I yochib tʼan

ILIYI jiñʌch jumpʼejl libro muʼ bʌ i subeñonla cʌntesʌntel tsaʼʌch bʌ ujti wajali. Tsaʼ locʼsʌnti yaʼ ti libro ñumen cʌmbil bʌ ti Pañimil, jini Biblia. Jini libro miʼ cʌntesañonla chuqui tsaʼ bʌ ujti wajali ila ti pañimil, miʼ tech i yʌl cheʼ bʌ Dios tsiʼ teche i melbal cʼʌlʌl wʌle ora. Cheʼ to jaʼel miʼ cʌntesañonla chuqui muʼ bʌ i wʌn al Dios chaʼan mi caj i mel ti talto bʌ qʼuin.

Ili libro miʼ pam subeñonla chuqui miʼ chʼʌm tilel jini Biblia. Yicʼot miʼ subeñonla chuqui tsiʼ meleyob jini winicob xʼixicob muʼ bʌ i yʌjlel yaʼ ti Biblia yicʼot chuqui tsiʼ meleyob. Cheʼ jaʼel miʼ pʌs jini ñuc bʌ pijtaya aqʼuebil bʌ i chaʼan Dios jini winicob xʼixicob muʼ bʌ caj i chumtʌlob ti pejtelel ora ila ti Pañimil cheʼ ba ora miʼ sujtel ti jumpʼejl paraíso.

An wʌclujumpʼejl yicʼot wʌccʼal (116) cʌntesʌntel tac ila ti libro. Tʼoxbil tac ti waxʌcpʼejl parte. Ti jujumpʼejl parte yaʼ ti ñaxam bʌ iyopol miʼ yʌl chuqui miʼ chʼʌm tilel. Jini cʌntesʌntel tac tsaʼ tsʼijbunti cheʼ bajcheʼ tsaʼ ujti tilel tiʼ yorajlel. Ili miʼ coltañet a chʼʌmben isujm baqui ora tsaʼ ujti jujumpʼejl cʌntesʌntel.

Tsaʼ cʼʌjñi tʼan tac mach bʌ wocolic chaʼan miʼ tsʼijbuntel jini cʌntesʌntel. Yonlel alʌ chʼitoñob yicʼot alʌ xchʼocob mi ca mejlel i bajñel pejcañob. Jini tatʌlob mi caj i qʼuelob chaʼan wen tijicñayob i yalobilob cheʼ jaysujtelic miʼ pejcʌbentelob jini cʌntesʌntel tac. Mi caj i qʼuejlel chaʼan ili libro miʼ chʼʌm tilel ñuc tac bʌ cʌntesʌntel, chaʼan xcolelob yicʼot añobix bʌ i jabilel.

Jini texto tac yaʼ mi caj a taj tiʼ yujtibal jujumpʼejl cʌntesʌntel. Yom maʼ poj pejcan jini texto tac baqui chucbil jini cʌntesʌntel tac. Cheʼ bʌ tsaʼix ujti a pejcan jumpʼejl cʌntesʌntel, yom maʼ qʼuel jaʼel jini cʼajtiya tac yaʼ bʌ maʼ taj tiʼ yujtibal jini cʌntesʌntel 116 yicʼot yom maʼ cʼajtesʌben i jacʼbal.