Yom xucʼulonla tiʼ tojlel Jehová

1, 2. ¿Chucoch jiñʌch wen ñuc bʌ ejemplo jiñi i xucʼtʌlel Jonatán tsaʼ bʌ i pʌsʌ tiʼ tojlel David?

TAJOL Jonatán toj sajtel i pusicʼal chaʼan tsaʼ bʌ i mele David. Tsaʼ ujti i tsʌnsan jiñi colem bʌ wiñic i cʼabaʼ Goliat yicʼot tsiʼ chʼʌmbe majlel i jol baʼan jiñi rey Saúl, i tat Jonatán (1 Samuel 17:57). Jonatán wen yujil chaʼan David añʌch i coltʌntel ti Dios. Ti jiñi bʌ ora, tsaʼ sujtiyob ti wem bʌ i yamigojob i bʌ. Tsaʼ yʌqʼueyob i bʌ i tʼan chaʼan chʌn xucʼul mi caj i yajñelob (1 Samuel 18:1-3). Cheʼʌch tsaʼ ujti.

² Wen ñuc i cʼʌjñibal cheʼ laj cujil chaʼan Jonatán tsaʼ sujti ti wem bʌ i yamigo David. ¿Chucoch? Come Jonatán i yalobilʌch jiñi rey Saúl. Jin chaʼan, jin i wentʌlel bʌ miʼ yochel ti rey ti wiʼil. Pero Jehová yajcʌbilix i chaʼan David, i mach jiñic Jonatán. Jonatán tsiʼ pʌsʌ i xucʼtʌlel tiʼ tojlel David. Cheʼ bʌ Saúl woli (choncol) i sʌclan David chaʼan miʼ tsʌnsan, Jonatán tsiʼ wen ñaʼta jiñi i yamigo. Come yujil chaʼan David yaʼ mujcubil i bʌ yaʼ tiʼ tiquiñal lum am bʌ ti Hores, tsaʼ majli i qʼuel yicʼot tsiʼ sube chaʼan miʼ chʌn ñop ti Jehová. Tsiʼ sube: «Mach a chaʼlen bʌqʼuen, come maʼanic mi caj i tajet Saúl jini c tat. Jatet mi caj a wochel ti yumʌl tiʼ tojlel Israel. Joñon mi caj cochel ti a waj coltaya» (1 Samuel 23:16, 17).

3. a) ¿Chuqui ñumen ñuc bʌ tiʼ tojlel Jonatán? b) ¿Bajcheʼ la cujil chaʼan jiñʌch ñumen i cʼʌjñibal i chaʼan Jonatán? (Qʼuele jiñi dibujo am bʌ tiʼ tejchibal).

³ Lʌcʼʌl ti lac pejtelel mi lac mulan lac ñochtan jiñi muʼ bʌ i pʌsob i xucʼtʌlel. Pero ¿muʼ ba lac mulan bajcheʼ tsiʼ mele Jonatán tiʼ cajach xucʼul tsaʼ ajñi yicʼot David? Maʼañic. Mi lac mulan come tsiʼ pʌsʌ i xucʼtʌlel ti Dios i jiñʌch ñumen i cʼʌjñibal bʌ i chaʼan. Jin chaʼan xucʼul tsaʼ ajñi tiʼ tojlel David i maʼañic tiʼ tsʼaʼle. Tsaʼ to i colta chaʼan miʼ ñop ti Jehová. Tsiʼ pʌsbeyob i bʌ i xucʼtʌlel tiʼ chaʼticlelob yicʼot tiʼ tojlel Jehová. Tiʼ tsʼʌctesayob jiñi tʼan tsaʼ bʌ i subeyob i bʌ: «Lac Yum mi caj i yajñel ti lac tojlel yicʼot tiʼ tojlel lac pʼolbal» (1 Samuel 20:42).

4. a) ¿Chuqui miʼ yʌqʼueñonla lac tijicñʌyel? b) ¿Chuqui mi caj laj qʼuel ti ili temaj?

⁴ Joñonla yom mi lac pʌs lac xucʼtʌlel jaʼel tiʼ lac familiajob, ti la camigojob yicʼot ti la quermañojob (1 Tesalonicenses 2:10, 11). Pero yom ñumen xucʼulonla tiʼ tojlel Jehová come jiñʌch tsiʼ meleyonla (Apocalipsis 4:11). Miʼ yʌqʼueñonla lac tijicñʌyel yicʼot miʼ yʌqʼuen i sujmlel laj cuxtʌlel cheʼ xucʼulonla tiʼ tojlel Dios. Pero yom xucʼulonla ti Jehová tiʼ pejtelel ora anquese añonla ti tsʌts bʌ wocol. Tiʼ ili temaj mi caj laj qʼuel chʌnchajp baqui miʼ coltañonla chaʼan xucʼulonla tiʼ Dios jiñi ejemplo i chaʼan Jonatán. Ñaxam bʌ, cheʼ mi lac ñaʼtan chaʼan mach yomic mi laj qʼuel ti ñuc juntiquil am bʌ i yeʼtel (troñel). I chaʼpʼejlel, cheʼ bʌ yom mi lac yajcan majqui mi caj lac pʌsben lac xucʼtʌlel. I yuxpʼejlel, cheʼ bʌ juntiquil hermano am bʌ i yeʼtel mach utsʼatic bajcheʼ miʼ mel ti lac tojlel. I chʌmpʼejlel, cheʼ bʌ mach mejlic lac tsʼʌctesan lac tʼan la cubin.

CHEʼ MI LAC ÑAʼTAN CHAʼAN MACH YOMIC MI LAJ QʼUEL TI ÑUC JUNTIQUIL AM BɅ I YEʼTEL

5. ¿Chucoch jiñi israelob wocol tsiʼ pʌsʌyob i xucʼtʌlel ti Jehová cheʼ ba ora woli ti yumʌntel Saúl?

⁵ Jonatán yicʼot jiñi yambʌ israelob wen wocol woli (yʌquel) i ñusañob. I tat Jonatán maʼañic tsiʼ chʌn jacʼʌ tʼan, jin chaʼan Jehová maʼañix tsiʼ qʼuele ti utsʼat bajcheʼ rey i chaʼan bʌ Israel (1 Samuel 15:17-23). Pero tsaʼto i cʌyʌ Saúl chaʼan cabʌl jab miʼ chʌn chaʼlen yumʌntel. Come woli ti yumʌntel yaʼ tiʼ buchlib lac Yum yicʼot cabʌl woli i mel jontolil, jiñi israelob wocolʌch tsiʼ pʌsʌyob i xucʼtʌlel ti Jehová (1 Crónicas 29:23)

6. ¿Chucoch la cujil chaʼan Jonatán xucʼul tsaʼ ajñi ti Jehová?

⁶ Jonatán xucʼul tsaʼ ajñi yicʼot Jehová. ¿Chucoch la cujil? Chaʼan tsaʼ bʌ i mele ti wiʼil cheʼ bʌ Saúl tsaʼ caji i ñusʌben i tʼan Dios (1 Samuel 13:13, 14). Ti jiñi bʌ ora, tsaʼ tiliyob yonlel soldadojob añoʼ bʌ i chaʼan 30,000 carreta chaʼan guerra chaʼan miʼ contrajiñob Israel. Jiñi israelob añob jach i chaʼan 600 soldadojob. I cojach jiñi rey Saúl yicʼot Jonatán añob i chaʼan muʼ bʌ i cʼʌjñel ti guerra. Pero Jonatán maʼañic tsiʼ pʌsʌ i bʌqʼuen. Tsiʼ cʼajtesa chaʼan jiñi xʼaltʼan Samuel tsiʼ yʌlʌ: «Maʼanic mi caj i bajñel cʌy i tejclum lac Yum ame tsʼaʼlentic jiñi ñuc bʌ i cʼabaʼ» (1 Samuel 12:22). Jin chaʼan tsiʼ sube juntiquil soldado: «Cabʌl i pʼʌtʌlel jini lac Yum. Miʼ cʼʌn winicob tiʼ yeʼtel. Mi cabʌlob o mi maʼanic jaytiquil, junlajal tiʼ wut». Ti chaʼticlelob tsaʼ majliyob i tsiʼ tsʌnsayob cheʼ bʌ 20 soldadojob. Wen tsiquil chaʼan Jonatán tsaʼʌch i pʌsʌ i ñopoñel (chʼujbiya) ti Jehová. Jin chaʼan Dios tsiʼ yʌqʼue i bendición. Dios tsiʼ yʌcʼʌ chaʼan miʼ yujtel yujquel lum, i jiñi i contrajob tsiʼ wen bʌcʼñayob jin chaʼan tsaʼ caji i tsʌnsañob i bʌ. Cheʼ jiñi tsiʼ mʌlʌyob (jotoyob) guerra jiñi israelob (1 Samuel 13:5, 15, 22; 14:1, 2, 6, 14, 15, 20).

7. ¿Bajcheʼ tsiʼ mele Jonatán tiʼ tojlel i tat?

⁷ Anquese jiñi rey Saúl tsiʼ chʌn ñusʌbe i tʼan Jehová, Jonatán ti bele ora tsiʼ jacʼbe i tʼan i tat. Jumpʼejl ejemplo jiñʌch cheʼ bʌ tsaʼ majli yicʼot i tat ti jumpʼejl guerra chaʼan miʼ coltan i tejclum Jehová (1 Samuel 31:1, 2).

8, 9. ¿Bajcheʼ mi lac pʌs lac xucʼtʌlel ti Dios cheʼ bʌ mi laj qʼuel ti ñuc jiñi añoʼ bʌ i yeʼtel?

⁸ ¿Bajcheʼ miʼ mejlel lac tsajcan i melbal Jonatán yicʼot xucʼul mi laj cajñel tiʼ tojlel Dios? Cheʼ mucʼʌch lac jacʼben i tʼan jiñi yumʌl am bʌ i chaʼan jiñi país yaʼ baqui chumulonla. Jehová miʼ yʌcʼ chaʼan «jini añoʼ bʌ i yeʼtel ti pañimil» miʼ yumañonla yicʼot yom chaʼan mi laj qʼuelob ti ñuc (pejcan Romanos 13:1, 2). Jin chaʼan, yom mi laj qʼuelob ti ñuc jiñi xʼeʼtelob chaʼan bʌ yumʌl, jinto jaʼel jiñi mach bʌ weñic i melbal, anquese mi lac ñaʼtan chaʼan mach la comic laj qʼuelob ti ñuc. Jehová yom chaʼan tiʼ pejtelel wiñicob xʼixicob (quixtañujob) tsaʼ bʌ i yʌqʼueyob i yeʼtel mi laj qʼuelob ti ñuc jaʼel (1 Corintios 11:3; Hebreos 13:17).

⁹ Laʼ laj qʼuel bajcheʼ juntiquil hermana i cʼabaʼ Olga chʼoyol bʌ ti Sudamérica tsiʼ pʌsʌ i xucʼtʌlel ti Jehová.^[1] (qʼuele jiñi nota am bʌ tiʼ yujtibal ili temaj). Jiñi i ñoxiʼal tsiʼ wen ticʼla. Come testigo i chaʼan Jehová, an tajol i ñoxiʼal maʼañic miʼ wis pejcan o miʼ suben jontol bʌ tʼan. Tsaʼto cʼoti i suben chaʼan miʼ caj i cʌy yicʼot miʼ caj i pʌy majlel i yalobilob. Pero jiñi hermana tiʼ pejtelel ora tsiʼ qʼuele ti ñuc yicʼot maʼañic tsiʼ ‹qʼuexta jontolil›. Tsaʼ bʌ i mele jiñʌch chaʼan tsiʼ chaʼle wersa i mel chuqui wem bʌ bajcheʼ ijñamʌl. Miʼ melben i yuchʼib, miʼ wutsʼben i pislel yicʼot miʼ wen qʼuel i familia (Romanos 12:17). Cheʼ bʌ mucʼʌch i mejlel, miʼ piʼlen majlel jeʼel cheʼ ba ora i ñoxiʼal miʼ julaʼtan i familia yicʼot i yamigojob. Jumpʼejl ejemplo, cheʼ bʌ tsaʼ chʌmi i tat i ñoxiʼal, tsiʼ luʼ chajpa chaʼan miʼ majlelob i qʼuel come an ti yambʌ tejclum. Tsaʼ ñusʌnti yaʼ ti iglesia, jin chaʼan jiñi hermana tsiʼ pijta ti jumpat jinto cheʼ tsaʼ loqʼui i ñoxiʼal. Cheʼ bʌ añix ñumen cabʌl jab, i ñoxiʼal tsaʼ caji i mel chuqui wem bʌ tiʼ tojlel. Tiʼ caj chaʼan maʼañic tsaʼ lujbʼa yicʼot chaʼan tiʼ pejtelel ora tsiʼ qʼuele ti ñuc. Wʌle jiñix i ñoxiʼal muʼ bʌ i suben chaʼan maʼañic miʼ sʌt jiñi tempa bʌ yicʼot jin miʼ pʌy majlel yaʼ ti Yotlel Tempa bʌ. An i tajol jaʼel miʼ cʌlel yicʼot Olga yaʼ ti tempa bʌ (1 Pedro 3:1).

CHEʼ BɅ YOM MI LAC YAJCAN MAJQUI MI CAJ LAC PɅSBEN LAC XUCʼTɅLEL

10. ¿Chuqui tsiʼ colta Jonatán chaʼan miʼ yajcan majqui mi caj i pʌsben i xucʼtʌlel?

¹⁰ Cheʼ bʌ Saúl tsiʼ yʌlʌ chaʼan mi caj i tsʌnsan David, Jonatán tsiʼ ñaʼta majqui mi caj i pʌsben i xucʼtʌlel, i tat o David. Wocolʌch tsaʼ bʌ i mele, come Jonatán yom i pʌs i xucʼtʌlel tiʼ chaʼticlelob. ¿Chuqui tsiʼ colta chaʼan wen miʼ yajcan? Yujil chaʼan Dios woliʼ coltan David, mach jiñic Saúl. Jin chaʼan tsiʼ yajca chaʼan xucʼul mi caj i yajñel yicʼot David. Ñaxan tsiʼ sube David chaʼan miʼ mujcun i bʌ, i ti wiʼil tsiʼ sube Saúl chaʼan maʼañic miʼ tsʌnsan David (pejcan 1 Samuel 19:1-6).

11, 12. ¿Bajcheʼ miʼ coltañonla jiñi laj cʼuxbiya ti Dios chaʼan mi lac ñaʼtan majqui mi caj lac pʌsben lac xucʼtʌlel?

¹¹ Mi mucʼʌch laj cʼuxbin Dios, ñumen mi caj lac pʌs lac xucʼtʌlel tiʼ tojlel i mach jiñic ti juntiquil quixtañu o tiʼ tojlel lac familia. Laʼ laj qʼuel chuqui tsiʼ mele juntiquil hermana i cʼabaʼ Alice chʼoyol bʌ ti Australia. Tsaʼ cʼoti i ñaʼtan majqui mi caj i pʌsben i xucʼtʌlel. Cheʼ tsaʼ caji i cʌn am bʌ ti Biblia, tsaʼ caji i suben jiñi yambʌ i familiajob. Ti jumpʼejl bʌ qʼuin tsiʼ subeyob chaʼan maʼañix mi caj i chʌn mel jiñi Navidad yicʼot tiʼ tsictesa chucoch. Jiñi i familia maʼañic tsiʼ mulaj. Ti wiʼil tsaʼ wen michʼayob. Tsiʼ yubiyob chaʼan maʼañix woliʼ cʼuxbintelob. I ñaʼ jiñi Alice tsiʼ sube chaʼan mach yomix i chʌn qʼuel. Alice tsiʼ yʌlʌ: «Wen cʼux tsaʼ cubi jiñi come mic wen cʼuxbin jiñi c familia. Pero ti jumpʼejl c pusicʼal tsaʼ cʌlʌ chaʼan mi caj cʌcʼ ti ñaxan Jehová yicʼot Jesús, jin chaʼan tsaʼ c chaʼle chʼʌmjaʼ ti jiñi colem tempa bʌ» (Mateo 10:37).

¹² Mi mucʼʌch laj cʼuxbin Dios, xucʼul mi caj la cajñel tiʼ tojlel jaʼel, mach jiñic tiʼ tojlel jumpʼejl equipo chaʼan alas, jumpʼejl escuela o jiñi lac país. Laʼ laj qʼuel tiʼ tojlel juntiquil hermano i cʼabaʼ Henry. Yaʼ ti escuela an jumpʼejl equipo muʼ bʌ i chaʼlen alas ajedrez yicʼotob i tsiʼ yʌlʌ tiʼ pusicʼal chaʼan mi caj i mʌlben jiñi yan tac bʌ equipo. Come tiʼ pejtelel i jilibal semana miʼ chaʼlen alas, maʼañix i yorajlel chaʼan miʼ majlel ti subtʼan yicʼot tempa bʌ. Jumpʼejl bʌ qʼuin tsaʼ cʼoti i ñaʼtan chaʼan mach jiñic Jehová choncol bʌ i pʌsben i xucʼtʌlel. Jin chaʼan tsiʼ cʌyʌ jiñi equipo (Mateo 6:33).

13. ¿Bajcheʼ miʼ coltañonla lac xucʼtʌlel ti Dios chaʼan mi lac tojʼesan wocol ti lac familia?

¹³ An i tajol wocolʌch mi lac pʌsben lac xucʼtʌlel tiʼ pejtelel lac familia. Laʼ laj qʼuel tsaʼ bʌ ujti tiʼ tojlel jiñi hermano Ken. Miʼ yʌl chaʼan wen ñoxix i ñaʼ, jin chaʼan ti bele ora yom i lon julaʼtan yicʼot chaʼan miʼ tilel ti cʌytʌl tiʼ yotot ti bixetic. Pero i ñaʼ yicʼot i yijñam mach weñic miʼ qʼuelob i bʌ. Jin chaʼan, miʼ yʌl chaʼan mach yujilic chuqui yom miʼ mel chaʼan tijicña miʼ yajñelob tiʼ chaʼticlel. Ken xucʼul yom ajñel tiʼ tojlel Jehová. Jin chaʼan tsaʼ caji i ñaʼtan chuqui miʼ yʌl jiñi Biblia. Tsaʼ cʼoti i ñaʼtan chaʼan Dios yom chaʼan tijicña miʼ yajñel yicʼot i yijñam yicʼot miʼ pʌsben i xucʼtʌlel. Jin chaʼan tsiʼ sʌcla bajcheʼ tijicña miʼ mejlel ti ajñel. Tsiʼ chaʼle tʼan yicʼot i yijñam i tiʼ tsictesʌbe chucoch yom uts tiʼ tojlel i ñaʼ jiñi Ken. Tiʼ tsictesʌbe i ñaʼ jaʼel chucoch yom miʼ qʼuelben ti ñuc i yijñam (pejcan Génesis 2:24 yicʼot 1 Corintios 13:4, 5).

CHEʼ BɅ JUNTIQUIL HERMANO AM BɅ I YEʼTEL MACH UTSʼATIC BAJCHEʼ MIʼ MEL TI LAC TOJLEL

14. ¿Chuqui mach bʌ weñic tsiʼ mele Saúl tiʼ tojlel Jonatán?

¹⁴ Yambʌ bajcheʼ mi lac mejlel lac pʌsben lac xucʼtʌlel Jehová jiñʌch bajcheʼ yilal mi laj qʼuel juntiquil hermano am bʌ i yeʼtel cheʼ mach utsʼatic bajcheʼ miʼ mel ti lac tojlel. Jiñi rey Saúl tsaʼ yajcʌnti ti Dios, pero mach utsʼatic tsiʼ mele tiʼ tojlel i yalobil. Maʼañic tsiʼ ñaʼta chucoch Jonatán tsiʼ wen cʼuxbi David. Jin chaʼan, Saúl tsaʼ wen michʼa tiʼ tojlel Jonatán cheʼ bʌ tsiʼ ñopo i coltan David, i tsiʼ yʌcʼʌ ti quisin tiʼ tojlel cabʌl quixtañu. Pero Jonatán tsiʼ chʌn qʼuele ti ñuc i tat. Pero cheʼ jaʼel chʌn xucʼul tsaʼ ajñi tiʼ tojlel Jehová yicʼot David, tsaʼ bʌ i yajca Dios bajcheʼ rey ti Israel tiʼ qʼuexol Saúl (1 Samuel 20:30-41).

15. Mi juntiquil hermano mach utsʼatic miʼ mel ti lac tojlel, ¿chuqui yom mi lac mel?

¹⁵ Ili ora, jiñi ancianojob mucʼob ti wersa chaʼan utsʼat miʼ qʼuelob jiñi hermanojob yaʼ ti congregación. Pero an i tajol maʼañic miʼ chʼʌmbeñob isujm chucoch an chuqui tsaʼ lac mele, come xmulilob (1 Samuel 1:13-17). Mi ti jumpʼejl bʌ qʼuin mach utsʼatic bajcheʼ miʼ melob ti lac tojlel, laʼ lac chʌn pʌs lac xucʼtʌlel tiʼ tojlel Jehová.

CHEʼ BɅ MACH MEJLIC LAC TSʼɅCTESAN LAC TʼAN MI LA CUBIN

16. ¿Baqui tac yom mi lac pʌs lac xucʼtʌlel ti Dios?

¹⁶ Saúl tsiʼ ñaʼta chaʼan muʼ bʌ caj i yochel tiʼ qʼuexol bajcheʼ rey jiñʌch Jonatán, mach jiñic David (1 Samuel 20:31). Cheʼic yom Jonatán tsiʼ chaʼle wersa chaʼan jiñʌch miʼ yochel ti rey. Pero tiʼ tsʼʌctesa jiñi tʼan tsaʼ bʌ i sube i yamigo David come Jonatán miʼ cʼuxbin Jehová yicʼot xucʼul tiʼ tojlel. Jiñi Biblia miʼ yʌl chaʼan jiñi xucʼuloʼ bʌ ti Jehová yicʼot miʼ cʼuxbiñob miʼ tsʼʌctesañob i tʼan anquese tajol mach utsʼatic bajcheʼ miʼ yujtel (Salmo 15:4). Jumpʼejl ejemplo, mi woli lac mel jumpʼejl trato chaʼan eʼtel, yomʌch mi lac tsʼʌctesan. Mi an wocol ti lac ñujpuñel, mi caj lac pʌsben lac xucʼtʌlel lac ñoxiʼal o la quijñam come mi laj cʼuxbin Jehová (pejcan Malaquías 2:13-16).

17. ¿Chuqui tsaʼ cʌñʌ ti ili temaj?

¹⁷ Yom xucʼulonla ti Dios anquese woli lac ñusan tsʌts tac bʌ wocol cheʼ bajcheʼ Jonatán. Yom xucʼulonla tiʼ tojlel la quermañojob, anquese tajol maʼañic mi lac mulan bajcheʼ miʼ melob. Cheʼʌch mi caj laj cʌqʼuen i tijicñʌyel Jehová, i jiñʌch miʼ caj i yʌqʼueñonla lac tijicñʌyel jaʼel (Proverbios 27:11). Miʼ mejlel lac ñop chaʼan mucʼʌch caj i chʌn coltañonla. Yaʼ ti yambʌ temaj mi caj lac taj ti tʼan chaʼan yañoʼ bʌ cheʼ ti yorajlel David. Mi caj laj qʼuel chaʼan an xucʼul bʌ tsaʼ ajñiyob ti Dios, yicʼot an mach bʌ cheʼiqui. Mi caj laj qʼuel jaʼel chuqui miʼ mejlel laj cʌn tiʼ tojlelob.