Dios tsiʼ teche i melbal

PEJTELEL chuqui tac wen tilem ti Dios. Jiñʌch tsaʼ bʌ i mele jini Qʼuin chaʼan mi yʌqʼueñonla i cʼʌcʼal ti qʼuinil, yicʼot jini Uw yicʼot jini ecʼ tac chaʼan miʼ tsʼitaʼ aqʼueñonla i cʼʌcʼal cheʼ ti acʼʌlel. Jini Pañimil chaʼañʌch mi lac chumtan.

Pero jini Qʼuin, jini Uw, jini ecʼ tac yicʼot jini Pañimil mach jinic ñaxam bʌ tsiʼ mele Dios. ¿Awujil ba baqui bʌ? Jiñʌch lajal bʌ bajcheʼ yicʼot. Iliyobi maʼanic miʼ mejlel laj qʼuelob, cheʼ bajcheʼ Dios maʼanic miʼ mejlel laj qʼuel. Jini Biblia miʼ suben ángelob. Dios tsiʼ mele jini ángelob chaʼan miʼ chumtʌlob yicʼot yaʼ ti panchan.

Jini ñaxam bʌ ángel tsiʼ mele Dios ñumen ñuc cheʼ bajcheʼ tiʼ pejtelel ángelob. Jiñʌch ñaxam bʌ i Yalobil Dios, tsiʼ chaʼle eʼtel yicʼot i Tat. Tsiʼ colta Dios i mel tiʼ pejtelel chuqui tac an. Tsiʼ colta i mel jini Qʼuin, jini Uw, jini ecʼ tac yicʼot jaʼel jini Pañimil.

¿Bajcheʼ yilal jini Pañimil cheʼ bʌ ora jini? Tiʼ cajibal maʼanic majqui miʼ mejlel ti chumtʌl ila ti Pañimil. Cojach an jini colem ñajb mosbil bʌ i chaʼan tiʼ pejtelel. Pero Dios yom tsiʼ yʌlʌ chaʼan ila ti Pañimil miʼ chumtʌl winicob xʼixicob. Jini chaʼan, tsaʼ caji i chajpʌbeñonla. ¿Chuqui tsiʼ mele?

Weno, ti ñaxan yom an i sʌclel lum ila ti Pañimil. Jini chaʼan Dios tsiʼ mele jini Qʼuin chaʼan mi yʌcʼ i cʼʌcʼal ila ti Pañimil. Tsiʼ mele iliyi chaʼan mi yajñel acʼʌlel yicʼot qʼuinil. Ti wiʼil tsiʼ mele chaʼan jini lum miʼ yajñel tiʼ pam jini colem ñajb.

Ti ñaxan maʼanic chuqui wis an ila ti Pañimil. Lajal cheʼ bajcheʼ maʼ qʼuel ila tiʼ dibujolel. Maʼanic nichim mi teʼel mi anic añimal tac. Maʼanic i chʌyil jini colem ñajb tac. Cheʼ bʌ ora jini, Dios wen cabʌl chuqui yom miʼ mel chaʼan jini añimal tac yicʼot winicob xʼixicob wen mi chumtʌlob ila ti Pañimil.