Tsaʼ chʼʌjmi Canaán

CHEʼ jalto mi caj i yochelob jini Israel yaʼ ti Canaán, Jehová tsaʼix i wʌn sube Abraham chaʼan mi caj i yʌqʼuen jini lum i pʼolbal. Wʌle am bʌ tiʼ wenta jiñix Josué, cheʼ lʌcʼʌlix mi caj i chʼʌmob israelob jini Lum tsaʼ bʌ Wʌn subentiyob.

Dios tsiʼ ñaʼta chaʼan miʼ jisʌntelob jini cananeojob, come wen jontolob yicʼot lecojax i melbalob. Jini chaʼan Dios tsiʼ yʌqʼue i tʼan jini israelob chaʼan mi luʼ jisañob pejtelel jini tejclum tac ti Canaán.

Pero cheʼ maxto ochemobic yaʼ ti lum, Josué tsiʼ choco majlel chaʼtiquil xyojchʼ. Iliyob tsaʼ ochiyob yaʼ ti tejclum Jericó, tsaʼ jijliyob ti yotot juntiquil xʼixic i cʼabaʼ Rahab. Anquese yujilix chaʼan jiñobʌch israelob, pero tsaʼ yʌcʼʌ yotot chaʼan miʼ mujcuñob i bʌ. ¿Chucoch? Come ubibil i chaʼan cheʼ tsiʼ mele Jehová milagro tac chaʼan miʼ coltan i tejclum i tsiʼ ñopo. Rahab tsiʼ cʼajtibe jini xyojchʼob chaʼan mi yʌqʼuen i tʼan, chaʼan maʼanic mi jisʌntel mi jinic i chaʼañoʼ bʌ.

Ti wiʼil jini israelob tsaʼ ochiyob ti Canaán tsaʼ caji i contrajiñob Jericó. Jehová tsiʼ jeme jini tsʼajc yaʼ ti tejclum, cheʼ jini tsaʼ ochiyob majlel jini soldadojob, pero Rahab yicʼot i chaʼañoʼ bʌ maʼanic tsaʼ jisʌntiyob. Cheʼʌch tsaʼ tejchi i chaʼleñob guerra wʌcpʼejl jab, jini Josué yicʼot i soldadojob tsiʼ jisayob cabʌl tejclum chaʼan jini Lum tsaʼ bʌ Wʌn subentiyob. Ti wiʼil, jini lum tsaʼ tʼoxbentiyob ti mojt ti mojt bʌ añob ti israelob.

Jumpʼejl bʌ qʼuin, cheʼ lʌcʼʌlix mi yujtel i yeʼtel, Josué tsiʼ laj tempa jini tejclum Israel. Tsiʼ cʼajtesʌbeyob chuqui tsaʼ bʌ i mele Dios yicʼot i ñojteʼelob yicʼot tsiʼ pʼʌtʼesayob chaʼan chʌn xucʼul miʼ yajñelob. Jini chaʼan, cheʼ tsaʼ chʌmi Josué yicʼot i piʼʌlob, jini israelob tsiʼ cʌyʌyob Jehová i tsaʼ caji i chʼujutesañob dios tac mach bʌ isujmic. Jini joʼlujuncʼal (300) jab tsaʼ bʌ ñumi, maʼanic tsiʼ chʼujbibeyob i tʼan Dios ti tsʼʌcʌl. Cheʼ maʼanic mi jacʼob, Jehová tsaʼ yʌcʼʌ ti cʼʌb filisteojob yicʼot yambʌ i contrajob. Pero cheʼ mi cʼajtiñob i coltʌntel, Jehová miʼ waʼchocon juntiquil xcoltaya. Tiʼ pejtelel tsaʼ waʼchocontiyob lajchʌntiquil xcoltayajob, mi subentel juezob.

Yaʼ baʼ mi yʌl ti Biblia miʼ tejchel tiʼ tojlel jini juez Otniel i mi yujtel tiʼ tojlel jini winic ñumen pʼʌtʌl bʌ ti pejtelel: jini juez Sansón. Jini muʼ bʌ i yʌjlel yaʼ ti Jueces an junchajp cʌntesʌntel wen ñuc bʌ: mi mucʼʌch lac jacʼben i tʼan Jehová wen mi caj la cajñel; mi maʼanic mi, caj lac taj wocol.

(Loqʼuem ti Josué, Jueces yicʼot Levítico 18:24, 25.)