5. Chaʼlenla wem bɅ tʼan laʼ wicʼot laʼ walobilob

¿CHUQUI YOM I YɅL?

Cheʼ bʌ jiñi tatʌlob miʼ chaʼleñob wem bʌ tʼan yicʼot i yalobilob miʼ subeñob i bʌ chuqui miʼ ñaʼtañob yicʼot bajcheʼ yubil miʼ yubiñob i bʌ.

¿CHUCOCH ÑUC I CʼɅJÑIBAL?

Tajol wocolʌch maʼ wubin chaʼan maʼ chaʼlen tʼan a wicʼot a walobil wolix bʌ i colel majlel. Cheʼ bʌ alʌlobto muʼto i laj subeñetob, pero cheʼ tsaʼix i tajayob i colel maʼañix miʼ wen chaʼleñob tʼan, maʼañix miʼ subeñetob chuqui miʼ ñaʼtañob yicʼot bajcheʼ yubil miʼ yubiñob i bʌ. Lajal bajcheʼ waʼalet tiʼ tiʼ colem jaʼ i jiñi a walobil waʼal tiʼ junwejlel. Pero baqui ora yom maʼ ñumen chaʼlen tʼan a wicʼot a walobil jiñʌch cheʼ wolix i taj majlel i colel.

¿CHUQUI MIʼ MEJLEL A MEL?

Ñʌchʼtañob cheʼ yomob tʼan. Cheʼʌch yom mi laʼ mel anquese wen acʼʌlelix woliyetla ti tʼan laʼ wicʼotob.

«An i tajol la com la cʌl: ‹¡Jumpʼejl qʼuin wʌʼañon quicʼotet, i ¿a womto tʼan?!›. Pero, ¿yom ba maʼ wʌl jiñi cheʼ bʌ jiñi a walobil yom i jambeñet i pusicʼal? ¿Mach ba jiñic la com cheʼ jiñi la calobilob miʼ subeñonla bajcheʼ yubil miʼ yubiñob i bʌ?» (Lisa).

«Mic mulan wʌyel ti seb, pero an c ñumen chaʼle tʼan ti wen quicʼot calobilob cheʼ yojlilix acʼʌlel» (Albert).

PRINCIPIO AM BɅ TI BIBLIA: «Maʼañic majqui yom miʼ bajñel sʌclan i wenlel, laʼ i sʌclʌben i wenlel yambʌlob» (1 Corintios 10:24).

Xucʼchocon a pensar. Juntiquil tatʌl miʼ yʌl: «An i tajol, cheʼ bʌ jiñi calobilob woliʼ pejcañoñob, yambʌ baqui mic choc majlel c pensar. I mucʼʌch i cʌñob».

Mi cheʼ an ujtemet jaʼel bajcheʼ iliyi, yʌpʌ jiñi a televisión o cʌyʌ jiñi a celular o yan tac bʌ. Wen ñʌchʼtan woli bʌ i subeñet jiñi a walobil, cheʼ bajcheʼ jiñi, mi caj a pʌsben chaʼan a wentajʌch muʼ bʌ i pensarin anquese mach wen ñuquic yilal.

«Ñucʌch i cʼʌjñibal cheʼ mi lac subeñob jiñi la calobilob chaʼan lac wentajʌch bajcheʼ yubil miʼ yubiñob i bʌ. Mi maʼañic, maʼañic chuqui mi caj i subeñoñobla o yambʌ baqui mi caj i sʌclañob i coltʌntel» (María).

«Mach ti orajic yom maʼ michʼan, anquese jiñi a walobil miʼ yʌl chuqui mach bʌ weñic» (Anthony).

PRINCIPIO AM BɅ TI BIBLIA: «Wen qʼuelela bajcheʼ mi laʼ ñʌchʼtan» (Lucas 8:18).

Chaʼlenla tʼan baqui jach añetla. An i tajol, jiñi xcolelob miʼ mulañob i chaʼleñob tʼan yicʼot i tat i ñaʼob cheʼ tijicña baqui añob.

«Joñon lojon mic chaʼlen lon tʼan cheʼ an baqui añon lojon. Cheʼ lajal buchulon lojon ñumen wen an c chaʼle lojon tʼan» (Nadya).

Cheʼ bʌ mi laʼ cʼux laʼ waj wem bʌ i yorajlel jaʼel chaʼan mi laʼ chaʼlen tʼan.

«Cheʼ bʌ mij cʼux lon c waj ti icʼan, mij cʌleʼ lojon chuqui wem bʌ tsaʼ lon c ñusa yicʼot mach bʌ weñic cheʼ ti qʼuiñil. Cheʼ mi lon c mel iliyi miʼ temon lojon yicʼot miʼ cʼajtesʌbeñon lojon chaʼan mach lon c bajñelic jach yom mi lon c mʌlben jiñi wocol» (Robin).

PRINCIPIO AM BɅ TI BIBLIA: «Yom chajpʌbiletla chaʼan mi laʼ ñʌchʼtan tʼan, pero mach ti orajic yom mi laʼ jacʼ» (Santiago 1:19).