Cʌntesʌntel 3

Yom mi lac wersa cʌn Dios

Chaʼan mi lac sujtel ti yamigo Dios, yom mi lac ñaxan cʌn. Jini la camigojob yujilob laj cʼabaʼ i miʼ cʼʌñob, ¿ñumach? Cheʼʌch jaʼel Dios, yom chaʼan mi laj cʌmben i cʼabaʼ yicʼot mi laj cʼʌn. I cʼabaʼ Dios jiñʌch Jehová (Salmo 83:18; Mateo 6:9). Yicʼot jaʼel, yom la cujil chuqui miʼ mulan yicʼot mach bʌ anic mi mulan, i majqui yamigojob yicʼot majqui contrajob. Come jal ti cʌñol ti wen juntiquil lac piʼʌl, jini Biblia mi yʌl wen cheʼ mi la cʌqʼuen i yorajlel chaʼan mi laj cʌn jini Jehová (Efesios 5:15, 16).

Jini yamigojob Dios miʼ melob chuqui muʼ bʌ i mulan. Ñaʼtancu jini a wamigojob. Mi jatet maʼ ticʼlañob yicʼot maʼ mel mach bʌ anic mi mulañob, ¿chʌn muʼto ba caj i mulañob ti yamigojet? Isujm maʼanix. Cheʼ jaʼel, mi la com cheʼ yamigojonla Dios, yom mi lac mel chuqui muʼ bʌ i mulan (Juan 4:24).

Mach tiʼ pejtelelic jini ñopbalʌl tac miʼ coltañonla chaʼan mi lac sujtel tiʼ yamigo Dios. Jesús, jini ñumen utsʼat bʌ i yamigo Dios, tsiʼ yʌlʌ an chapʼejl bij. Jini ñaxan bʌ wen colem, i butʼul ti winicob xʼixicob. Ili bij majlem yaʼ tiʼ jilibal. Jini yambʌ chʼoʼchʼoc jach, yaʼi wen tsʼitaʼ jach winicob xʼixicob miʼ majlelob. Jini bij miʼ pʌyonla majlel baʼan laj cuxtʌlel mach bʌ anic miʼ jilel. Ili yom yʌl chaʼan mi la com lac tajben i cʼuxbiya Dios, yom la cujil bajcheʼ utsʼat mi chʼujutesʌntel (Mateo 7:13, 14).