Cʌntesʌntel 44

Rahab tsiʼ mucu jini xyojchʼob

ILI winicob añob ti jumpʼejl wocol. Yom miʼ putsʼelob, chaʼan maʼanic miʼ tsʌnsʌntelob. Jiñobʌch xyojchʼoʼ bʌ israelob, jini xʼixic woli bʌ i coltañob jiñʌch Rahab. Rahab chumul ti jumpʼejl otot baʼan jini tsʼajc chaʼan tejclum Jericó. Laʼ laj qʼuel bajcheʼ tsaʼ ujti pejtelel iliyi.

Jini israelob lʌcʼʌlix chaʼan miʼ cʼaxelob yaʼ ti Jordán jaʼ yicʼot chaʼan mi yochelob yaʼ ti Canaán. Pero cheʼ muʼto caj i yochelob, Josué tsiʼ choco majlel chaʼtiquil xyojchʼob. Tsiʼ subeyob: ‹Wen qʼuelela jini lum yicʼot jini i tejclum Jericó›.

Cheʼ bʌ tsaʼ ochiyob jini xyojchʼob yaʼ ti Jericó, tsaʼ majliyob ti yotot Rahab. Pero an majqui tsiʼ sube jini rey bʌ ti Jericó: ‹Tsaʼ juliyob chaʼtiquil israelob ti ili acʼʌlel chaʼan miʼ tsajiñob lac tejclum›. Cheʼ bʌ tsiʼ yubi jini rey, tsiʼ choco majlel winicob baʼan Rahab chaʼan miʼ subeñob: ‹¡Pʌyʌ loqʼuel jini winicob tsaʼ bʌ juliyob ti a wotot!›. Pero Rahab tsiʼ mucu jini winicob yaʼ ti jol i yotot. Tsiʼ yʌlʌ: ‹Isujm tsaʼ tiliyob winicob ti cotot, pero mach cujilic baqui chʼoyolob. Tsaʼ majliyob cheʼ tsaʼ icʼa, cheʼ maxto ñujpʼi i tiʼ tejclum. ¡Mi tsaʼ majliyetla ti ajñel, mux laʼ tajob!›. Jini winicob tsaʼ majliyob ti ajñel i sʌclañob.

Cheʼ tsaʼix majliyob, Rahab tsaʼ letsi majlel ti ajñel ti jol i yotot. ‹Cujilʌch chaʼan Jioba mi caj i yʌqʼueñetla ili lum›, cheʼ tsiʼ sube jini xyojchʼob. ‹Tsaʼ cubi lojon cheʼ tsiʼ tsʌcʼmesa o tiquesa jini Chʌchʌc bʌ colem ñajb cheʼ bʌ tsaʼ loqʼuiyetla ti Egipto, yicʼot cheʼ tsaʼ laʼ tsʌnsa jini reyob Sehón yicʼot Og. Come wen chuqui tsac melbeyetla, waʼchocobeñon laʼ tʼan, laʼ wocolic, chaʼan mi laʼ pʼuntañon. Coltanla jini c tat yicʼot c ñaʼ, yicʼot querañob.›

Jini xyojchʼob tsiʼ yʌqʼueyob i tʼan chaʼan cheʼʌch miʼ melob, pero Rahab an chuqui yom miʼ mel. ‹Yom maʼ cʌch chʌchʌc bʌ lazo yaʼ ti a ventana›, cheʼob jini xyojchʼob, ‹yicʼot tempan pejtelel jini a piʼʌlob ti a wotot. Cheʼ mic chaʼ tilel lojon chaʼan mic chʼʌm lojon jini Jericó yicʼot cheʼ mij qʼuel lojon jini lazo, maʼanic mi caj c tsʌnsan lojon mi juntiquilic añoʼ bʌ ti a wotot›. Cheʼ tsaʼ sujtiyob jini xyojchʼob baʼan Josué, tsiʼ subeyob pejtelel tsaʼ bʌ ujti.

Josué 2:1-24; Hebreos 11:31.