Tsa’ bʌ mejli ti’ cajibal c’ʌlʌl che’ ti i yorajlel But’ja’

¿Baqui tsaʼ tili jini panchan yicʼot Pañimil? ¿Bajcheʼ tsaʼ mejli jini Qʼuin, jini Uw yicʼot ecʼ tac, yicʼot cheʼ bajcheʼ yan tac bʌ am bʌ ti Pañimil? Jini Biblia miʼ sub tiʼ sujmlel cheʼ mi yʌl chaʼan Dios tsiʼ laj mele chuqui tac an. Jini chaʼan jini lac libro miʼ tech i yʌl tsaʼ bʌ ujti cheʼ tiʼ cajibal i melbal Dios.

Mi laj cʌn jini ñaxam bʌ i melbal Dios jiñobʌch espíritujob lajal bʌ bajcheʼ yicʼot. Jiñobʌch ángelob. Pero jini Pañimil tsaʼ mejli chaʼan winicob xʼixicob cheʼ bajcheʼ joñonla. Jini chaʼan Dios tsiʼ mele jini winic yicʼot xʼixic i cʼabaʼ Adán yicʼot Eva i tsaʼ yʌcʼʌ ti tʼojol jax bʌ pʌcʼʌbʌl. Pero tsiʼ ñusʌbeyob i tʼan Dios i tsiʼ sʌtʌyob jini añoʼ bʌ tiʼ wenta chaʼan chʌn cuxul mi yajñelob.

Tiʼ tsijquel, miʼ tejchel cheʼ tsaʼ mejli Adán cʼʌlʌl cheʼ ti i yorajlel ñuc bʌ Butʼjaʼ tsaʼ ñumi 1,656 jabil. Cheʼ bʌ ora jini tsaʼ chumleyob yonlel jontol bʌ winicob xʼixicob. Yaʼ ti panchan tsaʼ chumleyob espíritujob mach bʌ anic mi lac taj laj qʼuelob, Satanás yicʼot jontol bʌ i yángelob. Ila ti Pañimil, tsaʼ ajni Caín yicʼot yonlel jontol bʌ winicob xʼixicob, yicʼot jaʼel winicob mach bʌ ñʌmʌlic ti qʼuejlel chaʼan wen pʼʌtʌlob. Pero añob jaʼel weñoʼ bʌ winicob xʼixicob tsaʼ ajñiyob ila ti Pañimil... Abel, Enoc yicʼot Noé. Ila ti PARTE 1 mi caj lac pejcan chaʼan tiʼ tojlelob ili winicob xʼixicob yicʼot tsaʼ bʌ ujti.