Jiñi alas chaʼan taqʼuin

¿Am ba i wocolel cheʼ mi lac chaʼlen alas chaʼan taqʼuin?

MUʼ BɅ I YɅL JIÑI LAC PIʼɅLOB.

Jiñi lac piʼʌlob miʼ ñaʼtañob chaʼan jiñi alas chaʼan taqʼuin maʼañic i wocolel miʼ maʼañic woliʼ ñusʌntel ti pʼis jiñi i mandar yumʌlob. An alas tac chaʼan lotería chajpʌbil bʌ i chaʼan jiñi yumʌl, i jiñi taqʼuin muʼ bʌ i tajtʌl miʼ cʼʌjñel chaʼan miʼ coltʌntel lac piʼʌlob.

MUʼ BɅ I YɅL JIÑI BIBLIA.

Jiñi Biblia maʼañic miʼ jamʌ taj ti tʼan chaʼan jiñi alas chaʼan taqʼuin. Pero mucʼʌch i yʌqʼueñonla ticʼojel tac muʼ bʌ i coltañonla lac ñaʼtan chaʼan bajcheʼ yilal miʼ qʼuel Dios.

Jiñi alas chaʼan taqʼuin chaʼan jach miʼ chilben i taqʼuin muʼ bʌ i sʌt yambʌ, i jiñi maʼañic miʼ taj i bʌ yicʼot tsaʼ bʌ i yʌlʌ Jesús: «Cʌntan laʼ bʌ chaʼan maʼañic mi laʼ mulan laʼ chaʼañin i chubʌʼan yambʌ» (Lucas 12:15). Tiʼ sujm, jiñi quixtañujob miʼ chaʼleñob alas come miʼ mulʌbeñob i chubʌʼan yañoʼ bʌ. Anquese mucʼʌch i yʌjlel bajcheʼ cʼamel miʼ mejlel a taj jiñi taqʼuin, wocolʌch chaʼan miʼ mʌjlel a chaʼan. Come jiñi quixtañujob yomob sujtel ti rico, jin chaʼan cabʌl taqʼuin miʼ yotsañob yaʼ baqui miʼ yujtel jiñi alas chaʼan taqʼuin. Jiñi alas chaʼan taqʼuin maʼañic miʼ coltan jiñi lac piʼʌlob come woli jach i yʌcʼ chaʼan miʼ bej mulañob taqʼuin.

Cheʼ jaʼel mucʼ jach i yʌcʼ chaʼan mi lac bajñel ñaʼtan lac bʌ. Pero jiñi Biblia miʼ subeñonla chaʼan «maʼañic majqui yom miʼ bajñel sʌclan i wenlel, laʼ i sʌclʌben i wenlel yambʌlob» (1 Corintios 10:24). Ti jiñi mandar tsaʼ bʌ aqʼuenti Moisés, an jumpʼejl muʼ bʌ i yʌl: «Mach a mulʌben [...] a piʼʌl, chuqui tac an i chaʼan» (Éxodo 20:17). Cheʼ bʌ juntiquil lac piʼʌl yomʌch i mʌl jiñi alas, yom chaʼan jiñi yañoʼ bʌ miʼ sʌt i taqʼuin chaʼan miʼ chʼʌm.

Jiñi Biblia miʼ ticʼonla chaʼan mach yomic mi lac ñaʼtan chaʼan jiñi suerte an i pʼʌtʌlel chaʼan miʼ yʌqʼueñonla lac chubʌʼan tac. Ti wajali, an israelitajob maʼañic bʌ tsiʼ ñopoyob tiʼ tojlel Dios i tsaʼ caji i chʼujutesañob diosob muʼ bʌ i poj aqʼueñob suerte. ¿Bajcheʼ yilal tsiʼ qʼuele Dios jiñi? Tsiʼ yʌlʌ: «Tsaʼ laʼ mele jontolil tiʼ tojel c wut. Tsaʼ laʼ yajca chuqui tac tsʼaʼlebil c chaʼan» (Isaías 65:​11, 12).

I sujmʌch chaʼan an país tac baqui jiñi yumʌlob miʼ cʼʌñob jiñi taqʼuin muʼ bʌ i tajob cheʼ miʼ melob alas chaʼan miʼ cʼʌñob ti programa tac muʼ bʌ i coltan jiñi lac piʼʌlob o jiñi tejclum tac. Pero jiñi taqʼuin mach weñic baqui tsaʼ tili come tsaʼ jach i lajal chilbeyob i bʌ jiñi quixtañujob tiʼ caj jiñi alas chaʼan taqʼuin yicʼot tiʼ caj miʼ mulañob chuqui an i chaʼan yambʌ.

«Mach a mulʌben [...] a piʼʌl, chuqui tac an i chaʼan» (Éxodo 20:17).

¿Chuqui ti wocol miʼ tajob jiñi quixtañujob chaʼan jiñi alas?

MUʼ BɅ I YɅL JIÑI BIBLIA.

Jiñi Biblia miʼ subeñonla chaʼan «jiñi yomoʼ bʌ sujtel ti rico miʼ yajlelob ti mulil, ti yac tac yicʼot tiʼ mulʌntel chuqui bajñel yomob mach bʌ añic i cʼʌjñibal i muʼ bʌ i mejlel i ticʼlañob, iliyi miʼ yʌqʼueñob wocol yicʼot chʌmel» (1 Timoteo 6:⁠9). Jiñi i wen mulʌntel chubʌʼañʌl jiñʌch muʼ bʌ i yʌcʼ chaʼan juntiquil lac piʼʌl miʼ chaʼlen alas chaʼan taqʼuin, pero jiñi Biblia miʼ yʌl chaʼan iliyi miʼ yʌcʼ cabʌl wocol (Efesios 5:⁠3).

Jiñi alas miʼ yʌcʼ chaʼan mach wocolic mi lac taj taqʼuin, pero mucʼ jach i yʌcʼ chaʼan mi lac ñumen «mulan taqʼuin». Jiñi Biblia miʼ yʌl chaʼan ili cʼuxbiya «jiñʌch i wiʼ pejtelel chuqui mach weñic». I cʌlʌx mulʌntel taqʼuin miʼ mejlel i yʌqʼueñonla wocol. Tajol miʼ yʌcʼ chaʼan mi lac wen cʼojoʼtan lac bʌ yicʼot chaʼan mi laj cʌy i chaʼan tac bʌ Dios. Jiñi Tsʼijbujel miʼ subeñonla chaʼan jiñi tsaʼ bʌ i cʌlʌx mulayob chubʌʼan tac «tsiʼ tajayob cabʌl wocol» (1 Timoteo 6:10).

Cheʼ bʌ maʼ wen mulan chuqui tac an, mach tijicñayetic yicʼot jiñi an tac bʌ a chaʼan. Eclesiastés 5:10 miʼ yʌl: «Jiñi am bʌ i woʼlel chaʼan taqʼuin maʼañic mi caj i jastiyel ti taqʼuin. Mach a lon ñaʼtan a taj i tijicñʌyel a pusicʼal ti cabʌl a chubʌʼan».

Cabʌl lac piʼʌlob muʼ bʌ i chaʼleñob alas chaʼan taqʼuin maʼañix miʼ mejlel i cʌyob. Ti Estados Unidos yonlel lac piʼʌlob muʼ bʌ i melob iliyi.

Proverbios 20:21 miʼ pʌsbeñonla chaʼan jiñi muʼ bʌ i cʌlʌx mulañob taqʼuin tajol miʼ mejlelob ti sujtel ti rico, pero mach yicʼotic i bendición Dios. Cheʼ jaʼel, jiñi muʼ bʌ i wen mulan jiñi alas chaʼan taqʼuin miʼ mejlel i yotsan cabʌl i bet, miʼ mejlel i sʌt i yamigojob, i yeʼtel yicʼot i familia. Cheʼ mi lac jacʼ jiñi ticʼojel tac am bʌ ti Biblia miʼ coltañonla chaʼan maʼañic mi lac taj wocol tiʼ caj jiñi alas chaʼan taqʼuin.

«Jiñi yomoʼ bʌ sujtel ti rico miʼ yajlelob ti mulil, ti yac tac yicʼot tiʼ mulʌntel chuqui bajñel yomob mach bʌ añic i cʼʌjñibal i muʼ bʌ i mejlel i ticʼlañob, iliyi miʼ yʌqʼueñob wocol yicʼot chʌmel» (1 Timoteo 6:9).