Cʌntesʌntel 85
Jesús tsiʼ yila pañimil yaʼ ti otot baʼ miʼ lojtel alʌcʼʌl
¿AWUJIL ba majqui jini alʌl? Jiñʌch Jesús. Tsaʼ jax to i yila pañimil yaʼ ti otot baʼ miʼ lojtel alʌcʼʌl. María woliʼ ñolchocon Jesús tiʼ pam i bucʼujib jini burro yicʼot yan tac bʌ alʌcʼʌl. Pero, ¿chucoch yaʼan María yicʼot José yaʼ baqui an alʌcʼʌl tac? ¿Wem ba chaʼan miʼ yilan pañimil juntiquil alʌl yaʼi?
Mach wenic. Jini winic yumʌl bʌ yaʼ ti Roma, i cʼabaʼ Augusto César, tsiʼ mele jumpʼejl mandar, baqui tsiʼ yʌlʌ chaʼan miʼ chaʼ sujtelob jini winicob xʼixicob, yaʼ baqui tsaʼ yilayob pañimil, chaʼan miʼ tsʼijbuñob i cʼabaʼ yaʼ ti libro, jini chaʼan tsaʼ cʼotiyob jaʼel jini José yicʼot María, come José tsiʼ yila pañimil yaʼ ti Belén. Pero cheʼ bʌ tsaʼ cʼotiyob ti Belén, maʼanix tsiʼ tajayob jochol bʌ cuarto. Tsaʼ majliyob yaʼ baqui an i yotlel jini alʌcʼʌl. ¡Ti jini jach bʌ qʼuin María tsiʼ yʌcʼʌ ti pañimil Jesús! Cheʼ bajcheʼ maʼ qʼuel, maʼanic bajcheʼ yilal jini alʌl.
¿Muʼ baʼ qʼuel jini xcʌnta tiñʌmeʼob, tsaʼ bʌ cʼotiyob i qʼuel Jesús? Cheʼ bʌ tsaʼ lejmi i cʼʌcʼal i ñuclel Dios tiʼ joytilel jini xcʌnta tiñʌmeʼob, yaʼañob ti jini acʼʌlel i cʌntañob i tiñʌmeʼ yaʼ ti jamil. ¡Jiñʌch juntiquil ángel! Jini xcʌnta tiñʌmeʼob tsaʼ wen bʌcʼñayob. Pero jini ángel tsiʼ subeyob: ‹¡Mach laʼ chaʼlen bʌqʼuen! Tsac chʼʌmbeyetla tilel wen tʼan. Sajmʌl yaʼ ti Belén, tsiʼ yila pañimil jini Cristo lac Yum. ¡Jiñʌch muʼ bʌ caj i coltan jini tejclum! Mi caj i bʌjqʼuel ti pisil yicʼot mi caj i ñolchocoñob yaʼ tiʼ pam i bucʼujib alʌcʼʌl tac›. Ti ora tsaʼ cʼotiyob yonlel ángelob chaʼan miʼ subeñob i ñuclel Dios. Yicʼot ti ora tsaʼ majliyob i sʌclañob Jesús jini xcʌnta tiñʌmeʼob, i tsaʼʌch cʼoti i tajob.
¿Awujil ba chucoch maʼanic yambʌ bajcheʼ Jesús? ¿Awujil ba majqui jini? Yom cʼajal a chaʼan, tsaʼix laj cʌñʌ chaʼan jini ñaxam bʌ i Yalobil Dios yaʼ ti ñaxam bʌ cʌntesʌntel ti ili libro. Tsiʼ tem chaʼle eʼtel yicʼot Jioba, cheʼ tiʼ mele jini panchan jini Pañimil yicʼot yan tac bʌ chuqui tac an. ¡Jesús tsiʼ chaʼle coltaya chaʼan tiʼ melol iliyi!
Jioba tsiʼ cʼaxtesʌbe i cuxtʌlel i Yalobil tiʼ matriz jini María. Cheʼ jini tsaʼ caji ti colel jini alʌl tiʼ malil i ñʌcʼ jini María, cheʼ bajcheʼ miʼ colel yambʌ alʌlob tiʼ ñʌcʼ i ñaʼ. Pero ili alʌl jiñʌch i Yalobil Dios. Tsiʼ yila pañimil ti Belén, ti jumpʼejl otot baʼ miʼ lojtel alʌcʼʌl tac. ¿Awujil ba chucoch wen tijicñayob jini ángelob, cheʼ bʌ tsiʼ subeyob jini winicob xʼixicob, chaʼan tsaʼix i yila pañimil Jesús?