Cʌntesʌntel 1

Dios yom chaʼan mi lac sujtel ti yamigo

Dios miʼ mulan chaʼan mi lac sujtel ti yamigo. ¿A wujil ba jatet chaʼan maʼ mejlel ti sujtel ta wamigo jini lac Piʼʌl wen ñuc bʌ i cʼʌjñibal ti panchan yicʼot ti Pañimil? Jini Abrahán, tsaʼ bʌ ajñi ti wajali, tsaʼ subenti ti yamigo Dios (Santiago 2:23). Jini Biblia mi yʌl ti yañoʼ bʌ winicob xʼixicob tsiʼ yubiyob i tijicñʌyel chaʼan ti cʼuxbiya Dios, i tsiʼ tajayob cabʌl bendición tac. Ti ili qʼuin wʌle, cabʌl winicob xʼixicob tiʼ pejtelel pañimil tsaʼix i sutqʼuiyob i bʌ ti yamigo Dios. Jatet miʼ mejlel a mel jaʼel.

I cʼuxbiya Dios ñumen ñuc cheʼ bajcheʼ i chaʼan bʌ pañimil. Dios miʼ pʌs i xucʼtʌlel ti tojlel i yamigojob tojoʼ bʌ (Salmo 18:25). Cheʼ i yamigojonla Dios wen ñuc i cʼʌjñibal, ñumento bajcheʼ cabʌl lac taqʼuin. Cheʼ miʼ chʌmel jini wen cabʌloʼ bʌ i taqʼuin, yambʌyob miʼ cʌytʌl yicʼot i taqʼuin. Jini chaʼan, jini muʼ bʌ i yubiñob i tijicñʌyel chaʼan i yamigojob Dios, añob i chubʌʼan wen letsem bʌ i tojol mach bʌ anic majqui miʼ mejlel i chilben (Mateo 6:19).

Tajol an majqui mach yomobic chaʼan maʼ chʌn ñop majlel i cʌntesa Dios. Tajolʌch chaʼ jiñob jach a wamigojob yicʼot añoʼ bʌ ti a wotot (Mateo 10:36, 37). Mi an majch miʼ tseʼtañet o miʼ chʼʌquet, cʼajtiben a bʌ: «¿Majqui com c tijicñesʌben i pusicʼal, winicob ba o Dios?». Ñaʼtan ili yambʌ: cheʼ anic majqui mi subeñet a cʌy a cʼux a waj, ¿muʼ ba a cʌy? Isujm maʼanic. Chaʼan cuxul mi la cajñel yom mi laj cʼux lac waj. Jini chaʼan, Dios miʼ mejlel i mel chaʼan maʼ wajñel ti pejtelel ora. Jini chaʼan, chʌn cʌñʌ majlel bajcheʼ yom maʼ mel chaʼan i yamigojet Dios, i mach a jacʼben mi an majch woli i tiqʼuet (Juan 17:3).