Cʌntesʌntel 32

Lujunchajp bʌ wocol

Q’UELE cu jini joy mʌcʌl tac bʌ. Ti jujunchajp miʼ pʌs ti jujumpʼejl wocol tsaʼ bʌ i choco majlel Jioba yaʼ ti Egipto. Ti ñaxam bʌ maʼ qʼuel jiñʌch Aarón woli i jatsʼ yicʼot i teʼ jini colem jaʼ i cʼabaʼ Nilo. Cheʼ jini i yaʼlel jini colem jaʼ tsaʼ pʌntiyi ti chʼichʼ, i chʌyil jini colem jaʼ tsaʼ chʌmi tac, i tsaʼ caji ti tuwʼan jini colem jaʼ.

Ti wiʼil, Jioba tsiʼ locʼsa xpequejc yaʼ ti colem jaʼ Nilo. Tsaʼ ochi tac ti horno, yicʼot baʼ miʼ xʌjqʼuel tac waj, ti wʌyibʌl tac, i baqui jach tac. Cheʼ bʌ ora tsaʼ chʌmi jini xpequejc, jini egiptojob tsiʼ muchʼquiyob jini xpequejc, jini tejclum tsaʼ wen tuwʼa.

Cheʼ jini Aarón tsiʼ jatsʼʌ jini lum yicʼot i teʼ, jini tsʼubejn tac tsaʼ sujti ti us, yalob us tac mucʼ bʌ ti wejlel yicʼot mucʼ bʌ ti cʼux. Iliyi jiñʌch i yuxchajplel bʌ wocol.

Jini yan tac bʌ wocol jiñob jach egiptojob tsiʼ ticʼlayob, i mach jinic Israel. I chʌnchajplel jiñʌch colem tac bʌ jaj tsaʼ bʌ ochiyob tiʼ pejtelel i yototob jini egiptojob. Jini i joʼchajplel bʌ wocol tsiʼ ticʼla jini alʌcʼʌl tac. Jini yonlel bʌ wacax tac, tiñʌmeʼ tac yicʼot chivo tac i familia jini egiptojob tsaʼ laj chʌmi.

Ti wiʼil Moisés yicʼot Aarón tsiʼ wejtuyob tan ti icʼ, tsaʼ bʌ i yʌqʼueyob i tsoy jini winicob xʼixicob yicʼot jini alʌcʼʌl tac. Iliyi jiñʌch i wʌcchajplel bʌ wocol.

Cheʼ tsaʼ ñumi jini, Moisés tsiʼ letsa i cʼʌb ti panchan, Jioba tsiʼ choco tilel chajc yicʼot tuñijaʼ. Jiñʌch ñumen tsʌts bʌ tuñijaʼ tsiʼ yila Egipto.

Jini i waxʌcchajplel bʌ wocol jiñʌch bajcʼʌl motocña bʌ sajcʼ. Maʼanic baʼ wis ujtem bajcheʼ jini, mi anic chaʼ ujtem yambʌ, cheʼ an cabʌl sajcʼ. Tsiʼ laj cʼuxuyob ti pejtelel jini mach bʌ anic tsiʼ jisa jini tuñijaʼ.

Jini i bolonchajplel bʌ wocol jiñʌch cheʼ tsaʼ icʼa pañimil. Uxpʼejl qʼuin tsaʼ icʼa pañimil yaʼ baqui an jini tejclum, pero an i sʌclel pañimil yaʼ baqui chumulob jini israelob.

Cheʼ ti cojix bʌ wocol, Dios tsiʼ sube i tejclum chaʼan miʼ bonbeñob i chumtelel i tiʼ i yotot ti chʼichʼel alʌ tat tiñʌmeʼ o alʌ tat chivo. Cheʼ jini i yángel Dios tsaʼ ñumi yaʼ ti Egipto. Cheʼ bʌ jini ángel mi qʼuel jini chʼichʼ, maʼanic majqui miʼ tsʌnsan ti jini otot. Pero cheʼ maʼanic miʼ qʼuel jini chʼichʼ, miʼ tsʌnsan jini ñaxam bʌ i yalobil jini winic yicʼot cheʼ bajcheʼ jini alʌcʼʌl tac. Iliyi jiñʌch i lujunchajplel bʌ wocol.

Cheʼ bʌ tsaʼ ñumi jini cojix bʌ wocol, Faraón tsiʼ choco majlel jini israelob, come chajpʌbilobix jini jach bʌ acʼʌlel tsaʼ cajiyob ti loqʼuel majlel yaʼ ti Egipto.

Éxodo, capítulo 7 cʼʌlʌl ti 12.