Cʌntesʌntel 46

Jini tsʼajc tac am bʌ ti Jericó

¿CHUQUI woli i yʌcʼ ti jejmel jini tsʼajc tac am bʌ yaʼ ti Jericó? Lajal cheʼ bajcheʼ mi yujtel jumpʼejl guerra i tsaʼ luʼ jisʌntiyob, pero mach cheʼiqui. ¡Jiñʌch yambʌ milagro i chaʼan Jioba! Laʼ laj cʌn bajcheʼ tsaʼ ujti.

Ubin chuqui tsaʼ bʌ i sube Jioba jini Josué: ‹Jatet yicʼot a soldadojob yujiloʼ bʌ guerra yom mi laʼ joyojtan jini tejclum. Yom mi laʼ joyojtan junyajl ti jujumpʼejl qʼuin cʼʌlʌl cheʼ tiʼ wucpʼejlel qʼuin. Chʼʌmʌla majlel jini arca chaʼan bʌ trato. Wuctiquil motomaj yom miʼ ñaxan majlelob tiʼ tojel jini arca yicʼot miʼ wusob trompeta tac melbil bʌ tiʼ xulub tiñʌmeʼ.

›Cheʼ tiʼ wucpʼejlel qʼuin joyojtanla jini tejclum ti wucyajl. Cheʼ jini chaʼlenla cʼam bʌ oñel cheʼ miʼ caj ti wustʌl i xulub tat tiñʌmeʼ. ¡Jini tsʼajc tac miʼ caj ti jejmel!›.

Josué yicʼot jini israelob tsiʼ meleyob jini tsaʼ bʌ i yʌlʌ Jioba. Cheʼ wolito i joyojtañob, ñʌchʼʌlob ti pejtelel. Cojach mi yubintel i tʼan jini xulub tac yicʼot cheʼ woli i joyojtañob. Jini i contrajob yaʼ bʌ añob ti Jericó tsaʼʌch i chaʼleyob bʌqʼuen. ¿Muʼ ba a taj a qʼuel jini chʌchʌc bʌ lazo yaʼ bʌ jocʼol ti ventana? ¿Majqui i ventanajlel i yotot jini? Isujmʌch, Rahab tsaʼʌch i mele cheʼ bajcheʼ tsiʼ yʌlʌyob jini chaʼtiquil xyojchʼob. Tiʼ pejtelel yicʼot i piʼʌlob yaʼan yicʼot ti mal, woli i chʌcʌ qʼuelob pañimil.

Ti yujtibal, cheʼ ti wucpʼejlel qʼuin, cheʼ tsaʼix i joyojtayob ti wucyajl jini tejclum, tsiʼ wusuyob jini trompeta tac, tsiʼ chaʼleyob cʼam bʌ oñel jini soldadojob, tsaʼ jejmi tac jini tsʼajc. Josué tsiʼ yʌlʌ: ‹Tsʌnsanla pejtelel winicob xʼixicob yicʼot pulula jini tejclum yicʼot ti pejtelel i bʌl, jini jach jini plata, jini oro, cobre yicʼot tsucu taqʼuin, chaʼañʌch miʼ lojtel ti yotot lac Yum›.

Josué tsiʼ sube, jini chaʼtiquil xyojchʼob: ‹Pʌyʌla loqʼuel jini Rahab yaʼ ti i yotot yicʼot pejtelel i piʼʌlob›. Tsaʼ coltʌntiyob, cheʼʌch bajcheʼ tsiʼ wʌn acʼʌyob i tʼan jini chaʼtiquil xyojchʼob.

Josué 6:1-25.