Cʌntesʌntel 58
David yicʼot Goliat
JINI filisteojob tsaʼ tili i chaʼ contrajiñob Israel. Jini uxtiquil i yʌscuñob David tsaʼ ochiyob tiʼ soldado Saúl. Jini chaʼan, jumpʼejl bʌ qʼuin Isaí tsiʼ sube David: ‹Yom maʼ chʼʌmbeñob majlel bʌlñʌcʼʌl yicʼot caxlan waj a wʌscuñob. Cucu qʼuele bajcheʼ añob›.
Cheʼ bʌ David tsaʼ cʼoti chaʼan miʼ qʼuel i yʌscuñob yaʼ baqui muchʼquibilob, tsaʼ majli ti ajñel yaʼ baqui waʼalob ti ñaxan chaʼan jini guerra. Tsaʼ loqʼui tilel jini chan bʌ filisteo Goliat chaʼan miʼ wajlen jini israelob. Cheʼʌch tsiʼ mele ti jujumpʼejl sʌcʼajel yicʼot ti jujumpʼejl icʼajel ti chaʼcʼal (40) qʼuin. Tsaʼ caji ti cʼam bʌ tʼan: ‹Yom mi laʼ yajcan juntiquil chaʼan miʼ chaʼlen leto yicʼoton. Mi tsaʼ mʌjli i chaʼan yicʼot mi tsaʼ i tsʌnsayon, cheʼ jini mi caj cochel lojon ti laʼ winic. Pero mi tsaʼ mʌjli c chaʼan joñon, yicʼot mi tsac tsʌnsa, cheʼ jini jatetla mi caj laʼ wochel tic winic lojon. Yom mi laʼ chocbeñon tilel juntiquil chaʼan mi laj qʼuel majqui miʼ mʌl›.
David tsiʼ cʼajtibe lamital soldadojob: ‹¿Chuqui mi caj i yʌqʼuentel jini muʼ bʌ i tsʌnsan ili filisteo chaʼan maʼanix miʼ chʌn ticʼlan Israel chaʼan ili wajlentel?›
Juntiquil soldado tsiʼ yʌlʌ: ‹Saúl mi caj yʌqʼuen cabʌl chubʌʼañʌl. Yicʼot jaʼel mi caj i yʌqʼuen xchʼoc bʌ i yalobil chaʼan tiʼ yijñam›.
Pero tiʼ pejtelel jini israelob miʼ bʌcʼñañob Goliat chaʼan wen chan bʌ winic. Lʌcʼʌl uxpʼejl metro i chanlel, yicʼot an juntiquil soldado muʼ bʌ i cuchben i mʌctʌjib.
An lamital soldadojob tsaʼ bʌ majli i subeñob jini rey Saúl chaʼan David yom majlel ti guerra tiʼ contra Goliat. Pero Saúl tsiʼ sube David: ‹Maxto mejliquet. Goliat wen yujil guerra cʼʌlʌl cheʼ alob to, jatet chʼitoñet jaxto›. David tsiʼ yʌlʌ: ‹Joñon tsac tsʌnsa juncojt oso yicʼot juncojt bajlum tsaʼ bʌ i chucbe tac majlel i tiñʌmeʼ c tat. Wʌle lajal mi caj c tsʌnsan jaʼel jini winic filisteo. Jioba mi caj i coltañon›. Jin chaʼan Saúl tsiʼ sube: ‹Cucu cheʼ jini, laʼ majlic a wicʼot Jioba›.
David tsaʼ jubi majlel yaʼ ti colem jaʼ, tsiʼ loto joʼpʼejl xajlel i tsaʼ yotsa ti alʌ bolsa cuchul bʌ i chaʼan. Cheʼ jini, tsaʼ majli yicʼot i pʌrʌntun chaʼan miʼ contrajin chan bʌ winic. Pero Goliat maʼanic tsiʼ ñopo woli bʌ i qʼuel. Tsiʼ ñaʼta chaʼan mach wis wocolic miʼ tsʌnsan David.
Goliat tsaʼ yʌlʌ: ‹Laʼ ilayi. Mi caj cʌcʼ a bʌcʼtal chaʼan miʼ cʼux xtaʼjol yicʼot bʌteʼel tac›. Pero David tsiʼ yʌlʌ: ‹Talet tij contra yicʼot espada, yicʼot lanza, pero joñon talon ti a contra tiʼ cʼabaʼ Jioba. Jioba mi caj i yʌqʼuet tij cʼʌb wʌle ora yicʼot mi caj c tsʌnsañet›.
Cheʼ jini, tsaʼ majli ti ajñel David tiʼ tojlel Goliat. Tsiʼ locʼsa tiʼ bolsa jumpʼejl xajlel, tsiʼ yʌcʼʌ tiʼ pʌrʌntun, i tsiʼ julu Goliat yicʼot pejtelel i pʼʌtʌlel. ¡Jini xajlel tsaʼ ochi tiʼ pam Goliat, chʌmenix tsaʼ ñuc yajli jubel ti lum! Jini filisteojob tsaʼ putsʼiyob cheʼ bʌ tsiʼ qʼueleyob chaʼan tsaʼix yajli jini wen yujil bʌ guerra i chaʼañob. Jini israelob tsiʼ yajñesayob majlel i tsaʼ mʌjliyob i chaʼan jini guerra.
1 Samuel 17:1-54.