Jiñi ángelob miʼ yʌlob chaʼan tsaʼ yila pañimil Jesús

Jiñi gobernador ti Roma, César Augusto, tiʼ sube jiñi judíojob chaʼan miʼ majlel i tsʼijbuñob i bʌ ti jun yaʼ baqui tsaʼ yilayob pañimil (chʼocʼayob). Jin chaʼan José yicʼot María tsaʼ majliyob ti Belén come yaʼʌch chʼoyolob i familia José. Mach jalix yom chaʼan miʼ chʼocʼan jiñi alʌl.

Cheʼ bʌ tsaʼ cʼotiyob ti Belén, yaʼ jach tsaʼ cʌyleyob tiʼ bucʼujib añimal tac, i yaʼ tsaʼ chʼocʼa Jesús. María tsiʼ bʌcʼʌ ti cʼun bʌ pisil i wen xucʼul jach tiʼ totsʼchoco.

Yaʼ ti tʼejl Belén, yaʼan xcʌnta tiñʌmeʼob woli (choncol) bʌ i cʌntañob i tiñʌmeʼ cheʼ ti acʼʌlel. Mach yʌxʌlobic i yo cheʼ bʌ ti pʌsʌ i bʌ juntiquil ángel, tsiʼ qʼuelbeyob i cʼʌcʼal i ñuclel Jehová tiʼ joytilelob. Tsaʼ wen bʌcʼñayob, pero jiñi ángel tiʼ subeyob: «Mach laʼ chaʼlen bʌqʼuen, woli c chʼʌm tilel wem bʌ tʼan. Sajmʌl tsaʼ yila pañimil jiñi Mesías yaʼ ti Belén». Cheʼ jiñi, cabʌl ángelob tsiʼ pʌsʌyob i bʌ yaʼ ti panchan i tsaʼ yʌlʌyob: «Wen ñuc Dios am bʌ ti panchan i woliʼ yʌqʼuentelob i ñʌchʼtʌlel wiñicob xʼixicob ti pañimil». Cheʼ jiñi tsaʼ sʌc majli jiñi ángelob. ¿Chuqui tsiʼ mele (chaʼle) jiñi xcʌnta tiñʌmeʼob?

Tiʼ subeyob i bʌ: «Conla ti Belén». Jin chaʼan tsaʼ majliyob ti ora, tsaʼ cʼoti i tajob José yicʼot María i yaʼan jiñi alʌl yaʼ tiʼ bucʼujib añimal.

Tsaʼ toj sajtiyob i pusicʼal jiñi tsaʼ bʌ i yubiyob chaʼan jiñi ángel tsaʼ bʌ i sube jiñi xcʌnta tiñʌmeʼob. María tsiʼ wen ñaʼta jiñi tʼan tsaʼ bʌ i sube jiñi ángel i maʼañic tsaʼ ñajʌyi i chaʼan. Jiñi xcʌnta tiñʌmeʼob tsaʼ chaʼ majli i cʌntañob i tiñʌmeʼ yaʼ ti jamil, tsiʼ wen aqʼueyob wocolix i yʌlʌ Jehová chaʼan jiñi tsaʼ bʌ i qʼueleyob yicʼot i ñʌchʼtayob.