David yicʼot Goliat

Jehová tiʼ sube Samuel: «Cucu tiʼ yotot Jesé. Juntiquil i yalobil mi caj i sujtel ti rey yaʼ ti Israel». Samuel tsaʼʌch majli i cheʼ bʌ tsiʼ taja i qʼuel jiñi ascuñʌl bʌ i yalobil, tsiʼ ñaʼta: «Mi cʌl jiñʌch ili tsaʼ bʌ yajcʌnti». Pero Jehová tiʼ sube Samuel chaʼan mach jiñiqui i tiʼ sube: «Mach cojach mij qʼuelbeñob i wut jiñi wiñicob xʼixicob, mij qʼuelbeñob i pusicʼal jaʼel».

Jesé tsiʼ pʌsbe Samuel jiñi yambʌ 6 i yalobilob. Pero Samuel tsiʼ yʌlʌ: «Jehová mach jiñic tsaʼ bʌ i yajcayob. ¿Am ba yambʌ a walobilob?». Jesé tsiʼ jacʼʌ: «Cojachix yom mic pʌy tilel David, jiñi ijtsʼiñʌl bʌ, woli bʌ i cʌntan tiñʌmeʼ tac». Cheʼ bʌ tsiʼ pʌyʌyob tilel David, Jehová tiʼ sube Samuel: «¡Jiñʌch iliyi!». Samuel tsiʼ mulbe i jol ti aceite. Cheʼʌch tsiʼ waʼchoco bajcheʼ jiñi chaʼan miʼ yochel ti rey.

Ti wiʼil, jiñi israelob tsiʼ contrajiyob jiñi filisteojob. Yicʼotob juntiquil chan bʌ wiñic yujil bʌ guerra, i cʼabaʼ Goliat. Ili wiñic tiʼ pejtelel ora miʼ wajlen jiñi israelob yicʼot miʼ yʌl: «Chocola tilel juntiquil wiñic chaʼan miʼ contrajiñon. Mi tsaʼ c sʌtʌ, mi caj lon c sujtel ti laʼ mozo. Pero mi maʼañic tsaʼ c sʌtʌ, mi caj laʼ sujtel ti lon c mozo».

David tsaʼ majli i yʌqʼuen i yuchʼel i yʌscuñob yaʼ baqui añob come soldadojob. David tsaʼ yubibe i tʼan Goliat i tsiʼ yʌlʌ: «¡Mi caj j contrajin!». Jiñi rey Saúl tiʼ sube: «Maxto mejlet». David tsiʼ jacʼʌ: «Jehová mi caj i coltañon».

Saúl tsiʼ majñʌbe i yeʼtijib chaʼan guerra, pero David tsiʼ yʌlʌ: «Mach mejlic j cʼʌn». David tsiʼ chʼʌmʌ i pʌrʌntun. Tsaʼ majli ti jaʼ, tsiʼ loto joʼpʼejl xajlel (tun) i tsaʼ yotsa tiʼ morral. Tsaʼ majli ti ajñel tiʼ tojlel Goliat. Cʼam tsiʼ chaʼle tʼan ili wiñic: «¡Lʌcʼtesan a bʌ alʌ chʼiton i yaʼ to mi caj a qʼuel! Mi caj c sujtesañet tiʼ weʼel xmateʼmut yicʼot tiʼ weʼel añimal tac». David maʼañic tsiʼ bʌcʼña i tiʼ sube: «Mi caj a contrajiñon yicʼot espada yicʼot lanza, pero joñon mi caj j contrajiñet tiʼ cʼabaʼ Jehová. Maʼañic woli a contrajiñon lojon, woli a contrajin Dios. Tiʼ pejtelel wʌʼ bʌ añob mi caj i qʼuelob chaʼan ñumen pʼʌtʌl Jehová bajcheʼ jumpʼejl espada o lanza. Jehová mi caj i yʌqʼuetla ti lon j cʼʌb».

David tsiʼ yotsa jumpʼejl xajlel yaʼ ti pʌrʌntun i tsiʼ choco tiʼ pejtelel i pʼʌtʌlel. David yicʼotʌch i coltaya Jehová, jin chaʼan toj tsaʼ cʼoti tiʼ pam Goliat jiñi xajlel i tsaʼ chʌmi. Tsaʼ putsʼiyob jiñi filisteojob chaʼan maʼañic mi tsʌnsʌntelob. ¿Ixcu jatet? ¿Muʼ baʼ wʌcʼ ti ñuc Jehová bajcheʼ David?