Cʌntesʌntel 38
Jini lajchʌntiquil xyojchʼob
Q’UELE cu jini i wut tac teʼ qʼuecheloʼ bʌ i chaʼan jini winicob. Qʼuele cu wen colem jini junpajl tsʼusub. Chaʼtiquil winic yom miʼ qʼuechob ti juntsʼijt teʼ. Yicʼot qʼuele jini higo tac yicʼot jini granada tac. ¿Baqui tsiʼ chʼʌmʌyob tilel jini utsʼatax bʌ i wut tac teʼ? Tilem tiʼ lumal Canaán. Yom cʼajal a chaʼan, Canaán yaʼʌch baqui tsaʼ chumle Abraham, Isaac yicʼot Jacob. Pero chaʼan tiʼ caj jini wiʼñal tsaʼ bʌ ujti yaʼi, Jacob tsaʼ majli yicʼot jini i familia yaʼ ti Egipto. Wʌle, cheʼ bʌ tsaʼix lʌcʼʌ ñumi wʌclujumpʼejl i junlujuncʼal (216) jab, Moisés tsiʼ chaʼ pʌyʌ majlel ti Canaán jini israelob. Yaʼix añob ti Cades, yaʼ ti i tiquiñal lum.
Yaʼ ti Canaán yaʼ chumul winicob xʼixicob jontoloʼ bʌ. Jini chaʼan, Moisés tsiʼ choco majlel lajchʌntiquil xyojchʼob i tsiʼ subeyob: ‹Qʼuelela jaytiquil winicob xʼixicob chumulob yaʼi, yicʼot mi wen pʼʌtʌlob. Qʼuelela mi weñʌch jini lum chaʼan chuqui miʼ pʌjqʼuel. Yicʼot mach yomic miʼ ñajʌyel laʼ chʼʌm tilel lamital tac i wut jini teʼ›.
Cheʼ bʌ tsaʼ chaʼ sujtiyob jini xyojchʼob yaʼ ti Cades, tsiʼ subeyob jini Moisés: ‹Tiʼ sujm jiñʌch wem bʌ tejclum›. Chaʼan miʼ ñopob, tsiʼ pʌsbeyob tac lamital i wut jini teʼ. Pero jini lujuntiquil xyojchʼob tsiʼ yʌlʌyob: ‹Jini winicob xʼixicob yaʼ bʌ chumulob ti jini tejclum wen chañob yicʼot wen pʼʌtʌlob. Mi tsaʼ lac ñopo lac chilbeñob jini tejclum, mi caj i jisañoñobla›.
Jini israelob tsaʼ cajiyob ti bʌqʼuen cheʼ tsiʼ yubiyob iliyi. ‹Ñumen wen cheʼ tsaʼic chʌmiyonla yaʼ ti Egipto o wʌʼ ti i tiquiñal lum›, cheʼob. ‹Mi caj lac jisʌntel ti guerra, jini la quijñamob yicʼot la calobilob mi caj i cʌjchelob majlel. ¡Laʼ lac waʼchocon yambʌ juntiquil am bʌ i yeʼtel chaʼan ti qʼuexol Moisés, chaʼan mi lac chaʼ sujtel majlel ti Egipto!›.
Pero jini chaʼtiquil xyojchʼob tsiʼ ñopoyob Jioba, tsaʼ caji i ñop i ñʌjchʼesañob jini winicob xʼixicob. I cʼabaʼob jiñʌch Josué yicʼot Caleb. Tsiʼ yʌlʌyob: ‹Mach laʼ chaʼlen bʌqʼuen. Jioba mi caj yajñel la quicʼot. Mach wocolic mi caj lac chʼʌm jini tejclum›. Pero jini winicob xʼixicob maʼanic miʼ jacʼob. Yicʼot yon yomix i tsʌnsañob jini Josué yicʼot Caleb.
Iliyi tsiʼ wen michʼesa Jioba, i tsiʼ sube Moisés: ‹Mi juntiquilic winic xʼixic am bʌ juncʼal (20) i jabilel yicʼot ñumenix bʌ mi caj i yochelob yaʼ ti tejclum Canaán. Qʼuelbilobix i chaʼan jini milagro tac tsaʼ bʌ c mele yaʼ ti Egipto yicʼot yaʼ ti i tiquiñal lum pero maxto anic miʼ ñopoñob. Jini chaʼan, mi caj i chaʼleñob xʌmbal chaʼcʼal (40) jab yaʼ ti i tiquiñal lum jinto miʼ chʌmel jini cojix bʌ. Cojach jini Josué yicʼot Caleb mi caj yochelob yaʼ tiʼ lumal Canaán›.
Números 13:1-33; 14:1-38.