Dios miʼ mel panchan yicʼot Lum

Jehová jiñʌch tsiʼ Meleyonla (Pʌtʌyonla). Jiñʌch tsiʼ laj mele chuqui an, jiñi muʼ bʌ laj qʼuel yicʼot jiñi maʼañic bʌ. Cheʼ bʌ maxto i luʼ mele jiñi muʼ bʌ laj qʼuel, tsiʼ mele yonlel ángelob. ¿A wujil ba majqui jiñi ángelob? Jiñʌch muʼ bʌ i melbeñob i yeʼtel (troñel) Jehová i lʌcʼʌ lajal yicʼotob. Maʼañic miʼ mejlel laj qʼuel Jehová mi jiñic to jiñi ángelob. Jiñi ángel tsaʼ bʌ i ñaxam mele Jehová tsaʼ sujti ti xcoltaya i chaʼan. Ili ángel tsiʼ colta Jehová chaʼan miʼ mel ecʼ, planeta yicʼot yan tac bʌ. Chumulonla ti jumpʼejl planeta i jiñʌch ili cʼoʼtajax bʌ Lum.

Ti wiʼil, Jehová tsiʼ chajpa ili lum chaʼan miʼ chumtʌl añimal tac yicʼot wiñicob xʼixicob (quixtañujob). Tsiʼ mele jiñi qʼuin chaʼan miʼ tsʼʌjyel tiʼ petol pañimil. Tsiʼ mele jaʼel wits, mar yicʼot colem jaʼ.

¿I cheʼ jiñi? Jehová tsiʼ yʌlʌ: «Mi caj cʌcʼ ti pasel jam, pimel yicʼot teʼ tac». Tsaʼ caji ti colel wut teʼ tac yicʼot ñich teʼ tac. Jehová tsiʼ mele jaʼel añimal tac muʼ bʌ ti wejlel, muʼ bʌ ti ñuxijel yicʼot jiñi jexecña bʌ ti lum. Tsiʼ mele chut tac bʌ añimal, cheʼ bajcheʼ jiñi xtʼul, yicʼot jiñi colem tac bʌ, cheʼ bajcheʼ jiñi tsimin. ¿Baqui bʌ añimal maʼ ñumen mulan?

Cheʼ jiñi, Jehová tiʼ sube jiñi ñaxam bʌ ángel: «Laʼ lac pʌt jiñi wiñic». Mach lajalic miʼ cajel jiñi quixtañujob bajcheʼ jiñi añimal tac. Mi caj i mejlel i pʌtob chuqui yomob, mi caj i mejlelob ti tʼan, ti tseʼñal yicʼot i pejcañob Dios. Mi caj i cʌntañob jiñi pañimil yicʼot jiñi añimal tac. ¿A wujil ba majqui jiñi ñaxam bʌ wiñic? Laʼ laj qʼuel.