʼãrẽta krĩchabʉta bʉita maʉ̃ta neẽbʉrʉ krĩchabʉ baera Jeowaba asinasion diabʉrʉde aripe oauẽãta, mamina krĩcha orara maʉ̃ kʼarea bʉtrʉ abapai mawũã berabaribʉ ẽ.
2 Marcos akʉza Timoteoʉ̃mera bʉ kĩrãkʼa krĩchapanasi baibara, ãya kʼawua ẽ basi baibara ãyi bebʉde kʼãrẽta sãwũã berabarita akʉza Jeowaba asignasion diabʉrʉde aripe oauẽãta krĩchapanasi baibara mawũãsidu ãyira nekʼãrẽ oita krĩchasida Jeowaita. Maʉ̃ta Pabloba akʉza Bernabéʉ̃meba Marcosʼa jarasidade ãyi kʼaidu Daizeze Bedʼeata jaradia wãmarẽã awuru drʉa eda, maʉ̃nera Marcosʼra yi papa deda basi bʼaibara akʉza maʉ̃ dera bia kirasi (Hech. 12:12, 13, 25). Marcosbara iyi aduʼabadata jõma idubʉsi mawũã audre Jeowaita oita. Nããrara iyira wãsi Antioquía eda (Hech. 13:1-5). Maʉ̃ tẽã Pablo Bernabéʉ̃mera awuru drʉa eda wãsida. Abarika berabarisi Timoteota, Timoteora yibarirabawara aduʼabasi maʉ̃ba Pabloba jaraside Daizeze Bedʼea jaradia wãita awuru drʉa eda Timoteobara krĩchabasi baibara iyira warrara baera kʼãrẽ aripe oauẽãta (naʉ̃ testoʉ̃me akʉra 1 Corintios 16:10, 11 akʉza 1 Timoteo 4:12). Mamina Timoteobara ĩjãsi Pabloba jaradata maʉ̃ba iyara nekʼãrẽ biata mejãcha ũdusi tẽã (Hech. 16:3-5).
3. (1) ¿Sãwũã kʼawuapanʉ Pabloba Marcosta Timoteoʉ̃mera mejãcha kãgabasita? (2 Timoteo 4:6, 9, 11). (Akʉra potota). (2) ¿Kʼãrẽ bedʼeata panʉnai naʉ̃ artikulodera?
3 Ãyi warrarabasimina kongregasione nekʼãrẽ mejãcha osida maʉ̃ kʼarea Pablobara ãyira mejãcha kãga zesi maʉ̃ba Pablo beibodoare trʉ̃bʉesi naʉ̃ra ũmeta iyidu jʉ̃ẽmarẽã (akʉra 2 Timoteo 4:6, 9, 11). ¿Kʼãrẽa? Pablobara Timoteota Marcosʼʉ̃mera mejãcha kãga zesi akʉza warrarabara, ¿sãwũã naʉ̃rane kĩrãkʼa oseabʉ? akʉza ¿Pabloba ũrãgʼa diadaba sãwũã kʼarebaseabʉ idibema warrarara?
Marcosba Timoteoʉ̃mebara ãyi warraraenaʉba audre ojʉ̃drʉsida Jeowaita, maʉ̃ba Pablobara mejãcha kãga zesi ãyira. (Akʉra parrapo 3).b
KʼAREBAKĨRÃ BARA WUABEMARATA MARCOSDE KĨRÃKʼA
4, 5. ¿Sãwũã ũdubisi Marcosbara wuabemara kʼarebakĩrãbasita?
4 Disionario abaʉba jara ũrĩbibʉ kʼãrẽta jarakĩrãbʉta wuabemara kʼarebaita. Wuabemara kʼarebaira zarea trajaibarata ãya nesidabʉta diaita edaʉde dayirãitabida zarea bʉmina maʉ̃ta oibara, mawũã ũdubisi Marcosba Pabloba awuru drʉa eda jaradia wãine iyi ede ẽ baside. Maʉ̃ kʼarea Marcosʼra kĩrʉsi bʼaibara akʉza sopʉa sentisi bʼaibara (Hech. 15:37, 38). Mamina idubʉ ẽ basi wuabema mebẽrã kʼarebabʉta.
5 Marcosʼra wãsi yi primo Bernabéʉ̃me jaradiade, maʉ̃ta 11 poaga berabarida tẽã Marcosba kʼarebasi Pablo Romane karselde baside (Filem. 23, 24). Pablobara Marcosʼa mejãcha biga diasi iyita mawũã kʼarebasi baera maʉ̃ kʼarea jarasi Marcosʼra so zarea diabarita (Col. 4:10, 11).
6. ¿Sãwũã kʼarebasi Marcosʼra Daizeze Bedʼeadebema sãwũã oi bia kʼawuabʉrabawara ãba bʉba? (Akʉra notata).
6 Marcosʼra mebẽrã Daizezedebema sãwũã oita biʼia kʼawuabʉrabawara ãba basi baera, naʉ̃ba kʼarebasi iyabida nebiata ũduita. Bari jaraita, iyira Romanera Pabloʉ̃me basi, maʉ̃ tẽã Babiloniane Pedroʉ̃me ãba basi, iyira Pedroʉ̃mera jipade neũdukʼawua biaba zesi maʉ̃ba Pedroba jarasi Marcosʼra iyi wũãwũã kĩrãkʼabʉta (1 Ped. 5:13). Ãyi mawũã ãba panʉne Pedroba Marcosʼa nebʉrasi Jesús nama egorode baside ẽbẽrarã sãwũã jaradiabada ʉ̃rʉ akʉza Jesús sãwũãbada ʉ̃rʉ, maʉ̃ta Marcosbara Evangelio Marcosde bʉsi.a
7. ¿Mebẽã Seung-Woobara sãwũã Marcosde kĩrãkʼa osi? (Akʉra potota).
7 Marcosbara ewariza obasi Jeowadeta akʉza iyira badua ãba basi mebẽrã Daizeze Bedʼeadebema sãwũã oita biʼia kʼawuabʉrabawara, ¿bʉara sãwũã Marcosde kĩrãka osebʉ? Bʉa krĩchabʉbʉrʉ kongregasione audre kʼarebaita mamina maʉ̃ta bʉaʼa waidide diada ẽ bʉrʉ maʉ̃ kʼarea sopʉarãra, krĩcha orara awuarabʉrʉ jʉra kʼawuabʉta ũdubira akʉza jʉrʉda sãwũã nekʼãrẽ awurude kʼarebaseabʉta kongregasione mawũã Jeowaba kãgabʉta oita. Akʉdaya Seung-Woo nebʉrata, iyira zõrãrã kongregasionebema, iya nebʉrabʉ iyi warraraenara iya akʉbasita awuru mebẽrã iyi dauchabemarata sãwũã maʉ̃ra kongregasione nekʼãrẽ omarẽã diapanasita mamina iyara diada ẽ basi, maʉ̃nera iya krĩcha zesi zõrãrãbara iyira ũduda ẽãta maʉ̃ kʼarea bedʼeasi zõrãrãbawara maʉ̃ ʉ̃rʉ, maʉ̃ne zõrãrã abaʉba iyaʼa jarasi krĩchamarẽã awurura kʼarebaita, maʉ̃ba iya maʉ̃ta ojʉ̃drʉsi, kʼarebabasi mebẽrã zõrãpanʉrata akʉza yi ãba yi jʉrebarieda kʼãrẽne wãi neẽ panʉrata, iya naʉ̃ obʉde naʉ̃ta jarasi: «Mʉ̃a naʉ̃ obʉdeba kʼawuasi kʼãrẽta jarakĩrãbʉta wãrĩnu wuabemara kʼarebaiba, maʉ̃ne mʉ̃a ũdusi wuabemara kʼarebabʉba mejãcha sobiabibasita mʉ̃ra».
¿Kʼãrẽa yibia warrarãra mebẽrã burubiabawara ãba bʼaita? (Akʉra parrapo 7).
WUABEMARA Ʉ̃RɄ KRĨCHABɄTA ŨDUBIRA TIMOTEODE KĨRÃKʼA
8. ¿Pablobara kʼãrẽa iyi kʼaidu edesi Timoteora? (Filipenses 2:19-22).
8 Drʉa iyi pẽwãnapeadama jẽda wãinera, Pablobara jʉrʉibarabasi iyi kʼaime wãita, mamina iyiʉ̃me wãira zowaĩnĩgʉa bʼaibarabasi maʉ̃ba nããra Pablobara jidasi mebẽã aba yi trʉ̃ Silasta, Silasʼra Jeowa odebʉta dããrabasi (Hech. 15:22, 40). Tẽã Pabloba jidasi Timoteota, ¿kʼãrẽa Timoteota jidasi iyira warrarabasibʉrʉ? Timoteo ʉ̃rʉra wuabemara ibia bedʼeapanasi baera (Hech. 16:1, 2). Adewara jidasi Timoteobara iyikʉza ʉ̃rʉ krĩchabʉta ũdubi ba ẽ basi baera, awuarabʉrʉ nããra krĩchabasi wuabemara sãwũã kʼarebai ʉ̃rʉ (akʉra Filipenses 2:19-22).
9. ¿Timoteobara sãwũã ũdubisi wuabemara ʉ̃rʉ krĩchabʉta?
9 Timoteobara Pabloʉ̃meba Daizeze Bedʼea jaradia jʉ̃drʉdadeba ũdubisi iyi ʉ̃rʉ krĩchabʉ ẽãta awuarabʉrʉ wuabemara ʉ̃rʉ krĩchabʉta, maʉ̃ kʼarea Pablobara Timoteora Bereade amaesi mamabema ʉ̃rabʉrʉ Daizeze ode jʉ̃drʉdarata kʼarebamarẽã maʉ̃ra so zarea diamarẽã (Hech. 17:13, 14). Maʉ̃nera Timoteobara nekʼãrẽ mejãcha kʼawuasi Silasdeba. Silasʼsida iyiʉ̃me basi baera Bereade. Tẽã Pablobara Timoteora doba zokʼabʉesi Tesalonica eda kʼarebamarẽã mamabema kongregasionta zarea bʼaita (1 Tes. 3:2, nota). Maʉ̃ 15 poagade Timoteobara ũdubisi iya wuabemara ʉ̃rʉ krĩchabʉra ewariza audre mawũã obasita, iyira jẽdasi yi jẽgapanʉrabawara (Rom. 12:15; 2 Tim. 1:4). Kristianora warrarapanʉrabara, ¿sãwũã Timoteode kĩrãkʼa oseapanʉ?
10. ¿Woo Jaebara sãwũã audre krĩcha kʼawuasi wuabemara ʉ̃rʉ?
10 Mebẽã Woo Jaebara kʼawuasi wuabemara ʉ̃rʉ sãwũã audre krĩchaita, iyi warrara basiedara iyitara zõrãpanʉrabawara bedʼeaira zarebasi maʉ̃ba ãba yi jʉrebari eda jʉ̃ẽbʉrʉdera iyara bari saludabasi, maʉ̃ta iyaʼa zõrãrã abaʉba jarasi zarea omarẽã mebẽrã zõrãpanʉra jara ũrĩbita ãya kʼãrẽ nebia erbʉta akʉza krĩchamarẽã kʼãrẽ ʉ̃rʉ ũrĩkĩrãbaita ãya, mawũã ãyiʉ̃me wiña wiñane bedʼea jʉ̃drʉmarẽã. Woo Jaebara naʉ̃ mebẽãba ũrãgʼa diadara ũrĩsi, atiara iyira zõrãrã kongregasionebema. Iya naʉ̃ta jarabʉ: «Mʉ̃a maʉ̃ ojʉ̃drʉda tẽãra mʉ̃itara ẽbẽrarãʉ̃me bedʼeaira zare ẽ atiara mʉ̃ara kʼawuabʉ wuabemara bedʼea zroma berabaribʉrʉde sãwũã sentibʉra, mawũãbʉba kʼarebabʉ mʉ̃abida kʼawuaita ãyi kʼãrẽne kʼarebaseabʉta».
11. ¿Kʉ̃rarabara sãwũã ũdubiseabʉ wuabemara ʉ̃rʉ krĩchabʉta? (Akʉra potota).
11 Kʉ̃ra bʉa wabida ũdubiseabʉ wuabemara ʉ̃rʉ krĩchabʉta, bʉ ãba yi jʉrebarieda jʉ̃ẽbʉrʉde widira mebẽrã sãwũã panʉta mõbe kĩrãkita ũrĩra ãya kʼãrẽta panʉbʉta mawũã obʉbʉrʉ naʉ̃ba kʼarebayi bʉa kʼawuaita ãyi kʼãrẽne kʼarebaseabʉta. Bari jaradaita, kʼawuaseabʉ mebẽrã zõrãpanʉraba kʼareba nesidapanʉta aplikasion JW Library® zokʼaita, mawũã ẽ bʉrʉ neẽãta ãyi kʼaiba kopayaita Daizeze Bedʼea jaradia wãita. Maʉ̃nera bʉara kʼarebaseabʉ ãyi aplikasion zokʼa kʼawuaide mawũã ẽ bʉrʉ kopayaseabʉ Daizeze Bedʼea jaradiaide, bʉa bʉya areba wuabemarata mawũã kʼarebabʉbʉrʉ, kongregasionebemarabara bʉra bia akʉdayi.
Kʉ̃rarabara kongregasiora mejãcha kʼarebaseabʉ nekʼãrẽ biode. (Akʉra parrapo 11).
PABLOBA ŨRÃGʼA DIADABA KʼAREBAYI BɄRA
12. ¿Kʼãrẽta oseabʉ kʉ̃rarabara Pabloba Timoteoa ũrãgʼa diadadeba nebia ũduita?
12 Pablobara Timoteora iyi wũãwũã kĩrãkʼa kãgabasi maʉ̃ba iyaʼa ũrãgʼa biata diasi iyita bia wãmarẽã akʉza Daizeze Bedʼea jaradiabʉde (1 Tim. 1:18; 2 Tim. 4:5). ¿Kʼãrẽta oibara bʉsida bia wãmarẽã Pabloba ũrãgʼa diadadeba? Lera Pabloba Timoteoa karta ũme bʉdiabʉedata mawũã ora bʉa ũduseabʉ maʉ̃ra ũrãgʼadebemata bʉa saʉ̃ta oũdubiseabʉta. Akʉdaya ʉ̃kʉrʉ maʉ̃ranebema ũrãgʼata.
13. ¿Kʼãrẽba kʼarebai Daizezea bia yiwidʼi bʼaita?
13 Adewara zarea ora Daizezea bia yiwidʼi bʼaita (1 Tim. 4:7b). ¿Kʼãrẽta jarakĩrãbʉ Daizezea bia yiwidʼibara? Maʉ̃bara jara kĩrãbʉ Daizezeʉ̃me kʼẽrẽpa bʼaita akʉza iya kãgabʉta oibarata, mamina maʉ̃ oira dayirãra zarea oibara mawũã obamarẽã toda ẽ basi baera, maʉ̃ kʼarea Pabloba nama zarea oibara asidera ũdubikĩrãbasi, ẽbẽra karrera obʉra zarea oibarata ewariza iyi mawũã wẽbabʉrʉde aukʼara ẽ baita, abarika dayirãsida ewariza zarea oibara badua jʉrʉita sãwũã Jeowa kʼawa bʼaita.
14. ¿Kʼãrẽa lepanʉ Daizeze Bedʼeara? Yizata jara ũrĩbira.
14 Adewara dayirãbara Daizeze Bedʼeara ewariza lebaibara mamina kĩrãbedaibara kʼãrẽa lepanʉta, dayirãbara lepanʉ Jeowa kʼawa bʼaita. Bari jaraita, bʉa lera Jesúsba ẽbẽra aba nekʼãrẽ barabada ʉ̃rʉ nebʉradata, krĩchara kʼãrẽta jaradiabʉta maʉ̃ba Jeowa ʉ̃rʉ (Mar. 10:17-22). Naʉ̃ yumakẽrãbara Jesúsʼra ĩjãbasi, mamina Jesúsba kʼawuabasi wabida audre ĩjãita waebʉta maʉ̃ kʼarea iyira Jesús kʼaidubema ba be ẽ basi. Mawũãsidu Jesúsbara iyaʼa ibiade bedʼeabasi, ¿kʼãrẽa mawũã osi? Daizeze odebʉde sobia bamarẽã kãgabasi baera. Jesúsba maʉ̃ yumakẽrã mawũã bia edabʉrʉba, ũdubisi Jeowaba sãwũã akʉbʉta maʉ̃ra (Juan 14:9). Maʉ̃ kʼarea dayirãkʉza widiseabʉ, ¿mʉ̃ra kʼãrẽta oseabʉ audre Jeowa kʼawa bʼaita akʉza wuabemara audre kʼarebaita?
15. ¿Kʼãrẽa kʉ̃rarãra yiza bia bʼaibara wuabemaraita? Yizata jara ũrĩbira (1 Timoteo 4:12, 13).
15 Yiza biabara yi kʼẽrẽpa bʉita (akʉra 1 Timoteo 4:12, 13). Pablobara jarasi Timoteoa Daizeze Bedʼeara biʼia le kʼawuamarẽã akʉza bia jaradia kʼawuamarẽã maʉ̃neba, mamina Pablobara jarasi wuabema nekʼãrẽ biasida ũdubimarẽã, bari jaraita: Kãgata, audre ĩjã bʼaita akʉza neneẽãbʉ ũdubita, ¿kʼãrẽa? Audre yibia baera bʉa oũdubita bʉaʼa bari jaranʉmaira, krĩchara naʉ̃ yizata. Bʉa jaradayi diskursota diamarẽã maʉ̃nera jaradayi bedʼeamarẽã Daizeze Bedʼea jaradia wãi ʉ̃rʉ bʉa maʉ̃ta oũdubinʉmʉbʉrʉ bʉitara zare ẽ bayi maʉ̃ ʉ̃rʉ bedʼeaita akʉza wuabemarabara okĩrãnañi bʉa jaradianʉmʉta ãya ũdupanʉ baera bʉa jarabʉ kĩrãkʼa obʉta (1 Tim. 3:13).
16. (1) ¿Kʼãrẽ nekʼãrẽ juesomabʉdeba yiza bia baseabʉ kʉ̃rarãra? (2) ¿Kʼãrẽta oseabʉ kʉ̃ra abaʉba iyi bedʼeabʉdeba yiza bia bʼaita?
16 1 Timoteo 4:12de, Pabloba nekʼãrẽ juesoma jarasi kʉ̃rara yiza bia bʼaita wuabemaraita, ¿kʼãrẽa maʉ̃nebemata aba abaka kʼawua ẽ marabara mawũa yiza bia bʼaita? Bari jaraita, maʉ̃nebemata aba kʼawuadayi dayi sãwũã bedʼeabʉta. Krĩchara bʉ bedʼeabʉdeba sãwũã so zarea diaita wuabemara. Bʉta bʉ yibarira dedabʉrʉ krĩchara sãwũã audre biga diaita bʉ bari nekʼãrẽ obʉ kʼarea. Ãba yi jʉrebʉrʉdera krĩchara bʉyi bedʼeadeba komentario diaita akʉza ãba yi jʉreberabarida tẽã krĩchara mebẽã abaʉa biga diaita maʉ̃ba nekʼãrẽ bia jarada kʼarea, mawũã obʉbʉrʉ bʉra yiza bia bayi wuabemaraita (1 Tim. 4:15).
17. ¿Kʼãrẽba kʼarebai kʉ̃ra abaʉba iya oita krĩchabʉ aripe oita? (2 Timoteo 2:22).
17 Mirʉ wãra warraraba okĩrãpanʉ kĩrãkʼa oẽ baita awuarabʉrʉ jʉrʉda aripe oita (akʉra 2 Timoteo 2:22). Pabloba Timoteoa jarasi jʉra kʼawua bamarẽã nekʼãrẽ oẽ baita Jeowadeba jĩgababibʉta akʉza Jeowaita audre obi ẽãneba. Bʉa krĩchaseabʉ kʼãrẽba mawũã obʉta, bari jaraita, ¿bʉ ewarira zokʼabʉka internet akʉbaita, bideo juego jemeita akʉza wuabemara nekʼãrẽ obaide? ¿Kʼãrẽa maʉ̃ ewarira bʉa zokʼa ẽ nekʼãrẽ Jeowade oita? Bari jaraita, kʼarebaseabʉ salon ara obarabʉde mawũã ẽ bʉrʉ mebẽrãbawara esibidordeba jaradia wãita, bʉa mawũã obʉbʉrʉ mebẽrãbara kʼarebayi audre omarẽã Jeowaita akʉza bʉa Jeowaita oita krĩchabʉsida aripe omarẽã.
WUABEMARA KʼAREBABɄ KʼAREA NEBIATA ŨDUPANɄ
18. ¿Kʼãrẽa jaraseapanʉ Marcosta Timoteoʉ̃mera sobiapanasita?
18 Marcos Timoteoʉ̃mebara nekʼãrẽ mejãcha osida Jeowaita akʉza ãyira mejãcha sobiapanasi maʉ̃ kʼarea (Hech. 20:35). Marcosʼra drʉaza wãsi akʉza mejãcha kʼarebasi mebẽrãrata adewara Marcosbara bʉsi Jesús ʉ̃rʉ akʉza iya sãwũã jaradiabada ʉ̃rʉ, kõbe Timoteobara biode kʼarebasi Pablota kongregasion oita akʉza mebẽrã so zarea diaita. Marcosba Timoteoʉ̃mebara nekʼãrẽ jõma osida Jeowaita audre oita, maʉ̃ kʼarea Jeowabara bia akʉbasi ãya odara akʉza sobia basi.
19. ¿Kʼãrẽa yibia kʉ̃raraba ũrĩta Pabloba ũrãgʼa diadara akʉza kʼãrẽ nebiata ũduseapanʉ?
19 Pabloba karta bʉdabara ũdubibʉ mejãcha kãgabasita Timoteora. Naʉ̃ kartaba ũdubibʉ Jeowabara mejãcha kãgabʉta kʉ̃rarãra akʉza bia wãmarẽã kãgabʉta. Mawũẽra maʉ̃ra kʉ̃raraba ũrĩnara Pabloba ũrãgʼa diadata akʉza zarea opanʉbʉrʉ wuabemara kʼarebaita mawũãra idi sobiapanañi akʉza ʉ̃ra zeidebida ewari jõmaʉ̃nẽ sobiapanañi (1 Tim. 6:18, 19).
TRÃBI 80 “Prueben y vean que Jehová es bueno”
b POTOBA ŨDUBIBɄTA: Pabloba Bernabéʉ̃meba drʉa jãpe Daizeze Bedʼea jaradiabʉde Marcosba ãya nesidabʉta diabʉ, Timoteora iyiareba kongregasionta akʉ wãbʉ mebẽrã so zarea diaita.