Cʌntesʌntel 39
Jini i barateʼ Aarón mi yʌcʼ i nich
Q’UELE jini nichim tac yicʼot cʼʌñix bʌ i wut almendra woli bʌ i colel ti ili barateʼ. Jiñʌch i barateʼ Aarón. ¡Ili i nich tac yicʼot ili cʼʌñix bʌ i wut teʼ tsaʼ coli ti jumpʼejl jach acʼʌlel! Laʼ laj qʼuel chucoch.
Jini israelob cabʌl qʼuin tsiʼ chaʼleyob xʌmbal ñumel yaʼ ti i tiquiñal lum. Lamital maʼanic tsiʼ ñopoyob chaʼan jini Moisés mi yochel ti am bʌ i yeʼtel, mi jinicto chaʼan mi yochel ti ñuc bʌ motomaj jini Aarón. Coré jiñʌch juntiquil cheʼ bʌ miʼ ñaʼtan bajcheʼ jini, yicʼot jaʼel Datán, Abiram yicʼot jini lujuncʼajl yicʼot lujuntiquil i yuxcʼal (250) winicob añoʼ bʌ i yeʼtel. Ti pejtelel iliyobi tsaʼ tiliyob baʼan Moisés yicʼot tsiʼ subeyob: ‹¿Chucoch jatet maʼ wʌcʼ a bʌ ti ñaxan tic tojlel lojon?›.
Moisés tsiʼ sube Coré yicʼot woli bʌ i tsajcañob: ‹Ti yijcʼʌlal cheʼ ti sʌcʼan chʼʌmʌla jini yajñib pom yicʼot mi laʼ wotsʌben pom tiʼ mal. Cheʼ jini yom mi laʼ tilel ila ti tabernáculo i chaʼan Jioba. Chaʼan mi laj qʼuel majqui miʼ yajcan›.
Ti yijcʼʌlal Coré yicʼot jini lujuncʼal yicʼot lujuntiquil i yuxcʼal (250) i winicob tsaʼ tiliyob baʼan jini tabernáculo. Yonlel yañoʼ bʌ tsaʼ tiliyob chaʼan miʼ coltañob. Jioba wen michʼ. ‹Ñajtʼesan laʼ bʌ yaʼ ti pisil bʌ i yototob ili jontoloʼ bʌ winicob›, cheʼen Moisés. ‹Mach yomic mi laʼ wis chʼʌm chuqui añob i chaʼan.› Jini winicob xʼixicob tsiʼ jacʼʌyob, tsiʼ ñajtʼesayob i bʌ yaʼ ti pisil bʌ i yototob Coré, Datán yicʼot Abiram.
Cheʼ jini Moisés tsiʼ yʌlʌ: ‹Chaʼan ili muʼ bʌ i caj ti ujtel mi caj laʼ ñaʼtan majqui jini yajcʌbil bʌ i chaʼan Jioba. Jini lum mi caj i cal i bʌ chaʼan yaʼ miʼ jubelob majlel jini jontoloʼ bʌ winicob xʼixicob›.
Ti jini jach bʌ ora tsaʼ ujti ti tʼan Moisés, jini lum tsiʼ cala i bʌ. Jini pisil bʌ i yotot yicʼot i chubʌʼan tac Coré, Datán yicʼot Abiram yicʼot yaʼ bʌ an yicʼotob tsaʼ yajliyob ochel, jini lum tsiʼ chaʼ ñupʼu i bʌ. Cheʼ bʌ tsiʼ yubiyob jini winicob xʼixicob i yoñel jini woli bʌ i yajlelob ochel, tsiʼ yʌlʌyob: ‹¡Putsʼenla! ¡Jini lum miʼ mejlel i cal i bʌ i mi lac yajlel ochel jaʼel!›.
Coré yicʼot jini lujuncʼal yicʼot lujuntiquil i yuxcʼal (250) i winicob yaʼto añob ti i tʼejl jini tabernáculo. Jini chaʼan Jioba tsiʼ choco jubel cʼajc, i ti pejtelelob tsaʼ puliyob. Cheʼ jini Jioba tsiʼ sube Eleazar i yalobil Aarón chaʼan miʼ chʼʌmbeñob i yajñib i pom jini tsaʼix bʌ chʌmiyob yicʼot chaʼan miʼ cʼʌñob i mel mach bʌ pimic i tejpʼil jini pulʌntib. I cʼʌjñibal bʌ ili i tejpʼil pulʌntib chaʼañʌch miʼ ñaʼtañob jini israelob chaʼan cojach jini Aarón yicʼot i yalobilob yom mi yochelob ti motomajob i chaʼan Jioba.
Pero Jioba yom i ñumen tsictesan chaʼan jiñʌch Aarón yicʼot i yalobilob yajcʌbil bʌ i chaʼan cheʼ bajcheʼ motomajob. Jini chaʼan tsiʼ sube Moisés: ‹Ti jujuntiquil am bʌ yeʼtel ti jujunmojt chaʼan Israel laʼ i chʼʌmob tilel i barateʼ. Chaʼan jini junmojt levíjob, laʼ i chʼʌm tilel i barateʼ Aarón. Cheʼ jini acʼʌ jini jujumpʼejl barateʼ yaʼ ti tabernáculo tiʼ tojel jini arca chaʼan bʌ trato. I barateʼ jini winic tsaʼ bʌ c waʼchoco ti motomaj mi caj yʌcʼ i nich›.
Cheʼ bʌ Moisés tsiʼ qʼuele ti yijcʼʌlal cheʼ ti sʌcʼan, ¡tiʼ barateʼ Aarón tsaʼ loqʼui ili nichim yicʼot cʼʌñix bʌ i wut tac almendra! ¿Muʼ ba a ñaʼtan wʌle chucoch Jioba tsiʼ mele chaʼan miʼ loqʼuel i nich i barateʼ jini Aarón?
Números 16:1-49; 17:1-11; 26:10.