Xucʼul Jonatán i maʼan i bʌqʼuen

Jiñi ñaxam bʌ i yalobil jiñi rey Saúl jiñʌch Jonatán, juntiquilʌch soldado mach bʌ añic i bʌqʼuen. David tsiʼ yʌlʌ chaʼan Jonatán ñumen ora bajcheʼ xiyeʼ yicʼot pʼʌtʌl bajcheʼ juncojt bajlum. Ti jumpʼejl bʌ qʼuin, Jonatán tsiʼ qʼuele filisteojob tiʼ pam jumpʼejl wits. Tiʼ sube jiñi xcuch eʼtijib: «Mi caj laj contrajiñob mi mucʼʌch i yʌqʼueñonla Jehová jumpʼejl señal. Mi tsiʼ yʌlʌyob chaʼan mi lac letsel, mi caj lac ñaʼtan chaʼan yom mi laj contrajiñob». Cʼam tsiʼ yʌlʌ jiñi filisteojob: «¡Letsenla tilel chaʼan mi laj contrajin lac bʌ!». Tsaʼ letsiyob majlel i 20 soldado tiʼ tsʌnsayob.

Jonatán yom miʼ yochel ti rey cheʼ bʌ miʼ chʌmel i Saúl come jiñʌch ñaxam bʌ i yalobil. Pero Jonatán yujil chaʼan Jehová tsiʼ yajca David bajcheʼ tsijiʼ bʌ rey yaʼ ti Israel i maʼañic tsiʼ michʼ qʼuele. Jonatán tsaʼ sujti ti wen bʌ i yamigo David. Tsiʼ yʌcʼʌyob i tʼan chaʼan miʼ caj i cʌntañob i bʌ. Chaʼan miʼ pʌs Jonatán chaʼan i yamigojʌch David, tsiʼ yʌqʼue i bujc, i yespada, i jalʌjb (wʌnteʼ) yicʼot i cʌjchiñʌcʼ.

Cheʼ bʌ David woli (choncol) i putsʼtan Saúl, Jonatán tsaʼ majli i qʼuel i tiʼ sube: «Mach a chaʼlen bʌqʼuen i yom pʼʌtʌlel. Jehová tsiʼ yajcayet chaʼan maʼ sujtel ti rey. Jiñi c tat miʼ ñaʼtan». ¿A wom ba a taj juntiquil wem bʌ amigo bajcheʼ Jonatán?

Jiñʌch jaysujtel colel i yʌcʼ i bʌ ti chʌmel Jonatán chaʼan miʼ coltan i yamigo. Jonatán yujil chaʼan i tat yom i tsʌnsan David, jin chaʼan tiʼ sube: «Mi maʼ tsʌnsan David, mi caj a mel tsʌts bʌ mulil. Maʼañic chuqui melbil i chaʼan». Saúl tsaʼ wen michʼa yicʼot Jonatán. Ti wiʼil, Saúl yicʼot Jonatán tsaʼ chʌmiyob ti guerra.

Cheʼ bʌ tsaʼix chʌmi Jonatán, David tiʼ sʌcla Mefibóset, i yalobil Jonatán. Cheʼ bʌ tsiʼ taja, tiʼ sube: «Mi caj j cʌntañet cheʼ bʌ cuxulon to come wen camigo a tat ti wajali. Mi caj a chumtʌl tic palacio i yaʼ mi caj a wuchʼel tic mesa». David maʼañic tsaʼ ñajʌyi i chaʼan Jonatán.