I Cʌntesa Jesús yaʼ ti Bujtʌl

Cheʼ bʌ tsaʼix i yajca jiñi 12 apóstolob, Jesús tsaʼ jubi tilel yaʼ ti wits i tsaʼ majli yaʼ baqui an cabʌl wiñicob xʼixicob (quixtañujob). An tsaʼ bʌ tiliyob ti Galilea, ti Judea, ti Tiro, ti Sidón, ti Siria yicʼot tiʼ junwejlel jiñi Jordán jaʼ. Tsiʼ pʌyʌyob tilel cʼamoʼ bʌ yicʼot woli (yʌquel) bʌ i yilañob wocol tiʼ caj xibajob i Jesús tsiʼ laj tsʼʌcayob. Cheʼ jiñi tsaʼ buchle yaʼ ti wits i tsaʼ caji i pejcan jiñi yaʼ bʌ tempʌbilob. Tiʼ subeyob chuqui yom mi lac mel (chaʼlen) chaʼan mi lac sujtel tiʼ yamigo Dios. Yom mi lac ñaʼtan chaʼan i cʼʌjñibalʌch lac chaʼan Jehová yicʼot chaʼan yom mi la ñop laj cʼuxbin. Pero mach mejlic laj cʼuxbin Dios mi maʼañic mi laj cʼuxbin lac piʼʌlob. Yom uts lac pusicʼal, yom mi laj qʼuel ti wen tiʼ pejtelel quixtañujob yicʼot jaʼel jiñi laj contrajob.

Jesús tsiʼ yʌlʌ: «Mach cojach yom maʼ cʼuxbin a wamigojob, yom maʼ cʼuxbin jaʼel a contrajob yicʼot yom maʼ ñusʌbeñob i mul tiʼ pejtelel a pusicʼal. Mi an majqui tsaʼ michʼa a wicʼot, cucu suben ti ora chaʼan miʼ ñusʌbeñet. Qʼuele yambʌlob cheʼ bajcheʼ a wom maʼ qʼuejlel jaʼel».

Jesús tsiʼ yʌcʼʌ wen bʌ ticʼojel jaʼel chaʼan jiñi lac chubʌʼan. Tsiʼ yʌlʌ: «Ñumen ñuc i cʼʌjñibal cheʼ mi lac sujtel tiʼ yamigo Jehová i mach jiñic i sʌclʌntel cabʌl taqʼuin. Come juntiquil ajxujchʼ miʼ mejlel i xujchʼin a taqʼuin, pero maʼañic majqui miʼ mejlel i xujchʼin a wenlel ti Jehová. Jin chaʼan, cʌyʌ a cʼojoʼtan chuqui mi caj a cʼux, a jap o a lʌp. Qʼuelecu jiñi xmateʼmut. Dios miʼ cʌntan chaʼan maʼañic miʼ sʌjlel i bʌl i ñʌcʼ. Anquese maʼ wen chaʼlen pensal, maʼañic mi caj i ñumen jalʼan a cuxtʌlel. Cʼajtesan: Jehová yujil chuqui i cʼʌjñibal a chaʼan».

Jiñi quixtañujob maʼañic baʼ yubiyob ti tʼan yambʌ wiñic bajcheʼ Jesús. Jiñi ñaxam bʌ miʼ yʌcʼob i bʌ ti ñopbalʌl maʼañic baʼ i pʌsbeyob jiñi quixtañujob ili tsaʼ bʌ i yʌlʌ Jesús. ¿Chucoch wem bʌ xcʌntesa jiñi Jesús? Come luʼ tilem ti Jehová i cʌntesa.