¿Kĩrãbebʉka?
Naʉ̃ poagade Jarakabʉ ʉ̃tʉ zedara, ¿jõma bia akʉsika? Akʉra panʉseabʉ kʼawuaita nama edre widibʉta:
¿Kʼãrẽa ibia bedʼeaibara Jeowa ʉ̃rʉ?
Dayirãra Jeowa ʉ̃rʉ ibia bedʼeaibara iyita wawiapanʉ baera, iyita mejãcha kãgapanʉ baera akʉza kãgapanʉ baera wuabemarabida ũdukʼawuadamarẽã Jeowata (w25.01, pagina 3).
Dayirã zʉbʉria obʉdadera mejãchade pʉ, ¿kʼãrẽta oibara ewari jõmaʉ̃nẽ sopʉa ba ẽ baita?
Dayi zʉbʉriabʉta kʼãrẽ ẽ kĩrãkʼa akʉ ẽ baibara, awuruba aña oda kʼarea dayita kĩrʉ kiki kʼawua ẽ bʉrʉ, naʉ̃ba kʼarebabʉ dayi sode aduʼa bʼaita, adewara naʉ̃ra dayirãita nekʼãrẽ bia, nãã bada kĩrãkʼa aduʼa sobia babibʉ baera (w25.02, pagina 15, 16).
¿Kʼãrẽa Marcosʼra yiza bia idi ewade warraraitara?
Marcosbara zarea osi wuabemara kʼarebaita. Pabloba awuru drʉa eda jaradia jʉ̃ẽside ede ẽ baside Marcosʼra. Maʉ̃ kʼarea Marcosʼra kĩrʉsibaibara akʉza sopʉa sentisibaibara. Mamina idubʉ ẽ basi wuabema mebẽrã kʼarebabʉta (w25.04, pagina 27).
«Mʉ̃a ũdukʼawuabisi bʉ trʉ̃ra», Jesúsba naʉ̃ bedʼeata jaraside, ¿kʼãrẽta jarakĩrãkʉasi? (Juan 17:26).
¿Jesúsbara bari ũdukʼawuabikĩrãbasika Daizeze trʉ̃ta? Mawũã ẽ, iyi kʼaidupanʉrabara ũdukʼawuabasi Daizeze trʉ̃ra. Iya kãgabasi ũdukʼawuadamarẽã sãwũãchuta Jeowara, kʼãrẽ nebia erbʉta, kʼãrẽta obʉta akʉza kʼãrẽ oita krĩchabʉta (w25.05, pagina 20, 21).
¿Kʼãrẽa yibia jõma kʼawua ẽ baira?
Dayirãitabida yibia jõma kʼawua ẽ baera. Dayirãba sainʉ oseabʉta kʼawuapanʉbʉrʉ naʉ̃ba kʼarebayi ĩjãita Jeowabʉrʉ dayirã kʼawua jaraita kʼãrẽta oibarata dayirãba nei jidaitabʉrʉde. Bari jaradaita dayirãbara kʼawuada ẽ Jeowaba naʉ̃ drʉade yi kayiruabʉ jõma jõbira sõbede weira akʉza kʼawuada ẽ Jeowaba kʼãrẽta oita dayirã kʼarebaita (w25.06, pagina 15-18).
¿Kʼãrẽba kʼarebaseabʉ audre nekʼawuaita artikulo lebʉdeba, mawũã ẽ bʉrʉ diskurso ũrĩbʉdeba?
Dayikʉza widiseabʉ: «¿Kʼãrẽ wãrĩnuneba ũdubibʉ wãrĩnuta Daizeze Bedʼeara? ¿Kʼãrẽ yizarata zokʼanʉmʉ wãrĩnu ʉ̃rʉ jaradiaita? ¿Naʉ̃ra kʼaira jaradiaseabʉ akʉza sõbede jaradiaseabʉ?» (w25.07, pagina 19).
¿David yizaba sãwũã ũdubibʉ Jeowabara jipa kĩrãduabʉta nemitia obʉra?
Nokʼo Davidʼra iya nãã nemitia oda kʼarea mejãcha sopʉabasi. Maʉ̃ kʼarea soiduba jẽda krĩchasi iya odara maʉ̃ba Jeowabara kĩrãduasi iya nemitia odara (1 Rey. 9:4, 5). Jeowabara badua kĩrãbenʉma ẽ baita dayirãba nemitia odara akʉza badua jaranʉma ẽ baita maʉ̃ta (w25.08, pagina 17).
Bʉ nekʼawuabariba bedʼea aba ũrĩ ẽ bʉrʉ, ¿kʼãrẽta oseabʉ?
Bʉ nekʼawuabariba bedʼea aba ũrĩ ẽ bʉrʉ zarea orãra iyaʼa jõma ũrĩbita, awuarabʉrʉ jaradiara wuabemarata, maraba estudiabarabʉta jõna tẽã bedʼeaita iya ũrĩ ẽ bada ʉ̃rʉ (w25.09, pagina 24).
Daizeze Bedʼeade jarabʉ «poder engañoso del pecado» (Heb. 3:13). ¿Kʼãrẽa Daizeze Bedʼeaba jarabʉ kayiruaba sewabʉta?
Dayirãra Adánʼneba zesi baera nekayirua opanʉ adewara naʉ̃ba krĩchabiseabʉ Jeowaba dayirãra kãga ẽãta, daya maʉ̃ta okĩrãbʉ ẽ mina (w25.10, pagina 16).
¿Kʼãrẽta oibara audre biʼia yiwidʼi kʼawuadaita dayirãra?
(1) Krĩchaibara Jeowara kʼãrẽaba zeze biata. (2) Krĩchara kʼãrẽta jaraita Jeowaʼa. (3) Mesera yiwidʼirãra (w25.10, pagina 19, 20).
¿Sãwũã kʼarebaseabʉ mebẽrã zõrãpanʉrãra?
Badua akʉ wãbaibara akʉza trʉ̃baibara. Mediko eda wãita kopayaibara. Ãyibawaraʉba Daizeze Bedʼeata jaradia wãibara (w25.11, pagina 6, 7).
¿Kʼãrẽta oibara yi bedʼeapanʉraba ãya kãgabʉbʉrʉ bia berabaridamarẽã juwa jidai ewaride?
Bia kʼawuaidua mayi drʉade kʼãrẽta widibʉta nokʼoraba mawũã juwa jidaita, zarea oidua juwa jidabʉrʉde Jeowaba jarabʉde oita. Juwa jidai ewaride bia yoibara, wua biata jʉ̃ibara, wãrĩnuta jaraidua akʉza wawiata ũdubidua. Juwa jidai ewaride kʼãrẽ oi ʉ̃rʉra bio krĩchaibara (w25.12, pagina 21-24).