Cʌntesʌntel 43

Josué tsaʼ waʼchoconti tiʼ yeʼtel

MOISÉS yom ochel yaʼ ti Canaán yicʼot jini israelob. Jini chaʼan tsiʼ yʌlʌ: ‹Jioba, acʼʌyon ti cʼaxel yaʼ ti Jordán jaʼ, chaʼan mij qʼuel jini wem bʌ lum›. Pero Jioba tsiʼ yʌlʌ: ‹¡Jasʌlix! ¡Mach a chʌn alix jini!›. ¿Awujil ba chucoch Jioba cheʼ tsiʼ sube bajcheʼ jini?

Chaʼañʌch jini tsaʼ bʌ ujti cheʼ bʌ Moisés tsiʼ jatsʼʌ jini xajlel. Yom cʼajal a chaʼan: Moisés yicʼot Aarón maʼanic tsiʼ ñuqʼuesayob Jioba. Maʼanic tsiʼ subeyob jini tejclum chaʼan Jioba jiñʌch tsaʼ bʌ i locʼsa jaʼ yaʼ ti xajlel. Jini chaʼan, Jioba tsiʼ subeyob chaʼan maʼanic mi caj i yochelob yaʼ ti Canaán.

Jini chaʼan, cheʼ maxto cabʌlic uw i chʌmel jini Aarón, Jioba tsiʼ sube Moisés: ‹Pʌyʌ majlel jini Josué, yaʼ baqui an jini motomaj Eleazar yicʼot pejtelel jini israelob. Tiʼ tojel pejtelel jini israelob, subeñob ti pejtelel chaʼan Josué jiñʌch jini tsijiʼ bʌ tsaʼ waʼchoconti ti am bʌ i yeʼtel›. Moisés tsiʼ mele cheʼ bajcheʼ tsiʼ yʌlʌ Jioba, cheʼ bajcheʼ miʼ mejlel a qʼuel yaʼ ti dibujo.

Cheʼ jini Jioba tsiʼ sube Josué: ‹Yom chʼejlet, mach a chaʼlen bʌqʼuen. Jatet mi caj a tojʼesañob jini israelob chaʼan maʼ pʌyob ochel yaʼ tiʼ lumal Canaán tsaʼ bʌ c wʌn subeyetla, joñon mi caj cajñel a wicʼot›.

Ti wiʼil Jioba tsiʼ sube Moisés chaʼan miʼ letsel tiʼ jol jini wits i cʼabaʼ Nebo yaʼ tiʼ lumal Moab. Yaʼ baqui tsaʼ waʼle Moisés chaʼan miʼ taj i qʼuel tiʼ junwejlel Jordán jaʼ jini wen i tʼojol jax bʌ i lumal Canaán. Jioba tsiʼ yʌlʌ: ‹Jiñʌch ili lum tsaʼ bʌ c wʌn subeyob mi caj cʌqʼuen jini yalobilob Abraham, Isaac yicʼot Jacob. Tsaʼ cʌqʼuet chaʼan maʼ qʼuel, pero maʼanic mi caj cʌqʼuet ti ochel yaʼi›.

Yaʼ ti wits i cʼabaʼ Nebo, tsaʼ chʌmi Moisés. Anix wʌccʼal (120) i jabilel. Chʼejl to cheʼ bʌ ora jini, yicʼot wen to miʼ qʼuel pañimil. Jini tejclum tsiʼ wen tajayob i chʼijiyemlel yicʼot tiʼ pejtelelob tsiʼ wen ucʼtayob Moisés. Pero wʌle tijicña mi yubiñob come Josué jiñʌch tsijiʼ bʌ tsaʼ waʼchoconti ti am bʌ i yeʼtel.

Números 27:12-23; Deuteronomio 3:23-29; 31:1-8, 14-23; 32:45-52; 34:1-12.