Cʌntesʌntel 2

I tʼojol jax bʌ jumpʼejl pʌcʼʌbʌl

¡Q’UELE awilan jini Pañimil! ¡I tʼojol jax tiʼ pejtelel! Qʼuele jini pimel yicʼot jini teʼel, jini nichim tac yicʼot pejtelel añimal tac. ¿Muʼ ba a qʼuel baqui tac an jini tsimin yicʼot jini bajlum tac?

¿Baqui tsaʼ loqʼui tilel ili tʼojol jax bʌ pʌcʼʌbʌl? Weno, laʼ laj qʼuel bajcheʼ Dios tsiʼ chajpʌbeyonla jini Pañimil.

Cheʼ ti ñaxan, Dios tsiʼ mele yax bʌ pimel chaʼan miʼ mos jini lum. Cheʼ jaʼel tsiʼ mele ti chajp ti chajp bʌ yalob pimel tac yicʼot yalob teʼ yicʼot teʼel tac. Ili muʼ bʌ i pasel tac ñumen i tʼojol jax miʼ mel jini Pañimil. Pero anto yambʌ chuqui miʼ mel. Yicʼot jaʼel cabʌl muʼ bʌ yʌqʼueñonla sumuc tac bʌ bʌlñʌcʼʌl.

Ti wiʼil Dios tsiʼ mele jini chʌy tac chaʼan mi yajñel ti jaʼ yicʼot xteʼlemut chaʼan miʼ chaʼlen wejlel ti chan. Tsiʼ mele tac tsʼiʼ yicʼot mis tac yicʼot caballo tac; colem bʌ añimal tac yicʼot chʼoʼchʼoc tac bʌ. ¿Am ba añimal tac lʌcʼʌl bʌ an baʼ chumulet? ¡Cʼax utsʼatʌch Dios chaʼan tsiʼ chajpʌbeyonla pejtelel jini!

Ti yujtibal, Dios tsiʼ mele jumpʼejl parte qʼuexel bʌ ila ti Pañimil. Tsiʼ yotsʌbe i cʼabaʼ pʌcʼʌbʌl Edén. Laj wen melbil. I tʼojol jax tiʼ pejtelel. Dios yom tsiʼ yʌlʌ chaʼan tiʼ pejtelel jini Pañimil miʼ sujtel cheʼ bajcheʼ tsiʼ mele ili i tʼojol jax bʌ pʌcʼʌbʌl.

Pero chaʼ qʼuele jini i dibujolel. ¿Awujil ba chuqui to yom tsiʼ qʼuele Dios ila ti pʌcʼʌbʌl? Laʼ laj qʼuel.

Génesis 1:11-25; 2:8, 9.