Cʌntesʌntel 40

Moisés tsiʼ jatsʼʌ jini xajlel

TSAʼ ñumi jabil tac... ¡lujumpʼejl (10) jabil, juncʼal (20) jabil, lujumpʼejl i chaʼcʼal (30) jabil, bolonlujumpʼejl i chaʼcʼal (39) jabil! Jini israelob yaʼto chʌn añob yaʼ ti i tiquiñal lum. Pero tiʼ pejtelel ili jabil Jioba tsiʼ cʌnta i tejclum. Tsiʼ weʼsayob yicʼot maná. Tsiʼ tojʼesayob ti i bijlel cheʼ ti qʼuinil yicʼot jumpʼejl tocal, cheʼ ti acʼʌlel yicʼot cʼajc. Yicʼot maʼanic tsaʼ jiliyob i bujc i pislelob mi tsaʼic lojwiyob i yoc.

Iliyi jiñʌch ñaxam bʌ uw chaʼan jini chaʼcʼal (40) jab cʼʌlʌl cheʼ tsaʼ loqʼuiyob yaʼ ti Egipto. Jini israelob yaʼix chaʼañob yaʼ ti Cades. Wʌʼʌch baqui añob tiʼ pejtelelob jini lajchʌntiquil xyojchʼob tsaʼ bʌ chojquiyob majlel i mucu qʼuelob i lumal Canaán cheʼ lʌcʼʌlix yom chaʼan miʼ tsʼʌctiyel jini chaʼcʼal (40) jabil. Miriam i yijtiʼan Moisés tsaʼ chʌmi yaʼ ti Cades. Cheʼ bajcheʼ ti ñaxan, an wocol ilayi.

Jini winicob xʼixicob maʼanic miʼ tajob jaʼ. Tsaʼ cajiyob ti wulwul tʼan tiʼ tojlel Moisés: ‹Ñumen wen cheʼ tsaʼic chʌmiyonla. ¿Chucoch tsaʼ locʼsayon lojon ti Egipto chaʼan maʼ pʌyon lojon tilel ila ti lum mach bʌ wenic baʼ maʼanic chuqui miʼ colel? Ila maʼanic bʌlñʌcʼʌl tac, mi anic higo tac, mi anic tsʼusub tac, mi anic to granada tac. Mi jinic to jaʼ chaʼan mi lac jap›.

Cheʼ bʌ Moisés yicʼot Aarón tsaʼ majliyob ti oración yaʼ ti tabernáculo, Jioba tsiʼ sube Moisés: ‹Tempan jini winicob xʼixicob. Cheʼ jini, tiʼ tojelob i wut jatsʼʌ jini xajlel yaʼ bʌ an. Yaʼi mi caj i loqʼuel ti on jini jaʼ chaʼan miʼ japob jini winicob xʼixicob yicʼot i yʌlacʼob tac›.

Jini chaʼan Moisés tsiʼ tempa jini winicob xʼixicob, i tsiʼ yʌlʌ: ‹¡Ubinla, winicob xʼixicob mach bʌ anic mi laʼ ñop Dios! ¿Yom ba mic locʼsʌbeñetla jaʼ ti ili xajlel Aarón yicʼot joñon?›. Cheʼ jini, Moisés tsiʼ jatsʼʌ ti chaʼyajl jini xajlel yicʼot juntsʼijt teʼ, tsaʼ caji ti wen loqʼuel jaʼ. An jaʼ chaʼan miʼ japob ti pejtelel jini winicob xʼixicob yicʼot chaʼan jini i yʌlacʼob tac yaʼ bʌ an yicʼotob.

Pero Jioba tsaʼ michʼa yicʼot Moisés yicʼot Aarón. ¿Awujil ba chucoch? come jini Moisés yicʼot Aarón tsiʼ yʌlʌyob chaʼan jiñobʌch muʼ bʌ caj i locʼsañob jaʼ yaʼ ti xajlel. Pero jini tsaʼ bʌ i mele iliyi jiñʌch Jioba. Come jini Moisés yicʼot Aarón maʼanic tsiʼ tsictesayob i sujmlel chaʼan iliyi, Jioba tsiʼ yʌlʌ chaʼan mi caj i tojob i mul. ‹Mach jateticla mi caj laʼ pʌy ochel c tejclum yaʼ ti Canaán›, cheʼen Jioba Dios.

Mach jalic cheʼ bʌ ora jini israelob tsaʼ loqʼuiyob yaʼ ti Cades. Maʼanic tsaʼ wen jalʼayob cheʼ bʌ tsaʼ cʼotiyob yaʼ ti wits i cʼabaʼ Hor. Yaʼ tiʼ chañelal jini wits, Aarón tsaʼ chʌmi. Anix uxpʼejl i wuccʼal (123) i jabilel cheʼ tsaʼ chʌmi. Jini israelob wen chʼijiyemob, lujumpʼejl i chaʼcʼal (30) qʼuin tsiʼ yucʼtayob Aarón. Eleazar i yalobil Aarón jiñʌch tsaʼ bʌ ochi ti jini yambʌ ñuc bʌ motomaj chaʼan jini tejclum Israel.

Números 20:1-13, 22-29; Deuteronomio 29:5.