8. AcʼɅla jiñi ejemplo

¿CHUQUI YOM I YɅL?

Mi an chuqui mi la cʌl cheʼʌch yom mi lac mel jaʼel. Juntiquil tatʌl mach yomic miʼ cʼajtiben i yalobil chaʼan maʼañic miʼ chaʼlen lot mi an i tajol miʼ suben chaʼan miʼ sub chaʼan mach yaʼic an tiʼ yotot cheʼ bʌ yaʼʌch añi.

«Cabʌl miʼ yʌlob: ‹Mele chuqui mic subeñet mach jiñic muʼ bʌ c mel›, pero iliyi maʼañic miʼ cʼʌjñibʌyel tiʼ tojlel la calobilob. Pejtelel chuqui mi la cʌl yicʼot mi lac mel jiñʌch muʼ bʌ i cʌñob jaʼel. Mi an chuqui mi lac subeñob i yambʌ chuqui mi lac mel, mi caj i qʼuelob i mi caj i chaʼ subeñoñobla» (David).

PRINCIPIO AM BɅ TI BIBLIA: «Jatet muʼ bʌ a sub: ‹Mach a chaʼlen xujchʼ›, ¿maʼ chaʼlen xujchʼ?» (Romanos 2:21).

¿CHUCOCH ÑUC I CʼɅJÑIBAL?

Jiñi laʼ walobilob ñumen miʼ cʌñob ti laʼ tojlel cheʼ bajcheʼ jiñi i piʼʌlob ti clase, ñumento cheʼ bʌ xcolelobto. Ili yom i yʌl, chaʼan jatetla muʼ bʌ mejlel laʼ ñumen pʌsben jiñi wem bʌ bij, pero tiʼ pejtelel ora cheʼʌch yom mi laʼ mel cheʼ bajcheʼ mi laʼ wʌl.

«An i tajol an chuqui miʼ mejlel lac wen subeñob jiñi la calobilob i mach la cujilic mi wolʌch i ñʌchʼtañoñobla, pero cheʼ bʌ miʼ qʼuelob chaʼan maʼañic mi lac mel cheʼ bajcheʼ mi la cʌl, mi caj i chaʼ subeñoñobla ti lac wut. Miʼ wen qʼuelob pejtelel chuqui mi lac mel anquese mach cheʼic yilal» (Nadya).

PRINCIPIO AM BɅ TI BIBLIA: «Jiñi ñaʼtʌbalʌl tilem bʌ ti panchan [...] cheʼʌch miʼ pʌs i bʌ bajcheʼ ñoj yilal» (Santiago 3:17).

¿CHUQUI MIʼ MEJLEL A MEL?

Cʼajtiben a bʌ: «¿Bajcheʼ yilalon tiʼ tojlel quijñam o c ñoxiʼal yicʼot calobilob? ¿Chuqui mij qʼuel ti televisión? ¿Majqui jiñi camigojob? ¿Muʼ ba c ñaʼtan jiñi yambʌlob?». Ti yambʌ tʼan, ¿a wom ba chaʼan jiñi a walobilob cheʼ miʼ sujtelob bajcheʼ jatet?

«Joñon quicʼot c ñoxiʼal maʼañic mij cʼajtibeñob jiñi lon calobilob chaʼan miʼ melob chuqui maʼañic bʌ mi lon c mel jaʼel» (Christine).

Cʼajtin i ñusʌntel a mul. Jiñi a walobilob yujilobix chaʼan xmuliletla. Jin chaʼan, mi mucʼʌch a cʼajtiben jiñi a piʼʌl o a walobilob chaʼan miʼ ñusʌbeñet a mul cheʼ bʌ an chuqui maʼ mel, woli a pʌsbeñob wen ñuc bʌ i cʼʌjñibal, chaʼan yom miʼ melob chuqui wen yicʼot miʼ pʌsob i pecʼlel.

«Yom mi la cʌl chuqui mach bʌ weñic tsaʼ lac mele i mi laj cʼajtin chaʼan mi lac ñusʌbentel, mi mach cheʼic mi lac mel maʼañic mi caj i cʌñob i mel jaʼel jiñi la calobilob» (Robin).