Daniel miʼ yotsʌntel tiʼ chʼeñal bajlum

Darío, jiñi chʼoyol bʌ ti Medopersia, tsiʼ chaʼle eʼtel bajcheʼ rey yaʼ ti Babilonia. Tsiʼ qʼuele chaʼan Daniel mach lajalic bajcheʼ yambʌlob, jin chaʼan tiʼ sujtesa tiʼ yum jiñi ñumen ñuc bʌ wiñicob yaʼ ti país. Ili wiñicob mach yom i qʼuelob Daniel i yom i tsʌnsañob. Yujilob chaʼan Daniel uxyajl miʼ pejcan Jehová ti jujumpʼejl qʼuin, jin chaʼan tiʼ subeyob Darío: «C rey, yom cheʼ añic jumpʼejl mandar tiʼ petol pañimil muʼ bʌ i yʌl chaʼan jatet jach yom maʼ melbentel oración. Mi an majqui miʼ ñusan jiñi mandar, yom miʼ yochel yaʼ ti chʼeñal bajlum». Darío tsaʼʌch i jacʼʌ i tsiʼ chaʼle ti firmar jiñi mandar.

Cheʼ bʌ tsaʼ yubi Daniel jiñi mandar, tsaʼ majli tiʼ yotot. Tsaʼ ñocle i jamʌl i ventana tsaʼ caj i pejcan Jehová. Jiñi i contrajob tsaʼ ochiyob tiʼ yotot i woli (choncol) i pejcan Dios tsiʼ tajayob. Tsaʼ majli i subeñob jiñi Darío: «Daniel tsiʼ ñusa a tʼan. Uxyajl miʼ pejcan i Dios ti jujumpʼejl qʼuin». Darío utsʼat miʼ qʼuel Daniel i mach yomic miʼ tsʌnsʌntel. Jumpʼejl qʼuin tsiʼ ñaʼta bajcheʼ miʼ mejlel i coltan, pero maʼañic miʼ mejlel i yʌn jiñi mandar tsaʼix bʌ i chaʼle tiʼ firmar. Maʼañix chuqui i tumbe, jin chaʼan tsiʼ yʌlʌ chaʼan miʼ chojquel ochel Daniel yaʼ ti chʼeñal bajlum.

Ti jiñi bʌ acʼʌlel, Darío tsiʼ wen pensali Daniel i maʼañic tsaʼ wʌyi. Cheʼ ti sʌcʼan, ajñel tsaʼ majli yaʼ ti chʼeñal bajlum, tsiʼ yojchʼo ochel i tsiʼ yota: «¡Daniel! ¿Tsaʼ ba i coltayet a Dios?».

Darío tsiʼ yubibe i tʼan Daniel i tsiʼ yʌlʌ: «I yángel Jehová tsiʼ mʌcbe i tiʼ jiñi bajlum tac, i maʼañic chuqui tsiʼ tumbeyoñob». Wen tijicña tsiʼ yubi Darío i tsiʼ xiqʼui ti locʼsʌntel Daniel. Maʼañic lojwem tsaʼ loqʼui. Jiñi rey tsiʼ yʌlʌ: «¡Chocola ochel yaʼ tiʼ chʼeñal bajlum jiñi tsaʼ bʌ i jopʼbeyob i mul Daniel!». Cheʼ bʌ tsaʼ chojquiyob ochel yaʼ ti chʼen, jiñi bajlum tac ti ora jach tsiʼ jisayob.

Darío tsaʼ yʌcʼʌ ili mandar: «Yom mi laʼ qʼuel ti ñuc i Dios Daniel. Come jiñʌch tsiʼ colta yaʼ baqui an bajlum tac».

¿Ixcu jatet? ¿Muʼ ba a pejcan Jehová ti jujumpʼejl qʼuin cheʼ bajcheʼ Daniel?